Yesu ˗yö ˗Zlan ˗bha ˗Gblüdëdhɛ ˗nɔɔn ˗pö

˗Dhɛ ˈö Yesu ˗yö bɔ ˈˈyi ꞊bhaa, ˗a ˗dhɛ ˈyii ꞊gwëë ˈö ˗ya ˗zlanwopösü ˗bha.ˈYö˗ pö: ‹˗Zlan ˗bha ˗Gblüdëdhɛ ˈö dhaŋ˗ ˈgü ˗ya yö ꞊klöö˗.› ˗Dhɛ ˈö kun ˈˈta ˈkpɔ ˗ni ˈgü Galile waa Zude ˗dhɛ ˗nu ˈgü, ˗a ˗bha gwëëˈˈ ˗nu ˗wo ˗ʒiö ˗a ꞊kee˗. ˈDhɛ Yesu ˗yö ö ꞊yɛɛkë Nazadhɛtö, ˈyö dho ˗yakwëëkëgükɔ ˈgü. ˗Yö Izai ˗bha ˈsëëdhɛ ˈˈdhiʋ̈ ˗pʋ ˈö˗ ˗wo pö ö ˗wo ˗ta ꞊dhɛ: ‹Zoova ˗bha ˗zuu ˗yö n ˗ta, ˗a ˗gɛn ˗mü ꞊dhɛ ˗yö n ˗ya kö ˈa nɔɔn˗ ˗së pö.› ˗Wo ˈö bhë ˗a ˗gɛn ˈnën ˗tɔ ˗mën? ˗A ˗gɛn ˈnën ˗tɔ ꞊dhɛ ˈkö ˗kë ꞊dhɛ mɛn ˗nu ˗kun ˗a ˈˈpiʋ̈ kö ˗yö ˗dhidha kë, ˈpë ˗kë ˈö ˗zuu ˗yö nu ˗a ˗ta ˈyö ˗tɔ kö ˗yö nɔɔn˗ ˗së pö. ˗Ya ˗pö ö ˈˈtʋtobhamɛn ˗nu ˗dhɛ: ‹꞊Dɛɛ, ˗wo ˈö bhë, ˗ya yökodhiʋ̈.›

ˈDhɛ go mü, Yesu ˗yö ˗dho ꞊weeyi ˈö Galile ˗a ˈˈsuee. ˗Dhɛ bhë ꞊nën˗ ˈgü ˈö ˗kpan ö ˗bha gwëëˈˈ ˗nu ˗yiishiö ˈwo kun ˈˈyiblükëmɛn ˗nu ˈka, ˗an ˗bha. ˈYö ˗an ˗dhɛ ˈö˗ pö: ‹˗Ka ʒiö n ꞊kee˗. A ˗dho ka kë ˈˈkplʋ̈ ˗zuö mɛnbhɩɩdhe ˗nu ˗gɔ ˗mɛn ˗nu ˈka.› Mɛn ˈwo ˈˈdhʋ̈ ˈwo ˗tɔ Piɛɛ, Andre, Zakö waa Zan. ˈDhɛ ˗kë ˈˈdhʋ̈, ˈyö ˈwo wo ˗bha ˈˈkplʋ̈ ˗nu to ˈˈshia˗ ˈwo ˗ʒiö ˗a ꞊kee˗. ˗Wo ˗bɔ Galile ˗dhɛ ˗nu ˈgü nɔɔn˗ ˗së ˈö ˗gban Zoova ˗bha ˗Gblüdëdhɛ ˗bha ˗a ˗pö mɛn ˗nu ˗dhɛ ˗sü ˈka. ˗Wo ˗zlanwopö ˗yakwëëkëgükɔ, ˈˈdhookwëëdhɛ waa ˗kpinŋpiʋ̈dhɛ ˗nu ˈgü. ˗Wo Yesu ˗tɔɔ ˗man ˗dhɛ ꞊gban ˈgü ˈö yö ˈka Sidhi.

Yesu ˗yö ˗kɔmɔnwɔnbhasü ˗nu ˈö ˗bha gwëëˈˈ ˈbha ˗nu ˗dhɛ, ˈwo ˗ya mɛn ˗nu ˗dhɛ bo ˗sü waa ˗zuu yaa ˗bho ˗an ˈgü ˗sü ˗bha. ˗Yö ˗zlanwopö ˈpödhɛ waa ˈˈkwipö ˗nu ˈgü. ˗Klu ˗Zlan ˗bha ˗mɛn ˗nu ˈwo ˗kë ꞊dhɛ Madhi ˈö go Madala, Ʒanö, Sizanö waa mɛn ˈˈwɛɛ ˈbha ˗nu ˈdhö bhë, ˗wo wo ˗zokë Yesu waa ö ˗bha gwëëˈˈ ˗nu ˈˈpiʋ̈.

˗Dhɛ ˈö Yesu ˗yö bo ö ˗bha gwëëˈˈ ˗nu ˗kian ˗sü ˈka, ˗yö ˗an ˗bɔ kö ˗wo ˗zlanwopö. ˈDhɛ ˈwo kun ˈˈta ˈkpɔ ˗ni ˈgü Galile, mɛn ꞊vadhɛ ˗wo ˗bɔ ˈˈyi ꞊bhaa ˈwo kë ˗a ˗bha gwëëˈˈ ˗nu ˈka. Mɛn ꞊va ꞊dede ˗kun ˗a ˈˈpiʋ̈ kö ˈwo kë ˗a ˗bha gwëëˈˈ ˗nu ˈka, ˗a ˗wɔn ˈgü ˗ya ˗pö ꞊dhɛ pë ˈˈkan ˈˈtʋ̈ŋ ˗së ꞊nɛn. ˈYö˗ pö ˈzü: ‹˗Ka bhɛɛˈˈ ˈbhladhɛ Dëmɛn ˗dhɛ kö ˗yö yökëmɛn ˈbhaa ˗nu bɔ ˈbhlaa.› ꞊Taabha, ˗yö ö ˗kɔ ˗yɛ gwëëˈˈ ˗nu 70 ˗bha ˈö ˗an bɔ ꞊plɛ ꞊plɛ Zude. ˗Wo ˗Zlan ˗bha ˗Gblüdëdhɛ ˗nɔɔn ˗pö mɛn ˗nu ˗dhɛ. ˗Dhɛ ˈö˗ ˗bha gwëëˈˈ ˗nu ˈwo wo ꞊yɛɛkë, ˈwɔn ˗së ˈö ˗kë ˗an ˈka mü, ˗a ˗blɛɛ Yesu ˗dhɛ ˗sü ˗lele ˗kun ˗an ˗ta. Dügɔmɛn ˗kɔ ˈti ꞊mɔɔn˗ ˗bha kö ˗yö ˗zlanwopösü ˈduannu.

Yesu ˗yö pë ˈˈpɛpɛ ˗kë kö ꞊ya kë ꞊dhɛ ˗ya ˈdho dhaŋ˗ ˈgü, ˗a ˗bha gwëëˈˈ ˗nu ˗dho ˈdho yö ˈö bhë ˗a ˈka ˈˈdhiʋ̈ ˗kplawo, kö ˈö˗ ˈwɔn dɔ. ˈYö˗ pö ˗an ˗dhɛ: ‹˗Ka ˗Zlan ˗bha nɔɔn˗ ˗së pö ˈˈsɛ ˗todhösü ˗ta. ˗Ka mɛn ˗nu ꞊klaŋkë ˗Zlan ˈˈDhiwo ˈka, ˈka ˗an bɔ ˈˈyi ꞊bhaa.›