Kwa dho ˈˈdoo züdɔ ˗kɔ ˗kë ꞊dhɛ kwa ˗bha ˈsëëdhɛ ˈˈpɛn ˗nu ˈka?

ˈÖ sü kwɛ 2018, Zanvie ˗bha, ˗Kë Kletiɛn ˈka ˗sü waa ˗zlanwopö ˗yö ˗bhɔkwëë ˈsëëdhɛ ˈˈpian ꞊blɛɛsü ˗yö ˗zlanwopö ˗kɔ ˈˈslö ˈbhaa ˗nu ˗zɔn. ˗Wo kwa ꞊faan ˗mën ˈˈdoo ˗dɔ mɛn ˗nu ˈˈpiʋ̈ ˗sü ˗bha ˈö ˗ʒiö ˗a ˈka ˈsëëdhɛ ˗nu ˗an ˗dhɛ ˗sü ˗ta. ˗Zlanwopö ˗kɔ ˈˈslö ˗bha video ˗nu ˗wa ˗kɔ ˈö ˈkwa dho ˈˈdoo dɔ ˗a ˈka mɛn ˗nu ˈˈpiʋ̈ Biblö dosɛnŋ ˈka ˗a ˗zɔn kwa ˗dhɛ kö ˈkwa kwa ˗bha ˗zlanwopö ˗kɔ bho ˈˈgblʋʋ. ˈˈKɛɛ ˗a kë ˈˈdhʋ̈ ˗sü ˗ya ˗zɔn ꞊dhɛ ˈkwa ˗zlanwopö ˗ni ˈgü ˈkɔ ˈgü ˈkɔ ˈgü, kwa dua ˈyaa ˗mü kö ˈkwa ˈsëëdhɛ nu mɛn ˗nu ˗dhɛ ˗ee? ˗Abin! ˈKwa˗ ˈˈpiʋ̈ ˈkwa ˈˈdoo zübho, kwa ˗bha ˈsëëdhɛ ˈˈpɛn ˗nu ꞊mɔɔn˗ ˗bha kö ˗wo kwa ˗takun ꞊dedewo. ˈKwa ˗zlanwopö ˗ni ˈgü kwa ˗bha ˈsëëdhɛ ˈˈpɛn ˗nu ˈka, kwa ꞊mɔɔn˗ ˗bha ˈkwa pë ˈö yö ˗a kë:

1. ˗Kwa dhɛɛˈˈ ˈö˗ ˈˈpian ꞊blɛɛsü ˗ta bhë ˗a ˈkpɔ.

2. ˗Kwa Biblö ˈˈɲan ˗nu ˈwo˗ ˈˈpian ꞊plɛ ˗naan ˗ta ˈˈdhʋŋ bhë, ˗a ˗zɔn. ˈˈTʋ̈ŋ ꞊ya kë, ˗wo ˗nu ˈwo ˈsëëdhɛ bhë˗ ˈgü ˗kwa ˗an wo pö kö ˈkwa ˗an ˈˈdoo dɔ.

3. ˗Kwa ˈsëëdhɛ ˈˈpɛn bhë˗ ˈto˗ ˗gɔ kö ˈkwa˗ ꞊faan ˈmën kö ˗ya ˗wopösü ˈˈdhiʋ̈ta ˈˈtʋ̈ŋ ˈö ˗dhi ˗a ˗dhɛ ˗a ˈka.

4. ˈˈSanni ˈkwa ʒiö, ˗kwaa ˈˈpian «˗Ka ka ˗zota» ˗zɔn ˗a ˗dhɛ kö ˈkwa˗ ˈˈslö ꞊mɛɛn kö ˈkwa nu ˗a ˗yɔ ˈö Biblö ˗ya bɔ ˗a ˗zɔn ˗a ˗dhɛ ꞊taabha.

ˈKwa kwa yɛɛ kë ˗a mɛn ˈˈpiʋ̈, ˗kwa dhɛɛˈˈ bhë ˗a ˗yɔ bɔ kö ˈkwa˗ ˈˈwɛɛ ˈbha ˈö ˈkwa dho ˗a ˗yɔ bɔ ꞊taabha ˗a ˈkpɔ ˗a ˗gɔ. Kwa ꞊mɔɔn˗ ˗bha ˈkwa kwa ˗kɔ ˗yɛ dhɛɛˈˈ ˗nu ˈwo kwa ˗bha ɛntɛnɛtö ˈˈnimlɔn ɛɛnˈˈ ˈwo ˈsëëdhɛ ˈˈpɛn bhë ˗a ˈˈpian ˗totaabhasü ˗ta, ˗a do ˗bha. ˈKwa yö ˈˈtʋ̈ŋ ˗së ˗bha, ˗kwa ˈsëëdhɛ ˗be ˈnën Nɔɔn˗ ˗së ˗nu ˈwo go ˗Zlan ˈˈpiʋ̈! ɛɛnˈˈ ˗a ˈwɛɛ ˈbha ˈkwa mɛn ˗nu ꞊klaŋ ˗kë ˗a ˈka, ˗a ˗zɔn ˗a ˗dhɛ.