Yesu ˗bha ˗bhöpë ˗totaabhasü

Zuifö ˗nu ˗wo Pakö ˈwlaan˗ ˗kë ˗kwɛ ꞊gban ˈˈpɛpɛ ˈka Nizan 14 ˈka. ˗Wa ˗kë kö ˗an ˗zo ˗yö ˗bö ꞊dhɛ Zoova ˗yö ˗an ˗bho ꞊dhuɛŋdhɛ ˈgü Ezitö ˈö dho ˗an ˈka ˈˈsɛ ˈö˗ ˈˈplüün bho ˗an ˗dhɛ, ˗a ˈgü. ˗Kwɛ 33 ˈka, Yesu waa ö ˗bha bɔmɛn ˗nu ˗wo Pakö ˈwlaan˗ ˗kë Zedhizadhɛmö ˈkɔ do ˈbhaa ˈgü ˈˈdhʋŋ. ˈDhɛ ˈwo wo ˗bo pëbhö ˗sü ˈka, ˈyö Yesu ˗ya pö: ‹Mɛn do ˗yö ka kpö ˈgü ˈö dho n ˈˈdhoo dɔ.› ˗Dhɛ ˈö˗ pö ˈˈdhʋ̈, ˗yö ˗mën ˗a ˗bha bɔmɛn ˗nu ˈka, ˈö ˈwo˗ pö: ‹De ˗mü?› ˈYö Yesu ˗ya pö: ‹Mɛn ˈa dho ˈbluu˗ ˈˈklu ˈö yö ˗a nu ˗a ˗dhɛ, yö ˗mü.› ˈYö ˈbluu˗ ˈˈklu bhë ˗a nu Zuda Isikadhiɔtö ˗dhɛ. Zuda ˗yö ˗to ˈˈshia˗ mü ˈö ꞊luu, ˈö go ˈkɔɔ.

˗Dhɛ ˈö ö ˗bo ˈdho ˗sü ˈka, Yesu ˗yö ˗bhɛɛ ˈö ˈbluu˗ ˈˈkluklu bho, ˈö˗ nu ö ˗bha bɔmɛn ˗nu ˈwo to ˗an ˗dhɛ. ˈYö˗ pö: ‹˗Ka ˈbluu˗ bhë ˗a ˗bhö. N kwi ˈa dho ˗a nu ka ˗wɔn ˈgü ˗a ꞊zuaan ꞊nën bhë!› ˗Yö ˗bhɛɛ ˈzü we ˗ta ˈö˗ nu ö ˗bha bɔmɛn ˗nu ˗dhɛ, ˈö˗ pö: ‹˗Ka we ˈö yö, ˗a mü. Yö ˈnën ˈö ˈtɔ˗ n ꞊ɲɔɔn ˈö dho ꞊wɛnŋ kö ˗Zlan ˗yö ka ˗bha ˈwɔn yaa ˗nu ˗bhawɔn ˈto, ˗a ꞊zuaan. A˗ ˈˈplüün ˗bho ka ˗dhɛ ꞊dhɛ ka ˗dho kë ˗gblüdë ˗nu ˈka n ˈˈpiʋ̈ dhaŋ˗ ˈgü. ˗Kaa kë ˈˈdhʋ̈ ˗kwɛ ꞊gban ˈka kö ka ˗zo ˗yö ˗buö n ˈka.› ˗Bhɔkwëë ˈwo˗ ˗kë bhë, ˗wa ˗dhɛ ꞊dɛɛ Dëmɛn ˗bha ˈˈdooka ˗bhöpë.

ˈDhɛ ˈwo wo bo pëbhö ˗sü ˈka, ˈyö Yesu ˗bha bɔmɛn ˗nu ˗wo ˗ya zɔɔdhe man ˗sü ˗bha kö mɛn ˈö ꞊bhlëësü ˗an ꞊zinŋ ˈgü, ˗wa dɔ. ˈˈKɛɛ Yesu ˗ya ˗pö ˗an ˗dhɛ: ‹Mɛn ˈö ˈkpii˗ ka ꞊zinŋ ˈgü ˈnën ˗tɔ mɛn ˈö ö ˗de yö ꞊dhɛ ka ˗bha mɛn ˈˈtɩtɩ, ˈö˗ ꞊bhlëë ˈyaa ˈdhö, ˗a ˈdhö.

‹Ka ˈnën ˈka ˗tɔ n ˈˈtɔŋdë ˗nu. ˈWɔn ˈˈpɛpɛ ˈö n Dë ˈdhö˗ ˈˈpiʋ̈ ˈa˗ blɛɛˈˈ ka ˗dhɛ, a˗ ˗blɛɛ ka ˗dhɛ. ˗A ˈˈtʋ̈ŋ ˈyaa ꞊gblɛɛn ˈzü kö ˈa dho n Dë ˈˈpiʋ̈ dhaŋ˗ ˈgü. Ka ˗dho ˈto ꞊taabha, ˈyö mɛn ˗nu ˗dho ˗a ˈwɔn dɔ ꞊dhɛ n ˗man gwëëˈˈ ˗nu ˗mü ka ˈka ˗dhɔ ˈö ka ˈko ꞊zinŋ ˈgü bhë, ˗a ˗bha. Ka ˗dhɔ dua ˗mü kö ˗yö ka ˈko kë ꞊dhɛ ˗kɔ ˈö ka ˗dhɔ ˗yö n ˗kë ˗a ˈka bhë, ˗a ˈdhö.›

˗A ˈˈdhiʋ̈tadhɛ ˈgü Yesu ˗yö ˗bhɛɛ ˈö˗ pö Zoova ˗dhɛ ˗yö ö ˗kɔ kpa ö ˗bha gwëëˈˈ ˗nu ꞊gban ˗ta. ˗Ya ˗pö Zoova ˗dhɛ ˗yö ˗an ˗takun kö ˗wo yö kë ˗dhikodhɛ ˈgü. ˗Yö ˗bhɛɛ kö Zoova ˈtɔ ˗yö bhɔ. Waa ö ˗bha gwëëˈˈ ˗nu ˗wo ˗wɩ Zoova ˈˈpiʋ̈, ˈö ˈwo yö ˈˈkpɛnŋ. ˗A ˈˈtʋ̈ŋ bhë ˗a ˈka, kö Yesu ˈkun ˈˈtʋ̈ŋ ˈyaa ꞊gblɛɛn ˈzü.