˗Zuu ˈˈslʋ̈ʋ̈slʋ̈ ˗yɔɔ Yesu ˗bha gwëëˈˈ ˗nu ˗ta

ˈDhɛ Yesu ˗yö dho dhaŋ˗ ˈgü ˈö ˗dhɛkpaɔyi ˗kɔŋ do ˗yö ˗ʒiö, ˗zuu ˈˈslʋ̈ʋ̈slʋ̈ ˗yö ˗yɔɔ ˗a ˗bha gwëëˈˈ ˗nu ˗ta. ˗Yö ˗kun ˗kwɛ 33 Pantekɔtö yi ˈka, ˈyö mɛn ꞊va ꞊dede ˗wo ˗go ˗dhɛ ˗nu ˈgü do do, ˈwo nu Zedhizadhɛmö ˈwlaan˗ bhë ˗a ˗ta. Yesu ˗bha gwëëˈˈ 120 ˗wo ˗kun wo ˈˈkwëë ˈkɔ do ˈbha ˈgü ˈˈdhʋŋ. ˗Wo ˗to mü ˈö ˈwɔnmɛnkunwɔn do ˈbha ˗yö ˗kë. Pë ˈbha ˈö ˗kë ꞊dhɛ ˈˈshiʋ̈ ˈnɛɛn˗ ˈdhö ˗yö ˗ya Yesu ˗bha gwëëˈˈ ˗dhɛ ˈö ˈdhö ˗a ꞊troo, ˈyö ˈwo ˗ya ˈwɔn blɛɛˈˈ ˗sü ˗bha ˗wo ˈˈwɛɛ ˗nu ˈgü. ˈYö ˗wo ˈbhaa ˈö bhɔ ˈˈtɛɛ ˈˈgbɩɩ˗ ˗wo ˗bha, ˗yö ˈkɔɔdhɛ ꞊gban sü.

Mɛn ˗nu ˈwo go ˈˈsɛ ˈˈwɛɛ ˈgü ˈwo nu Zedhizadhɛmö bhë, ˈdhɛ ˈwo ˗wo ˈö bhë ˗a man, ˗wo ˗bialö ˈwo ˗da ˈkɔɔ kö ˈwɔn ˈö ˗kë ˗wa yö. ˈDhɛ ˈwo ˗kpan Yesu ˗bha gwëëˈˈ ˗nu ˗bha kö ˗wo ˈwɔn blɛɛˈˈ ˗ni ˈgü ˗an ˗de ˗wo ˈgü bhë, ˗a ˗wɔn ˗yö ˗an ˗kun ꞊dedewo. ˗A ˗wɔn ˈgü, ˗wa ˗pö: ‹Mɛn ˗nu ˈwo yö Galile ˗mɛn ˗nu ˗mü ˗an ˈka, ˈˈkɛɛ ˗yö ˗kë ꞊dhɛ ˈsa ˈö ˈwo ꞊mɔɔn ˈwɔn blɛɛˈˈ ˗sü ˗bha kwa ˗de ˗wo ˈgü?›

ˈDhɛ ˗kë ˈˈdhʋ̈, ˈyö Piɛɛ waa bɔmɛn ˈdhɛ ˗nu ˈwo to ˈwo dɔ ˗gɛan mɛn kpö ˈö bhë ˗a wëëdhö. ˗Kɔ ˈö ˈwo Yesu zë ˗a ˈka waa ˗kɔ ˈö Zoova ˗ya bho ˗a ˈka ga ˈgü, Piɛɛ ˗ya ˗pö ˗an ˗dhɛ, ˈö˗ pö: ‹Dɔ ˈö ˈkwa˗ ˗wo yö, Yesu ˗yö dhaŋ˗ ˈgü ˗Zlan ˗kɔ ˗së ˈgü. ˗Ya ˗zuu ˈˈslʋ̈ʋ̈slʋ̈ ˈö˗ ˈˈplüün bho bhë, ˗a nu kwa ˗dhɛ. Yö ꞊nën˗ ˗wɔn ˈgü ˈö ˈka ˗kpan ˗ni ˈgü ˗dhidhawɔn ˈö yö ˗a ˗bha bhë!›

ˈWɔn ˈö Piɛɛ ˗ya ꞊blɛɛ bhë, ˗yö ˗pa ꞊dedewo mɛn kpö ˈö bhë ˗a ˈka, ˈyö ˈwo˗ pö: ‹ˈMën ˈyi dua ˈdhö ˗mü kö ˈyi˗ kë?› ˈYö˗ pö ˗an ˗dhɛ: ‹˗Ka ˈgo ka ˗bha ꞊sɔŋ yaa ˗nu ˈgü kö ˈka bɔ ˈˈyi ꞊bhaa Yesu ˈtɔ ˈgü. Ka ˗de ˈpö ka ˗dho ˗zuu ˈˈslʋ̈ʋ̈slʋ̈ ꞊slɔɔ.› ˗Dhɛkpaɔyi ꞊dede ˈö bhë ˗a ˈka, mɛn ˗nu ˈwo ꞊mɔɔn 3.000 ˗bha ˗wo ˗bɔ ˈˈyi ꞊bhaa. ˈÖ go yi ˈö bhë˗ ˗bha, Yesu ˗bha gwëëˈˈ ˗nu ˗wo ˗dadhiʋ̈ ˗biata Zedhizadhɛmö. ˗Zuu ˈˈslʋ̈ʋ̈slʋ̈ ˈsaa˗ ˈgü, ˗wo ˗zlanwokɔdhi ꞊va ˗dɛɛ ˗nu ˗ya, ˈö ˈwo mɛn ˗nu ꞊klaŋ ˗kë pë ˈˈpɛpɛ ˈö pö ˗an ˗dhɛ bhë, ˗a ˈka.