˗Gblüdëdhɛ ˈö dho ˈto ˗tokpa ˈka

Gbeŋ do ˈka, ˗gblüdë Nabukodonozɔ ˗yö ˈˈɲɛɛn ˈö ˈˈsuʋ̈ ˗da ˗a ˈgü, ˗a ˗bho. ˗A ˗wɔn ˈgü ˈyaa kun ꞊mɔɔn ˗ni ˈgü yi zë ˗sü ˗bha. ˗Yö ö ˗bha ˗dhidhakëmɛn ˗nu ˗dhɛ ˈö˗ pö ˗an ˗dhɛ: ‹ˈˈƝɛɛn ˈa˗ bho, ˗kaa pö n ˗dhɛ.› ˈYö ˈwo˗ pö: ‹˗Gblüdë, ˈˈɲɛɛn ˈü˗ bho ˗a pö yi ˗dhɛ.› ˈˈKɛɛ Nabukodonozɔ ˗ya ˗pö: ‹˗Abin, ka ꞊nën ˗kaa pö, ˈyaa ˈˈdhʋ̈ a ˗dho ka zë.› ˈYö ˈwo˗ pö ˈzü: ‹ˈˈƝɛɛn ˈü˗ bho ˗a blɛɛˈˈ yi ˗dhɛ kö ˈyi˗ ˈklɔɔ˗ pö.› ˈYö˗ pö: ‹Ka˗ ˈˈpiʋ̈ ˈka ˈˈkpënŋ˗ kë n ˗gɔ. ˈˈƝɛɛn ˈa˗ bho, ka ˗zë ˗kaa pö.› ˈYö ˈwo˗ pö ˗a ˗dhɛ: ‹Mɛn ˈbha ˈkö ˗dho ꞊mɔɔn˗ ˗bha kö ˗yö ˈwɔn suu ˈö bhë ˗a kë, ˈyaa ˈdhö. Pë ˈü˗ ˗dhɛ ˗ni ˈgü bhë, ˗a ˈˈsɩ ˈyaa mɛn ˈbha ˗dhɛ kö ˗ya kë.›

˗A ˗wɔn ˗yö ꞊shiö ꞊dedewo Nabukodonozɔ ˗dhɛ ˈö˗ pö ˗wo ˈwɔndɔmɛn ˗nu ˈwo kun ˈˈsɛ bhë ˗a ˈgü ˗an ꞊gban zë. Daniɛdhö, Shadrakö, Meshakö waa Abɛdönego ˗wo ˗kun mɛn ˗nu ˈwo ˗dho ˗an zë, ˗an kpö ˈgü. ˈˈKɛɛ Daniɛdhö ˗ya ˗pö ˗gblüdë ˗dhɛ ˗yö ˈˈtʋ̈ŋ ˈnënbha nu wo ˗dhɛ. ˈDhɛ ˗kë ˈˈdhʋ̈ ˈyö waa ö ˈˈtɛɛbɔ ˗nu ˈwo ꞊bhɛɛ Zoova ˗dhɛ, ˈwo˗ pö ˗yö wo ˗takun. ˈMën Zoova ˗ya ˗kë?

Zoova ˗yö Nabukodonozɔ ˗bha ˈˈɲɛɛn bhë˗ ˗zɔn Daniɛdhö ˗dhɛ, ˈö˗ ˈklɔɔ˗ pö ˗a ˗dhɛ ˈpö. ˗A yi ˈö dɔ˗ ˈˈpiʋ̈ ˗a ˈka, Daniɛdhö ˗yö ˗dho ˗gblüdë ˗bha yökëmɛn ˈˈpiʋ̈ ˈö˗ pö ˗a ˗dhɛ: ‹ˈBhaa ˈdho mɛn ˈbha zë! ˈˈƝɛɛn ˈö ˗gblüdë ˗ya bho bhë, a ꞊mɔɔn˗ ˗bha ˈa˗ ꞊blɛɛ ˗a ˗dhɛ.› ˈYö ˗gblüdë ˗bha yökëmɛn ˗yö Daniɛdhö sü ˈö ˈdho ˗a ˈka Nabukodonozɔ ˈˈpiʋ̈. Daniɛdhö ˗ya ˗pö ˗Gblüdë ˗dhɛ: ‹˗Zlan ˗ya ˈwɔn ˈö ˗dho kë ˗dhɛkpaɔ dhiʋ̈ˈˈ ˈgü ˗a ˗zɔn ü ˗dhɛ. ˈˈƝɛɛn ˈü˗ bho, ˈyö ꞊nɛn: Ü ˗kpan pë ˈˈbin ˈkpii˗ do ˈö˗ ˗gɔ ˈdhö kun ˈˈsënŋ ˈka, ˗a ˗bha. ˗A ˗kuu waa ˗gbe ˗nu ˗kun ˈwëë˗ ˈka, ˈyö˗ ˈgu waa˗ ˈˈgbanga ˗nu ˈwo kun zën ˈka. ˗A ˗gɛn ˗nu ˗kun ˗piöga ˈka, ˈyö ˗gɛndhɛ ˗nu ˈwo kun ˗piö waa gbɔ ˈˈsɛ ˗an ˗kaankwëësü ˈka. ˈYö ˗gwö ˈbha ˗yö go ˗tɔn do ˗bha, ˈö man pë ˈˈbin ˈö bhë ˗a ˗gɛndhɛ ˗bha. ˈYö pë ˈˈbin ˈö bhë ˗yö wü ˈö ˗kë ˗bi ˈka ˈö ˈˈtɛɛ ˗ya sü. ˗Gwö ˈö bhë ˗yö ˗kë ˗tɔn ˈˈgbɛɛ ˈkpii˗ ˈka, ˈö ˈˈsɛtadhɛ pa.›

Daniɛdhö ˗ya ˗pö ˈzü: ‹Ü ˗bha ˈˈɲɛɛn ˈklɔɔ˗ ꞊nɛɛn: Ü ˗bha ˗gblüdëdhɛ ˈnën ˗tɔ pë ˈˈbin bhë˗ ˗gɔ ˈö ˈˈsënŋ ˈka. ˗A ˈˈpian ˗dhɛ ˈö ˈwëë˗ ˈka bhë ˈnën ˗tɔ ˗gblüdëdhɛ ˈö ˗dho yö ü ˗bha ꞊ʒiaandhö. ˗Ya ˈgo mü, ˗gblüdëdhɛ ˈbha ˗dho kë ꞊dhɛ zën ˈdhö ˈö ˈˈsɛ ˗todhʋ̈sü ꞊kɔɔn. ˗Gblüdëdhɛ ˈö ˗dho dɔ ˗a ˈˈpiʋ̈ ˗dho kë ˈˈgbɩɩ˗ ꞊dhɛ ˗piöga ˈdhö. ˗A ˈˈdhiʋ̈tadhɛ ˈgü, ˗gblüdëdhɛ ˈö dho yö mü ˗dho kë ˈˈpɛ ˗sü ˈka˗ ˈkoo. ˗A ˈˈpian ˈbha ˗dho kë ˈˈgbɩɩ˗ ꞊dhɛ ˗piö ˈdhö ˈö˗ ˈˈpian ˈˈwɛɛ ˈbha ˗yö ˗kë ˈˈplëëplë ꞊dhɛ gbɔ ˈˈsɛ ˈdhö. ˗Gwö ˈö ˗kë ˗tɔn ˈka bhë ˈnën ˗tɔ ˗Zlan ˗bha ˗Gblüdëdhɛ. ˗Yö ˗dho ˗gblüdëdhɛ ˗nu ˈwo bhë ˗an ꞊gban ˈgüshiʋ̈ ˈö yö ˗zë ˈö to ˗tokpa ˈka.›

Nabukodonozɔ ˗yö ö ˈˈgblëënnu Daniɛdhö wëëdhö, ˈö˗ pö: ‹Ü ˗bha ˗Zlan ˗ya ˈˈɲɛɛn ˈö bhë ˗a ˗zɔn ü ˗dhɛ. ˗Zlan ˈbha ˈkö ˗dho kë ꞊dhɛ ˗a ˈdhö, ˈyaa ˈdhö.› Nabukodonozɔ ˈyii Daniɛdhö zë. ˗Ya ˗ya ˈwɔndɔmɛn ˗nu ꞊gban ˗ta, ˈö˗ ˗ya ˈpö Babidhɔnö ˗pö ˗gɔ ˈˈdhiʋ̈. ˗Kɔ ˈö Zoova ˗yö Daniɛdhö ˗bha bhɛɛwo ˗daa ˗kë ˗a ˈka, ü˗ ˗yö ˗ee?