ˈWƆN ˗GƆ 8
Ablaamö waa Saadha ˗wo ˈwɔnman ˗Zlan ˗ta
ˈˈKwipö do ˈbha ˗kun Babɛdhö ˗dhɛ ˈˈsuee ˈwo ˗dhɛ ˈUu˗. ˗A ˈgümɛn ˗nu ˗kun ˗zlan ꞊va ˗dhɔkë ˗ni ˈgü. ˈˈKɛɛ gɔndë do ˈbha ˗kun mü ˈö kun Zoova dosɛnŋ ꞊nën˗ ˗dhɔkë ˗ni ˈgü. ˗A gɔndë ˈö ˈˈdhʋ̈, ˗wa ˗dhɛ Ablaamö.
Zoova ˗ya ˗pö Ablaamö ˗dhɛ: ‹Ablaamö, ˗bhö wlüüˈˈ i ˈkpɔ ˗pö ya˗ ˈgü, i dë ˗bha ˈkɔ ˈˈdhi ˈö yö ˗a ˈgü, kö ˈü ˈdho ˈü ˗ya ˈˈsɛ ˈa dho˗ ˗zɔn i ˗dhɛ bha˗ ˈgü.› ˗Zlan ˗ya pö ˈzü ˗a ˗dhɛ: ‹A ˗dho kë˗ ˈö ˈˈsɛ ˗gɔ ˗ziisü ˗yö go i ˈgü. A ˗dho ˈdhuëë˗ ˈkpɔ i ˗bha ˈö i ˈtɔ ˗yö bhɔ ˈö n man ˈdhuëë˗ ˗yö mɛn kun i ˈsaa˗ ˈgü.›
˗Dhɛ ˈö Zoova ˗yö Ablaamö bɔ ˗a ˗bha ˈkö ˗kë ꞊dhɛ ˈyaa kun ˗a dɔ ˗ni ˈgü, ˗yö ö ˗zoyö Zoova ˗dhɛ. Ablaamö, ˗a ˗bha dhebɔ Saadha, ˗a dë Tedha waa˗ ꞊dhegblü ˗bha ˈnën Lɔtö ˗wo ˈwɔn ˗man ˗Zlan ˗ta. ˗Wo wo ˗bha ꞊kwɛɛ˗ ˗nu ˗baa ˈwo ˈˈta ꞊gblɛɛn bhë˗ sü.
ˈDhɛ Ablaamö waa ö ˗bha ˈkɔɔmɛn ˗nu ˗wo ꞊loo ˗dhɛ ˈö Zoova ˗ya pö ˗an ˗dhɛ wo ˈdho mü bhë ˗a ˈgü, ˗a ˗kwɛ ˗kun 75. ˗Wo ˗kun ˗a ˗dhɛ ˗dhɛ ˗ni ˈgü Kanaan. ˗Wo ˗to mü ˈö ˗Zlan ˗ya pö Ablaamö ˗dhɛ ꞊dhɛ ˗yö ˗dho ‹ˈˈSɛgɔ ˈö bhë ˗a ꞊gbaɔ ˗a suugünën ˗nu ˗gɔ.› ˈˈKɛɛ ˗a ˈˈtʋ̈ŋ ˈö bhë ˗a ˈka kö Ablaamö waa Saadha ˗wa kë zii, ˈgo mü kö ˈnën ˈyaa ˗an ˗gɔ. Zoova ˗dho ˗a kë ꞊dhɛ kö pë ˈö˗ ˈˈplüün bho bhë ˗yö yökodhiʋ̈?
«Ablaamö ˗dɩ ˈpö, ˗a ˗bha ˗zʋ ˗yö ˗Zlan ˗dhɛ ˗sü ꞊në˗ ˗wɔn ˈgü, ˈyö˗ bɔ ˈö ˗Zlan ˗ya wo ˈˈsɛgɔ ˈö dho˗ kë˗ ˈkɛan˗ ˈka ˗a bhang ˗nu ˗dhɛ yi ˈbha ˈka bha˗ ˈgü bha ˈyii ˗kɔ. ˈYö ꞊wlü ö ˗dɩ ˗gɔ ˈˈsɛ ˈgü ˈö dho ö ˗gɔ ˈˈpiʋ̈, kö ˈyaa ö ˈdhodhɛ ˗zian dɔ.» —Eblö 11:8