Zoova ˗zo ˈˈti bhɔ Zozɛfö ˈka toŋtoŋdhö

ˈDhɛ Zozɛfö kun ˗kasho ˈgü, Ezitö ˗gblüdë Fadhaɔn ˗yö ˈˈɲɛɛn do ˈö mɛn ˈbha yö ˈti ꞊mɔɔn ˗a ˗gɛn dɔ ˗sü ˗bha ˗a ˗bho. ˗A ˗bha yökëmɛn do ˗ya ˗pö ˗a ꞊dhɛ Zozɛfö ˗yö ꞊mɔɔn˗ ˗bha. ˈYö Fadhaɔn ˗ya pö ˗wo nu Zozɛfö ˈka.

Fadhaɔn ˗ya ˗pö: ‹Ü ꞊mɔɔn˗ ˗bha ˈü n man ˈˈɲɛɛn ˗gɛn ˗dɔ n ˗dhɛ ˗ee?› ˈYö Zozɛfö ˗ya pö˗ ˗dhɛ: ‹˗Bhöpë ˗dho kë ꞊va Ezitö ˗sɛ ˈö yö ˗a ˈgü ˗kwɛ ˈˈsɔɔplɛ ˈˈpiʋ̈, ˈˈkɛɛ ˗kwɛ ˈˈsɔɔplɛ ˈdhɛ ˗nu ˈwo dho dɔ ˗an ˈˈpiʋ̈ ˗bhöpë ˈyii ˈdho kë ˗dhö. ˗Bhö ü ˗kɔ ˈˈyɛ mɛn ꞊kpɔɔsü do ˗bha kö ˗yö ˗bhöpë kpaaˈˈ ˈkwëë˗ ˗dhɛ ˗nu ˗bha kö din ˈyaa dho ˈˈsɛgümɛn ˗nu zë.› ˈYö Fadhaɔn ˗ya pö ˗a ˗dhɛ: ‹ˈMan n ˗kɔ ˈˈyɛ i ˗bha. ˗Ya ˈgo n ˗bha, bhi ꞊nɛn ˈi dho kë mɛn ˗wɔngbɩɩsü ꞊plɛ ˗naan ˈka Ezitö ˗sɛ ˈö yö ˗a ˈgü.› ˈDe Zozɛfö ˗takun ˈˈɲɛɛn bhë˗ ˗gɛn dɔ ˗sü ˗bha? Zoova ˗mü.

˗Kwɛ ˈˈsɔɔplɛ ˈˈpiʋ̈ Zozɛfö ˗yö ˗bhöpë ˗nu ˗kpaa ˈkwëë˗, ˈö din ˗yö ˗da ˈˈsɛ ˗todhösü ˗ta ꞊dhɛ ˗kɔ ˈö˗ pö ˈka ˗a ˈdhö. Mɛn ˗nu ˗wo ˗go ˈˈsɛ ꞊gban ˈˈpɛpɛ ˈgü kö ˗wo nu ˗bhöpë ˈdhɔ ˗a ˗gɔ. ˗Dhɛ ˈö˗ dë Zakɔbö ˗ya man ꞊dhɛ ˗bhöpë ˗yö Ezitö, ˈyö ö ˗bha ˈnëngɔɔn˗ ˗nu ˗kɔŋ do bɔ kö ˗wo ˗bhöpë ˈdhɔ mü.

Zakɔbö gbö ˗nu ˗wo ˗dho Zozɛfö ˈˈpiʋ̈ ˈyö Zozɛfö ˗yö to mü ˈö ˗an dɔ, ˈˈkɛɛ wo ˗zë wo ˈti˗ dɔ. ˗Wo yö wo kpɔn ˈgü ˗a ˈˈdhiʋ̈ ꞊dhɛ ˗kɔ ˈö˗ yö ˗a ˈka ˈˈɲɛɛn ˈgü kö ˗yö ꞊tun wlüünën ˈka bhë, ˗a ˈdhö. Zozɛfö ˗kun ˗a ˈˈpiʋ̈ kö ˈö˗ ˈwɔn dɔ ꞊ya kë ꞊dhɛ ö ˗san ˗yö ö ꞊dhegblü ˗nu ˈgü ˗kplawo. ˗A ˗wɔn ˈgü ˈö˗ pö ˗an ˗dhɛ: ‹˗Dhɛsuanbhomɛn ˗nu ˗mü ka ˈka. Ka nu kö ˗kɔ ˈö ˈˈsɛ ˈö yö ˈö˗ ˈka ˈka˗ dɔ.› ˈYö ˈwo˗ pö˗ ˗dhɛ: ‹˗Abin ˗wa! Yi go Kanaan ˗sɛ ˈgü. Yi dë ˗bha ˈnën ˗nu ˗wo 12. Yi ꞊dhegblü do ˗ya ga, ˈyö ˗a mɛn ˈˈtɩɩ ˗sü ˗ya ˈto yi dë ˈˈpiʋ̈.› ˈYö Zozɛfö ˗ya pö ˗an ˗dhɛ: ‹꞊Ya kë ꞊dhɛ ˈka nu ka ꞊dhegblü gɔɔn˗ ˗kaanta bhë ˗a ˈka, ˈyö ˗a dho ˈdhaŋ bho ka ˈˈdhiʋ̈.› ˈYö ˈwo wo yɛɛ ˗kë wo dë ˈˈpiʋ̈.

ˈDhɛ ˈö ˗an ˗bha ˗bhöpë ˗yö ɲën, ˈö Zakɔbö ˗yö ö gbö ˗nu bɔ ˈzü Ezitö ˗sɛ ˈgü. ˈˈKɛɛ ˈdhɛ ˈwo kun ˈdho ˗ni ˈgü, ˗wo ˗dho wo ꞊dhegblü ˗kaanta Bɛnŋzamɛn ˈka. ˗Kɔ ˈö Zozɛfö ˗yö ˗an ˈgüdan ˗a ˈka, ˈyö ꞊nɛn. ˗Yö ö ˗bha ˈˈyi ˗mü ˗a ˈgü ˗kɔɔ ˈö ˈwëë˗ ˈka ˗a ˗sü ˈö˗ ˗bin Bɛnŋzamɛn ˗bha ˈˈkpɔɔ ˈgü. ˗Dhɛ ˈö Zozɛfö waa ö ˗bha yökëmɛn ˗nu ˗wo ˗kpan ˗a ˗bha ˗kɔɔ ˈö bhë ˗a ˗bha Bɛnŋzamɛn ˗bha ˈˈkpɔɔ ˈgü, ˗a ˈwɔn ˗ya ꞊dhegblü ˗nu ˗kun ꞊dedewo. ˈDhɛ ˗kë ˈˈdhʋ̈, ˈwo ꞊bhɛɛ Zozɛfö ˗dhɛ kö ˗yö ˈwɔn bho wo ˗zë wo ˈgü Bɛnŋzamɛn ˈˈgblʋʋ ˈgü.

Zozɛfö ˗to mü ˈö˗ ˈwɔn dɔ ꞊dhɛ ö ꞊dhegblü ˗nu ˗wa wo ˗bha ˈwɔn ˗kë ˗kɔ ˗nu bho ˈˈgblʋʋ. Zozɛfö ˈti ꞊mɔɔn˗ ˗bha kö ˈö ö zuʋ̈piʋ̈wɔn ˗nu ˗bin ˈzü. ˗A ˗wɔn ˈgü, ˈö ˗ya ˈˈgbʋ bɔ ˗sü ˗bha ˈö˗ pö: ‹Man Zozɛfö ˗mü. N dë ꞊tun ö ˈˈɲaan ˗ee?› ˗A ˈwɔn ˗ya ꞊dhegblü ˗nu ˗kun ꞊dedewo. ˗Yö ˗an ˗zogban ˈö˗ pö: ‹ˈKa dho kë ka ˗de ˈgü ˈya˗ n ˈˈdhɔɔ ˈka˗ dɔ bhë˗ ˗wɔn ˈgü. ˗Zlan ˈnën˗ nu n ˈka yö, kö ˈka dha. ˗Ka ka ꞊yɛɛkë ˈzozodhö, ˈka ˈdho n dë mɛɛnˈˈ.›

ˈYö ˈwo wo ꞊yɛɛkë ˈwo nɔɔnwo ˗së bhë ˗a pö wo dë ˗dhɛ, ˈwo˗ sü ˈwo nu ˗a ˈka Ezitö ˗sɛ ˈgü. Zozɛfö waa ö dë ˗wo ˗kpan wo ˈkwëë˗ kö ˗kwɛ ꞊va ꞊dede ˗ya ʒiö.