Dhaabö ˗yö ˈwɔn ˈsuanbhomɛn ˗nu ˗bin

ˈDhɛ ˈwɔn ˈsuanbhomɛn ˗nu ˗wo ˗lo Ʒedhiko, ˗wo ˗dho dhebɔ do ˈwo˗ ˗dhɛ Dhaabö bhë ˗a ˗gɔ ˈkɔɔ. ˈDhɛ Ʒedhiko ˗gblüdë ˗ya ˈwɔn dɔ ˈˈdhʋ̈, ˈyö ö ˗bha ˈˈsɔdha ˗nu bɔ Dhaabö ˈˈpiʋ̈. ˈYö Dhaabö ˗yö ˈwɔn ˈsuanbhomɛn ˗nu ˈwo bhë ˗an ˗bin ö ˗gɔ ˈkɔɔ, ˈö ˈˈsɔdha ˗nu bɔ ʒiaan ˈˈwɛɛ ˈka. ˗Ya ˗pö ˈwɔn ˈsuanbhomɛn ˗nu bhë ˗an ˗dhɛ: ‹A ˗dho ka ˗takun ˈyö ˗tɔ ꞊dhɛ Zoova ˗yö ka ˈˈpiʋ̈, ka ˗kɔ ˗dho ʒiö ˈˈsɛ ˈö yö ˗a ˗gɔ. ˈˈKɛɛ ˗ka dɔ ˈˈgbɩɩ˗ ˈka ka ˗wo ˗bhö n ˗dhɛ ꞊dhɛ ka ˈti dho pë ˈbha kë yaa n man ˈkɔdhigümɛn ˗nu yi ˈka.›

ˈYö ˈwɔn ˈsuanbhomɛn ˗nu ˗wa pö Dhaabö ˗dhɛ: ‹Pë ˈbha ˈti dho kë ü ˗bha ˈkɔdhigümɛn ˗nu ˈka.› ˈWo˗ pö ˈzü: ‹˗Bhö bhuʋ̈ˈˈ ga ˗zɔɔndhö do ˗klu ü bha fönɛtrö ˈˈdhiʋ̈ kö ˈka dha.›

Dhaabö ˗ya ˗kë ˈö ˈwɔn ˈsuanbhomɛn ˗nu ˗wo bɔ ˗a ˗bha fönɛtrö ˈˈdhiʋ̈ ˈwo ꞊yɔɔ bhuʋ̈ˈˈ ga ˈka. ˗Wo ˗dho ˈwo wo ˗bin ˗tɔn ˗nu ˈgü ˗dhɛkpɔayi ˗yaaga ˈˈpiʋ̈, ˈwo wo yɛɛkë Ʒosue ˈˈpiʋ̈. ˈYö Izraɛdhömɛn ˗nu ˗wo Zuudɛn ga ˗kan, ˈö ˈwo wo de ꞊baa kö ˗wo ˈdho ˈˈsɛ ˈö bhë ˗a ˈkun. ˈˈKwipö ˗blɛɛsü ˈwo˗ kun ˈnën ˗tɔ Ʒedhiko. Zoova ˗ya ˗pö ˗an ˗dhɛ ˗wo glüüˈˈ ˈˈkwipö ˈö bhë ˗a ˗zü ˗gɛnɲan ˈka do ˗dhɛkpɔayi do ˈgü, ˈyö ˗wa kë ˈˈdhʋ̈ ˗dhɛkpɔayi ˈˈsɔɔdo ˈˈpiʋ̈. ˗Dhɛkɛpɔayi ˈˈsɔɔplɛ ˗naan ˈka, ˗wo ˗glü ˗gɛnɲan ˈka ˈˈsɔɔplɛ ˈˈkwipö ˈö bhë ˗a ˗züzü. ˈDhɛ ˗kë ˈˈdhʋ̈, ˈyö ˈˈsaabhomɛn ˗nu ˗wo ˈˈtrʋʋ ˗piö, ˈyö ˈˈsɔdha ˗nu ˗wo ˗ya ˈˈgbla ˗sü ˗bha ˈˈgbɩɩ˗ ˈka ꞊dedewo. ˈYö ˈˈkwipö bhë ˗a ˈˈkplʋʋ ˗nu ˗wo ˗ya ˈwü ˗sü ˗bha, ˈˈkɛɛ Dhaabö ˗zë ˗a ˗bha ˈkɔ ˈö kun ˈˈkplʋʋ ˗ta ˈˈdhuŋ bhë, ˗yö ˗to ö ˗wɛɛ ˈgü. Dhaabö waa ö ˗bha ˈkɔdhigümɛn ˗nu ˗wo ˗dha, ˈö sü ꞊dhɛ ˗wo wo ˗zoyö Zoova ˗dhɛ.