˗Gblüdëdhɛ do ˈö ꞊dhɛ ˈˈdhü ˈkpii˗ ˈdhö

Gbeŋ do ˈka, ˈyö Nabukodonozɔ ˗yö ˈˈɲɛɛn yaa bho. ˗Yö ö ˗bha ˈwɔndɔmɛn ˗nu ˗dhɛ kö ˗wa ˗gɛn pö ˗a ˗dhɛ. ˈˈKɛɛ ˗an ˈbha ˈwii ꞊mɔɔn˗ ˗bha. ˈDhɛ ˗kë ˈˈdhʋ̈ ˈyö ˗gblüdë ˗ya ˗wɔn ꞊blɛɛ Daniɛdhö ˗dhɛ.

Nabukodonozɔ ˗ya ˗pö Daniɛdhö ˗dhɛ: ‹ˈˈƝɛɛn ˈa˗ bho ˗a ˈgü, a ˗kpan ˈˈdhü do ˗bha. ˗A ˈˈdhü ˈö bhë ˗yö ˗gla ˈö dho ö yö dhaŋ˗ ˗bha. ˈMɛn ˗dɔ ˗dhɛ ꞊gban ˈgü ˈˈsɛ ˗ta ˈö ˈmɛn ˈdhö ˗kpan ˗a ˗bha. ˗A ˈˈdhɛ ˗nu ˗kun ˗së ˈö˗ bhɛ ˈdhö kun ꞊va ꞊dedewo. Wü ˗nu ˗kun nu ˗ni ˈgü wɔ ˗a dhɔŋ ꞊wlöö, ˈö ˗mannën ˗nu ˗wo wo ˗bha ˈkɔ ˗nu dɔ ˗a kwɛɛˈˈ ˗nu ˗ta. ˈˈKɛɛ ˗Zlan ˗bha ˈˈkiö do ˗yö ˗go dhaŋ˗ ˈgü ˈö˗ pö: «ˈˈDhü ˈö bhë, ˗kaa bɔ kö ˈka˗ kwɛɛˈˈ ˗nu ˈˈkan. ˈˈKɛɛ ˗kaa kunŋˈˈ waa˗ ɲun ˗nu ˗an ˈto ˈˈsɛɛdhö kö ˈka ˗piö waa zën yö ˗an ˗bha. ˈˈDhü ˈö bhë ˗a zuʋ̈ga ˈyii ˈdho kë ˈzü mɛnbhɩɩdhe zuʋ̈ga ˈka, ˗yö ˗dho kë wü zuʋ̈ˈˈ ꞊nën˗ ˈka. ˈˈTʋ̈ŋ ˈˈsɔɔplɛ ˗dho ʒiö ˗a ˗ta. Mɛn ꞊gban ˗dho ˗a ˈwɔn dɔ ꞊dhɛ ˗Zlan ˈnën ˗tɔ Mɛnkɔɔmɛn ˈö ˗gblüdëdhɛ nu mɛn ˈö ˗dhi ˗a ˗dhɛ, ˗a ˗dhɛ.»›

Zoova ˗yö ˈˈɲɛɛn ˈö bhë ˗a ˈklɔɔ˗ ˗pö Daniɛdhö ˗dhɛ. ˗Dhɛ ˈö Daniɛdhö ˗yö ˈˈɲɛɛn ˈö bhë ˗a ˈklɔɔ˗ dɔ, ˈyö ˈˈsuʋ̈ ˗yö ˗da ˗a ˈgü ˈö˗ pö: ‹˗Gblüdë, ˗yö n ˈˈpiʋ̈ ˗be ꞊dhɛ ˈˈɲɛɛn ˈö bhë ˗yö ˗gban ü ˈyɔɔ˗ ˗nu ˗bha! ˈˈKɛɛ ˈyaa ˈˈdhʋ̈, ˗yö ˗gban bhi ꞊nën ü ˗bha. ˈˈDhü ˈkpii˗ ˈwo˗ bɔ bhë, bhi ˗mü. ˗Wo ˗dho ü ˗bha ˗gblüdëdhɛ ˈsü ü ˗gɔ, ˈyö ˈü blëë ˗nu ˈwo ˈˈblü ˗an ˗bhö ꞊dhɛ ˈˈblü wü ˈdhö. ˈˈKɛɛ ˗dhɛ ˈö ˗kë ꞊dhɛ ˗Zlan ˗bha ˈˈkiö ˈö bhë ˗ya ˗pö ˗wo wo ꞊kwaa ˗a kunŋˈˈ waa˗ ɲun ˗an ˗zü bhë, ü ˗dho kë ˗gblüdë ˈka ˈzü.›

˗Dhɛ ˈö ˗kwɛ do ˗yö ˗ʒiö, Nabukodonozɔ ˗kun ʒiö ˗ni ˈgü ö ˗bha ˈkɔ ˗ta ˈˈdhʋŋ kö ˗yö Babidhɔnö ˗pö ˗ga ˗ni ˈgü ꞊niidadhe ˈka. ˈDhɛ ˗kë ˈˈdhʋ̈ ˈyö˗ pö: ‹ˈPö˗ ˗së ˈa˗ dɔ, ˗kaa ˗ga. Mɛn ˈˈtɩtɩ ˈyaa ˗mü n ˈka. ˗Yö ˗to ˈwɔn blɛɛˈˈ ˗sü ˗bha ˈö ˗wo ˈbha ˗yö go dhaŋ˗ ˈgü ˈö˗ pö: ‹Nabukodonozɔ, ˗a ˈˈtʋ̈ŋ ˗ya ˗wo kö ˗wo ü ˗bha ˗gblüdëdhɛ ˈsü ü ˗gɔ.›

Nabukodonozɔ ˗yö ˗to ˈˈshia˗ mü ˈö slaaˈˈ ˗yö ˗da ˗a ˗ta, ˈö ˈwɔn ˗nu ˗kë ꞊dhɛ ˈˈblü wü ˈdhö. ˗Yö ˗go ö ˗bha ˗gblüdëdhɛ ˈgü ˈˈgbɩɩdhɛ ˈka ˈö dho ˗tosɛta kë wü ˗nu ˈˈpiʋ̈ ˈˈblü. ˗A ˗bha wundhɛ ˗yö ˗bhɔ ˈö ˗kë ꞊gblɛɛn ꞊dhɛ ˈˈgblëë˗ gban ˗bha ˗kaa ˗nu ˈdhö, ˈö˗ ꞊soo ˗nu ˗wo ˗kë ꞊dhɛ ˗mannën ꞊soo ˗nu ˈdhö.

˗Dhɛ ˈö ˗kwɛ ˈˈsɔɔplɛ ˗yö ˗ʒiö, Nabukodonozɔ ˗yö ö ˗de ˗slɔɔ ˈö Zoova ˗ya kë ˈzü ˗gblüdë ˈka Babidhɔnö ˗dhɛ ˗ta. ˗Dhɛ ˈö ˗kë ˈˈdhʋ̈ ˈyö Nabukodonozɔ ˗ya pö: ‹A Zoova ˈö ˗kë ˗Gblüdë ˈö dhaŋ˗ ˈgü ˗a ˈka, ˗a ˈtɔ ˗bhɔ. ˈMan˗ ˈwɔn dɔ ˈzlöö ꞊dhɛ yö ꞊nën ˈö ˈtɔ˗ Mɛnkɔɔnmɛn. ˗Yö ˈlëë˗ ˗dɔ ˗desüvamɛn ˗nu ˗bha, ˈö ˗gblüdëdhɛ nu mɛn ˈö ˗dhi ˗a ˗dhɛ, ˗a ˗dhɛ.›