Yesu ˗yö ö ˗kɔ ˗yɛ Sɔdhö ˗bha

Sɔdhö ˗kun Wlɔmö mi ˈö bhɔ Taasö waa Fadhiziɛn ˈö Zuifö ˗nu ˗bha ˈtɔŋ˗ dɔ ˗së ˈka, ˗a ˈka. Kletiɛn ˗nu ˗san ˗kun ˗a kë ˗ni ˈgü. ˗Yö kletiɛn gɔɔn˗ ˗nu waa dhoŋ ˗nu ˗an ˗kun ˗an ˗gɔ ˈkɔɔ, ˈö ˗an ˗da ˗kaso ˈgü. ˗Dhɛ wo kun Etiɛnö ˗zuö ˗ni ˈgü ˗gwö ˈka kö ˗wa zë, ˗yö ˗kun dɔ ˗sü ˈka mü.

Kletiɛn ˗nu ˈwo kun Zedhizadhɛmö, woo dosɛnŋ ˗an ˈkun ˗sü ˈyaa kun Sɔdhö ˗zokun ˗ni ˈgü. ˗A ˗wɔn ˈgü ˗ya ˗pö ˈˈsaabhomɛn ˈkpii˗ ˗dhɛ ˗wa bɔ Damasö, kö ˗yö kletiɛn ˗nu ˈwo mü ˗an ˈkun ˈpö. ˈDhɛ Sɔdhö ˗yö yö Damasö ˗pö ˈˈsɔɔ, ˈyö ˈˈshiʋ̈ ˈbhü ˗yö sɔ˗ ˗ta ˈö ꞊klëën ˗a ˗zü, ˈö ˗puö ˈˈshia˗. ˈYö ˗wo do ˈbhaa ˗ya pö ˗a ˗dhɛ: ‹Sɔdhö, ˈmën ˗kë ˈü n ˈˈklʋʋ bhɔ?› ˈYö Sɔdhö ˗ya pö: ‹N Dëmɛn, de ˗mü ü ˈka?› ˈYö ˗wo ˈö bhë ˗ya pö: ‹Man Yesu ˗mü. ˗Bhö ˗da ˈplöö. ˈPë ü dua ˈdhö ˗mü kö ˈü˗ kë, ˗wo ˗dho ˗a pö ü ˗dhɛ.› Pɔdhö ˗to ˈˈshia˗ mü ˈö˗ ˈˈɲɛɛn ˗yö ꞊tröö. Mɛn ˗nu ˗wa ˗kɔ ˗kun ˈö ˈwo ˗da ˈplöö.

˗Klu ˗Zlan ˗bha ˗mɛn do ˈbha ˗kun Damasö ˈö ˈwo˗ ˗dhɛ Ananiasö. Yesu ˗ya ˗pö ˗a ˗dhɛ ˈˈɲɛɛn ˈgü ꞊dhɛ: ‹˗Bhö ˈdho Zuda ˗gɔ ˈkɔɔ, ˗kpinŋga ˈwo˗ ˗dhɛ Ʒiaan ˈö dɔ vɛɛdhö bhë ˗a ˗ta, kö gɔndë ˈwo˗ ˗dhɛ Sɔdhö bhë, ˈü˗ mɛɛnˈˈ.› ˈYö Ananiasö ˗ya pö: ‹N Dëmɛn, ˈwɔn ˈˈpɛpɛ ˈö ˗gban gɔndë ˈö bhë ˗a ˗bha, a˗ ˗dɔ. Yö ꞊nën ˈö ü ˗bha gwëëˈˈ ˗nu ˗da ˗ni ˈgü ˗kaso ˈgü!› ˈˈKɛɛ Yesu ˗ya ˗pö ˗a ˗dhɛ: ‹˗Bhö ˈdho, ˈyö ˗tɔ ꞊dhɛ ˈman n ˗kɔ ˗yɛ ˗a ˗bha kö ˗yö nɔɔn˗ ˗së pö ˈˈsɛ ˈˈwɛɛ ˈgümɛn ˗nu ˗dhɛ.›

ˈDhɛ ˗kë ˈˈdhʋ̈, Ananiasö ˗yö ˗kpan Sɔdhö ˗bha ˈö˗ pö ˗a ˗dhɛ: ‹Sɔdhö, n ꞊dhegblü, Yesu ˗ya n bɔ kö ˈa ü ˈˈɲan ˈˈpʋ.› Sɔdhö ˗to ˈˈshia˗ mü ˈö ˗dhɛ yö. ˗Yö ˈwɔn ˈö ˗gban Yesu ˗bha ˗a ˗draan, ˈö ˗kë ˗a ˗bha gwëëˈˈ ˈka. ˈDhɛ ˗kë kletiɛn ˈka kö ꞊waa˗ bɔ ˈˈyi ꞊bhaa, ˗yö ˗ya ˗zlanwopö ˗sü ˗bha ˗yakwëëkëgükɔ ˗nu ˈgü ö ꞊dhegblü kletiɛn ˗nu ˈˈpiʋ̈. ˈDhɛ ˈö Zuifö ˗nu ˈwo ˗kpan Sɔdhö ˗bha kö ˗yö Yesu ˗wɔn blɛɛˈˈ ˗ni ˈgü mɛn ˗nu ˗dhɛ, ˗kɔ ˈö˗ ˈwɔn ˗yö ˗an kun ˗a ˈka, bhi ꞊dede ˗bhö ü ˗zota ˗a ˈgü. ˗A ˗wɔn ˈgü ˗wa ˗pö: ‹Gɔndënën ˈö kun pë ˈˈdhiʋ̈˗ ꞊gbɔɔnsü kë ˗ni ˈgü Yesu ˗bha gwëëˈˈ ˗nu ˈka bhë, ˈyaa ˈnën ˈö yö ˗ee?›

Sɔdhö ˗yö ˗zlanwopö Damasö ˗kwɛ ˗yaaga ˈˈpiʋ̈. ˗A ˗san ˗yö ˗da Zuifö ˈgü, ˈö ˈwo˗ ˈˈslö ꞊mɛɛn kö ˗wa zë. ˈˈKɛɛ kwa ꞊dhegblü ˗nu ˈˈtʋ ˗yö ˗da ˗a ˈgü, ˈyö ˈwo˗ ˗takun kö ˗yö ꞊duëë. ˗Wa ˗ya ꞊töö do ˈgü ˈö ˈwo˗ bɔ ˈpö˗ ˈö bhë ˈˈkplʋʋ ˈˈdhi do ˈbhaa ˈö kun ˗a ˗bha ˗a ˈka, ˈwo˗ ꞊yɔɔ ˈˈkpɛnŋdhö.

ˈDhɛ Sɔdhö ˗yö ˗wo Zedhizadhɛmö, ˗yö kwa ꞊dhegblü ˗nu ˈwo mü ˗an ˈˈpiʋ̈ ˗ʒian ˗mɛɛn. ˈˈKɛɛ ˗wo ˗kun ˈˈsuʋ̈ ˗ni ˈgü ˗a ˗gɔ. ˈDhɛ ˗kë ˈˈdhʋ̈, Yesu ˗bha gwëëˈˈ do ˈwo˗ ˗dhɛ Baanabasö, ˈö˗ ˈˈgblü ˈdhö kun ˗së, ˗yö ö ˗kɔ ˗da Sɔdhö ˈgü ˈö ˈdho ˗a ˈka bɔmɛn ˗nu ˈˈpiʋ̈, ˈö˗ pö ˗an ˗dhɛ ꞊dhɛ Sɔdhö ˈyaa mɛn ˈˈvaanvan ˈka ˈzü. Sɔdhö ˗yö ˗ya nɔɔn˗ ˗së pö ˗sü ˗bha ö ꞊faan ꞊dede ˈka ˗zlanwokɔdhigümɛn ˗nu ˈˈpiʋ̈ Zedhizadhɛmö. ˗Dhɛ ˈö ꞊ɲɔɔn mü ˈyö ˈwo˗ ˗dhɛ Pɔdhö.