˗Wo ˈwɔn ˗bho ˗gblüdhe ˈˈgblü yaa ˗sü do ˈˈɲan ˈgü

˗Gblüdë Akabö ˗ya dɔ ö ˗bha fenɛtrö ˈˈdhiʋ̈ Ʒezeɛlö, ˗a ˈˈɲan ˗yö ˗kpan Nabɔtö ˗bha ˗drɔɔn ˗bhlaa ˗bha. ˗Drɔɔn ˗bhlaa bhë, ˗gblüdë Akabö zuʋ̈ˈˈ ˗yö ˗bhɔ ˗a ˗bha. ˗A ˗wɔn ˈgü ˗ya ˈˈslö ˗mɛɛn kö ˈö˗ ˈdhɔ Nabɔtö ˗gɔ. ˈˈKɛɛ Nabɔtö yö ˈti ˈˈwɩ˗ ˗bha kö ˗ya ˈˈdhoodɔ ˗a ˗gɔ ˈyö ˗tɔ ꞊dhɛ Zoova ˗bha ˈtɔŋ˗ ˗ya ˗pö ˈwaa ˈkɛnŋpë ˈˈdhoodɔ. ˗A ˗kë ˗sü kö Nabɔtö ˗yö ö ˗gɔ ˈdho Zoova ˗bha ˈtɔŋ˗ ˗nu ˗dhɛ ˈˈshia˗ bhë, ˗yö ˗dhi ˗gblüdë Akabö ˗dhɛ ˗ee? ˗Abin. ˈWɔn ˗yö ˗shiö ˗a ˗dhɛ ꞊dedewo. ˗A ˗wɔn ˈgü ˈyaa ˗kun ˈˈwɩ ˗ni ˈgü ˗a ˗bha kö ˈö ˈgo ö ˗bha ˈkɔ ꞊duudhö ˈˈɛɛnˈkö ˈö pëbhö.

˗A ˗bha dhebɔ ˈˈgblüyaasü, ˗gblüdhe Ʒezabɛdhö ˗ya ˗pö ˗a ˗dhɛ: ‹˗Bhi ˈnën ˈü ˗gblüdë ˈka Izraɛdhö ˈˈsɛ ˈö yö ˗a ˈgü. Pë ˈˈpɛpɛ ˈü˗ ˈˈpiʋ̈, ü ꞊mɔɔn˗ ˗bha ˈü˗ ꞊slɔɔ. ˗A dho ˗a ˈˈslö mɛɛnˈˈ kö ˈbhladhɛ ˈö bhë ˈü˗ ꞊slɔɔ.› ˈYö ˈsëëdhɛ bɔ mɛn zii ˗nu ˈwo Ʒezeɛlö ˗an ˗dhɛ ˈö˗ pö ˗wa pö Nabɔtö ˗ya ˗Zlan ꞊bhlëë ꞊shiö, kö ˗wa ˗zuö ˗gwë ˈka ˗yö to mü ˗yö ga. Mɛn zii ˗nu ˗wo pë ˈö˗ pö bhë ˗a ˗kë. ˈYö Ʒezabɛdhö ˗ya pö Akabö ˗dhɛ: ‹Nabɔtö ˗ya ga, ˗drɔɔndhɛ ˈö bhë ˗ya ˈto ü ˗gɔ.›

Ʒezabɛdhö ˗yö Nabɔtö waa Zoova ˗dhɔkëmɛn ˗nu ꞊va ˈö wo ˈti pë ˈbhaa kë ˗an ˗zë ˈˈwɛɛwɛ. ˗Yö ꞊geebɔ ˗nu ˗dhɔkë, ˈgo mü ˈö ˈwɔn ˗nu ˈö ˈwaa ˗së Zoova ˈˈɲan ˈˈdhiʋ̈ ˗an ˗kë ˈpö. ˈWɔnyaa ˈˈpɛpɛ ˈö Ʒezabɛdhö ˗yö ˗an ˗kë bhë, Zoova ˈˈɲan ˗yö ˗kpan ˗an ꞊gban ˗bha. ˗Mën ˈö Zoova dho ˗a kë ˈö ˗gban Ʒezabɛdhö ˗bha.

ˈDhɛ Akabö ˗yö ga, ˗a gbö Ʒoramö ˗yö ˗kë ˗gblüdë ˈka. ˈYö Zoova ˗yö Ʒeu bɔ kö ˗yö ˈwɔn bho Ʒezabɛdhö waa ö ˗bha ˈkɔdhigümɛn ˗nu ˈgü.

Ʒeu ˗yö ö ˗bha ˈˈdhügɔ ˈö ꞊soo ˗ya ˗gan bhë ˗ʒiö ˈö dho Ʒezeɛlö ˗dhɛ ˈö Ʒezabɛdhö ˈdhö˗ ˗bha bhë ˗a ˈgü. Ʒoramö ˗yö ˗nu ˗a ˗gɔ ꞊ʒiaan ˈˈdhügɔ ˈö ꞊soo ˗ya ˗gan bhë ˈgü ˈpö, ˈö˗ dhɛɛˈˈ ˈkpɔ ˈö˗ pö: ‹˗Dhikodhɛ ˗yö ko ꞊zinŋgü ˗ee?› ˈYö Ʒeu ˗ya pö ˗a ˗dhɛ: ‹ˈˈTʋ̈ŋ ˈö ü dhe Ʒezabɛdhö ˈdhö ꞊tun ˈwɔn yaa kë ˗ni ˈgü ˗a ka, ˗dhikodhɛ ti ˈdho kë ko ꞊zinŋgü toŋtoŋdhö.› ˈYö Ʒoramö ˗yö ö bha ˈˈdhügɔ ꞊slëë ˗zü kö ˈö ꞊duëë. ˈˈKɛɛ ˈyö Ʒeu ˗yö ö ˗bha ꞊saaga sü ˈö˗ ˗gban Ʒoramö gü ˈö˗ ˗zë.

꞊Taabha Ʒeu ˗yö ˗dho Ʒezabɛdhö ˗bha ˗gblüdëdhɛkëdhɛ ˈgü. ˗Dhɛ ˈö Ʒezabɛdhö ˗ya man ꞊dhɛ Ʒeu ˗yö nu ˗ni ˈgü, ˈyö ö wëëdhɛ waa ö ˗bha wun ꞊baa ˗së ˈka ˈö ˈdho ˈö dɔ ö ˗bha fenɛtrö ˈka. ˈDhɛ Ʒeu ˗yö ˗wo, Ʒezabɛdhö ˗yö ˈwɔnyaa blɛɛˈˈ ˗a ˗bha. ˈYö Ʒeu ˗ya pö yökëmɛn ˗nu ˈwo kun ˗a ˈˈsuee ˗an ˗dhɛ: ‹˗Kaa ˗zuö fenɛtrö ˈka!› Pë ꞊dede ˈwo˗ ˗kë ˈyö bhë. Ʒezabɛdhö ˗to mü ˈö ga.

ˈDhɛ ˗kë ˈˈdhʋ̈, ˈyö Ʒeu ˗yö Akabö ˗bha ˈnëngɔɔn˗ ˗nu 70 bhë ˗an ꞊gban zë, ˈyö Baadhö ˗dhɔkësü ˈˈdhiʋ̈ ˈduannu Izraɛdhö ˗sɛ ˈgü. ˗Gleŋ ˗mɛɛn ˈkwa˗ ˗sü ˗a ˈgü? Zoova ˈˈɲan ˗yö ˗kpan mɛn ˗nu ˈwo ˈwɔnyaa ˗kë ˗an ꞊gban ˈˈpɛpɛ ˗bha, ˈö dho ˈwɔn bho ˗an ˈgü ˈö ˈˈtʋ̈ŋ ˗së ˗bha.