Izraɛdhö ˗bha ˗gblüdë ˗blɛɛsü

Zoova ˗yö ˗nu zakanmɛn ˗nu ˈka Izraɛdhömɛn ˗nu ˗dhɛ kö ˗wo ˈˈdhiʋ̈sü ˗an ˈka. ˈˈKɛɛ ˗gblüdë ˈnën˗ ˈwo kun ˗a ˈˈpiʋ̈. ˗Wa ˗pö Samiɛ ˗dhɛ: ‹ˈˈSɛgɔ ˗nu ˈwo to ˗gblüdë ˗nu ˗wo ˗an ˗gɔ. Yi˗ ˈˈpiʋ̈ kö ˗gblüdë do ˗yö ˈˈdhiʋ̈sü yi ˈka ˈpö.› ˈWɔn bhë Samiɛ ˗ya ˗sü ˈya˗ ˈö ꞊bhɛɛ Zoova ˗dhɛ. Zoova ˗ya ˗pö ˗a ˗dhɛ: ‹Bhi ˈyaa ˈnën ˈwo ꞊kwaa ü ˗zü. Man ˈnën ˈwo ˗kan n ˗bha. ˗A pö ˗an ˗dhɛ ˗wo wo ˗de ˗bha ˗gblüdë mɛɛnˈˈ, ˈˈkɛɛ ˗wa ˈwɔn dɔ ꞊dhɛ ˗gblüdë ˈö ˈˈdhʋ̈ ˗yö ˗dho pë ꞊va ꞊dede ˗dhɛ ˗an ˗gɔ.› ˈYö ˈˈsɛgümɛn ˗nu ˗wa pö: ‹ˈYaa ˈwɔn ˈbha ˈka, pë ˈyi˗ ˈˈpiʋ̈ ˈyö ˗tɔ ˗gblüdë do!›

ˈYö Zoova ˗ya pö Samiɛ ˗dhɛ gɔndë ˈwo˗ Saidhö ˗kë bhë ꞊nën ˗dho kë ˗an ˗bha ˗gblüdë ˗blɛɛsü ˈka. ˈDhɛ Saidhö ˗yö dho ˗wo Samiɛ ˗dhɛ Lama ˗sɛ ˈgü, ˈyö Samiɛ ˗yö ˈˈɲɔn ꞊lo ˗a ꞊troo.

ˈDhɛ ꞊ɲɔɔn ˗mü, ˈö Samiɛ ˗yö Izraɛdhömɛn ˗nu ˗dhɛ kö ˈö ˗an ˗bha ˗gblüdë ˗dɛɛ ˗zɔn ˗an ˗dhɛ. ˈˈKɛɛ wo ˈti ˗kpan Saidhö ˗bha ˗dhɛ ˈbhaa ˈgü. ˈPë ˗kë ˈö ˗kë ˈˈdhʋ̈ ü˗ ˗dɔ ˗ee? ˈYö ˈtɔ ꞊dhɛ Saidhö ˗kun ˗bin ˗sü ˈka ꞊kwɛɛ˗ ˗nu ꞊zinŋgü. ˈDhɛ ˈwo ˗kpan ˗a ˗bha, ˈwo˗ sü ˈwo nu ˗a ˈka ˈˈsɛgümɛn ˗nu wëëdhö. Saidhö ˗kun ꞊gblɛɛn ˈö ʒiö ˈka mɛn ꞊gban ˗ta, ˈö kun ˈnëngɔɔn˗ ˈnën ˗së ꞊dede ˈka. ˈYö Samiɛ ˗ya pö: ‹Mɛn ˈö Zoova ˗yö ö ˗kɔ ˗yɛ ˗a ˗bha ˈyö ꞊nɛn.› ˈYö ˈˈsɛgümɛn ˗nu ˗wa pö: ‹˗Gblüdë ˗dɛɛ ˗ya kë kwa ˗gɔ, kwa ˗bha ˈˈyʋʋ ˗mü!›

˗A züdɔdhɛ ˈgü, Saidhö ˗kun ö ˈˈtʋ ˈto ˗ni ˈgü Samiɛ waa Zoova ˗an ˗wo ˗bha. ˈˈKɛɛ ˈyö˗ ˗bha ˈwɔn kë ˗kɔ ˗nu ˗wo go ˈˈgblʋʋ. ˗A ˈwɔnzuan ꞊nɛn, yi do ˈka Samiɛ ˗ya ˗pö Saidhö ˗dhɛ ˗yö dɔ ö ˗gɔ ö nu ˗ni ˈgü. ˈˈKɛɛ ˈdhɛ Saidhö ˗ya yö ꞊dhɛ ˈyaa nu ˗ni ˈgü ˈˈvaandhö, ˈö yö ꞊dede ö ˗ya ˈˈsaa˗ bho ˗sü ˗bha ˈˈkɛɛ ˈkö ˗a dua ˈyaa ˗mü kö ˗ya kë ˈˈdhʋ̈. Samiɛ ˗yö ˗kë ö ˗de ˈgü ˗kɔ ˗kë ꞊dhɛ? ˗Ya pö Saidhö ˗dhɛ: ‹Ü dua ˗mü ˗be kö ˈü ˈwɔn man Zoova ˗ta.› ˈWɔn yaa ˈö Saidhö ˗ya ˗kë bhë, ˗yö ˗dho ˗gleŋ ˗sü ˗a ˈgü ˗ee?

꞊Taabha ˈdhɛ Saidhö ˗yö dho ˗gblü ˗gɔn Amalɛkömɛn ˗nu ˈka, ˈyö Samiɛ ˗ya pö Saidhö ˗dhɛ ˗yö mɛn ꞊gban ˈˈpɛpɛ zë. ˈˈKɛɛ ˗ya ˗sü ö ˗de ˈgü kö ö ˗gblüdë Agagö ˈto ˈˈbhɩɩ˗. ˈYö Zoova ˗ya pö Samiɛ ˗dhɛ: ‹Saidhö ˗ya ˈˈkan n ˗bha, ˈyaa ö ˈˈtʋ ˈto n ˗bha ˈzü.› Samiɛ ˗yö ˗kë ö ˗de ˈgü ˗wëësü, ˈö˗ pö: ‹ˈDhɛ ˗kë ꞊dhɛ ˈbhaa ˈwɔn man Zoova ˗ta ˈzü bhë, ˗yö ˗dho ˈö ˗kɔ ˈˈyɛ ˗gblüdë ˈˈwɛɛ ˈbhaa ˗bha.› ˈDhɛ Samiɛ ˗yö ö ˗taa yö˗ ˗bha ˈö kun ˈdho ˗ni ˈgü, ˈyö Saidhö ˗ya ˗bha sɔ bɛɛnˈˈ kun ˈˈgbɩɩ˗ ˈka ˈö to ˗a ꞊kwɛɛ˗ ˈö ˗pɛ. ˈYö Samiɛ ˗ya pö˗ ˗dhɛ: ‹Zoova ˗ya ˗gblüdëdhɛ ˈkun ü gɔ.› Zoova ˗dho ˗gblüdëdhɛ nu mɛn ˈˈwɛɛ ˈö˗ ˗dhɔ dho˗ kë, ˈö dho ˈwɔn man ˗a ˗ta ˗a ˗dhɛ.