˗Wo Daniɛdhö ˗zuö ˗glu ˈˈdhi ˈkpii˗ ˈö ꞊laa ˗nu ˈwo˗ ˈgü ˗a ˈgü

˗Gblüdë ˈˈwɛɛ ˈbha ˗kun ˗dhö Babidhɔnö ˈwo˗ ˗dhɛ Dadhisö Mɛdö mi. ˗Ya ˗yö ꞊dhɛ Daniɛdhö ˗kun mɛn ꞊bhlëësü do ˈka. ˗Yö mɛn ꞊bhlëësü ˗nu ˈwo kun ˈˈsɛ bhë˗ ˈgü ˗an ˈˈklɔɔn ˗bho ˗a ˗bha. ˈˈKɛɛ ˗wo ˗kun ꞊druɛɛ kë ˗ni ˈgü ˗a ˗bha, ˈwo kun ˗a ˈˈpiʋ̈ kö ˈwo˗ zë. ˗Wa ˈwɔn ˗dɔ ꞊dhɛ Daniɛdhö ˗yö ˗bhɛɛ ˗gɛnɲan ˈka ˗yaaga ˗dhɛkpaɔyi do ˈgü. ˈYö ˈwo˗ pö Dadhisö ˗dhɛ: ‹ˈAa ˗glüdë, ˈtɔŋ˗ do dua ˗mü kö ˗yö ˗ya. ˈTɔŋ˗ bhë ˗a ˈgü, bhii dosɛnŋ ˈnën ˈyi dua ˈdhö ˗mü kö ˈyi bhɛɛˈˈ ü ˗dhɛ. Mɛn ˈˈoo ˗mɛn ˈö dho ˈtɔŋ˗ bhë˗ ꞊lögü, ˗a dua ˗mü kö ˗wa ˗zuö ˗glu ˈˈdhi ˈö ꞊laa ˗nu ˈwo˗ ˈgü ˗a ˈgü. ˈYö Dadhisö ˗yö ˗wɩ ˗a ˗bha ˈö ö ˗kɔ ˈˈgblʋʋ ˗ya ˗a ˈsëëdhɛ ˗ta.

ˈDhɛ Daniɛdhö ˗ya ˈwɔn dɔ ꞊dhɛ ˗wa ˈtɔŋ˗ ˗dɛɛ suu ˈö ˈˈdhʋ̈ ˗a ˗ya, ˈö dho ö ˗gɔ ˈkɔɔ, ˈö ˗ya ö kpɔn ˈgü ˈö ˗bha fönɛtrö ˈˈdhiʋ̈ ˈö ꞊bhɛɛ Zoova ˗dhɛ. ˈYö ˗druɛɛ kë ˗mɛn ˗nu ˈwo bhë, ˈwo ˗da ˗a ˗gɔ ˈkɔɔ ˈwo ˗kpan ˗bha kö ˗yö bhɛɛˈˈ ˗ni ˈgü. ˈYö ˈwo ˗bialö ˈwo dho Dadhisö ˈˈpiʋ̈ ˈwo˗ pö: ‹Daniɛdhö ˗ya ˗gban ü ˗gɔ. ˗Yö ˗bhɛɛ ö ˗bha ˗Zlan ˗dhɛ ˗gɛnɲan ˈka ˗yaaga ˗dhɛkpaɔyi do ˈgü. Dadhisö ˈyaa kun ˗a ˈˈpiʋ̈ kö Daniɛdhö ˗yö ga. ˗Yö ˗kun ˗a ˈˈpiʋ̈ kö ˈö˗ dha. ˈˈKɛɛ ˈyaa kun ꞊mɔɔn ˗ni ˈgü ˗a ˗bha kö ˈtɔŋ˗ ˈö yöö ꞊dede ˈö ö ˗kɔ ˈˈgblʋʋ ˗ya ˗a ˗ta bhë ˈö˗ ꞊lö ˈgü. ˈYö˗ pö ö ˗bha mɛn ˗nu ˗dhɛ ˗wo Daniɛdhö ˗zuö ꞊laa ˗nu ˗dhɛ.

Gbeŋ bhë˗ ˈka Dadhisö ˈti ꞊mɔn yi ˗zë ˗sü ˗bha Daniɛdhö ˗wɔn ˈgü. Dhiapiʋ̈ ˗kpo tii ˈgü, ˗yö ˗dho ˗glu ˈˈdhi ˈwo Daniɛdhö ˗zuö ˈgü bhë ˗a ˗dhɛ ˈgü ˈö˗ pö Daniɛdhö ˗dhɛ: ‹Ü ˗bha ˗Zlan ˗ya ü dha ˗ee?›

ˈYö Dadhisö ˗yö Daniɛdhö ˗wo man kö ˗ya pö ˗ni ˈgü ˗a ˗dhɛ: ‹Zoova ˗bha ˈˈkiö ˗ya ꞊laa ˗nu ˈˈdhi ta. ˗Wo ˈti pë yaa ˈbha kë n ˈka toŋtoŋdhö. Dadhisö zuʋ̈ˈˈ ˈˈgblü ˗yö ˗dhi dedewo, ˈyö˗ pö ˗wo Daniɛdhö bho ꞊laa ˗nu ˈˈpiʋ̈. Pë ˈbha ˈti Daniɛdhö kë. ˈYö ˗gblüdë ˗ya pö: ‹Mɛn ˗nu ˈwo ꞊sua ˗kë Daniɛdhö ˗bha bhë, ˗ka ˗an ˗zuö ꞊laa ˗nu ˗dhɛ.› ˗Dhɛ ˈwo ˗an ˗zuö ꞊laa ˗nu ˗dhɛ, ꞊laa ˗nu ˗wo ˗an ˗bhö ˈpapadhö.

Dadhisö ˗yö ˗dhioo ˗dɔ ˈˈsɛgümɛn ˗nu ˗ta ˈö˗ pö: ‹Mɛn ˈˈpɛpɛ ka ˈˈsuʋ̈ Daniɛdhö ˗bha ˗Zlan ˗gɔ. ˗Ya Daniɛdhö dha ꞊laa ˗nu ˗gɔ.›

Ü ꞊bhɛɛ Zoova ˗dhɛ ˗kplawo ꞊dhɛ Daniɛdhö ˈdhö ˗ee?