Pë ˈbha ˈyaa ꞊mɔɔn˗ ˗an ˈˈduannu ˗sü ˗bha

Gɔndë do ˈö ˈyaa kun ˈˈtasü ˈsü ˗ni ˈgü, ˗yö ˗kun ˗ya ˗sü ˈka ˗Zlan ˗dhɔkëgükɔ ˈˈkpan ˈˈdhiʋ̈ yi ꞊gban ˈka, kö ˗yö gbadhɛ ˗ni ˈgü. Yi do ˈka ˈˈdooka, ˗yö ˗kpan Piɛɛ waa Zan ˗an ˗bha kö ˗wo ˈdho ˗ni ˈgü ˗Zlan ˗dhɔkëgükɔ ˈgü. ˈYö˗ pö ˗an ˗dhɛ: ‹˗Ka pë ˈbha nu n ˗dhɛ.› ˈYö Piɛɛ ˗ya pö: ‹Pë ˗së ˈbha ˗yö n ˗gɔ ˈö ˗ʒiö ˈwëëga ˗ta. Yesu ˈtɔ ˈgü, ˗bhö luuˈˈ ü ˈˈta ˈsü.› Piɛɛ ˗ya ˗takun ˈö dɔ ˗gɛan, ˈö ˈˈta sü. ˗A ˈwɔn ˗yö mɛn ˗nu zuʋ̈gblüdhi ꞊dedewo, ˈyö ˗an ꞊vadhɛ ˗wo ˈdhaŋ bho Yesu ˈˈdhiʋ̈.

ˈˈKɛɛ ˗yö ˗shiö ˈˈsaabhomɛn ˗nu waa Sadusömɛn ˗nu ˗dhɛ. ˗Wo bɔmɛn ˗nu ˗kun ˈwo ˈdho ˗an ˈka zakanmɛn ˗nu ˗kuu ˈˈdhiʋ̈, ˈwo˗ pö ˗an ˗dhɛ: ‹De ˈö gɔndënën bhë ˗a ˈˈdhɛkësü ˗faan nu ka ˗dhɛ?› ˈYö Piɛɛ ˗ya pö: ‹Yesu Klito ˈö ˈka˗ zë bhë, yö ˗mü.› ˈDhɛ ˗kë ˈˈdhʋ̈, ˈyö ˈtɔŋ˗ ˗gɔmɛn ˗nu ˗wo ˗gbla ˈwo˗ pö: ‹ˈKaa ˈdho Yesu ˗wɔn blɛɛˈˈ ˈzü.› ˈˈKɛɛ ˈyö bɔmɛn ˗nu ˗wa pö: ‹Yi dua ˗mü kö ˈyi˗ ˗wɔn blɛɛˈˈ, ˈyi ˈdho ˗a ˈka.›

ˈDhɛ ˈwo wo ˗kwaa Piɛɛ waa Zan ˗an ˗zü, ˗wo ˗to ˈˈshia˗ ˈmü ˈö ˈwo dho gwëëˈˈ ˈdhɛ ˗nu ˈwo to ˗an ˈˈpiʋ̈ ˈö ˈwɔn ˈˈpɛpɛ ˈö ˗kë, ˈwo˗ ꞊blɛɛ ˗an ˗dhɛ. ˗Wo ˗bhɛɛ Zoova ˗dhɛ wo ˈˈkwëë, ˈwo˗ pö: ‹Dɔ ˈˈgbɩɩ˗, ˗bhö ˗zogbandhe nu yi ˗dhɛ kö ˈyi ˈdho ü ˗bha yö ˈka ˈˈdhiʋ̈.› Zoova ˗yö ˗an ˗gba ö ˗bha ˗zuu ˈˈslʋ̈ʋ̈slʋ̈ ˈka, ˈö ˈwo dho ˗zlanwopösü waa mɛn ˈˈdhɛkësü ˈka ˈˈdhiʋ̈. Mɛn ꞊va ꞊dede ˗wo ˗ya ˈdhaŋ ˗bho Yesu ˈˈdhiʋ̈ ˗sü ˗bha. ˗Druɛɛ ˗yö ˗da Sadusömɛn ˗nu ˈgü, ˈyö ˈwo bɔmɛn ˗nu ˗kun ˈwo ˗an ˗da ˗kaso ˈgü. ˈˈKɛɛ gbeŋ, Zoova ˗yö ö ˗bha ˈˈkiö do ˗bɔ ˈö ˗kaso ˈˈkwɛɛ ˗nu ˈˈdhi ˗pʋ ˈö˗ pö bɔmɛn ˗nu ˗dhɛ: ‹˗Ka ˈdho ˗Zlan ˗dhɔkëgükɔ ˈgü ˈbhaawo kö ˈka mɛn ˗nu ꞊klaŋ kë mü.›

˗Dhɛ ˈö˗ ˗ta ˗dhɛ ˗yö ꞊kpɔɔ, mɛn ˗nu ˗wa ˗pö zakanmɛnn ˗nu waa ˈtɔŋ˗ ˗gɔmɛn ˗nu ˗dhɛ ꞊dhɛ: ‹˗Kasokɔ ˈˈdhiʋ̈ ˗yö ta ˗sü ˈka, ˈˈkɛɛ mɛn ˗nu ˈö ˈka ˗an kun bhë ˈwaa mü ˈzü. ˗Wo mɛn ˗nu ꞊klaŋkë ˗ni ˈgü ˗Zlan ˗dhɔkëgükɔ ˈgü.› ˗Wo ˗dho ˈö ˈwo ˗an kun, ˈö ˈwo nu ˗an ˈka ˈzü zakanmɛn ˗nu ˗dhɛ. ˈYö ˈˈsaabhomɛn ˈkpii˗ ˗ya ˗pö ˗an ˗dhɛ: ‹Yi˗ ˗pö ka ˗dhɛ ˈkaa ˈdho Yesu ˗wɔn blɛɛˈˈ ˈzü, ˈˈkɛɛ ˈkaa˗ man.› ˈYö Piɛɛ ˗ya pö: ‹Yi dua ˗mü ˈyi yi ˗gɔ ˈdho ˗Zlan ˗dhɛ ˈˈshia˗ kö ˗yö ʒiö ˗a ˈka mɛnbhɩɩdhe ˗ta.›

˗Yö ˗shiö ꞊dedewo ˈtɔŋ˗ ˗gɔmɛn ˗nu ˗dhɛ, ˈö ˈwo ˗kun ˗a ˈˈpiʋ̈ ˈwo bɔmɛn ˗nu zë. ˈˈKɛɛ Fadhiziɛn do ˈbha ˈwo˗ ˗dhɛ Gamadhiɛdhö, ˗yö ˗luu ˈö˗ pö: ‹˗Kaa kë ˗së ˈka! ˗A ˈbha ˗ya kë kö ˗Zlan ˗yö mɛn ˗nu ˈwo bhë ˗an ˈˈpiʋ̈. Ka˗ ˈˈpiʋ̈ ꞊dedewo kö ˈka ˈkozë ˗Zlan ˈka ˗ee?› ˗Wo wo ˈˈtʋ ˗to ˗a ˗wo ˗bha. ˈDhɛ ˈwo wo bo bɔmɛn ˗nu man ˗sü ˈka ˗klaaga ˈka, ˗wa ˗pö ˗an ˗dhɛ ˈwaa ˈdho ˗zlanwopö, ˈö ˈwo wo ˗kwaa ˗an ˗zü. ˈˈKɛɛ ˈwɔn ˈö bhë ˈyii bɔmɛn ˗nu ˗kɔ ˈˈkan ˗zlanwopösü ˗bha toŋtoŋdhö. ˗Wo ˗dho nɔɔn˗ ˗së pö ˗sü ˈka ˗zogbandhe ˈka, ˗Zlan ˗dhɔkëgükɔ waa ˈkɔ ˈgü ˈkɔ ˈgü.