˗A ˗bha ˗zoyödhe ˗yö ˗da ˈgüdandhe ˈgü

Ablaamö ˗yö ö gbö Izaakö ꞊klaŋ ˗kë kö Zoova ˗dhɔ ˗ya kë, kö ˗wo ˗nu ˈö ˗an ˈˈplüün bho bhë ˗yö ˈdhaŋ˗ bho ˗an ˈˈdhiʋ̈. ˈˈKɛɛ ˗dhɛ ˈö Izaakö ˗kwɛ ˗yö ˗kë 25, ˈyö Zoova ˗ya pö Ablaamö ˗dhɛ ˗yö ˈwɔn ˈˈgbɩɩ˗ do ˈbha kë. ˈMën ˈö˗ pö ˗ya kë?

˗Zlan ˗ya ˗pö Ablaamö ˗dhɛ: ‹˗Bhö ü gbö, ü ˗bha ˈnën ga do ˈö ü ˗gɔ ˗bhë ˗a ˈsü kö ˈi ˈˈsaa˗ bho˗ ˈka n ˈˈdhiʋ̈ ˗tɔn ˈö Modhia ˗sɛ ˈgü bhë ˗a do ˗ta.› ˈPë ˈö Zoova ˗ya pö Ablaamö ˗dhɛ ˗ya kë bhë, Ablaamö ˈyaa kun ˗a ˗gɛn dɔ ˗ni ˈgü. ˈˈKɛɛ ˗yö ˈwɔn ˗man Zoova ˗ta ˈö˗ ˗kë.

ˈDhɛ ˗ta ˗dhɛ ˗yö ꞊kpɔɔ, Ablaamö ˈdhöö, ˗a gbö Izaakö ˈdhöö waa ˗bha yökëmɛn ˗nu ꞊plɛ ˗wo ˗dho Modhia. ˗Dhɛ ˈö ˗wa ˗dhɛkpaɔyi ˗yaaga ˗ta ˈsü, ˗wo ˗dɔ ꞊gblɛɛn ˈwo ˗kpan ˗tɔn ˗nu ˗bha. ˈYö Ablaamö ˗ya pö ö ˗bha yökëmɛn ˗nu ˗dhɛ ˗wo wo ˈˈɲan ˈto ˗an ˗gɔ kö waa Izaakö ˗wo ˈdho ˗wo ˈˈsaa˗ ˈö ˈˈdhʋ̈ ˗a bho. ˗Yö ˈˈwo ˗be ˗nu ö gbö ˗dhɛ ˈö yö ˗zë ˈyö ˗dhaanën sü. ˗Dhɛ ˈö ˗kë ˈˈdhʋ̈, ˈyö Izaakö ˗ya pö ö dë ˗dhɛ: ‹˗A ˈˈbhlaanën ˈö ˈkwa dho ˈˈsaa˗ bho ˗a ˈka bhë ˗yö ˈˈmɛn?› ˈYö Ablaamö ˗ya ˗yɔ bɔ ˗a ˗gɔ ˈö˗ pö: ‹N gbö, ˗Zlan yöö ˗dede ˈnën dho nu ˈˈsaapë bhë ˗a ˈka.›

˗Dhɛ ˈö ˈwo ꞊loo ˗tɔn ˈö bhë ˗a ˗ta, ˈyö ˈwo ˈˈsaabhotapë do dɔ. Ablaamö ˗yö Izaakö ˗gɛn waa˗ ˗kɔ ˗nu ˗klu, ˈyö˗ ˗wɔ ˈˈsaabhotapë ˈö bhë ˗a ˗ta.

ˈDhɛ Ablaamö ˗yö ö ˗bha ˗dhaanën sü, ˈö Zoova ˗bha ˈˈkië do ˗yö to dhaŋ˗ ˈgü ˈö˗ pö˗ ˗dhɛ: ‹Ablaamö! ˈBha ˈdho pë ˈbha kë ü bha ˈnën ˈka. ˈMan˗ ˈwɔn dɔ ꞊tɔn ꞊dhɛ ˗Zlan ꞊bhlëëyamɛn ˗mü ü ˈka, ˈyö ˗tɔ ꞊dhɛ ü ˈˈwɩ ˗sü ˈka˗ ˗bha kö ˈü ˗a nu ˈˈsaapë ˈka.› ˈYö Ablaamö ˗yö ö ˈˈɲan ˈˈdhiʋ̈ ꞊luu, ˈö ˗kpan ˈˈbhlaa gɔn do ˗bha kö ˗yö dɔ ˗sü ˈka ˗kpɔɔ ˈgü kö ˗a ˗söga ˗ya ʒiö pë ˈgü. ˈYö ö ˗kɔ ˗da ˗a ˈgü ˈˈvaandhö ˈö˗ sü ˈö ˈˈsaa˗ bho ˗a ˈka Izaakö ˈˈglʋʋ ˈgü.

ˈÖ sü yi ˈö bhë ˗a ˗bha, Zoova ˗yö Ablaamö ˗dhɛ ö ˈˈtɔŋdë. ˈPë ˗kë ˈö˗ ˗dhɛ ˈˈdhʋ̈ ü˗ ˗dɔ ˗ee? ˗Ya ˗dhɛ ˈˈdhʋ̈ ˈyö ˗tɔ ꞊dhɛ Ablaamö ˗yö pë ˈˈpɛpɛ ˈö Zoova ˗ya ˗dhɛ ˗a ˗gɔ bhë ˗a ˗kë, ˈkö ˗kë ꞊dhɛ ˈyaa kun ˗an ˈgüman ˗ni ˈgü.

Zoova ˗ya ˗pö ˈzü Ablaamö ˗dhɛ: ‹˗A dho ˈdhuëë˗ kpɔ ü ˗bha, ˈö ü ˗bha ˈnën ˗nu waa ü suugünën ˗nu ˗wo ˗kë ꞊va.› ˗A pö ˗kɔ ˈˈwɛɛ ˈgü ˗sü ˈka ö dho ˈdhuëë˗ kpɔ mɛn kpɛnŋdhö ˗nu ˗bha Ablaamö ˈˈsaa˗ ˈgü.