꞊Dhuëŋ ˈö ˈwɔnman ˗Zlan ˗ta

Zozɛfö ˗kun Zakɔbö ˗bha ˈnëngɔɔn˗ ˗nu bhë ˗a ˈˈtɩɩ ˗sü do ˈka. ˗A dhoo ˗nu ˗wa ˈsuanbho ꞊dhɛ yö ˈnën kun ˗an dë ˗bha ˈnën dhɔɔbhaasü ˈka. Ü ˗bha ˈgü ˗wö ˗kë wo ˗de ˈgü ˗kɔ ˗kë ꞊dhɛ? ˗Wo ˗kun ꞊druɛɛ kë ˗ni ˈgü ˗a ˗bha ˈö˗ ˗san ˗ya ˗nu ˗kë. Zozɛfö ˗yö ˈˈɲɛɛn do ˈbha ˗bho ˈö˗ ˗gɛn dɔ ö ꞊dhegblü ˗nu ˗dhɛ. ˗A ˗kë ˈˈdhʋ̈ ˗sü ˗ya ˗kë ˈö˗ ˗san ˗yö ˗an ˗kë ˈzü ˈgbɛ. ˗An ˗bhaa ˈgü ˗a ˗bha ˈˈɲɛɛn ˗nu ˈö ˗an bho bhë ˗an ˗gɛn ˈnën ˗tɔ ꞊dhɛ yi ˈbha ˗dho ˗wo ˈö ˈwo ˗nu ˈwo yö wo kpɔn ˈgü ˗a ˗dhɛ. ˈÖ sü yi ˈö bhë ˗a ˗bha, ˗wo ˗ya ˗a ˗san ˗zë ˗sü ˗bha ˈzü ꞊dedewo.

Yi do ˈka kö Zozɛfö ꞊dhegblü ˗nu ˗wo wo ˈˈɲan ˈto ni ˈgü ˈˈbhlaa ˗nu ˗bha Sisɛmö ˗dhɛ ˈˈsuee, ˈyö Zakɔbö ˗yö Zozɛfö bɔ kö ˈö ˈdho ˈö ˗wo ˗an ˗bha. ˈDhɛ ˈwo˗ yö kö ˗yö nu ˗ni ˈgü, ˈyö ˈwo˗ pö wo ˈko ˗nu ˗dhɛ: ‹˗Ka ˗dhɛga, kwa ˗bha ˈˈɲɛɛnbhomɛn bhë ˈnën ˈö nu ˗ni ˈgü bhë. ˗Kwaa ˗zë.› ˈYö ˈwo ˗pö ˗a ˗ta, ˈwo˗ kun ˈwo˗ ˗zuö ˗klɔŋ ꞊gblɛɛn do ˈgü. ˈˈKɛɛ Zuda ˈö ˗kë ˗an ꞊dhegblü do ˈka bhë ˗ya ˗pö ˗an ˗dhɛ: ‹ˈKwa ˈdho ˗a zë! ˗Kwa ˈˈdhoodɔ ꞊dhɛ ꞊dhuëŋ ˈdhö.› ˗Dhɛ ˈö ˗kë ˈˈdhʋ̈, ˈyö ˈwo Zozɛfö ˈˈdhoodɔ ˈwëë˗ ˈˈtamanga ˗kɔŋ ꞊plɛ ˗bha ˈˈdhoodɔmɛn ˗nu ˈwo go Madianö, ˈwo kun ˈdho ˗ni ˈgü Ezitö bhë ˗an ˗gɔ.

Zozɛfö ꞊dhegblü ˗nu ˗wa ˗bha sɔ ˗sü ˈwo˗ ˗ʒiö ˗bho ꞊ɲɔɔn ˈgü ˈwo dho ˗a ˈka wo dë ꞊dhɛ ˈwo˗ pö ˗a ˗dhɛ: ‹Ü gbö ˗bha sɔ bhë ˈyaa ꞊nën ˈö yö ˗ee?› ˈDhɛ ˗kë ˈˈdhʋ̈, ˈö Zakɔbö ˗ya pö ö ˗de ˗dhɛ ꞊dhɛ wü ˈˈdhiʋ̈sü do ˗ya ö gbö zë. ˗Wëë ˗yö bɔ ˗a ˗ta ꞊dedewo, ˈö mɛn ˈbha ˗kɔ ˈyaa kun ꞊mɔɔn˗ ˗ni ˈgü ˗a ˗bha kö ˗ya zuʋ̈ˈˈ ꞊dhuaa.

˗Dhɛ ˈwo wo Ezitö, ˗wo Zozɛfö ˈˈdhoodɔ ꞊dhɛ ꞊dhuëŋ ˈdhö gɔndë ꞊bhlëësü do ˈwo˗ ˗dhɛ Potifaa bhë ˗a ˗gɔ. ˈˈKɛɛ Zoova ˗yö ˗kun Zozɛfö ˈˈpiʋ̈. Potifaa ˗ya ˗yö ꞊dhɛ Zozɛfö ˗yö yö ˗kë ˗së. ˈGo mü ˈzü ˗yö ˗kun ˗zoyö ˗a ˗dhɛ ˗mɛn ˈka. ˗A ˗wɔn ˈgü ˗yö pë ˈˈpɛpɛ ˈö kun ˗a ˗gɔ bhë, ˗a ꞊gban ˗nu Zozɛfö ˗dhɛ kö ˗yö ö ˗zokë ˗a ˈˈpiʋ̈.

Potifaa ˗bha dhebɔ ˗ya ˈsuaanbho ꞊dhɛ Zozɛfö ˗yö gɔndë ˗së ꞊dede ˈö˗ ˈgü ˈdhö ˈˈgbɩɩ˗ ˗a ˈka. Yi ꞊gban ˈˈpɛpɛ ˈka, ˗yö ˗kun ˗a pö ˗ni ˈgü Zozɛfö ˗dhɛ ˗an bha sɛɛˈˈ ˗yö kë do. ˈMën Zozɛfö dho ˗a ˗kë? ˗Yö ˗kun ˗kɔ ˗ni ˈgü ˗kplawo ˗a ˗dhɛ, ˗a pö ˗sü ˈka: ‹˗Abin ˈwɔn yaa ꞊dede ˈnën bhë. N ˗gɔmɛn ˗yö ö ˗zoyö n ˗dhɛ ꞊dedewo, ˈyö ˗a bha dhebɔ ˗mü ü ˈka. ꞊Ya kë ꞊dhɛ ko ˗bha sɛɛˈˈ ˗ya kë do, kö ˈman ˈwɔn yaa kë ˗Zlan ˈka.›

Yi do ˈka, ˈyö Potifaa ˗bha dhebɔ ˗yö ˈˈgbɩɩdhɛ ˗wɔ Zozɛfö ˗ta kö ˗an ˗bha sɛɛˈˈ ˗yö kë do, ˈyö˗ kun ˗a ˗bha sɔ ˈka, ˈˈkɛɛ ˈyö Zozɛfö ˗yö ꞊duëë. ˈDhɛ Potifaa ˗yö nu ˈˈkwɛnŋdhö, ˈyö˗ ˗bha dhebɔ ˗ya pö ˗a ˗dhɛ ꞊dhɛ Zozɛfö ˗kun ˗a ˈˈpiʋ̈ kö ˗an ˗bha sɛɛˈˈ ˗yö kë do ˈˈgbɩɩdhɛ ˈka. Potifaa ˗bha dhebɔ yö ˈti gagade pö. ˈWɔn ˗yö ˗shiö Potifaa ˗dhɛ ꞊dedewo, ˗a ˗wɔn ˈgü ˗yö Zozɛfö ˗zuö ˗kasho ˈgü. ˈˈKɛɛ ˈkö ˗kë ˈˈdhʋ̈, Zoova ˗zo ˈti bhɔ Zozɛfö ˈka.