Yesu ˗yö Dhazaa ˗bho ga ˈgü

ˈˈTɔŋdë ˈˈgbɩɩ˗ ˗yaaga ˗kun Yesu ˗gɔ ˈö ˈwo kun Betani. Wo ꞊nën ˈwo ˗tɔ Lazaa waa ö ꞊dhegblü dhoŋ ˗nu ꞊plɛ Madhi waa Maatö. ˗Dhɛkpaɔyi do ˈka kö Yesu ˗yö Zuudɛn ga ꞊taabha, Madhi waa Maatö ˗wo mɛn ˗bɔ ˗a ˗dhɛ ˈˈvaandhö, ˈö ˈwo˗ pö ˗a ˗dhɛ: ‹˗Bhö nu ˈˈvaandhö, Lazaa ˈyaa ö ˈflëë˗ ˈgü.› ˈˈKɛɛ Yesu yö ˈti ˈto ˈˈshia mü kö ˗yo ˈdho. ˗Yö ˗dhɛkpaɔyi ꞊plɛ ˗kë mü, ˈö˗ pö ö ˗bha gwëëˈˈ ˗nu ˗dhɛ: ‹˗Kwa ˈdho Betani kö ˈa pa Lazaa ˗bha, ˈyö ˗tɔ ꞊dhɛ ˗ya yi zë.› ˈYö˗ ˗bha bɔmɛn ˗nu ˗wa pö: ‹꞊Ya kë ꞊dhɛ Lazaa ˗yö yi ˈgü, kö ˗yö ˗dho ö ˗de ꞊slɔɔ ˈsa.› ˈYö Yesu ˗ya pö ˗an ˗dhɛ ˈˈpuu ˈka: ‹Lazaa ˗ya ga.›

ˈDhɛ Yesu ˗yö ꞊lo Betani, kö ˗wa Lazaa ˈwaannu ˗a ˗dhɛkpaɔyi ˗ya kë ˗yiishiö. Mɛn ꞊va ꞊dede ˗wo ˗nu kö ˗wo Madhi waa Maatö ˗an zuʋ̈ˈˈ ꞊dhuaa. ˗Dhɛ ˈö Maatö ˗ya man ꞊dhɛ Yesu ˗ya nu, ˈyö ˗bialö ˈö dho ˗a ˈˈdhiʋ̈ ˗gɔ. ˈYö˗ pö Yesu ˗dhɛ: ‹Ü kë yö ˗be, n ꞊dhegblü ˈyii ˈdho ga.› ˈYö Yesu ˗ya pö ˗a ˗dhɛ: ‹Maatö, ü ꞊dhegblü ˗dho go ga ˈgü. Ü ˈdhaŋ bho ˗sü ˗ya ˈˈdhiʋ̈ ˗ee?› ˈYö Maatö ˗ya pö: ‹꞊Ii, a˗ ˈwɔn ˗dɔ ꞊dhɛ ˗yö ˗dho ꞊bo ˗gogagüsü ˈˈtʋ̈ŋ ˈka.› ˈYö Yesu ˗ya pö ˗a ˗dhɛ: «Man ˈnën ˈa ˗tɔ ˗go ga ˈgü ˗sü waa ˗këdhösü.»

Maatö ˗yö ˗dho Madhi ˈˈpiʋ̈ ˈö˗ pö ˗a ˗dhɛ: ‹Yesu ˗ya nu!› ˈYö Madhi ˗yö ˗bialö Yesu ˈˈpiʋ̈, ˈyö mɛn ˗nu ˗wo ˗ʒiö ˗a ꞊kee˗. ˗Yö ˗dho ˈö ˗puö ˈˈgbʋ ˈka Yesu wëëdhö, ˈö˗ pö ˗a ˗dhɛ: ‹N Dëmɛn, ü kë yö ˗be, kö n ꞊dhegblü ˗yö ˈˈbhɩɩ˗.› Yesu ˗ya ˗yö ꞊dhɛ Madhi zuʋ̈ˈˈ ˈˈklʋʋ ꞊dede ˗yö bhɔ ˗ni ˈgü, ˗a ˗wɔn ˈgü ˗yö ˗ya ˈˈgbʋ bɔ ˗sü ˗bha ˈpö. ˗Dhɛ ˈö mɛn kpö bhë ˗yö ˗kpan Yesu ˈˈɲanyi ˗bha, ˈyö ˈwo˗ pö: ‹Lazaa ˗dhɔ ꞊dede ˗kun Yesu kë ˗ni ˈgü!› ˈˈKɛɛ ˗a ˗mɛn ˈbhaa ˗nu ˗wa ˗pö: ‹ˈMën ˗kë ˈö ˈyii˗ dha ˈsa?› ˈMën Yesu ˗dho ˗a kë?

Yesu ˗yö ˗dho Lazaa blɔɔndhö. ˗Gwö kpö ˈkpii˗ do ˗kun ˗a ˈˈdhiʋ̈, ˈyö˗ pö ˗wa bho mü. ˈYö Maatö ˗ya pö: ‹ˈWo˗ ˈwaannu ˗a ˗dhɛkpaɔyi ˗ya kë ˗yiishiö. ˗A ˈˈtëë ˗dho kë dɔ ˗sü ˈgü!› ˈKö ˗kë ˈˈdhʋ̈, ˗wo ˗gwö ˈö bhë ˗a ˗bho mü, ˈö Yesu ˗yö ꞊bhɛɛ ˈö˗ pö: ‹N Dë, ü ˈˈnuɛ n ˗man bhɛɛwo ˗daakë ˗sü ˗bha. A˗ ˈwɔn ˗dɔ ꞊dhɛ ü˗ ˗daakë yi ꞊gban ˈka. ˈˈKɛɛ a ꞊bhɛɛ n ˗wo ˗ta ˈˈdhʋ̈ kö mɛn ˗nu ˈwo yö, ˗wa ˈwɔn dɔ ꞊dhɛ bhi ꞊nën ˈü n bɔ.› ˗Dhɛ ˈö ö bo bhɛɛˈˈ ˗sü ˈka, ˈö ˗gbla ˈˈgbɩɩ˗ ˈka ˈö˗ pö: «Lazaa, ˗bhö yö ˈˈkpɛnŋ!› ˈDhɛ ˈö˗ pö ˈˈdhʋ̈ ˈyö ˈwɔn ˈˈmlünmlünsü ꞊dede ˗yö ˗kë: Lazaa ˗yö ˗go ö bun ˈgü ˈö yö ˈˈkpɛnŋ, kö sɔ ˈˈpuu ˗nu ˗wo plʋʋˈˈ ˗sü ˈka˗ ˗bha. ˈYö Yesu ˗ya pö: «˗Kaa ˈˈpʋ ˈka ka ꞊kwaa˗ ˗zü ˗yö ˈdho.»

Mɛn ꞊va ꞊dede ˈˈɲan ˗yö ˗da ˈwɔn ˈö bhë˗ ˈgü, ˈö ˈwo ˈdhaŋ bho Yesu ˈˈdhiʋ̈. ˈˈKɛɛ mɛn ˈbha ˗nu ˗wo ˗dho ˈwo˗ ꞊blɛɛ Fadhiziɛn ˗nu ˗dhɛ. ˈÖ sü yi ˈö bhë ˗a ˗bha, Fadhiziɛn ˗nu ˗kun ˗a ˈˈpiʋ̈ ˈwo Lazaa waa Yesu ˗an zë. Yesu ˗bha bɔmɛn ˗nu 12 ˈwo bhë, ˗a mɛn do ˈwo˗ ˗dhɛ Zuda Isikadhiɔtö, ˗yö ˗dho Fadhiziɛn ˗nu ˈˈpiʋ̈ mɛn ꞊gban tii ˈka, ˈö˗ pö ˗an ˗dhɛ: ‹ˈWëë˗ ˗dhɛ ˈö ˈka ˗dho ˗a nu n ˗dhɛ ꞊ya kë ꞊dhɛ ˈman ka ˗takun Yesu ˈkun ˗sü ˗bha?› ˗An ˗wo ˗yö ꞊mɔɔn ˈˈtamanga 30 ˗bha, ˈö Zuda ˗yö ˗ya ˗kɔ ˈö dho Yesu ˈˈdhiʋ̈ dɔ ˗a ˈka Fadhiziɛn ˗nu ˗gɔ, ˗a mɛɛnˈˈ ˗sü ˗bha.