Yesu ˗yö mɛn ˈˈgblü ꞊va ꞊dede ˈˈdhi ˗gba

ˈˈSanni ˗kwɛ 32 Pakö yi ˗yö ꞊lo, Yesu ˗bha bɔmɛn ˗nu ˗wo ˗go wo ˗bha ˗zlanwopö ˈˈta ˈgü. ˈDhɛ ˗kë ˗dhɛ ˗an ˈgü ˗kun ga ˗sü ˈka bhë, Yesu ˗yö ˗an ˗sü ˈˈyitagɔ ˈgü, ˈö ˈwo dho Bɛtüsaidö kö ˗wo wo ˈˈtɛɛpa. ˈDhɛ ˈwɔn ˗ya ˈto ˈˈtɩtɩ kö ˗wo yö ˈˈyi ˈˈkpɔnŋ ˈˈdhiʋ̈, ˈyö Yesu ˗yö ˗kpan mɛn ˈˈgblü ꞊va ˗bha kö ˗wo dɔ ˈto ˗ni ˈgü ˗an ˗gɔ mü. Yesu ˗kun ˗a ˈˈpiʋ̈ kö waa ö ˗bha bɔmɛn ˗nu ˗wo ˈto ˈnënbhaawo wo do ˈka, ˈˈkɛɛ ˗yö ö ˗kɔ ˗ya mɛn ˗nu bhë ˗an ˗gɔ ˗së ˈka. ˗Yö ˗an ˗dhɛ ˗bo, ˈö ˗ya ˗an ꞊klaŋkë ˗sü ˗bha. Yesu ˗yö ˗an ꞊klaŋ ˗kë ˗Zlan ˗bha ˗Gblüdëdhɛ ˗wɔn ˈka, ˈö ꞊gloo˗ ˗bha. ˈDhɛ ˈˈbin ˗yö mën, ˈyö˗ ˗bha bɔmɛn ˗nu ˈwo ꞊ɲɔɔn ˗a ˗bha ˈwo˗ pö: ‹Din ˗yö ˗an ˗bha ˈkɔ. ˗A pö ˗an ˗dhɛ ˗wo ˈdho ˗bhöpë mɛɛnˈˈ kö ˗wa ˗bhö.›

ˈYö Yesu ˗ya pö: ‹˗A ˗dhɛ ˈyaa˗ ˗bha kö ˗wo ˈdho. Ka ꞊dede ka ˗bhöpë nu ˗an ˗dhɛ.› ˈYö˗ ˗bha bɔmɛn ˗nu ˗wa pö: ‹Ü˗ ˈˈpiʋ̈ ˈyi ˈdho pë ˈbha ˈdhɔ ˗an ˗bha ˈka ˗ee?› ˈYö Filipö ˈö ˗kë bɔmɛn do ˈka bhë, ˈö˗ pö: ‹ˈKwaa ꞊mɔɔn˗ ˗bha kö ˈkwa ˗bhöpë ˈdhɔ kö ˗yö ꞊mɔɔn mɛn ꞊va suu ˈwo yö ˗an ˗bha, ˈkö ˗kë ˗ʒiaanwo ꞊dhɛ ˈwëëga ꞊va ˗yö ˗kë kwa ˗gɔ.›

ˈYö Yesu ˗yö ˗an dhɛɛˈˈ kpɔ ˈö˗ pö: ‹˗Bhöpë ˈö kwa ˗gɔ ˗yö ꞊va ˗ee?› ˈYö Andre ˗ya pö: ‹ˈBluu˗ bhɛ ˈˈsoodhu waa ˈyuö˗ ˈsɛɛn˗ ꞊plɛ ꞊nën ˈwo kwa ˗gɔ. ˈˈKɛɛ ˗yö ˗dho ꞊mɔɔn kwa ˗ta ˗ee?› ˈYö Yesu ˗ya pö: ‹˗Ka nu ˗an ˈka n ˗dhɛ yö.› ˈYö˗ pö mɛn ˗nu ˗dhɛ ˗wo ˗ya ˈkpaa˗ ˗ta 50 50 ɛɛnˈˈ 100 100. Yesu ˗yö ˈbluu˗ waa ˈyuö˗ ˗nu bhë ˗an ˗sü ˈö ˗dhɛga dhaŋ˗ ˈgü, ˈö ꞊bhɛɛ, ˈö ˗an nu ö ˗bha bɔmɛn ˗nu ˗dhɛ kö ˗wa ˗gblü mɛn ˗nu ˗ta. Gɔɔn˗ ˗nu 5.000 ˈwo kun mü, dhoŋ ˗nu waa ˈnën ˈsɛɛn˗ ˗nu ˗wo pë ˗bhö ˈö ˈwo kën. ˈDhɛ ˈwo wo bo, Yesu ˗bha bɔmɛn ˗nu ˗wo ˗bhöpë ˗kpɛɛ ˈö to ˗an ˗löö kö ˗a ˈgü ˈyaa ˈdho shiʋ̈ˈˈ. ˗Bhöpë ˈˈkluklu ꞊töö ˗ɲaan 12 ˈnën ˈwo˗ ꞊slɔɔ. ˗Dhidhawɔn ꞊dede ˗mü, ˈyaa ˈˈdhʋ̈ ˗ee?

˗Yö ˗kë mɛn ˗nu ˈwo bhë ˗an ˗dhɛ ˗së ꞊dedewo. ˗A ˗wɔn ˈgü ˗wo ˗kun ˗a ˈˈpiʋ̈ ˈwo Yesu ˗kë ˗an ˗bha ˗gblüdë ˈka. ˈˈKɛɛ ˗a ˈwɔn ˗kun Yesu ˈˈɲaan ꞊dhɛ ˈˈtʋ̈ŋ ˈö Zoova ˗ya ˗ya kö ˗yö kë ˗gblüdë ˈka, ˈyaa kë ˈˈdhʋ̈. ˗Yö mɛn ˗nu ˈwo bhë ˗an ˈˈpiʋ̈ ˗kë, ˈö˗ pö ö ˗bha gwëëˈˈ ˗nu ˗dhɛ ˗wo ˗dho Galile ꞊weeyi ˈˈpian do ˗sü ˗ta. ˗Wo ˗da ˈˈyitagɔ ˈgü, ˈö Yesu yöö dosɛnŋ ˗yö dho ˗tɔn do ˈbha ˗ta. ˈMën ˗kë? ˗A ˗bhawɔn ˗kun ˈˈtʋ̈ŋ ˗bha kö ˗yö bhɛɛˈˈ ö Dë ˗dhɛ. ˈKö ˗kë ꞊dhɛ yö ˗kun Yesu ˗kɔ ˗ta ꞊va, ˗yö ˈˈtʋ̈ŋ ˗mɛɛn ˗kplawo kö ˗yö bhɛɛˈˈ.