Yesu ˗yö ö ꞊yɛɛkë ˈö dho dhaŋ˗ ˈgü

Yesu waa ö ˗bha gwëëˈˈ ˗nu ˗wo ˗kpan wo ˈkwëë˗ Galile, ˈyö ˈtɔŋ˗ ˈwɔngbɩɩsü ˗dɔ ˗an ˗ta, ˈö˗ pö: ‹˗Ka ˈdho ˈˈsɛ ꞊gban ˈˈpɛpɛ ˈgü, ˈka mɛn ˗nu kë n ˗man gwëëˈˈ ˗nu ˈka. ˗Ka ˗an ꞊klaŋ kë ˈwɔn ˈˈpɛpɛ ˈa˗ pö ka ˗dhɛ bhë ˗an ˈka, kö ˈka ˗an ˗bɔ ˈˈyi ꞊bhaa.› ˗Ya ˗pö ˗an ˗dhɛ ˈzü: ‹˗Yö kë ka ˈˈɲaan ꞊dhɛ a ˗dho kë ka ˈˈpiʋ̈ yi ꞊gban ˈka.›

ˈDhɛ Yesu ˗yö go ga ˈgü, ˗a ˗dhɛkpaɔyi 40 ˗wo dɔ ˗a ˈˈpiʋ̈ ˗a ˈka, ˗yö ö ˗de ˗zɔn ö ˗bha gwëëˈˈ ˗nu këŋ ꞊va ˗dhɛ Galile waa Zedhizadhɛmö ˗dhɛ ˗nu ˈgü. ˗Yö ˗an ꞊klaŋ ˗kë ˈwɔn ꞊bhlëësü ˗nu ˈka ˈö ˗dhidha ꞊va ˗kë. Yesu waa ö ˗bha gwëëˈˈ ˗nu ˗bha ˗kpan wo ˈko ˗bha ˗sü ˗kaanta ˗yö ˗kë Olivie ˗tɔn ˗ta. ˈDhɛ ˈwo ˗kpan wo ˈkwëë˗, ˗ya ˗pö ˗an ˗dhɛ: ‹ˈKaa ˗dho ˈgo Zedhizadhɛmö yö. ˗Ka ka ˈˈɲan ˈto pë ˈö n Dë ˗ya ˈˈplünŋ bho ka ˗dhɛ bhë, ˗a ˗gɔ.›

˗A ˗bha gwëëˈˈ ˗nu ˈwii pë ˈö˗ pö bhë, ˗a ˗gɛn man. ˗A ˗wɔn ˈgü ˗wa dhɛɛˈˈ ˗kpɔ ˈö ˈwo˗ pö: ‹Ü ˗bha ˗kë Izraɛdhö ˗Gblüdë ˈka ˗sü ˈˈtʋ̈ŋ ˗ya ꞊lo ˗ee?› ˈYö Yesu ˗ya pö ˗an ˗dhɛ: ‹ˈˈTʋ̈ŋ ˈö Zoova ˗ya ˗ya kö ˈa kë ˗Gblüdë ˈka, ˈyii ꞊lo ꞊köŋ. ˈˈKɛɛ ˗A ˈˈtʋ̈ŋ ˈyaa ꞊gblɛɛn ˈzü kö ˗zuu ˈˈslʋ̈ʋ̈slʋ̈ ˗yö ka ˗gba ꞊faan ˈka, kö ˈka kë n ˗man ꞊gbɛkiö ˗nu ˈka. ˗Dhɛ ˈö ˈˈdhʋ̈, ˗ka ˈdho ˗zlanwopö Zedhizadhɛmö, Zude, Samadhi waa ˈˈsɛ ˗nu ˈwo mü ꞊gblɛɛn ꞊gblɛɛn ˗an ˈgü.›

ˈDhɛ ˈö ö bo ˗a pö ˈˈdhʋ̈ ˗sü ˈka, ˈö ˗ya ˈdho ˗sü ˗bha dhaŋ˗ ˈgü, ˈyö ˈˈdhuu kpö ˗yö nu ˈö sɔ ˗a ˗ta. ˗A ˗bha gwëëˈˈ ˗nu ˗wo ˗to ˗dhɛga dhaŋ˗ ˈgü ˗sü ˗bha, ˈˈkɛɛ ˈkö ˗ya ˈdho.

˗A ˗bha gwëëˈˈ ˗nu ˗wo ˗go Olivie ˗tɔn ˗ta, ˈö ˈwo dho Zedhizadhɛmö. ˗Wo ˗kun ˗ya ˗ni ˈgü ˗dhɛ do ˈgü zoodhö zoodhö ˈkɔ do ˈbha ˈgü ˈˈdhʋŋ, kö ˈwo bhɛɛˈˈ. ˗An ˈˈɲan ˗kun Yesu ˗gɔ ˗kplawo kö ˗yö ˗dhioo ˈbha ˗nu dɔ ˗an ˗ta.