Davi waa Saidhö

ˈDhɛ Davi ˗yö Godhiatö zë, ˈyö Saidhö ˗yö ö ˗kɔ ˗yɛ ˗a ˗bha kö ˈö kë ˗a ˗bha ˈˈsɔdha ˗nu ˗gɔmɛn ˈka. ˈWɔn ꞊va ꞊dede ˗wo ˗dhi Davi ˗gɔ ˈö˗ ˈtɔ ˗yö ˗ya bhɔ ˗sü ˗bha. ˈˈTʋ̈ŋ ꞊gban ˈka Davi ˗ya ˈgo ˗gblü ˈˈpiʋ̈, dhebɔ ˗nu ˗wo ˈˈtan ˗kë ˈwo nu ˗a ˈka ˗a ˗gɔ ʒian ˈwo ˈˈtan ˗nu bho ˈwo˗ pö: ‹Saidhö ˗zë ˗yö mɛn ˈˈgblü ꞊va ˗zë, ˈˈkɛɛ Davi ˗zë ˗ya mɛn ˈˈgblü ˗kɔŋ ꞊va zë.› ˗Dhɛ ˈö ˗kë ˈˈdhʋ̈, Saidhö ˗yö ˗ya ꞊druɛ kë ˗sü ˗bha Davi ˗bha ˈö kun ˗a ˈˈpiʋ̈ kö ˈö˗ zë.

Davi ˗kun mɛn ˈö dɔ kɔŋ zë ˗dhɛ ˈka ˗së ˈka ˗a ˈka. Yi do ˈka, Davi ˗kun kɔŋ zë ˗ni ˈgü Saidhö ˗bha ˈka, ˈyö Saidhö ˗yö ö ˗bha ˈdüga ˗zuö ˗a ˈˈpiʋ̈. Davi ˗yö ö ˗gɔ ˗bho ˗a ˗gɔ ʒian ˗a ˈˈtʋ̈ŋ ˗së ꞊dede ˗bha, ˈö ˈdüga bhë ˗yö ˗gban ˈkɔ ˈbhaŋ ˈgü. ˈÖ ˗sü ˈˈtʋ̈ŋ bhë˗ ˗bha, Saidhö ˗ya ˈˈslö ˗mɛɛn ˈko ˈta ꞊va kö ˈö Davi zë. ˗A ˗wɔn ˈgü Davi ˗yö ˗duëë ˈö dho ö ˗bin ˈˈyɛta.

Saidhö ˗yö ˈˈsɔdha 3000 ˗sü ˈwo dho Davi mlɛɛnˈˈ. ˗Yö dho ˈö ˗da ˗gwë ꞊duudhɛ ꞊dede ˈö Davi waa ö ˗bha ˈˈsɔdha ˗nu wo ˗kun ˗bin ˗sü ˈka ˗a ˈgü bhë ˗a ˈgü. ˈYö˗ ˗bha ˈˈsɔdha ˗nu ˗wa pö: ‹˗A ˈˈtʋ̈ŋ ˈnën ˈö yö kö ˈü Saidhö zë.› Davi ˗yö ˗ɲɔɔn Saidhö ˗bha ˈˈyɛɛdhö ˈö˗ ˗bha gblɔŋ ˈˈtʋ ˈˈdhiʋ̈ bho. Saidhö ˈti˗ ˈwɔn dɔ. ˈDhɛ ˗kë ˈˈdhʋ̈, Davi ˗yö ˗kë ö ˗de ˈgü ˈya˗ ˈö ˗sü ˗dhɛ yö ˈti ꞊bhlëë ˗ya Zoova ˗bha ˗gblüdë ˈö ˈˈɲɔɔn ˗loo ˗a ˗troo bhë, ˗a ˗bha. Yö ˈti ˈˈwɩ˗ ˗bha kö ö bha ˈˈsɔdha ˗nu ˗wo ˈko ˗ya Saidhö ˗bha. ˗Dhɛ ö Saidhö ˗yö yö ˈˈkpɛnŋ, ˗ya ˗dhɛ ˈö˗ pö ˗a ˗dhɛ: ‹˗A ꞊mɔɔn˗ ˗bha ˗be ka˗ ü zë.› Saidhö ˗dho ö ꞊kwaa Davi ˈˈpiʋ̈ kë ˗sü ˗zü ˗ee?

˗Abin! ˗Yö ˗to Davi ˈˈpiʋ̈ kë ˗sü ˗bha ꞊kplawo. Gbeŋ do ˈka, Davi waa ö ꞊dhegblü ˗bha ˈnën Abishai ˗wo ˗dho ˈwo ˗da ˗dhɛ ˈö Saidhö waa ö ˗bha ˈˈsɔdha ˗nu ˈwo kun ˗a ˗bha bhë ˗a ˈgü. Abönɛɛ ˈö kun ˈˈɲan ˗to Saidhö ˗bha ˗mɛn ˈka bhë, ˗yö ˗kun yi zë ˗ni ˈgü ˈpö. ˈYö Abishai ˗ya pö: ‹Saidhö ˈnën ˗wɔ bhë, dɔ kö ˈa˗ zë.› ˈYö Davi ˗ya pö: ‹Abin! Zoova ˈnën ˈdho ˈwɔn bho ˗a ˈgü. ˗Kwa ˗bha ˈdüga waa ˗a ˗bha ˈˈyi ˗ya ˈgü pë ˗sü ˗ʒiaan kö ˈkwa ʒiö.›

ˈYö Davi ˗yö ˗da ˗tɔn ꞊gblɛɛn do ˈö kun Saidhö ˗bha ꞊kanŋ ˈˈsue bhë ˗a ˗ta. ˈYö dɔ mü ˈö ˗gbla ˈö˗ pö: ‹Abönɛɛ, ˈmën ˗kë ˈö ü ˈti ˈü ˗zo kë ü ˗bha ˗gblüdë ˈˈpiʋ̈. Saidhö ˗bha ˈˈyi ˗mü ˗a ˈgü pë waa ˗a ˗bha ˈdüga ˗nu ˗wo ˈˈmɛn?› ˈDhɛ Saidhö ˗yö Davi ˗wo dɔ ˈö˗ pö: ‹Ü ꞊mɔɔn˗ ˗bha ˗be kö ˈü n zë ˈˈkɛɛ ü ˈti˗ kë ˈˈdhʋ̈. A˗ ˈwɔn dɔ ꞊dhɛ bhi ˈnën ˈü ˗dho kë Izraɛdhömɛn ˗nu ˗bha ˗gblüdë ˗dɛɛ ˈka.› ˈYö go Davi ꞊kee˗ ˈö dho ö ˗gɔ ˈkɔɔ. ˈˈKɛɛ Davi ˗san ˈyaa kun Saidhö ˗bha ˈkɔɔ mɛn ˗nu ꞊gban kë ˗ni ˈgü.