Desanblö

Etiopi mi zuʋ̈ˈˈ ˗kun ˈˈwɩ ˗sü ˈka ˗a ˗bha ꞊dedewo kö ˈö bɔ ˈˈyi ꞊bha ˗ee? ˗Kwaa ˈwɔn dɔ ꞊dhɛ Etiopi mi « [˗yö ˗nu] Zedhizadhɛmö kö ˈö [˗Zlan] ˗dhɔ kë.» (Këw. 8:27) Kwa ꞊mɔɔn˗ ˗bha ˈkwa˗ pö ꞊dhɛ ˗ya ˈˈwɩ Zuifö ˗nu ˗bha ˗Zlan ˗dhɔkë ˗kɔ ˗bha ˈsaadhö. ˈYaa za ˈgü ꞊dhɛ ˈwɔn ˈö ˗gban Zoova ˗bha, ꞊yaa˗ man Biblö ˈˈpian ˈö Eblö ˗wo ˈgü bhë ˗a ˈgü. ˈˈKɛɛ ˗yö ˗kun ˗a ˈˈpiʋ̈ kö ˈö˗ ˈbha ˈgüman. ˈDhɛ Fidhipö ˗yö ˗kpan ˗a ˗bha ʒian ˗ta kö ˗yö ˗Zlan ˗wodhiʋ̈lomɛn Izai ˗bha ˈsëëdhɛ ˗wo pö ˗ni ˈgü. (Këw. 8:28) ˗Yö ˗kun ˗a ˈˈpiʋ̈ kö ˈö˗ draanˈˈ ˈö ˈdho ˗a ˈka ˈˈdhiʋ̈. ˗A ˗wɔn ˈgü, ˗yö ˈˈta ꞊gblɛɛn ˗sü ˈö go Etiopi ˗sɛ ˈgü ˈö dho Zedhizadhɛmö kö ˈö Zoova ˗dhɔkë. Fidhipö ˗yö gagade ˗wɔngbɩɩsü ˗nu ˈö˗ ˈbha ˗nu ˗gban ˗Zlan ˗bha ˗Yamɛn ˗bha, ˗an ˗zɔn Etiopi mi ˗dhɛ. (Këw. 8:​34, 35) Zoova waa ˈö Gbö ˗an ˗dhɔ ˈö˗ ˈgü ˗yö ˗dadhiʋ̈. ˗A ˗wɔn ˈgü, pë ˈbha ˈö ˗dho ˗a ˗bha ˗tosɛta bho ˈˈgblʋʋ ˗yö ˗da ˗a ˗ʒian ˗ta. ˗Yö ˗kun ˗a ˈˈpiʋ̈ kö ˈö bɔ ˈˈyi ꞊bhaa ˈö ˗kë Yesu ˗bha gwëëˈˈ ˈka. ˈDhɛ Fidhipö ˗ya ˈwɔn dɔ ˈˈdhʋ̈, ˗ya ˗bɔ ˈˈyi ꞊bhaa. w23.03 8-9 § 3-6.

ˈKwa kë ꞊suakëmɛn ˈka, ˈkwaa ꞊mɔɔn˗ ˗bha ˈkwa kë Zoova ˗dhɛ ˗së. (Prov. 6:​16, 17) ˈKö ˗kë ꞊dhɛ mɛn ꞊vadhɛ ˗wa ˗pö ꞊dɛɛ ꞊dhɛ ꞊suakësü ˗yö ˗së, kwa ˗zë kwa ˗kan ˗a ˗bha, ˈyö ˗tɔ ꞊dhɛ ˗yö Zoova ˗dhɛ ˈya˗. (Ps. 15:​1, 2) ˈKö ˗ke ꞊dhɛ ˈkwa ˈti ꞊sua kë vɛɛdhö, kwa dua ˈyaa ˗mü kö ˈkwa ˈwɔn ˗nu ˗gɔ plʋʋˈˈ ö ˗ta. Kwa dua ˗mü ˈpö ˈkwa ˈˈkan mɛn ˗nu ꞊tɔɔkësü ˗bha. (Prov. 25:23; 2 Tes. 3:11) ˈKwa˗ yö ꞊dhɛ kwa ˗bha ˈˈdoo ˗yö kë ˗ni ˈgü mɛn ˗nu ꞊tɔɔkësü ˈka, ˗kwa kwa ꞊kwaa˗ ˗zü ˈkwa pë ˈˈwɛɛ ˗wɔn blɛɛˈˈ. ˈDhɛ ˗kë ꞊dhɛ ˈˈkpɔnŋtaadhɛ ˈkwa˗ ˗bha yö ˈwɔn yaa blɛɛˈˈ ˗sü ˗ya sa ˗dhɛ ꞊gban ˈgü bhë, kwa dua mü ˈkwa pë ˈˈpɛpɛ kë kö kwa ˈˈdhiwo kë Zoova ˗dhɛ ˗së. ˈKwa kwa ˈgü dɔ ˈˈgbɩɩ˗ kö kwa ˈˈdhiwo kë ˗së ˗zlanwopödhɛ ˈgü, ˗bhɔkwëë ˗nu ˗ta, ɛɛnˈˈ kwa ˗bha ˈˈdoo ˗nu ˈgü, ˗yö ˗dho ˈdhuëë˗ ˈkpɔ kwa ˗bha. ˈˈKpɔnŋtaadhɛ yaa ˈö yö, Zoova ˗ya ˈö bo ˗a ˈgüshiʋ̈ ˗sü ˈka, ˗a ˈtɔ bhɔ ˗sü ˈö kwa ˈˈdhiwo ˈgü ˗yö ˗dho kë ˈˈplëëplë.—Zud. 15. w22.04 9 § 18-20.

ˈKwa kwa ˗zota ˗dhɔ ˈö Zoova waa Yesu ˈwo˗ ˗kë kwa ˈka bhë ˗a ˈgü, ˗an ˗dhɔ ˗yö ˗da kwa zuʋ̈ˈˈ ˈgü ˈpö. (1 Zn. 4:10) ˈKwa˗ ˈwɔn dɔ ꞊dhɛ Yesu ˗yö ˗ga kwa ˗wɔn ˈgü, ˗an ˗dhɔ ˈö ˈˈdhʋ̈ ˗yö ˗dadhiʋ̈ ˈzü. Bɔmɛn Pɔdhö ˗ya ˈwɔn ˗dɔ ˈˈdhʋ̈, yö ˈnën˗ ˗wɔn ˈgü ˗a ˗bha ˈsëëdhɛ ˈö˗ bɔ Gadhatömɛn ˗nu ˗dhɛ bhë ˗a ˈgü, ˈyö˗ pö: «Zlan ˗bha ˈnë ˈö [bhë] n ˗dhɔ ˗ya ˗kë ˈö ö ˗dɩ nu n ˗wɔn ˈgü.» (Ga. 2:20) Yesu ˗bha ga ˈsaa˗ ˈgü, Zoova ꞊mɔɔn˗ ˗bha ˈö ü ˗gan ö ˗bha ˈü ˗kë ˗a ˈˈtɔŋdë ˈka. (Zan 6:44) ˗A kë ˗sü kö Zoova ˗yö pë ˗së ˈbha yö kwa zuʋ̈ˈˈ ˈgü, ˗yö ˈˈsaa˗ suu ˈö ˈˈdhʋ̈ ˗a bho kë ˈˈdhʋ̈ kö ˈkwa kë ö ˈˈtɔŋdë ˗nu ˈka bhë, ˈyaa ˈpa kwa zuʋ̈ˈˈ ˈka ˗ee? ˈYaa Zoova waa Yesu ˗an ˗dhɔ ˈö kwa ˈgü ˗a ˗dadhiʋ̈ ˗ee? ˗Yö ˗dho kë ˗së kö ˈkwa kwa ˗de dhɛɛˈˈ ˈkpɔ, ˈkwa˗ pö: «˗Dhɔ suu ˈö bhë ˗mën ˈö n ˗blü ˗a kë ˗sü ˗bha?» ˗Zlan waa Klitö ˗an ˗dhɔ ˗yö kwa ˗blü ˗dhɔ ˗kë mɛn ˈˈwɛɛ ˗nu ˈka ˗sü ˗bha.— 2 Ko. 5:​14, 15; 6:​1, 2. w23.01 28 § 6-7.

Biblö ˈnën ˗tɔ pë ˗wɔngbɩɩsü ꞊dede ˈö Zoova ˗yö bɔ ˗a ˗ta ˈö ö ˗dhɔkëmɛn ˗nu ˗takun kö ˗wo ‹dɔ wo ˈko ˗gban gɔ ˗wa ˗dhɔkë.› Zoova ˗ya ˗kë ˈwo Biblö ˈˈpian ˈbha ˗nu ˗bɛnzë kö ˗dekëtɩtɩmɛn ˗nu dosɛnŋ ˗wa ˈgüman. (Dhu. 10:21) ˈˈSɛ ˈˈpɛpɛ ˈgü, mɛn ˗nu ˗wo Biblö ˗wo ˗pö. ˈˈKɛɛ ˗dekëtɩtɩmɛn ˗nu dosɛnŋ ˈnen ˈwo˗ ˈgüman, ˈwo˗ ˗wo ˗ya ꞊bhlëë ˈgü. (2 Ko. 3:​15, 16) Pë ˈbha ˈö˗ ˗zɔn ˈzü ꞊dhɛ Zoova ˗yö ꞊kpɔɔsü ˗yö Biblö ˈgü. Zoova ˗yö ˗bɔ Biblö ˗ta ˈö ö ˗dhɔkëmɛn ˗nu ˗lokota kö ˈö ˗an ꞊klaŋkë. ˈˈKɛɛ ˗yö ˗bɔ Biblö ˗ta ˈpö ˈö˗ mɛn ˗dhɛ ˈö ˗dhö ˗a ꞊klaŋkë, ˈö˗ ˗zogban. ˈKwa Biblö ˗wo pö, kwa˗ ˗yö mü ꞊dhɛ Zoova ö ˈˈtʋ̈ŋ ˗kë kwa ˈgü do do ˈka. (Is. 30:21) ˈKwa Biblö ˈˈɲan ˈbha ˗wo pö, ˗yö ˗kë ꞊dhɛ ˈpë ˈwo˗ ˗bɛnzë kwa do kwa ˗bha ˈka ˗a ˈdhö. ˈKö ˗kë ˈˈdhʋ̈, Biblö ˗yö mɛn ˈˈmliɲɔn ꞊va ˗takunpë ˈka. ˈMën ˗kë ˈö pë ˗nu ˈö kwa ˗bhawɔn ˈdhö ˗an ˗bha ꞊dedewo ˈwo Biblö ˈgü? ˈYö ˗tɔ ꞊dhɛ ˗a Dëmɛn ˗bha ꞊kpɔɔdhɛ ˗zɔn ˈka ˈyaa ˈdhö.—2 Tim. 3:​16, 17. w23.02 4-5 § 8-10.

Mɛn ˗nu ˈkwa ˗kë kletiɛn ꞊dede ˗nu ˈka, Zoova ˗dhɔ ˗yö kwa ˗kë. Kwa˗ ˈˈpiʋ̈ ˈkwa kwa ˈgü dɔ ˈˈgbɩɩ˗ kö ˈkwa˗ ˗bha yö kë kwa ꞊faan ˈka. ˈˈKɛɛ ˈkwa˗ pö pë ˈˈpɛpɛ ˈkwa ˗mɔn ˗a ˗bha ˈkwa˗ kë Zoova ˗dhɛ, kwa dua ˗mü kö pë ˈö ˈkwa dho ˗a kë ˈkwa˗ ˗wɔn ˗ya kwa ˗zo ˈˈpiʋ̈. ˗Yö ˗mɔn ˗a ˗bha ˈö ˗kë ˈˈklʋʋsë ˗nu draansü, ˗Zlan ˗bha yö ˈbha draansü ɛɛnˈˈ ˈzü mɛn ˗nu ˗takun ˗kɔ mɛɛnˈˈ ˗sü ˈka. ˈMën ˗kë kwa dua ˈdhö ˗mü ˈkwa˗ ˈˈslö mɛɛnˈˈ kö kwa ˗gɛn ˗yö ˈdho ˈˈdhiʋ̈ ˗Zlan ˗bha yökësü ˈgü? ˗A ˗gɛn ˗blɛɛsü ˈnën ˗tɔ ꞊dhɛ kwa˗ ˈˈpiʋ̈ ˈkwa kë kwa Dë ˈö dhaŋ˗ gü ˈö kwa ˗dhɔ ˗ya ˗kë bhë, ˗a ˗dhɛ ˗së. Pë ˗nu ˈö ˈkwa ˗mɔn ˗an kë ˗sü ˗bha ˈkwa ˗an ˈsü ˈkwa Zoova ˗bha yö kë ˗a ˈka, ˗a zuʋ̈ˈˈ ꞊nii ˗yö ˗da. ˗Ya ˈgo mü ˈzü, kwa˗ ˈˈpiʋ̈ kwa ˗gɛn ˗yö ˈdho ˈˈdhiʋ̈ Zoova ˗bha yö ˈgü, kö ˈkwa kwa ꞊dhegblü ˗nu ˗takun ˈgbɛ. (1 Tes. 4:​9, 10) ˈKö ˗kë ꞊dhɛ ˈkwa ꞊gwëë Zoova ˗bha yökësü ˈgü, kwa ˈˈpɛpɛ kwa ˗gɛn ꞊mɔɔn˗ ˗bha ˈö dho ˈˈdhiʋ̈ ˈzü. ˗Kɔ ˈö ˈkwa dho ˗a kë ˗a ˈka ˈˈdhʋ̈, ˗kwaa ˗ga. w22.04 22 § 1-2.

˗A ˈˈtʋ̈ŋ ˈyaa ꞊gblɛɛn ˈzüdho kö ꞊sua ˗zlanwo ˗nu ˗lokotasü ˈwo˗ Babidhɔnö ˗pö ˈkpii˗ ˗kë ˗bhë, ˈˈsɛgɔdhiʋ̈mɛn ˗nu ˗wo ˈdho ˗a ˗gɔ. ˗Yö ˗dho kë ˈˈklʋʋbhɔdhe ˈkpii˗ zübhodhɛ ˈka. ˈˈTʋ̈ŋ ˈö ˈˈdhʋ̈ ˗a ˈgü, mɛn ꞊vadhɛ ˗dho ˈˈwɩ ˗a ˗bha kö ˈwo kë Zoova ˗dhɔkëmɛn ˗nu ˈka ˗ee? ˗Abin. ˗Dhɛkpaɔ dhiaˈˈ ˈsëëdhɛ ˈˈɲan ˈˈgblʋ̈gblʋ̈ 6 ˗ya ˗pö ꞊ʒiaan ꞊dhɛ mɛn ˗nu ˈö ˈwaa Zoova ˗dhɔkëmɛn ˗nu ˈka, ˗wo ˗dho ˗takpadhe mɛɛnˈˈ ˈˈsɛkɔɔnmɛn ˗nu waa ꞊nɔɔnmɛn ˗nu ˈwo kë ˗sü ˈka ꞊dhɛ ˗tɔn ˗nu ˈdhö bhë, ˗an ˈˈpiʋ̈. ˈDhɛ ˗kë ꞊dhɛ wo ˈti ˗dho ˈˈwɩ ˗a ˗bha kö ˈwo wo ˗kɔ ˗ya ˗Zlan ˗bha ˗Gblüdëdhɛ ˗gɔ bhë, Zoova ˗dho ˗an ˈsü ꞊dhɛ ˗gban ö ˗gɔ ˗mɛn ˗nu ˈdhö. (Dhu. 11:23; ˗Dhɛ. 6:​15-17) Gagade ˈgü, ˈˈklʋʋbhɔdhe ˈkpii˗ ˈˈtʋ̈ŋ ˈka mɛn ˗nu ˗dho ˗a ˈwɔn dɔ ꞊dhɛ Zoova ˗dhɔkëmɛn ˗nu ˈwaa ꞊dhɛ mɛn ˗kpɛɛ ˗nu ˈdhö. Wo ˈˈkee dosɛnŋ ˈnën ˈwo dho kë Zoova ˗Zlan ˗dhɔkëmɛn ˗nu ˈka ˈˈsɛ ˗ta, ˈö ˈwii ˗dho ˈˈwɩ ˗a ˗bha kö ˈwo wo ˗kɔ ˗ya «wü ˈˈdhiʋ̈˗» ˗bha ˗gblüdëdhɛ ˗gɔ.—˗Dhɛ. 13:​14-17. w22.05 16-17 § 8-9.

‹˗Zlan ˗bha ˗Gblüdëdhɛ ˗nɔɔn ˗së› dosɛnŋ ˈyaa ˈnën Zoova ˗dhɔkëmɛn ˗nu dua ˈdhö ˗mü kö ˗wa pö. (Mat. 24:14) ˗An dua ˗mü ˈpö kö yö ˈö ˗Zlan ˗bha ˈˈkiö ˗nu ˈdhö˗ kë ˗ni ˈgü ˈwo˗ ˗wɔn ꞊blɛɛ ˗Dhɛkpaɔ dhiaˈˈ ˈsëëdhɛ 8 ˈö yö˗ ˈka 10 ˗bha ˗a ˈgü bhë, ˗wa kë. ˈWɔn ˈˈgbɩɩ˗ ˗nu ˈwo dho kë mɛn ˗nu ˈö ˈwaa wo ˗gɔ ˈdho ˗Zlan ˗bha ˗Gblüdëdhɛ ˗dhɛ ˈˈshia˗ ˗an ˈka, ˈˈkiö ˗nu ˈwo bhë ˗wa nɔɔn˗ ˗pö. ˗Dhɛ ˈö ˈˈdhʋ̈, Zoova ˗bha ꞊Gbɛkiö ˗nu dua ˗mü kö ˗Zlan ˗bha za ˈö dho ˗a dɔ Sɔtraan ˗bha ˈˈkpɔnŋtaadhɛ yaa ˈö yö ˗a ˗bha, ˈö˗ nɔɔn˗ ˈdhö kë ˗sü ˈka ꞊dhɛ ‹ˈˈmënŋga waa ˈˈshiʋ̈› ˗an ˈdhö bhë, ˗wa pö. (˗Dhɛ. 8:​7, 13) Mɛn ˗nu dua ˗mü kö ˗wa ˈwɔn dɔ ꞊dhɛ ˈˈkpɔnŋtaadhɛ ɲën ˈˈtʋ̈ŋ ˗ya yö ꞊klöö˗, kö ˗wo wo ˗bha ˗tosɛta kë ˗kɔ bho ˈˈgblʋʋ kë ˈˈdhʋ̈ kö ˗wo dha Zoova ˗bha ˗naanzuëëdhe ˗gɔ. (Soph. 2:​2, 3) ˈDhɛ ˗kë ꞊dhɛ nɔɔn˗ ˈö ˈˈdhʋ̈ yö ˈti ˗dho kë mɛn ꞊vadhɛ ˗dhɛ ˗së, kwa ˗bhawɔn ˗yö ˈgüdɔgbɩɩsü ˗bha. ˈˈKlʋʋbhɔdhe ˈkpii˗ ˈˈtʋ̈ŋ ˈka, ˗Zlan ˗bha za ˗nɔɔn ˈö ˈkwa dho ˗a pö mɛn ˗nu ˗dhɛ, ˗yö ˗dho ˈˈyɛ ˗an ˗bha.—˗Dhɛ. 16:21. w22.05 6-7 § 18-19.

Dhe waa ö ꞊gɔɔn ˈwo dho kë ˈnënmɛn ˗nu ˈka, ˗kwa kwa ˗zota ˗an ˈgü. ˗A ˈbha ˗ya kë kö ˗kwɛ ꞊va ˈˈpiʋ̈, ˈˈdhɛɛtadhiaŋ˗ ˗nu ˈwo ˗gban ˈnën ˗nu ˗to ˗kɔ ˗bha, ˗wa wo ˈˈtʋ ˈto ˗an ˗bha ˈko ˗ta ꞊va. ˈˈKɛɛ ˈdhɛ ˗kë ꞊dhɛ ˗wa ˈnën ˈkpɔ, ˈˈdhɛɛtadhiaŋ˗ ˗nu suu ˈwo ˈˈdhʋ̈ ˗wo ˗dho wo ˈˈtʋ̈ŋ kë ˗an ˈgü ˈzü ˈgbɛ, ˈyö ˗tɔ ꞊dhɛ wo ꞊dede ˈnën ˈwo dho wo ˗bha ˈnën ˗nu ˗to. Yö ˈkpii˗ ꞊dede ˈbha ˗mü. ˈWɔn ˈbha ˗nu ˗wa ˈgo ˈˈgblʋʋ kwa ˗bha ˗tosɛta ˈgü, Biblö ˈˈɲan ˗nu ˈö ˈkwa ˗an dɔ ˗be ˗wo ꞊mɔɔn˗ ˗bha ˈwo ˗gban kwa ˗bha ˈzü ꞊dedewo. ˗A ˗wɔn ˈgü Zoova ˗dhɔkëmɛn ˗nu ˗wo Biblö ˗wo ˗pö, ˈö ˈwo wo ˗zota ˗a ˈgü «˗dhɛkpaɔyi ˈˈpɛpɛ ˈka» wo ˗bha ˗tosɛta ˈgü, ꞊dhɛ ˗kɔ ˈö ˈtɔŋ˗ ˈö Zoova ˗ya dɔ Izraɛdhö ˗gblüdë ˗nu ˗ta ꞊kwɛŋzü ˈö˗ pö˗ ˈka, ˗a ˈdhö. (Deut. 17:19) ˈNënmɛn ˗nu, yö ꞊bhlëësü dɔ ˗sü ˈka ka ˗kɔ ˈka. Yö ˈnën ˗tɔ ka ˗bha ˈnën ˗nu ꞊klaŋkësü kö ˗wo Zoova dɔ. ˈˈKɛɛ yi˗ ˈwɔn ˗dɔ ꞊dhɛ ˈkaa˗ ˈˈpiʋ̈ kö ˗yö kë ˈwɔn ˈö ˗gban Zoova ˗bha ˗a ˗zɔn ˗an ˗dhɛ ˗sü ˈˈwɛɛwɛ ˈka. Ka˗ ˈˈpiʋ̈ ˈka ˗an ˗takun kö kwa Dë ˈö kwa ˗dhɔ ˗ya ˗kë bhë, ˗a ˗dhɔ ˗yö ˗an kë ˈpö. w22.05 26 § 2-3.

ˈWɔn yaa ɛɛnˈˈ ˗tosɛta kë ˗kɔ ˈbha ˈkwa˗ ˗kë ˈˈdhiʋ̈ ˗be ˗a ˗bha ˗mën kwa ˈka ˗sü dosɛnŋ ˈyaa ˗mɔn. Kwa dua ˗mü ˈkwa ˈwɔn ˈbha ˗nu kë. Pë ˗wɔngbɩɩsü do ˈö Zoova ˗ya ˗ga ˈzü ˈö kwa ˗bhawɔn to ˈyö ˗tɔ kwa ˗bha ˗kë mɛn suu ˗dɛɛ ˈka ˗sü. ˗Kë mɛn suu ˗dɛɛ ˈka ˗sü ˈnën ˗tɔ ˗kan ˈwɔn yaa ˈö ˈkwa˗ ˗kë ˈˈdhiʋ̈ ˗be ˗a ˗bha ˗sü kö ˈkwa ˗tosɛta kë ꞊dhɛ ˗kɔ ˈö Zoova ˈdhö˗ ˈˈpiʋ̈ ˈkwa˗ kë˗ ˈka, ˗a ˈdhö. (Is. 55:7) Mɛn ˈö˗ ˈˈpiʋ̈ ˈö kë mɛn suu ˗dɛɛ ˈka, ˗a dua ˗mü kö ˗yö ö ˗zota ˗kɔ ˗nu bho ˈˈgblʋʋ, ˗yö ö ꞊kwaa Zoova ˗bha ˈwɔn yö ˗kɔ ˗zü kö ˗yö ˈˈdhiʋ̈sü ˗a ˈka. (Wlɔ. 12:2; Efɛ. 4:23) ˗A dua ˗mü kö ˗yö ˈˈkan ˗zotadhe waa ˈˈtakɔ yaa ˗nu ˈö kun ˗an ˈgü ˗be, ˗an ˗bha. (Kodh. 3:​7-9) Gagade ˗mü ꞊dhɛ kwa ˗bha ˗zoyö Yesu ˗bha ˈˈsaa˗ ˈö˗ bho bhë ˗a ˗dhɛ ˗sü ˈnën Zoova ˗gban ˗a ˗ta ˈö kwa ˗bhawɔn to, ˈö ˈkwa ˗kë ˈˈslʋ̈ʋ̈slʋ̈ ˗a ˈˈɲan ˈˈdhiʋ̈. ˈˈKɛɛ ˈkwa˗ pö Zoova ˗yö ˗gban ˈˈsaa˗ ˈö bhë ˗a ˗ta kö ˗yö kwa ˗bhawɔn ˈto, kwa dua ˗mü ˈkwa˗ ˗zɔn ˗a ˗dhɛ ꞊dhɛ kwa kwa ˈgü dɔ ˗ni ˈgü ˈˈgbɩɩ˗ kö ˈkwa kwa ˈˈtakɔ ˗nu bho ˈˈgblʋʋ.—1 Zn. 1:7. w22.06 6 § 16-17.

ˈÖ sü Adan waa Ɛvö ˗an ˗bha ˗gban Zoova ˗gɔ ˈˈtʋ̈ŋ ˗bha, mɛnbhɩɩdhe ˗nu ˗wo pë ˈˈdhiʋ̈˗ kë ˗ni ˈgü wo ˈko ˗nu ˈka. (Eccl. 8:9) Mɛn ˗nu ˈö ˗wogbinŋdhɛ ˈdhö ˗an ˗gɔ ˗wo ˗dɔ ˗a ˗ta ˈwo ˈwɔn yaa ˗kë mɛn ˈˈwɛɛ ˗nu ˈka, ˈö pëyaakëmɛn ˗nu ˈˈvaanvandhɛ ˗kë ˗dhɛ ꞊gban ˈgü. ꞊Klaŋnën ˗nu ˗wo ˗wɩ wo ˈko ˗nu ˗dhɛ, ˈö ˈwo ˈˈsuʋ̈ ˗da wo ˈko ˗nu ˈgü. Mɛn ˈbha ˗nu ˗de ˗wo pë ˈˈdhiʋ̈˗ ˗kë wo ˗bha ˈkɔdhigümɛn ˗nu ˈka. ˗A ˗wɔn ˈgü, mɛnbhɩɩdhe ˗nu ˗bha ˗suʋ̈ wo ˈko ˗nu ˗gɔ ˗sü ˈwɔn ˈyaa kwa ˈkun. Sɔtraan ˗bɔ ˈˈsuʋ̈ suu ˈö ˈˈdhʋ̈ ˗a ˗ta ˈö nu kwa ˗gɔ ˗kɔ ˗kë ꞊dhɛ? Sɔtraan ˗bɔ ˗suʋ̈ mɛnbhɩɩdhe ˗nu ˗gɔ ˗sü ˗ta ˈö nu kwa ˗gɔ kë ˈˈdhʋ̈ kö ˈkwa ˈgo kwa ˗wo ˗ta, ˈkwa ˈˈkan ˗zlanwopösü ˗bha. -Yö ˈˈsɛkɔɔnmɛn ˈbha ˗nu ˗blü ˈwo kwa ˗bha yö ꞊kɛɛ˗ ˗kan, ˈwo kwa ˈˈklʋʋ bhɔ. (Dhu. 21:12) ˗A ˗bha ˈˈkpɔnŋtaadhɛ ˈö yö ˗a ˈgü, mɛn ꞊vadhɛ ˗wo ꞊sua ˈˈgblʋ̈gblʋ̈ ˗nu ˗ya Zoova ˗bha ꞊Gbɛkiö ˗nu ˗bha. Mɛn ˗nu ˈwo ˈdhaŋ˗ bho ꞊sua ˗nu ˈwo ˈˈdhʋ̈ ˗an ˈˈdhiʋ̈ ˈˈtʋ̈ŋ ˈbha ˗nu ˈka ˗wo kwa ˈˈklʋʋ ˗bhɔ ɛɛnˈˈ ˗wo ˈˈyɩɩ ˗nu ˗to kwa ˗bha. (Mat. 10:36) Sɔtraan ˗bha ˈˈslö ˗nu ˈwo bhë ˗an -wɔn kwa ˗kun ˗ee? ˗Abin toŋtoŋdhö. ꞊Yaa˗ ˗blɛɛsü kë ˈˈdhʋ̈ ˗be ˗kwɛ këŋ do ˗blɛɛsü ˈgü.—Këw. 5:​27, 28, 40. w22.06 16˗17 § 10-11.

De ˗nu ˈwo ˗tɔ «mɛn ꞊vadhɛ» ˈwo dho ˗an ˗takun kö ˗wo kë kpɛnŋdhö? Mɛn ˗nu ˈwo dho ˈgo ga ˈgü, ˗ya ˈgo mü mɛn ˗nu ˈwo dho dha Aamagedɔn ˗gblü ˗gɔ waa ˈnën ˗nu ˈö˗ ˈbha ˗ya kë ˈwo dho ˗an ˈkpɔ ˈˈkpɔnŋtaadhɛ ˗dɛɛ ˈgü, wo ˗mü. ˗Kwɛ 1.000 ˗ya ö bo ʒiö ˗sü ˈka, mɛn ˈˈpɛpɛ ˈwo dho kë ˈˈkpɔnŋ ꞊taa ˗wo ˗dho kë ˈˈslʋ̈ʋ̈slʋ̈. ˈYa ˗dho kë kwa ˈgü ꞊dhɛ mɛn ˗ya kë ˈˈslʋ̈ʋ̈slʋ̈, kö ˗ya ˈto mü ˗ya ˗tosɛta ˈö ˈyaa ɲën ˗a ꞊slɔɔ. ˗Kwa Adan waa Ɛvö ˗an ˗bha ˈwɔnzuan ˗ga. ˗Wo ˗kun ˈˈslʋ̈ʋ̈slʋ̈, ˈˈkɛɛ ˗a ˗dhɛ ˗kun ˗a ˗bha ˗be kö ˗wo ˈwɔn man Zoova ˗ta, kö ˗wo ˗tosɛta kë ˗toëpö ˈka. ˗A ˈdhɛ ˗wëëwɔn ˈka ˈyö ˗tɔ ˗wo ˈti ˈwɔn man ˗a ˗ta. (Wlɔ. 5:12) ˈDhɛ ˗kë ꞊dhɛ ˗kwɛ 1.000 ˈˈdhiʋ̈tadhɛ ˈgü mɛn ˗nu ˗dho kë ˈˈslʋ̈ʋ̈slʋ̈ bhë, ˗an ꞊gban ˈˈpɛpɛ ˗dho wo ˗kɔ ˗ya Zoova ˗bha ˗Gblüdëdhɛ ˗gɔ ˗toëpö ˈka ˗ee? Ɛɛnˈˈ ˗wo ˗dho kë ꞊dhɛ Adan waa Ɛvö ˈwo kun ˈˈslʋ̈ʋ̈slʋ̈, ˈˈkɛɛ ˈö ˗wo ˈti ˈto ˗klu ˗sü ˈka ˗Zlan ˗bha bhë, ˗an ˈdhö ˗ee? ˈWɔn ˗nu ˈwo bhë ˗an ˈˈɲan ˗dho bhɔ. w22.09 22-23 § 12-14.

ˈKa ˈˈkpɔnŋtaawɔn ˗nu ˈwo ꞊dɛɛ ˗an ˗ga, ka˗ ˗pö ka ˗de ˗dhɛ ꞊dhɛ dhiʋ̈ˈˈ ˗nu ö ꞊taabha ˗nu ˈka ˈwaa ꞊mɔɔn˗ ˗bha ˗wo kë ˗së ˗ee? ˗Dhɔkaadhe ˈyaa ˈkɔdhi do ˈgümɛn ˗nu ꞊zinŋgü ˈzüdho. Mɛn ˗nu ˗wo wo ˗zota wo ˗de ˗wɔn ˈgü, ˗wa kë ˈˈvaanvan, ˈö ˗an zuʋ̈ˈˈ ˗ya kë ˈˈdhiʋ̈˗. Mɛn ꞊vadhɛ ˗de ˈpö ˈwaa ˈdhaŋ˗ bho mɛn ˗nu ˈö ˗wogbinŋdhɛ ˈdhö ˗an ˗gɔ, ˗an ˈˈdhiʋ̈. ˈˈKɛɛ ˈwɔn ˗nu ˈwo bhë ˈnën ˈwo dho kwa ˗zogban ꞊ʒiaan ꞊dhɛ ˗tosɛta ˗dho kë ˗së ˗dhɛkpaɔ dhiʋ̈ˈˈ ˈgü. ˈMën ˗kë ˈkwa˗ pö ˈˈdhʋ̈? ˈYö ˗tɔ ꞊dhɛ pë ꞊dede ˈö Biblö ˗ya pö ˈö ˗gban «ˈˈkpʋngtaadhɛ yën ˈˈtʋ̈ng» ˗bha ˈnën ˈwo kë ˗ni ˈgü bhë. (2 Tim. 3:​1-5) ˈWɔn ˗nu ˈö Biblö ˗yö ˗an to ˈˈdhiʋ̈ ˈö˗ pö ˈwo kë ˗ni ˈgü ˈö zuʋ̈puumɛn gbɛ˗ ˈyaa ꞊mɔɔn˗ ˗bha ˗ya ˗da zɔɔdhe ˈgü bhë, ˗wa ˗zɔn ˈˈpuu ˈka ꞊dhɛ Yesu Klito ˗ya ˗ya ˗Zlan ˗bha ˗Gblüdëdhɛ ˗gɔdhiʋ̈. ˈˈKɛɛ ˈwɔn ˈö Biblö ˗ya ꞊blɛɛ ˈˈdhʋ̈ ˗a dosɛnŋ ˈnën ˈdhö ˗mü. ˈWɔn ˗nu ˈö Zoova ˗yö ˗an to ˈˈdhiʋ̈ ˈö˗ ꞊blɛɛ ˈˈdhʋ̈ bhë, ˗wo ˗dho yö ˈko ˈˈdhiʋ̈ ˈkpakpadhö, ö ˈˈtʋ̈ŋ ˗bha. w22.07 2 § 1-2.

Kolona Virisö ˈˈtʋ̈ŋ ˈö yö ˗a ˈgü, pë ˈkwa dho ˗a kë kö ˈkwa ˗bhɔkwëë ˗nu kë ɛɛnˈˈ ˈzü ˈkwa ˗zlanwopö, ˗wa ˗zɔn kwa ˗dhɛ. Kwa ˗to mü ˈkwa ˗ya kwa ˗bha ˗bhɔkwëë ˈsɛɛn˗ ˗nu, ˗a ˈkpii˗ ˗nu kë ˗sü ˗bha ɛntɛnɛtö ˗ta, ˈö ˈkwa ˗zlanwopö ˈsëëdhɛ ˗bɔ mɛn ˗nu ˗dhɛ ˗sü waa telefɔnö ˗kë ˗an ˗dhɛ ˗sü ˈka. Zoova ˗yö ˈdhuëë˗ ˈkpɔ ˗sü ˈka kwa ˗bha ˈgüdɔgbɩɩsü ˗bha. Betɛdhö ꞊vadhɛ ˗wa ˗pö ꞊dhɛ Zoova ˗dhɔkëmɛn ˗nu kë ˗ni ˈgü ꞊va wo ˗bha ˈˈpian ˗ta. ˗A ˗de ꞊ʒiaan ˗zlanwopömɛn ꞊va ˗wo ˗bɔ ˈwɔn ˗sɛŋbɔ ˗nu ˈgü ˈˈtʋ̈ŋ ˈö ˈˈdhʋ̈ ˗a ˈgü. Mɛn ꞊vadhɛ ˗bha ˈgü, Zoova ˗bha ˗kɔlokota ˗yö ˈwɔn ˗nu ˗ʒiö ꞊gɔa Kolona Virisö ˈˈtʋ̈ŋ ˈö yö ˗a ˈgü. ˈˈKɛɛ kwa˗ ˗yö ˈko ˗ta ꞊va ꞊dhɛ ˗dhioo ˗nu ˈwo˗ dɔ kwa ˗ta ˈˈdhʋ̈ ˗wo ˗kun ˗dhioo ˗sɛŋbɔ ˗nu ˈka. ˈKwa kwa ˗zota ˈˈdhiʋ̈ ˈö Yesu ˗ya sü kwa ˈka ˗dhɔkaadhe ˈgü bhë ˗a ˈgü, ˗yö kwa ˗zogban ꞊dhɛ ˈkö ˈwɔn suu ˈˈoo ˗su ˗nu kwa ˗ta ˗dhɛkpaɔ dhiʋ̈ˈˈ ˈgü, Zoova waa ö Gbö dhɔɔbhaasü ˗wo ˗dho kë kwa ˈˈpiʋ̈.—Ebl. 13:​5, 6. w22.07 13˗14 § 15-16.

Kwa ˗bha bhɛɛwo ˗nu ˈgü, ˗ya ˈˈkan Zoova ˈtɔbhɔsü ˗bha, kwa dua ˗mü ˈpö ˈkwa˗ ˈˈnuɛ bho pë ˗sɛŋbɔ ˗nu ˈö ˗an nu kwa ˗dhɛ ˗an ˗wɔn ˈgü. ˗A ˈwɔnzuan ꞊nɛn: Kwa ꞊mɔɔn˗ ˗bha ˈkwa˗ ˈˈnuɛ bho ꞊blëë ˈˈbin ˈˈɲan ˗sɛŋbɔ ˗nu ˈkwa ˗kpan ˗an ˗bha, ɛɛnˈˈ ˗bhöpë ˗sɛŋbɔ ꞊va ˈö˗ nu kwa ˗dhɛ waa kwa ˈˈtɔŋdë ˗nu ˈwo kwa zuʋ̈ˈˈ ˈˈgblü dhi, ˗an ˗wɔn ˈgü. Kwa Dë ˈö kwa ˗dhɔ ˗ya ˗kë bhë, ˗yö pë ˗sɛŋbɔ ꞊va ꞊dede ˗nu kwa ˗dhɛ, kö kwa zuʋ̈ˈˈ ˈˈgblü ˗yö dhi. (Ps. 104:​12-15,24) ˗A ˈdhɛ˗ ˗wɔn ˈdhö ˈˈgbɩɩ˗ ˈzü ˈyö ˗tɔ kwa dua ˗mü ˈkwa Zoova ˈˈnuɛ bho ˗zuu ˈgü ˗bhöpë ˈö˗ nu kwa ˗dhɛ waa ˗dhɛkpaɔ dhiʋ̈ˈˈ ˗së ˈö˗ ˈˈplüün bho ˗sü ˈka kwa ˗dhɛ ˗an ˗wɔn ˈgü. Kwa ˗zo ꞊mɔɔn˗ ˗bha ˈö bhɔ ˈˈvaandhö Zoova ˈˈnuɛ ˗bho ˈwɔn ˗së ˈö˗ ˗kë kwa ˗dhɛ ˗a ˗wɔn ˈgü ˗sü ˗bha. ˗Mën ˈö ꞊mɔɔn˗ ˗bha ˗yö kwa ˗takun kö kwa ˗zo ˗yö ˗bo? Kwa ꞊mɔɔn˗ ˗bha ˈkwa pë ˗nu ˈö ˈkwa ˗an ˗dhɛ Zoova ˗gɔ ˗an ˗bɛnzë ˈsëëdhɛ ˗ta kö ˈkwa˗ ˗ga zoodhö zoodhö, kë ˈˈdhʋ̈ kö ˗a ˈdhɛ Zoova ꞊yaa˗ ˈˈɲan bhɔ ˈkwa˗ dɔ, ˈkwa˗ ˈˈnuɛ bho ˗a ˗bha.—Kodh. 3:15. w22.07 22 § 8-9.

Kwa dua ˈyaa ˗mü kö kwa ˈˈdhiʋ̈ ˗yö ˈto gagade ˗nu draansü ˗ta dosɛnŋ. ˈKwa˗ pö ˈkwa˗ ꞊trɔɔn ꞊slɔɔ, kwa dua ˗mü kö ˈkwa ˗an ˗ya ꞊bhlëë ˈgü kwa ˗bha ˗tosɛta ˈgü. ꞊Ya kë ˈˈdhʋ̈, ˈyö gagade dɔ ˗sü dho zuʋ̈gblüdhi ꞊dede nu kwa ˗dhɛ. (Zak. 1:25) Kwa ˗dho ˗a ˈwɔn dɔ ˗kɔ ˗kë ꞊dhɛ ꞊dhɛ kwa ˗tosɛta ˗kë gagade ˗ta? Kwa ꞊dhegblü do ˗ya ˗pö ˗yö ˗dho kë ˗së kö ˈkwa ˈɲaannu ˈkwa kwa ˗de ˗ga, kö gagade ˗nu ˈdhɛ ˈkwa ˗an ˗ya ꞊bhlëë ˈgü waa˗ ˈdhɛ ˈkwaa˗ ˗ya ꞊bhlëë ˈgü ꞊köŋ, ˈkwa kwa ˗zota ˗a ˈgü. Bɔmɛn Pɔdhö ˗de ˈpö ˗ya ˗pö: «Kö ˈzü ˈö ˗kë ˗kɔ ˈˈʋʋ ˗kɔ ˈö˗ ˈgü, ˗naa ˈdhɛ ˈkö ˈkwa ˗wo ˗ta ya, kwa ˈˈta ˗gɛn ˗yö kë do kö ˈkwa ˈdho˗ ˈka ˈˈdhiʋ̈.» (Fdh. 3:16) ˈKwa kwa ˈgü dɔ ˈˈgbɩɩ˗ ‹ˈkwa ˈto gagade ˗ʒian ˗ta ˗kplawo,› ˈwɔn ˗së ˗nu ˈö ˈkwa dho ˗an ꞊slɔɔ ˗a ˈgü, ˗kwa kwa ˗zota ˗a ˈgü. ˗Yö ˗dho ˗a kë kö kwa ˗bha ˗tosɛta kë ˗së. ˈˈKɛɛ ˗yö ˗dho ˗a kë ˈpö kö Zoova waa kwa ꞊dhegblü ˗nu ˗an zuʋ̈ˈˈ ˈˈgblü ˗yö dhi. (Prov. 27:11; 3 Zn. 4) Yö ˈnën˗ ˗wɔn ˈgü ˈö˗ ˗dhɛ ˈdhö˗ ˗bha kö gagade ˗dhɔ ˗yö kwa kë, kö ˈkwa ˗tosɛta kë ˗a ˗ta. w22.08 18-19 § 16-18.

˗Kɔ ˗mɛɛn ˈö mɛn zii ˗nu ꞊mɔɔn˗ ˗bha ˈwo˗ ˗zɔn ˗a ˈka ꞊dhɛ Zoova waa Yesu ˗an ˗dhɔ ˗yö wo ˗kë? ˗A kë ˗kɔ ˗së do ˈö ˗dhö ˈyö ˗tɔ ˗zokë Yesu ˗bha gwëëˈˈ ˗nu ˈwo ˗kë ꞊dhɛ ˗a ˗bha ˗tuëë ˗nu ˈdhö bhë ˗an ˈˈpiʋ̈ ˗sü. (1 Piɛdhö 5:​1, 2) Yesu ˗ya ˗zɔn ˈˈdhʋ̈ ˈˈpuu ˈka bɔmɛn Piɛdhö ˗dhɛ. ˈDhɛ Piɛdhö ˗ya pö ˗gɛnɲan ˈka ˗yaaga ꞊dhɛ ˈyaa Yesu dɔ, ꞊taabha ˗yö ˗kun ˗a ˈˈpiʋ̈ ꞊dedewo kö ˈö˗ ˗zɔn ꞊dhɛ Yesu ˗dhɔ ˗yö ö ˗kë. Kö Yesu ˗ya ˈgo ga ˈgü, ˗yö Piɛdhö dhɛɛˈˈ ˗kpɔ ˈö˗ pö: «Simɔ Zan gbö, n ˗dhɔ ˗yö i ˗kë [ . . . ] ˗ee?» ˗Yö ꞊mɔɔn˗ ˗bha ˈö ga kwa ˈgü ꞊dhɛ Piɛdhö ˗yö pë ˈˈpɛpɛ ˗kë kö ˈö˗ ˗zɔn ꞊dhɛ Yesu ˗dhɔ ˗yö ö ˗kë. ˗A ˗wɔn ˈgü, Yesu ˗ya ˗pö ˗a ˗dhɛ ˈzü: «˗Bhö ma ˗tuʋ̈ ˗nu ˈˈdhiʋ̈ gba!» (Zan 21:​15-17) Piɛdhö ˗yö ö ˗zokë ö Dëmɛn ˗bha ˗tuëë ˗nu ˈwo ˈˈdhʋ̈ ˗an ˈˈpiʋ̈ ö ˗bha ˗tosɛta ꞊gban ˈgü, ˈö˗ ˗zɔn ꞊dhɛ Yesu ˗dhɔ ˗yö ö ˗kë. Mɛn zii ˗nu, ˗kɔ ˗mɛɛn ˈka dho ˗a ˗zɔn ˗a ˈka ꞊dhɛ ˗wo ˈö Yesu ˗ya pö Piɛdhö ˗dhɛ bhë ˗a ˗wɔn ˗yö ka ˗gɔ ˈˈgbɩɩ˗? Ka ꞊mɔɔn˗ ˗bha ˈka˗ ˗zɔn ꞊dhɛ Zoova waa Yesu ˗an ˗dhɔ ˗yö ka ˗kë, ˈka ˗wo kwa ꞊dhegblü ˗dhɛ ˗kplawo, ˈö˗ mɛn ˗nu ˈö ˗an ˗kɔ ˗ya ꞊zɔɔ ˗Zlan ˗dhɔkësü ˗bha ˈka ˗an ˗takun kö ˗wo wo ꞊yɛɛ˗ kë Zoova ˈˈpiʋ̈.—Ézéch. 34:​11, 12. w23.01 29 § 10-11.

ˈKwa ˗dho kwa ˗zota ꞊dhɛ ˈwɔn ˈö kwa ˗ta mɛn ˈˈwɛɛ ˈbha ˈyaa ˈgüman. ˈKwa˗ kë ˈˈdhʋ̈, ˗yö ˗dho kë kwa ˈgü ꞊dhɛ kwa ˗takunmɛn ˈyaa ˈdhö, ɛɛnˈˈ ˈkwaa ꞊mɔɔn˗ ˗bha ˈkwa ˗gban kwa zopiʋ̈wɔn yaa ˗nu ˗gɔ toŋtoŋdhö. Biblö ˈti˗ pö ˈˈdhʋ̈. ˗Ya ˗pö ꞊ʒiaan ꞊dhɛ ‹ˈgüdandhe ˗ya nu kwa ˗ta, ˗yö ˗dho ˗a ˈˈslë kë ˈö ˈkwa ꞊mɔɔ˗ ˗kun kwa ˗bha ˗sü ˗bha, ˈö ˈkwa dho˗ ˈka ˈˈdhʋ̈ ˈkwa go˗ ˈgü.› ˈDhɛ ˈˈdhʋ̈, ˈkö ˗kë ꞊dhɛ ˈwɔn yaa kë ˗sü ˗dhɔ ˗yö ˗da ˗ni ˈgü ˈˈdhiʋ̈ kwa zuʋ̈ˈˈ ˈgü, kwa ꞊mɔɔn˗ ˗bha ˈkwa ˈto ˗a ˈˈgbɩɩ˗ ˈka. Zoova ˗bha ˗takundhe ˈsaa˗ ˈgü kwa ꞊mɔɔn˗ ˗bha ˈkwa ˈˈkan ˈwɔn yaa kë ˗sü ˗bha. Kwa ˗zo ˗yö ˈto ˈwɔn ˈö yö ˗a ˈˈpiʋ̈ ˗kplawo: ˈDhɛ ˗kë ꞊dhɛ ˈwɔn yaa kë ˗dhii ˗yö kwa ˗bha bhë, ˈwɔn yaa kë ˗sü ˗dhɔ ˗yö ˗nu kwa ˗zo ˈˈpiʋ̈ ˗kplawo. ˈˈKɛɛ ˗ya kë kwa ˈka ˈˈdhʋ̈, ˗kwa ˈto mü ˈkwa˗ bho kwa ˗zo ˈˈpiʋ̈ ꞊dhɛ ˗kɔ ˈö Zozɛfö ˗yö ꞊duëë ˗a ˈka Potifaa ˗bha dhebɔ ˗gɔ bhë, ˗a ˈdhö. (ˈWun. 39:12) Kwa dua ˈyaa ˗mü kö ˈkwa kwa ꞊kwaa ˈwɔn yaa kë ˗sü ˗dhɔ ˈö kwa ˗zo ˈˈpiʋ̈ bhë ˗a ˗zü kö ˗yö kwa ˈˈtakɔ shiʋ̈ˈˈ. w23.01 12-13 § 16-17.

Zoova ˗bha ˈˈklʋʋsë ˈkpii˗ do ˈbha ˈnën ˗tɔ kpɛnŋdhödhɛ. (Deut. 32:4) Mɛn ˈö kpɛnŋdhö ˈyaa mɛn ˗nu zë ˈgü. ˗A ˗wɔn ˈgü, Zoova ˈyaa mɛn ˗nu ˗zë ˈgü. (Këw. 10:​34, 35) Kwa˗ ˗dhɛ ˗yö ˗wo ˗nu ˈwo Biblö ˗bɛnzë ˗a ˈgü, ˗an ˗bha. Zoova ˗ya ˈˈplüün ˗bho ꞊dhɛ ˈˈtʋ̈ŋ ˗totabhaasü ˈgü, ˗dhɛ ˗dho ˈˈpʋ «gagade» ˈö Biblö ˈgü bhë ˗a ˗ta, ˈö mɛn ꞊vadhɛ ˗wa ˈgüman. (Dan. 12:4) Biblö ꞊dhiëëta ˗sü, ˗a ˗yö ˈˈkpɛɛn ˗sü waa˗ ˗glu mɛn ˗nu ˗ta ˗sü ˗nu ˈnën ˈwo˗ ˗kë ˈö mɛn ꞊va ˗wa ˈgüman. Zoova ˗dhɔkëmɛn ˗nu ˗wo Biblö ꞊dhiëëta ˗wo ˈö ˗ʒiö 240 ˗ta ˗a ˈgü, ˈwo˗ nu mɛn ˗nu ˗dhɛ ˈˈwɛɛwɛ. ˗A ˗wɔn ˈgü, ‹ˈˈsanni ˈˈkpʋngtaadhɛ ˈˈdhiʋ̈ ˈto,› mɛn ˗nu ˈwo go ˈˈsɛ ˈˈpɛpɛ ˈgü, «ˈwɔn ˗taɔng ˗së ˈö ˗gban [˗Zlan] ˗bha ˗gblüdëdhɛ ˗wɔn ˗bha» ˗wa man ˗ni ˈgü. (Mat. 24:14) Kwa ˗bha ˗Zlan ˈö kpɛnŋdhö bhë ˗ya ˈˈpiʋ̈ kö mɛn ˗nu ˗wo bɔ Biblö ˗ta ˗wo ö dɔ, ˈyö sü ꞊dhɛ mɛnbhɩɩdhe ˗nu ˗dhɔ ˗ya ˗kë ꞊dedewo. w23.02 5 § 11-12.

˗Kë kpɛnŋdhö ˗sü ˗dhɔ ˗yö ka ˗kë ˗ee? ˈYaa za ˈgü ꞊dhɛ ˗a ˗dhɔ ˗yö ka ˗kë. ˈˈKɛɛ ˈwɔn yaa kë ˗dhii ˗yö mɛn ꞊gban ˈˈpɛpɛ kwa ˗bha. Kwa ˈti˗ kë ˗së, kwa ꞊mɔɔn˗ ˗bha ˈkwa ˈˈkpɔnŋtaamɛn ˗nu ˗bha ˈwɔn yö ˗kɔ sü. (Is. 5:20) ꞊Waa˗ pö mɛn kpɛnŋdhö, mɛn ꞊vadhɛ ˗bha ˈgü kö mɛn ˈö ö ˗de ˗kë ˈˈgɔɔgɔ, ˈö za dɔ mɛn ˗nu ˗bha, ˈö mɛn ˗nu këwɔn ˗nu ˗zëpiʋ̈dhɛ ꞊mɛɛn, ɛɛnˈˈ ˈzü ˈö ö ˗de sü ˗tiaandhö mɛn ˈˈwɛɛ ˗nu ˗bha yö ˗mü. ˈˈKɛɛ ˈˈtakɔ ˗nu suu ˈwo ˈˈdhʋ̈ ˈwaa ˗Zlan ˗dhɛ ˗së. Kö Yesu ꞊kun ˈˈsɛ ˗ta, ˗yö ˈˈdhɛ ˗bho ˗zlanwogɔmɛn ˗nu këwɔn ˗nu ˗ta, ˈö˗ pö ꞊dhɛ ˗wo wo ˗de ˈgü kpɛnŋdhö, ˈö ˈwo wo ˗de ˗bha ˈtɔŋ˗ ˗nu dɔ. (Eccl. 7:16; Dhu. 16:15) ˈˈKɛɛ mɛn ˈö Zoova dhɔɔbhawɔn kë ˗mɛn ꞊dede ˈka, ˈyaa˗ pö ö ˗de ˗dhɛ toŋtoŋdhö ꞊dhɛ ö ˗tiaandhö mɛn ˈˈwɛɛ ˗nu ˗bha. ˗Kë kpɛnŋdhö ˗sü ˈö bhë, ˈˈklʋʋsë ˗tiaandhö do ˗mü. ˗Kë kpɛnŋdhö ˗sü ꞊dede ˈnën ˗tɔ ˈwɔn ˈö Zoova ˗Zlan ˈˈɲan ˈˈdhiʋ̈ ˗së ˗a kë ˗sü. Biblö ˈgü ꞊waa˗ pö ˗kë kpɛnŋdhö ˗sü, kö ˗wo ˗wɩ ˗tosɛta ˗kë Zoova ˗bha ˈtɔŋ˗ ˗nu ˗ta ˗sü ˈka. w22.08 27 § 3-5.

ˈKö ˗kë ꞊dhɛ ˈwɔn ˗nu ˗wo ˗zë ˗a ˗bha gwëëˈˈ ˗nu ˗gɔ, Yesu ˗yö ˈdhaŋ˗ ˗bho ˗an ˈˈdhiʋ̈. (Zan 15:16) ˈDhɛ Zakö waa Zan ˈwo˗ pö ˗a ˗dhɛ ˗yö ˗duɛɛ ˈkpii˗ nu wo ˗dhɛ ˗a ˗bha ˗Gblüdëdhɛ ˈgü, Yesu ˈti˗ pö ꞊dhɛ ˗wo Zoova ˗dhɔkë ö ꞊trɔɔn ˗bha ɛɛnˈˈ ˈwaa ö ˗bha bɔmɛn ˗nu ˈka ˈzü. (Mak. 10:​35-40) ꞊Taabha, gbeŋyi ˈwo˗ kun ˗a ˈka bhë ˗a ˈgü, ˗a ˗bha gwëëˈˈ ˗nu ꞊gban ˈˈpɛpɛ ˗wo ˗kan ˗a ˗bha. (Mat. 26: 56) ˈKö ˗kë ˈˈdhʋ̈, Yesu ˈti ˈˈkan ˈdhaŋ˗ ˗bho ˗an ˈˈdhiʋ̈ ˗sü ˗bha. ˗Yö ˗kun ˗a ˈˈɲaan ꞊dhɛ ˈwɔn yaa kë ˗dhii ˗yö ˗an ˗bha. ˗A ˗wɔn ˈgü, ˗an «˗dhɔ ˗yö ˗kë ˗a ˗bha [ . . . ] ˈö yöë ˗a ˗bha ˗tosiadhe ˈdhiötoyi ˗bha.» (Zan 13:​1, NTBL) ˈDhɛ Yesu go ga ˈgü, ˗yö yö ˗wɔngbɩɩsü ˈö ˗kë ˗zlanwopösü, mɛn ˗nu ꞊klaŋkësü waa ˗zokë ö ˗bha gwëëˈˈ ˗nu ˈˈpiʋ̈ ˗sü ˈka bhë, ˗a ˗dɔ ö ˗bha bɔmɛn ˗nu 11 ˈwo to wo ˗wo ˗ta ˗an ˗kɔ ˈka. (Mat. 28:​19, 20; Zan 21:​15-17) ˗A ˗kë ˈˈdhʋ̈ ˗dhɛ ˗mü, ˈyö ˗tɔ ꞊dhɛ ꞊taabha, ˗an ꞊gban ˈˈpɛpɛ ˗wo ˗to wo ˗wo ˗ta ˈwo dho ˈwo ga˗ ˈka. Gagade ˈka, Yesu ˗yö ˈdhaŋ˗ ˗bho mɛn ˗nu ˈö ˈwɔn yaa kë ˗dhii ˈdhö ˗an ˗bha ˗an ˈˈdhiʋ̈ ˗sü ˈwɔnzuan ˗së ꞊dede ˗to kwa ˗gɔ. w22.09 6 § 12.

˗Ya kë ga ˗sü ˈka kwa ˈgü ˈkpakpadhö ꞊dhɛ kwa ˗dhɔ ˗yö Zoova ˗kë, ˈö kwa ˈˈpiʋ̈ ˗kplawo, ˈˈsuʋ̈ ˈti ˗dho kwa kë Sɔtraan ˗gɔ. ˗A ˈwɔnzuan ꞊nɛn: Mɛn ˈö Psaume 118 ˗bɛnzë bhë, ˗yö ˗kun bɔ ˗ni ˈgü ˈˈsuʋ̈wɔn ꞊dede ˗nu ˈgü. ˗A ˈyɔɔ˗ ˗nu ˗kun ꞊va, ˈö˗ mɛn ˈbha ˗nu kun mɛn ˗nu ˈö ˗wogbinŋdhɛ ˈdhö ˗an ˗gɔ ˗an ˈka (-a ˈˈɲan ˈsɛɛn˗ 9, 10). ˈˈTʋ̈ŋ ˈbha ˗nu ˈka, ˗wa ˗blü ˈwɔn yaa kë ˗sü ˗bha (˗a ˈˈɲan ˈsɛɛn˗ 13). ˗Ya ˈgo mü ˈzü, Zoova yöö ꞊dede ˗yö ˈwɔn ˗bho ˗a ˈgü (˗a ˈˈɲan ˈsɛɛn˗ 18). ˈˈKɛɛ ˈkö ˗kë ˈˈdhʋ̈, Psaume ˗bɛnzëmɛn bhë ˗yö ˈˈtan ˗bho ˈö˗ pö: «ˈˈSuʋ̈ ˈti ˗dho n kë.» ˈYö ˗tɔ ˗a ˈwɔn ˗kun ˗a ˈˈɲaan ꞊dhɛ ˈkö ˗kë ꞊dhɛ Zoova ˈwɔn ˗bho ö ˈgü, ö Dë ˈö dhaŋ˗ ˈgü bhë ö ˗dhɔ ˗ya ˗kë. ˗Yö ˗kun ga ˗sü ˈka ˗a ˈgü ˈkpakpadhö ꞊dhɛ ˈwɔn ˈˈoo ˗wɔn ˈö nu ö ˗ta, ö ˗bha ˗Zlan ˈö ö ˗dhɔ ˗ya ˗kë bhë ˗yö -dho ö ˗takun. (Ps. 118:29) Kwa dua ˗mü kö ˗yö ga kwa ˈgü ꞊dhɛ kwa ˗dhɔ ˗yö Zoova ˗kë. ˗Ya kë ga ˗sü ˈka kwa ˈgü ˈˈdhʋ̈, ˈwɔn ˗yaaga ˈwo yö ˗an ˈˈsuʋ̈ ˗dho ˈgo kwa zuʋ̈ˈˈ ˗ta: (1) Kwa ˗zokë kwa ˗bha ˈkɔdhigümɛn ˗nu ˈˈpiʋ̈ ˗sü. (2) ˗Suʋ̈ mɛnbhɩɩdhe ˗nu ˗gɔ ˗sü. (3) ˗Suʋ̈ ga ˗gɔ ˗sü. w22.06 15 § 3-4.

Kwa dua ˗mü ˈkwa pë ˈˈpɛpɛ kë kö kwa Zoova ˗dhɔkësü ˈwɔn bɔ ˈˈdhiʋ̈ kwa ˗bha ˗tosɛta ˈgü. Zoova ˈnën ˗tɔ kwa ˗Damɛn. ˗A ˗wɔn ˈgü, kwa dua ˗mü ˈkwa˗ ˗dhɔkë. (˗Dhɛ. 4:11; 14:​6, 7) ˈDhɛ ˈˈdhʋ̈, ˗kwa pë ˈˈpɛpɛ kë kö ˗a ˗dhɔkë ˗kɔ ˈö˗ ˗dhɛ ˗së, ˈö «˗zuu ˈslööslö waa˗ ˈwun giagia ˗an ˈgü» bhë, ˈkwa˗ ˗wɔn bɔ ˈˈdhiʋ̈ kwa ˗bha ˗tosɛta ˈgü. (Zan 4:​23, 24) Kwa ˗bhawɔn ˗yö ˗Zlan ˗bha ˗zuu ˈˈslʋ̈ʋ̈slʋ̈ ˗bha kö ˗yö ˈˈdhiʋ̈sü kwa ˈka, kö kwa ˗bha ˗a ˗dhɔkë ˗kɔ ˗yö ˗bɛ gagade ˗nu ˈwo˗ ˈˈDhiwo ˈgü ˗an ˗bha. ˈKö ˗kë ꞊dhɛ kwa ˗bha ˈˈsɛ ˈgü ˗wa kwa ˗bha yö ꞊kɛɛ˗ ˈˈkan, kwa dua ˗mü ˈkwa ˗Zlan ˗dhɔkësü ˗wɔn bɔ ˈˈdhiʋ̈. Dɔ ˈö ˈkwa˗ wo ꞊dɛɛ, kwa ꞊dhegblü gɔɔn˗ ˗nu waa dhebɔ ˗nu ˈwo ˗ʒiö 100 ˗ta ˗wo ˗kasho ˈgü ˗an ˗bha ˗kë Zoova ˗bha ꞊Gbɛkiö ˈka ˗sü ˗wɔn ˈgü. ˈˈKɛɛ ˈkö ˗kë ˈˈdhʋ̈, ˗an zuʋ̈ˈˈ ˈˈgblü ˗yö dhi ˗sü ˈka, ˈö pë ˈˈpɛpɛ ˈwo ꞊mɔɔn˗ ˗bha ˈwo˗ ˗kë kö wo bhɛɛˈˈ, ˈwo Biblö draanˈˈ, ˈwo Zoova waa ö ˗bha ˗Gblüdëdhɛ ˗an ˗wɔn blɛɛˈˈ mɛn ˗nu ˗dhɛ. Mɛn ˗nu ˗wa ˈˈwɩ kwa ˗dhɛ ɛɛnˈˈ ˗wa kwa ˈˈklʋʋbhɔ, ˗a ˈwɔn dɔ ˗sü ˈö ꞊dhɛ Zoova ˗yö kwa ˈˈpiʋ̈, ˈö dho ˗a ˈgüwɔn ˗së ˗kë kwa ˗dhɛ bhë, ˗yö kwa zuʋ̈ˈˈ ˈˈgblü ˗dhi.—1 Piɛ. 4:14. w22.10 9 § 13.

Proverbes ˈsëëdhɛ ˈgü, Zoova ˗yö ˗dhioo ˗nu ˈö ˈkwa ˗an ˗ya ꞊bhlëë ˈgü ˈwo dho kwa ˗bha ˗tosɛta kë ˗së, ˗an ˗dɔ kwa ˗ta. ˗Dhioo ˗nu ˈwo ˈˈdhʋ̈, ˗kwaa ꞊plɛ ˗wɔn blɛɛˈˈ. ˗A ˗blɛɛsü ˈnën ˗tɔ pë ˗nu ˈwo kwa ˗gɔ ˗wo kwa ˗zokun. Proverbes 23:​4, 5 ˗ya ˗pö: «ˈBha dho ü ˗de ꞊sëëbho ꞊nɔɔnpë ˗nu mɛɛnˈˈ ˗sü ˗bha. ˈYö sü ꞊dhɛ ˗an gban ˗yö ˗bhɔ ꞊dhɛ ˈˈgblëë˗ ˈdhö, ˈwo ˗lö ˈwo dɔ dhaŋ˗ ˗bha.» ˈˈKɛɛ ꞊dɛɛ, ˗yö ˗kë ꞊bhɔɔmɛn ɛɛnˈˈ ˈˈflɛɛmɛn ˈka, ˗kɔ ˈwo˗ ˗bha ꞊plɛ ˗wa ˈˈpiʋ̈ ˈwo ˈwëëga ꞊va ꞊slɔɔ. ˗A ˗wɔn ˈgü, pë ˗nu ˈwo dho ˗an ˈtɔ ɛɛnˈˈ ˈwo dho waa mɛn ˈˈwɛɛ ˗nu ˗an ꞊zinŋgüdhɛ shiʋ̈ˈˈ, ɛɛnˈˈ ˈzü pë ˗nu ˈwo ˗dho ˈˈyua ˗ya ˗an ˗bha, ˗wo ˗an ˗kë. (Prov. 28:20; 1 Tim. 6:​9, 10) ˗A ꞊plɛ ˗bha ˗naan ˈnën ˗tɔ ˗kwa kwa ˗zo kë kwa ˈˈdhi ˈˈpiʋ̈. Kwa ˈti kë kwa ˈsuan˗ ˈka, kwa ˈˈdhiwo ˗nu ˗dho pë ˈˈdhiʋ̈˗ kë mɛn ˗nu ˈka. Proverbes 12:18 ˗ya ˗pö: «ˈˈBlɔɔndhɛ ˗dhiaŋ ˗yö ˗yɛ mɛn ˗bha ꞊dhɛ ˗dhaa ˈdhö, ˈˈkɛɛ mɛn ꞊kpɔɔsü ˗nu ˈˈdhiwo ˗zë, ˗yö mɛn ˗dhɛ ˗bo.» ˈKwa ˈˈkan mɛn ˗nu ˗dhiaŋ yaa ˗zë ˗sü ˗bha, ˗dhikodhɛ ˗dho ˈto kwa ꞊zinŋgü.—Prov. 20:19. w22.10 21 § 14; 22 § 16-17.

Ezekiɛdhö dua ˗mü kö nɔɔn˗ ˈö dho ˗a pö, ˗ya ˈgüman ˗së ˈka. ˗A dua ˗mü kö ˗yö ˈdhaŋ˗ bho ˗wo ˈö bhë ˗a ˈˈdhiʋ̈, kë ˈˈdhʋ̈ kö ˗ya ˗blü ˗a ˗pö mɛn ˈˈwɛɛ ˗nu ˗dhɛ ˗sü ˗bha. ˈDhɛ ˗kë ˈˈdhʋ̈, ˗wɔnmɛnkunwɔn do ˈbha ˗yö ˗kë. Ezekiɛdhö ˗ya ˗yö ꞊dhɛ ˈsëëdhɛ ˈö bhë «˗a din ˗kun ˈˈnɛɛnnɛn ꞊dhɛ ˈˈzɔ ˈˈɲɔn ˈdhö.» (Ézéch. 3:3) ˈMën ˗kë ˈö ˗kë ˈˈdhʋ̈? ˈYö ˗tɔ ꞊dhɛ ꞊bhlëë ˈkpii˗ ˈö ˗kë Zoova ˗wɔn ˗blɛɛ mɛn ˗nu ˗dhɛ ˗sü ˈka bhë, ˗ya ˗sü ꞊dhɛ pë ˈˈnɛɛnnɛn ɛɛnˈˈ pë din ˗së ˗sü ˈdhö. (Ps. 19:​8-11) ˗A kë ˗sü kö ˗a ˈˈdhia kë Zoova ˈgü, kö ˗ya kë ö ˗wodhiʋ̈lomɛn ˈka bhë, Ezekiɛdhö zuʋ̈ˈˈ ˈˈgblü ˗dhi ˗a ˗wɔn ˈgü. ˈDhɛ go mü, Zoova ˗ya ˗pö Ezekiɛdhö ˗dhɛ: «Ü ˈˈtʋ ˈto ˗wo ˈˈpɛpɛ ˈa dho ˗a pö ü ˗dhɛ ˗an ˗bha, ˈü ˗an ˈkun ü zuʋ̈ˈˈ ˈˈpiʋ̈.» (Ézéch. 3:10) Pë ˈö kun ˗a ˈˈpiʋ̈ ˈö˗ pö Ezekiɛdhö ˗dhɛ ˈyö ˗tɔ ö ˗wo ˗nu ˈwo ˗bɛnzë ˗sü ˈka ˈsëëdhɛ ˈö˗ nu ˗a ˗dhɛ bhë ˗a ˈgü, ˗wo ˈto ˗a ˈˈɲaan, kö ˗yö ö ˗zota ˗an ˈgü ˗së ˈka. ˈDhɛ Ezekiɛdhö ˗ya ˗kë ˈˈdhʋ̈, ˗a ˗bha ˗zoyödhe ˗kë ˈˈgbɩɩ˗. ˗Ya ˗kë ˈpö ˈö nɔɔn˗ ˈö dho ˗a pö ˈˈsɛgümɛn ˗nu ˗dhɛ, ˈö˗ dɔ. (Ézéch. 3:11) ˈDhɛ Ezekiɛdhö ˗yö ˗Zlan ˗bha nɔɔn˗ ˈgüman ˗së ˈka, ˈö ˈdhaŋ˗ bho ˗a ˈˈdhiʋ̈, ꞊faan ˗yö ˗kë ˗a ˗gɔ kö yö ˈö bhë ˗ya züdɔ, ˗yö ˈdho ˗yö yö˗ ˈka ˗a ˈˈdhiʋ̈todhɛ ˗bha. w22.11 6 § 12-14.

ˈWɔn ˈbha ˗nu ˈwo ˗an bho ˈˈgblʋʋ ˗ya kwa ˗bha ˗klu ˗Zlan ˗bha ˗sü ˗da ˈgüdandhe ˈgü, ˈmën kwa dua ˈdhö ˗mü ˈkwa˗ kë? ˗Kwa kwa ˗kɔ ˗ya ˗a ˗gɔ ˗së ˈka. Kö Izraɛdhömɛn ˗nu ꞊kun ˈˈyɛta, Keatö ˗bha ˈnën ˈbha ˗nu ˈnën ˈwo Zoova ˗bha ˗mlɛɛn ꞊gbëë sü ˈwo yö ˗a ˈka ˈˈsɛgümɛn ˗nu ˈˈpɛpɛ ˗dhɛ ˈˈdhiʋ̈. (Nomb. 3:​29, 31; 10:33; Jos. 3:​2-4) ˗Yö ˗kun ꞊bhlëëwɔn ˈkpii˗ ˈka ˗an ˗bha ˈka. ˈˈKɛɛ ˈdhɛ ˈwo ˗lo ˈˈsɛ ˈö ˗Zlan ˗ya ˈˈplüün bho ˗an ˗dhɛ ˗a ˈgü, ˈwɔn ˗nu ˗go ˈˈgblʋʋ. ˗Mlɛɛn ꞊gbëë ˈsü ˗wɔn ˈyaa kun ˈdhö ˈzüdho. ˈDhɛ ˗kë ˈˈdhʋ̈, Keatö ˗bha ˈnën ˗nu dua ˗mü kö ˗wo yö ˈˈwɛɛ kë. (1 Chron. 6:​31-33; 26:​1, 24) Biblö ˈti˗ pö ꞊dhɛ ˗wo ˗kun ˗dɔn bho ˗ni ˈgü wo ˗wo ꞊wlöö ɛɛnˈˈ ˗wa ˗pö ˗wo yö ꞊bhlëësü ˈbha ˗nu wo ˗dhɛ yö ˈdhɛ ˈwo˗ ˗kë ˈˈdhiʋ̈ ˗be bhë, ˗a ˗wɔn ˈgü. ˗Gleŋ ˗mɛɛn ˈö˗ ˗da kwa ˗bha? ˗Wa ˈwɔn ˈbha bho ˈˈgblʋʋ Zoova ˗bha ˗kɔlokota ˈgü, ˈkö ˗kë ꞊dhɛ ˗yö ˗gban yö ˈö kwa ˗kɔ ˈka ˗a ˗bha, ˗kwa kwa ˗kɔ ˗ya ˗a ˗gɔ kwa zuʋ̈ˈˈ ꞊gban ˈka. Yö suu ˈˈpɛpɛ ˈwo˗ dɔ kwa ˗kɔ ˈka, kwa zuʋ̈ˈˈ ˈˈgblü ˗yö dhi ˗a ˗wɔn ˈgü. Kwa ˗zo ˈya ˗dho bhɔ ꞊dhɛ yö ˈö kwa ˗kɔ ˈka ˈyaa ˈnën kwa ˗kë ꞊bhlëësü Zoova ˈˈɲan ˈˈdhiʋ̈, ˈwɔn ˗man ˗a ˗ta ˗sü ˗mü. w22.11 23 § 10-11.

Onezifɔɔ ˗yo ˗dho ˈö bɔmɛn Pɔdhö ꞊mɛɛn, ˈö ˗takundhe ˈö˗ ˗bhawɔn kun ˗a ˗bha, ˗a nu ˗a ˗dhɛ. Pë ˈö Onezifɔɔ ˗ya kë bhë, ˗ya ˗bha ˗tosɛta ˗dɔ ga ˗yɛ ˈˈdhiʋ̈. ˗Gleŋ ˗mɛɛn ˈkwa˗ sü ˗a ˈgü? ˗Wo kwa ꞊dhegblü ˗nu ˈˈklʋʋbhɔ ˗ni ˈgü, ˗suʋ̈ mɛnbhɩɩdhe ˗gɔ ˗sü dua ˈyaa ˗mü kö ˗yö kwa ˗kɔ ˈkun ˗nu ˗an ˗dhɛ ˗sü ˗bha. ˗Kwa pë ˈˈpɛpɛ kë kö ˈpë kwa ˗kɔ ꞊mɔɔn˗ ˗bha ˈkwa˗ kë ˗an ˗dhɛ. (Prov. 17:17) ˗An ˗bhawɔn ˗yö kwa ˗bha ˗dhɔ waa ˗takundhe ˗bha. Kwa ꞊dhegblü ˗nu ˈwo ˗kasho ˈgü Rusi ˗kɔ ˈö˗ mɛn ˗nu ˈwo to ˈwo ˗an ˗takun ˗a ˈka, ˗kwaa ˗ga. ˗Wa ˈdho ˗a mɛn ˈbha ˗nu ˈka ˗zadɔmɛn ˗nu ˗kuu ˈˈdhiʋ̈, kwa ꞊dhegblü gɔɔn˗ ˗nu, dhebɔ ˗nu, ˗wo ˗dho ˈwo ˗an ꞊faan mën. ˗Gleŋ ˗mɛɛn ˈö˗ ˗da kwa ˗bha? ˗Wa kwa ꞊dhegblü ˗nu ˈwo ˈˈdhiʋ̈sümɛn ˗nu ˈka ˗an ˈkun ɛɛnˈˈ ˗wo ˗an ˈˈklʋʋbhɔ ˗ni ˈgü, ˈˈsuʋ̈ dua ˈyaa ˗mü kö ˗yö kwa kë. ˗Kwa bhɛɛˈˈ ˗an ˗bha ˈka, ˈkwa kwa ˗zokë ˗an ˗bha ˈkɔdhigümɛn ˗nu ˈˈpiʋ̈, ˈkwa kwa ˗kɔ ˗da ˗an ˗dhɛ.—Këw. 12:5; 2 Ko. 1:​10, 11. w22.11 17 § 11-12.

Mɛn zii ˗nu dua ˗mü kö ˗wo bɔ Biblö ˗ta ˗wo wo ꞊dhegblü ˗nu ꞊faanmën kö ˗a mɛn ˗nu ˈö zuʋ̈dhiʋ̈tɛ ꞊gbɔɔnsü ˈdhö ˗an ˗bha ˗wo ˗an ˗takun. (1 Piɛ. 5:2) ˈWɔn ˈˈgbɩɩ ˗nu ˈwo ˗kë ꞊dhɛ ˈˈyi ˗bha pa ˗sü ɛɛnˈˈ ˈˈsɛ ˗bha ꞊zii ˗sü ˗nu ˈdhö ˗wa kë, mɛn zii ˗nu dua ˗mü ꞊köŋ ˗blɛɛsü kö ꞊ya kë ꞊dhɛ ˗dhɛ ˈö ˗an ꞊dhegblü ˗nu ˈdhö˗ ˗bha pë ˈˈdhiʋ̈˗ ˈyaa ꞊mɔɔn˗ ˗bha ˗yö kë ˗an ˈka, ɛɛnˈˈ ˈzü ˗an ˗bhöpë ˗nu, sɔ ˗nu waa ˗an wɔdhɛ ˗nu ˗wo ˗dhö, ˗wa ˈwɔn dɔ. ˈˈKɛɛ ˈkö ˗kë ꞊dhɛ ˗a ˈwɔn ˗nu ˗wo ˗kë ˗ya ˗mɔn ˈˈsu ꞊va ˗bha, kwa ꞊dhegblü ˗nu ˗bhawɔn ˗yö ꞊faanmëndhe waa ˗zogbandhe ˗bha. (Zan 21:15) Arɔdhö ˈö Betɛdhö ˗bha ˈwɔnyëë˗ do ˈka, ˈö ˗ya ˗wo kwa ꞊dhegblü ˗nu ꞊vadhɛ ˈö ˈwɔn ˈˈgbɩɩ˗ ˗kë ˗an ˈka ˗an ˗dhɛ, ˗ya ˗pö: «˗An ˗bha ˗deslɔɔsü ˗yö ˈˈtʋ̈ŋ ꞊va ˗sü. ˈKö ˗kë ꞊dhɛ ˗an ˗bha ˗tosɛta ˗yö ˗kë ˈzü ˗së, ˗an dhɔɔbhaamɛn ˈö ga ɛɛnˈˈ ˗an ꞊slɔɔpë ˗tiaandhö ˈö ꞊shiʋ̈, ɛɛnˈˈ ˈzü ˗an ˗gɔ ˈö dha ga ˗gɔ bhë, ˗an ˗zo ꞊mɔɔn˗ ˗bha ˈö to ˗a ˈˈpiʋ̈ ˗kplawo. ˗A ˈbha ˗ya kë ˗yö ˗wëë ˗da ˗an ˗ta ˈˈtʋ̈ŋ ꞊gban. ˗Ya kë ˗an ˈka ˈˈdhʋ̈, ˗a ˗gɛn ˈyaa ˈnën ˗tɔ ꞊dhɛ ˗zoyödhe ˈyaa ˗an ˗gɔ. Mɛnbhɩɩdhe ˈˈpɛpɛ kwa kë ˗kɔ ˗mü.» ˗A pö ˈö Biblö ˗ya wo ꞊dhɛ «[˗]ka ˈˈgbʋ bɔ mɛ ˈwo ˈˈgbʋ bɔ sië˗ ˗nu ˈˈpiʋ̈» bhë, mɛn zii ˗nu ˗wo ˗a ˗ya ꞊bhlëë ˈgü.—Wlɔ. 12:15. w22.12 22 § 1; 24-25 § 10-11.

Zoova ˗yö ö ˗bha ˗zuu ˈˈslʋ̈ʋ̈slʋ̈ ˗nu kwa ˗dhɛ kö ˗yö kwa ˗takun ˈkwa ˈwɔn ˗së kë. Kwa Biblö draanˈˈ ˗ni ˈgü, kö kwa kwa ˗de dɔ ˗ni ˈgü ˗zuu ˈˈslʋ̈ʋ̈slʋ̈ ˗kɔ ꞊löö. ˈKwa ˈdho ˗bhɔkwëë ˗nu ˗ta, ˗zuu ˈˈslʋ̈ʋ̈slʋ̈ ˗yö ˗kë kwa ˗gɔ. ˗Bhɔkwëë ˗nu ˗ta, kwa ꞊dhegblü ˗nu ˈwo pë ˈˈpɛpɛ kë ˗ni ˈgü kö ˈwo ˈwɔn ˗së kë bhë, ˗wo kwa ꞊faanmën. (Ebl. 10:​24, 25; 13:7) ˈKwa bhɛɛˈˈ Zoova ˗dhɛ kwa zuʋ̈ˈˈ ꞊gban ˈka, ˗yö ˗dho bɔ ˗zuu ˈˈslʋ̈ʋ̈slʋ̈ ˗ta ˈö ꞊faan nu kwa ˗dhɛ kö ˈkwa ˈko zë kwa ˗bha ˈˈtëëtëdhɛ ˗nu ˈka. Biblö ˗wopösü, ˗dho ˗bhɔkwëë ˗ta ˗sü waa bhɛɛsü ˈwaa ꞊mɔɔn˗ ˗bha ˗wa kë kö ˈwɔn yaa ˗nu ˗wo wo bo ˗nu kwa zuʋ̈ˈˈ ˈgü ˗sü ˈka, ˈˈkɛɛ ˗wo ꞊mɔɔn˗ ˗bha ˈwo kwa ˗takun ˈkwa ˗gban ˗a ˈgüwɔn ˗nu kë ˗sü ˗gɔ. Pë ˗nu ˈwo dho kwaa˗ ˗Zlan kwa ˗bha ˈˈtɔŋdëdhɛ kë ˗së ˈkwa ˗ya ˗an kë ˗sü ˗bha, ˗yö ˗dho kë ˗së kö ˈkwa ˈto ˗an kë ˗sü ˗bha, ˈgo mü kö ˈwɔn ˗së ˗nu ˗wo kë kwa zuʋ̈ˈˈ ˈgü ˗kplawo. w23.01 11 § 13-14.

Biblö ˈti ˗kɔ ˈkwa ˗dho kwa ˈˈdhɛkë ˗a ˈka ɛɛnˈˈ pë ˗nu ˈö ˈkwa ˗dho ˗an ˗bhö ˗an ˗wɔn blɛɛˈˈ, ˈˈkɛɛ ˗yö Zoova ˗zopiʋ̈wɔn ˈö ˗gban ˗an ˗bha ˗a ꞊vadhɛ ˗zɔn. ˗A ˈwɔnzuan ˈnën ˗tɔ ˗ya ˗pö ˈkwa «pë yaa ˗nu» ˈwo ˗dho kwa kwigüdhɛ shiʋ̈ˈˈ ˗an bho kwa ˗bha. (Eccl. 11:10) ˗Bhöpë ꞊va ˗bhö ˗sü waa we ꞊va mü ˗sü ˈwo bhë Biblö ˗ya ˗pö ˗wo ꞊mɔɔn˗ ˗bha kö ˗wo ˈˈyua ˗ya kwa ˗bha, ˗wo kwa zë. (Prov. 23:20) Zoova ˗ya ˈˈpiʋ̈ kö ˈkwa ˗mɔn kwa ˗de ˈkun ˗sü ˗bha ˗bhöpë waa we ˗an ˗bha. (1 Ko. 9:25) ˈWɔn yö ˗kɔ ˗së ˗ya kë kwa ˗gɔ ˗yö ˗dho kwa ˗takun kö ˈwɔn ˗nu ˈkwa ˗da ˗an ˗ʒian ˗ta, ˗wa ˗zɔn ꞊dhɛ ˗Zlan ˗bha gbɔɔdhe ˈö ˗kë ˗tosɛta ˈka bhë ˗yö kwa ˗dhɛ ˗së ꞊dedewo. (Ps. 119:​99, 100; Prov. 2:11) ˗A wɔnzuan ˈnën ˗tɔ ˈkwa˗ pö ˈkwa pë ˈbha ˗bhö, ˗kwa kwa zota ˗së ˈka. ˈKwa˗ yö ꞊dhɛ ˈkwa ˗bhöpë suu ˈbha ˗bhö ˈkwaa kwa ˗de ꞊slɔɔ, ˗kwa ˈˈkan ˗a ˗bha. ˗Kwa pë ˈˈpɛpɛ kë kö ˈkwa yi zë ˗së ˈka, ˈkwa kwa kwi ˗nu ˈpa ˈö ˗diëë zoodhö zoodhö, ˈkwa kwa ˗bha ˈkɔɔdhɛ ˈkun ˗së kö ˈkwa˗ ˗zɔn ꞊dhɛ kwa ꞊kpɔɔsü. w23.02 21 § 6-7.

Biblö ˗wopösü ˗dho ˈwɔn ˗së kë kwa ˗dhɛ ˗kɔ ˗kë ꞊dhɛ? ˗Kwa 2 Timote 3:​16, 17 ˗wɔn blɛɛˈˈ. ˗Ya ˗pö: ‹˗Wʋ ˈˈpɛpɛ ˈkö ˗bɛn zë ˗sü ˈka bha˗ ꞊trɔɔn ˗së ˗yö ˗dhö, (1) ˗wo kwa draan˗ pë ˈö kpengdhö ˗a ˈka, (2) kö˗ ˈdhɛ ˗nu ˈö ˈwaa ˗së ˈkwa˗ dɔ. (3) ˗Wo kwa zun zian ˈö ˗së ˗a ˗bha, (4) ˈwo kwa ꞊draan ˈwɔn ˗së kë ˗sü ˈka.› ˈWɔn ˗së ˗yiishiö ˈwo bhë, kwa ꞊mɔɔn˗ ˗bha ˈpö ˈkwa ˗an ꞊slɔɔ Biblö ˈˈɲan ˗nu ˈö ˈkwaa ˗an ˗wo pö ˈˈtʋ̈ŋ ꞊gban ˈka ˗an ˈgü. ˈKwa ˗kwɛzlan ˈbha ˗wo pö, ˈpë ˈkwa˗ ꞊draan ˈö ˗gban Zoova, ˗a ˗zopiʋ̈wɔn waa˗ ˗bha ˈtɔŋ˗ ˗gɛngbandhɛ ˗nu ˗bha ˗kwa kwa ˗zota ˗a ˈgü. ˗Kɔ ˈö kwa ˗takun ˗a ˈka kö pë ˗nu ˈö ˈwaa ˗së ˈkwa an˗ dɔ, ˗kwaa ˈsuan˗ bho. ˗Kɔ ˈö Biblö ˈˈɲan ˗nu ˗wo kwa ˗takun ˗a ˈka kö ˈkwa ˈˈtakɔ ɛɛnˈˈ ˗zotakɔ yaa ˗nu dɔ, ˈkwa ˈˈkan ˗an ˗bha kö ˈkwa ˈto ˗klu ˗sü ˈka Zoova ˗bha, ˗kwaa ˗bɛnzë. ˗Ya ˈgo mü, pë ˈö ˈkwa ˗dho ˗a kë kö ˈkwa mɛn ˗nu ˗takun ˗wo ˗da ʒian ˗së ˗ta ɛɛnˈˈ ˗wo wo ˗bha ˈwɔn yö ˗kɔ ˗nu bho ˈˈgblʋʋ, ˗kwa kwa ˗zota ˗a ˈgü. Biblö ˈˈɲan ˗nu ˈwo dho kwa draanˈˈ ˈwɔn ˗së kë ˗sü ˗bha kö ˈkwa ˈwɔn ˗nu yö ꞊dhɛ Zoova ˈdhö, ˗kwa ˗an mɛɛnˈˈ. Kwa ˗zo ˗ya ˈto ˈwɔn ˗së ˗yiishiö ˈwo bhë ˗an ˈˈpiʋ̈, kwa ˗dho Biblö ˗wopösü ꞊trɔɔn ꞊dede ꞊slɔɔ. w23.02 11 § 11.

Daniɛdhö ˗bha ˈsëëdhɛ ˗be ˗ya ˗to ˈˈdhiʋ̈ ˈö˗ pö ˈzü ꞊dhɛ Yesu ˗dho ˗gblüdëdhɛ zübho ˈˈtʋ̈ŋ ˈˈsɔɔplɛ ˈˈdhiʋ̈todhɛ ˈgü. ˈˈTʋ̈ŋ ˈö ˈwɔn ˗së ˈö ˈˈdhʋ̈ ˈö ˗kë ˗a ˈka kwa ꞊mɔɔn˗ ˗bha ˈkwa˗ dɔ ˗ee? (Dan. 4:​10-17) «ˈˈTʋ̈ŋ ˈˈsɔɔplɛ» ˈö Daniɛdhö ˗yö ˗wɩ ˗a ˈka bhë ˈnën ˗tɔ ˗kwɛ 2.520. ˈˈTʋ̈ŋ ˈö ˈˈdhʋ̈ ˗a zü ˗yö ˗dɔ ˗kwɛ 607 ˈgü K.Y.B. kö Babidhɔnömɛn ˗nu ˗wa Zoova ˗bha ˗gblüdë ˗kaanta ˈö kun Zedhizadhɛmö ˗a ˈkun, ˈyö˗ ˈˈdhiʋ̈ ˗yo ta ˈpö ˗kwɛ 1914 ˈgü K.Y. ˗Kwɛ ˈö bhë ˗a ˈka ˈnën Zoova ˗yö «mɛn ꞊dede ˈö˗ ˗bha pë ˈdhö ˗mü» ˈö ˗kë Yesu ˈka bhë, ˗a ˗ya ö ˗bha ˗Gblüdëdhɛ ˗gɔdhiʋ̈. (Ézéch. 21:​25-27) ˈWɔn ˗së ˗mɛɛn ˈö˗ ˗kë kwa ˗dhɛ? Pë ˈö ˗gban «ˈˈtʋ̈ŋ ˈˈsɔɔplɛ» ˗bha ˗a ˈgüman ˗sü ˗yö kwa ˗zogban ꞊dhɛ ˈwɔn ˗nu ˈö Zoova ˗yö ˗an ˈˈplüün bho kwa ˗dhɛ bhë, ˗wo ˗dho yö ˈko ˈˈdhiʋ̈ ˈˈtʋ̈ŋ ˗së ˗bha. Zoova ˗ya ˗pö ꞊dhɛ ö ˗dho Yesu kë ˗Gblüdë ˈka. ˈYö ˗dhɛ ˈö ˈˈtʋ̈ŋ ˈbha ˗yö ˗wo, ˈyö˗ ˗kë ꞊dhɛ ˗kɔ ˈö˗ pö˗ ˈka ˗a ˈdhö. ˗Ya ˗kë ˈö ˈkwa˗ ˈwɔn dɔ ꞊dhɛ ˈwɔn ˈˈwɛɛ ˈbha ˗nu ˈö ˗an to ˈˈdhiʋ̈ ˈö˗ ꞊blɛɛ bhë, ˗wo ˗dho yö ˈko ˈˈdhiʋ̈ ˗a ˈˈtʋ̈ŋ ˗bha. ꞊Ii, Zoova ˗bha ˗dhɛkpaɔyi «˗dho kë ö ˈˈtʋ̈ŋ ˗bha.»—Hab. 2:3. w22.07 3 § 3-5.