Yesu ˗ya ˈgo ga ˈgü

ˈDhɛ Yesu ˗yö ga, ꞊bhɔɔmɛn do ˈwo˗ ˗dhɛ Zozɛfö, ˗ya ˗pö Pidhatö ˗dhɛ ˗yö Yesu ꞊gee ˈsü ˈˈdhü ˗bha kö ˗ya nu ö ˗dhɛ. Zozɛfö ˗yö pë ˈˈyi ꞊fii ˗së ˗sü ˗nu ˗ʒiö ˗a ꞊gee ˗bha ˈö sɔ ˈˈpuu ꞊plʋʋ ˗a ˈka, ˈö˗ ˗wɔ mɛn ˗wɛɛbhodhɛ ˗dɛɛ ˈgü. ˗Yö ˗gwö kpö ˈkpii˗ do ˗gblʋʋ ˈö˗ yö ˗a ˈˈdhiʋ̈. ˈDhɛ ˗kë ˈˈdhʋ̈, ˈyö ˈˈsaabhomɛn ˗gɔmɛn ˗nu ˗wa pö Pidhatö ˗dhɛ: ‹ˈWɔn ˈbha ˈö ˈyi ˈˈsuʋ̈ ˗ni ˈgü ˗a ˗gɔ, ˈyö ˗tɔ kö Yesu ˗bha gwëëˈˈ ˈbha ˗nu ˈwaa ˈdho nu ˗a ꞊gee ꞊kwaan kö ˗wa pö ꞊dhɛ ˗ya ˈgo ga ˈgü.› ˈDhɛ ˈwo˗ pö ˈˈdhʋ̈ ˈyö Pidhatö ˗ya pö: ‹˗Ka pë ꞊nënŋ ꞊gwö ˈö bhë ˗a ˗bha, kö ˈˈsɔdha ˗nu ˗wa ˗maankë.›

ˈDhɛ ˗dhɛkpaɔyi ˗yaaga ˗yö ˗ʒiö, dhebɔ ˗nu ˗yaaga ˗wo ˗dho Yesu ˗wɛɛbhodhɛ ˈgü dhiapiʋ̈ kpo tii ˈgü. ˈDhɛ ˈwo ꞊lo mü ˈyö ˈwo˗ yö ꞊dhɛ mɛn ˈbha ˗ya ꞊gwö ˈö bhë ˗a glünŋˈˈ ꞊yaa˗ bho mü. ˈYö ˗Zlan ˗bha ˈˈkiö do ˈö kun Yesu ˗wɛɛbhodhɛ bhë ˗a ˈgü, ˈö˗ pö ˗an ˗dhɛ: ‹ˈKaa ˈdho ˈˈsuʋ̈! Yesu ˗ya ˈgo ga ˈgü. ˗Ka ˈdho kö ˈka˗ pö ˗a ˗bha gwëëˈˈ ˗nu ˗dhɛ ˗wo ˈdho ˗a ꞊kee˗ Galile.›

Madhi ˈö go Madala ˗yö ˗biasü ˈˈvaandhö ˈö dho ˗kpan Piɛɛ waa Zan ˗an ˗bha, ˈö˗ pö ˗an ˗dhɛ: ‹Mɛn ˈbha ˗ya Yesu ꞊gee ˈsü.› ˈDhɛ pö ˈˈdhʋ̈, ˈyö Piɛɛ waa Zan ˗wo dho ˈzü Yesu blɔɔndhö. ˈDhɛ ˈwo˗ yö ꞊dhɛ ˗a ˈgüdhɛ ˗yö ˈˈfuö, ˈyö ˈwo wo yee ˗kë ˈˈkwɛɛnŋdhö.

ˈDhɛ Madhi ˗yö ö yee ˗kë Yesu blɔɔndhö, ˗yö ˗kpan ˈˈkiö ꞊plɛ ˗bha ˗a ˈgü ˈö˗ pö ˗an ˗dhɛ: ‹ˈDhɛ ˈwo dho ˗sü ˈka n Dëmɛn ˈka˗ ˗bha, ˈmaan˗ dɔ.› ˈDhɛ ˈö˗ pö ˈˈdhʋ̈ ˈyö ˗kpan gɔndënën do ˗bha, ˈö ˗kë ˗a ˈgü ꞊dhɛ ˈˈdhüdhɛɛdhɛ ˈö bhë ˗a ˗yökëmɛn ˗mü. ˈYö˗ pö ˗a ˗dhɛ: ‹N dë, dɔ ˈˈgbɩɩ˗ kö ˗dhɛ ˈü˗ ˗wɔ ˗a ˗bha, ˈü˗ ˗dhɛ pö n ˗dhɛ.› ˈˈKɛɛ ˈdhɛ ˈö gɔndënën bhë ˈö˗ pö ˗a ˗dhɛ: ‹Madhi›, ˗yö ˗to mü ˈö˗ ˈwɔn dɔ ꞊dhɛ Yesu ˗mü. ˈYö ˗gbla ˈö˗ pö: ‹˗Gɔmɛn!›, ˈyö ꞊loo ˗a ˗bha. ˈYö Yesu ˗ya pö ˗a ˗dhɛ: ‹ˈDho ˈü˗ pö n ꞊dhegblü ˗nu ˗dhɛ ꞊dhɛ ˈbha ˗kpan n ˗bha.› Madhi ˗to ˈˈshia˗ mü ˈö ˗biasü ˈö dho gwëëˈˈ ˗nu ˈˈpiʋ̈, ˈö˗ pö ˗an ˗dhɛ ꞊dhɛ ˗ya ˗kpan Yesu ˗bha.

˗Dhɛkpaɔyi do ˈö bhë ˗a ˈgü, Yesu ˗bha gwëëˈˈ ˗nu ꞊plɛ ˗wo ˗kun go ˗ni ˈgü Zedhizadhɛmö kö ˗wo ˈdho ˗ni ˈgü Emausö. ˈDhɛ ˈwo kun ʒian ˗ta ˈö gɔndënën do ˗yö ꞊ɲɔɔn ˗an ˗bha, ˈö ˗an dhɛɛˈˈ ˗kë ˈpë ˈwo˗ ˈwɔn blɛɛˈˈ ˗ni ˈgü ˗a ˈka. ˈYö ˈwo˗ pö ˗a ˗dhɛ: ‹ˈWɔn ˈö ˈˈshia˗ ˈˈtʋ̈ŋ yö˗ ˈgü, ˈbhaa˗ dɔ ˗ee? ˈˈSaabhomɛn ˗gɔmɛn ˗nu ˗wa Yesu zë, ˗a ˗dhɛkpaɔyi ˗ya kë ˗yaaga. ˈˈKɛɛ dhebɔ ˈbha ˗nu ˗wa ˗pö ꞊dhɛ ˗yö ˈˈbhɩɩ˗.› ˈYö gɔndënën bhë ˈö ˗an dhɛɛˈˈ kpɔ ˈö˗ pö: ‹Pë ˈö ˗Zlan ˗wodhiʋ̈lomɛn ˗nu ˈwo˗ pö bhë, ka ka ˗zoyö ˗a ˗dhɛ ˗ee? ˈWii˗ pö ꞊dhɛ ˗wo ˗dho Klito zë ˈö go ga ˈgü ˗ee?› ˈYö dho ˗Zlan ˗Wo ˈgü ˈˈpʋ ˗sü ˈka ˗an ˗dhɛ. ˈDhɛ ˈwo ꞊lo Emausö, ˈyö Yesu ˗bha gwëëˈˈ ˗nu ˗wa ˗pö ˗a ˗dhɛ ˗yö nu ˗an ꞊kee˗. ˈDhɛ ˈö ö bo bhɛɛˈˈ ˗sü ˈka ˈbluu˗ ˗ta ˈˈdooka ˗bhöpë ˈˈtʋ̈ŋ ˈka, ˈyö ˈwo˗ ˈwɔn dɔ ˈzlöö ꞊dhɛ Yesu ˗mü. ˈˈKɛɛ ˗yö ˗to mü ˈö ꞊dhiɔŋ.

Yesu ˗bha gwëëˈˈ ˗nu ꞊plɛ ˈwo bhë, ˗wo ˗luu ˈwo dho ˈˈvaandhö ˈkɔ ˈö bɔmɛn ˗nu ˈwo kun ˗a ˈgü Zedhizadhɛmö bhë ˗a ˈgü, ˈyö ˈwo ˈwɔn ˈö ˗kë ˗a ꞊blɛɛ ˗an ˗dhɛ. ˗Dhɛ ˈö ˗an ꞊gban kun ˈkɔɔ mü, ˈyö Yesu ˗yö ö ˗de ˗zɔn ˗an ˗dhɛ. ˗A züdɔdhɛ ˈgü, ˈwaa kun ˈdhaŋ bho ˗ni ˈgü ˗a ˈˈdhiʋ̈ ꞊dhɛ Yesu ˗mü. ˈDhɛ ˗kë ˈˈdhʋ̈ ˈyö Yesu ˗ya pö ˗an ˗dhɛ: ‹˗Ka n ˗kɔdhɛ ˗nu ˗ga, ˗ka pa n ˈka. ˗Yö ˗kun ˗bɛnzë ˗sü ˈka ꞊dhɛ Klito ˗dho ˈgo ga ˈgü.›