Yesu ˗yö ö ˗de ˗zɔn ˈˈyiblükëmɛn ˗nu ˗dhɛ

ˈDhɛ Yesu ˗yö ö ˗de ˗zɔn ö ˗bha bɔmɛn ˗nu ˗dhɛ ˈö ˈˈtʋ̈ŋ ˈnënbha ˗yö ˗ʒiö, Piɛɛ ˗yö ˗dho ˈˈyiblükë Galile ꞊weeyi ꞊bhaa. Toma, Zakö, Zan waa Yesu ˗bha gwëëˈˈ ˈbha ˗nu ˗wo ˗ʒiö ˗a ꞊kee˗. ˗Wo ˗wɔ ˈˈɲaan ˈˈyiblükësü ˗bha, ˈˈkɛɛ ˈwii pë ˈbha ˈkun.

˗Dhɛ ˈö˗ ˗ta ˗dhɛ ˗yö ꞊kpɔɔ, dhiapiʋ̈ kpo tii ˈgü, ˗wo ˗kpan gɔndë do ˗bha ˈˈyi ˈˈkpɔnŋ ˈˈdhiʋ̈, ˈö ˗gbla ˈö˗ pö: ‹Ka ˈyuö˗ ˈbha ˗kun ˗ee?› ˈYö ˈwo˗ pö: ‹˗Abin!› ˈYö˗ gɔndë ˗ya pö: ‹˗Ka ka ˗bha ˈˈkplʋ̈ ˗zuö ˈˈyitagɔ ˗kɔ ˗së ˈgü ˗ʒian ˈka.› ˈDhɛ ˈwo˗ ˗zuö mü, ˗an ˗bha ˈˈkplʋ̈ ˗yö ˗pa ˈyuö˗ ˈka, ˈö ˈwaa kun ꞊mɔɔn ˗ni ˈgü ˗a ˗bha kö ˗wa ˈˈgan ˗wo nu ˗a ˈka ˈˈyitagɔ ˈgü. ˈDhɛ ˗kë ˈˈdhʋ̈ ˈyö Zan ˗ya ˈwɔn dɔ ꞊dhɛ Yesu ˗mü, ˈyö˗ pö: ‹Dëmɛn ˗mü!› ˈDhɛ pö ˈˈdhʋ̈, ˈyö Piɛɛ ˗yö ˗pö ˈˈyi ꞊bhaa, ˈö ˈˈyi ˗kë ˈö ˈwo ˗a ˈˈkpɔnŋ ˈˈdhiʋ̈. Yesu ˗bha gwëëˈˈ ˈˈwɛɛ ˗nu ˈwo to, ˗wo ˗ʒiö ˗a ꞊kee˗ ˈˈyitagɔ ˈgü.

ˈDhɛ ˈwo ˗wo ˈˈɲɛɛn ˗ta, ˗wo ˗kpan ˈbluu˗ waa ˈyuö˗ ˗an ˗bha ˈˈshiʋ̈ ˗ta. Yesu ˗ya ˗pö ˗an ˗dhɛ ˗wo nu ˗a ˈbha ˈka kö ˗wa ˗da ˗a ˈdhɛ ˈö ˈˈshiʋ̈ ˗ta, ˗a ˗ta. ˈYö˗ pö ˗an ˗dhɛ: ‹˗Ka nu kö ˈka pë ˗bhö.›

ˈDhɛ ˈwo wo bo pë ˗bhö ˗sü ˈka, ˈyö Yesu ˗ya pö Piɛɛ ˗dhɛ: ‹N ˗dhɔ ˗yö ü ˗kë ˈö ˗ʒiö ˗a ˈka ˈˈyiblükësü ˗ta ˗ee?› ˈYö Piɛɛ ˗ya pö: ‹꞊Ii, n Dëmɛn! Bhi ꞊dede ü˗ ˈwɔn ˗dɔ ˈˈdhʋ̈.› ˈYö Yesu ˗ya pö: ‹˗Bhö ˗bhöpë nu n ˗man ˈˈbhlanën ˗nu ˗dhɛ.› Yesu ˗ya ˗pö ˗a ˈzü: ‹Piɛɛ, n ˗dhɔ ˗yö ü ˗kë ˗ee?› ˈYö Piɛɛ ˗ya pö: ‹꞊Ii n Dëmɛn, bhi ꞊dede ü˗ ˈwɔn ˗dɔ ˈˈdhʋ̈.› ˈYö Yesu ˗ya pö: ‹˗Bhö n ˗man ˈˈbhlanën ˗nu ˗maankë.› Dhɛɛˈˈ do ˈö bhë Yesu ˗ya ˗kpɔ Piɛɛ ˗gɔ ˗yaaga ˗bha ˗naanwo. ˈDhɛ ˗kë ˈˈdhʋ̈, ˈyö Piɛɛ ˗ta ˗yö ˗kë ˗saa ꞊dedewo, ˈö˗ pö: ‹N Dëmɛn, ü ˈwɔn ꞊gban ˈˈpɛpɛ ˗dɔ. Ü˗ ˈwɔn ˗dɔ ꞊dhɛ ü ˗dhɔ ˗yö n ˗kë.› ˈYö Yesu ˗ya pö ˗a ˗dhɛ: ‹ˈDhɛ ˈö ˈˈdhʋ̈, ˗bhö ˗bhöpë nu n ˗man ˈˈbhlaanën ˈsɛɛn˗ ˗nu ˗dhɛ.› ˈYö˗ pö ˈzü Piɛɛ ˗dhɛ: ‹˗Bhö ˈto n ꞊kee˗ ˗kplawo.›