Zan ˗yö Yesu ˗bha zian ˗glooga ˗nu ˗yuö ˗kë

Zan ˗mɛn ˗nu ˈnën ˈwo ˗tɔ Zakadhi waa Edhizabɛtö. ˈDhɛ ˗kë ˈkpii˗, ˗yö ˗kë ˗Zlan ˗wodhiʋ̈lomɛn ˈka. Zoova ˗yö ˗bɔ ˗a ˗ta kö ˗ya pö mɛn ˗nu ˗dhɛ ꞊dhɛ Mesi nu yi ˈyaa ꞊gblɛɛn ˈzü. Zan yö ˈti mɛn ˗nu ꞊klaŋkë ˗yakwëëkëgükɔ ɛɛnˈˈ ˈˈkwipö ˗nu ˈgü. ˗Yö ˗zlanwopö ˈˈyɛɛta. Mɛn ˗nu ˗wo ˗go Zedhizadhɛmö waa Zude ˗dhɛ ˗nu ˈgü kö ˗wo wo ˈˈtʋ ˈto ˗a ˗wo ˗bha. ˗Ya ˗pö ˗an ˗dhɛ ˈwo˗ ˈˈpiʋ̈ ˈwo kë ˗Zlan ˗dhɛ ˗së, ˗an dua ˗mü kö ˗wo wo bo ˈwɔn yaa kë ˗sü ˈka. ˗Dhɛ ˈwo˗ ˈgüman ˈˈdhʋ̈, ˗a mɛn ꞊vadhɛ ˗wo go wo ˗bha ꞊sɔŋ yaa ˈgü ˈö Zan ˗yö ˗an bɔ ˈˈyi ꞊bhaa Zuudɛn ga ꞊bhaa.

Zan ˗bha ˗tosɛta ˗kun ˗bhaasü. ˗Yö ˗kun sɔ ˗nu ˈwo˗ ˗kë ꞊ɲɔɔnmian kaa ˈka ˗a ˗da ˗ni ˈgü, ˈö kun ˗kpaa waa ˈˈzoɲɔn ˗nu ˗bhö ˗ni ˈgü. Mɛn ˗nu ˗kun ˗a ˈˈpiʋ̈ kö ˈwo˗ dɔ. ˗A ˗de ˗ʒiaan Fadhiziɛn waa Sadusö ˗mɛn ˗nu zuʋ̈ˈˈ yaasü ˗nu bhë ˗kun ˗a ˈˈpiʋ̈ kö ˈwo ˗kpan ˗a ˗bha. ˈYö Zan ˗ya pö ˗an ˗dhɛ: ‹Ka ˗dua ˗mü ˈka ˈgo ka bha ꞊sɔŋ yaa ˗nu ˈgü, kö ˈka ka ˗bha ˗tosɛta bho ˈˈgblʋʋ. ˈKa ˈdho˗ ˗pö ka ˗de ˗dhɛ ꞊dhɛ, ˈdhɛ kë ꞊dhɛ Ablaamö ˗bha ˈnën ˗nu ˗mü ka ˈka bhë, pö ˈyaa ka ˗bha. ˈYaa˗ ˗zɔn ꞊dhɛ ka ˗Zlan ˗bha ˈnën ˗nu ˈka.›

Mɛn ꞊va ˗wo ˗nu Zan ˈˈpiʋ̈ ˈö ˈwo˗ dhɛɛˈˈ kpɔ: ‹ˈMën ˈyi ˗dho ˗a kë kö ˈyi kë ˗Zlan ˗dhɛ ˗së?› ˗Ya ˗pö ˗an ˗dhɛ: ‹꞊Ya kë ꞊dhɛ gblɔŋ ꞊plɛ ˗ya kë ka ˗gɔ, ˗kaa do nu mɛn ˈö˗ ˗bhawɔn ˈdhö˗ ˗bha ˗a ˗dhɛ.› ˈPë ˗kë ˈö˗ ˗pö ˈˈdhʋ̈ ü˗ ˗dɔ ˗ee? ˗Yö ˗kun ˗a ˈˈpiʋ̈ kö ˈö˗ ˗zɔn ö ˗bha gwëëˈˈ ˗nu ˗dhɛ ꞊dhɛ ˈkwa˗ pö ˈkwa kë ˗Zlan ˗dhɛ ˗së, mɛn ˗nu ˗dhɔ ꞊dede dua ˗mü kö ˗yö kwa kë.

˗Ya ˗pö ˈniinsɔnŋkunmɛn ˗nu ˗dhɛ: ‹˗Ka kë kpɛnŋdhö. ˈKaa ˈdho mɛn ˗ta ˗bhö.› ˈÖ˗ pö ˈˈsɔdha ˗nu ˗dhɛ: ‹ˈKaa ˈdho ꞊flüüpë ˗nu ˈkun ɛɛnˈˈ ˈkaa ˈdho ꞊sua kë.›

ˈˈSaabhomɛn ˗nu waa Levi ˗gɔ ˈkɔɔmɛn ˗nu ˗wo ˗ɲɔɔn ˗a ˗bha, ˈwo˗ pö: ‹˗De ˗mü ü ˈka? Mɛn ꞊gban ˈˈpɛpɛ ˗wa ˈˈpiʋ̈ ˈwo ü dɔ.› ˈYö Zan ˗ya pö: ‹Man ˈnën ˈa ˗tɔ mɛn ˈö ˈˈgbla ˗ni ˈgü ˈˈyɛta, ˈö dho mɛn ˗nu ˈka Zoova ˈˈpiʋ̈ ꞊dhɛ ˗kɔ ˈö ˗Zlan ˗wodhiʋ̈lomɛn Izai ˗ya pö ˗a ˈka bhë, ˗a ˈdhö.›

Zan ˗bha ꞊klaŋwo ˗dhɔ ˗kun mɛn ˗nu kë ˗ni ˈgü. ˗Wo ˗kun wo ˗de dhɛɛˈˈ ˈkpɔ ˗ni ˈgü ꞊ya kë ꞊dhɛ Mesi ˈyaa ˗mü. ˈYö˗ pö ˗an ˗dhɛ: ‹Mɛn do ˈbhaa ˈö ˈkpii˗ ˈö ʒiö˗ ˈka n ˗ta yö nu ˗ni ˈgü, ˈö˗ ˗bha ꞊sabha ˗de ˈö˗ ˗gɛn ˗bha, ˗a ˈˈse ˈyaa n ˗dhɛ kö ˈa˗ gën ˈˈpʋ. Man ˗zë ˈˈyi ˈnën ˈa mɛn ˗nu bɔ ˗a ꞊bhaa. ˈˈKɛɛ yö ˗zë, ˗yö mɛn bɔ ˈˈyi ꞊bha ˗zuu ˈˈslʋ̈ʋ̈slʋ̈ ˈka.›