Yesu ˗yö ˈˈta ˗sü ˈˈyi ˗ta

Yesu ˈyaa mɛn ˈˈdhɛkë ɛɛnˈˈ ˈyaa mɛn ˗nu bho ga ˈgü dosɛnŋ. ˗A ˗kɔ ˗yö ˗ʒiö ˈpö ˈˈtɛɛ waa dha ˗an ˗gɔ. ˗Dhɛ ˈö Yesu ˗yö ö bo bhɛɛˈˈ ˗sü ˈka ˗tɔn ˗ta, ˈyö ˗dhɛga Galile ꞊weeyi ˈˈpian ˈˈpiʋ̈, ˈö ˗kpan ˈˈtɛɛ ˈˈgbɩɩ˗ ˗bha kö ˗yö ʒiö ˗ni ˈgü ˗a ˗ta. ˗A ˗bha bɔmɛn ˗nu ˗kun ˈˈyitagɔ ˈgü, ˈö ˗dho ˈˈdhiʋ̈ ˗sü kun ꞊gbɔɔn ˗ni ˈgü ˗an ˗ta. Yesu ˗yö ˗yɔɔ ˈö ˗ya ˈˈta ˈsü ˗sü ˗bha ˈˈyi ˗ta, ˈö dho ˗an ˈˈdhiʋ̈ ˗gɔ. ˈDhɛ ˈwo ˗kpan mɛn ˈbha ˗bha kö ˗yö ˈˈta ˈsü ˗ni ˈgü ˈˈyi ˗ta, ˈyö ˈˈsuʋ̈ ˗yö ˗da ˗an ˈgü. ˈˈKɛɛ ˈyö Yesu ˗ya pö ˗an ˗dhɛ: ‹Man ˗mü, ˈkaa ˈdho ˈˈsuʋ̈.›

ˈYö Piɛɛ ˗ya pö: ‹Dëmɛn, ꞊ya kë ü ˈka ꞊dedewo, ˗a pö n ˗dhɛ ˈa nu ü ˈˈpiʋ̈.› ˈYö Yesu ˗ya pö˗ ˗dhɛ: ‹˗Bhö nu!› ˈYö Piɛɛ ˗yö go ˈˈyitagɔ ˈgü ˈˈtɛɛ ˈˈgbɩɩ˗ bhë ꞊zinŋ ˈgü, ˈö ˗ya ˈˈta ˈsü ˗sü ˗bha ˈˈyita Yesu ˈˈpian ˈˈpiʋ̈. ˈˈKɛɛ ˗dhɛ ˈö yö Yesu ˈka ꞊klöö˗, ˈyö ˈˈsuʋ̈ ˗yö ˗da ˗a ˈgü, ˈö ˗ya ˈdho ˗sü ˗bha ˈˈyi ꞊löö. ˈYö ˗gbla ˈö˗ pö: ‹Dëmɛn, ˗bhö nu n ˗dhɛ!› ˈYö Yesu ˗ya kun ˗a ˗kɔ ˗bha, ˈö˗ pö: ‹ˈMën ˗kë ˈö ˈˈsuʋ̈ ˗yö ˗da ü ˈgü? Ü ˗bha ˗zoyödhe ˗yö ˈˈmɛn?›

Yesu waa Piɛɛ ˗wo ˗da ˈˈyitagɔ ˈgü, ˈö ˈˈtɛɛ ˈˈgbɩɩ˗ bhë ˗yö to ˈˈshia˗ mü ˈö ˈduannu. ˗Bhö ü ˗zota ˗kɔ ˈö Yesu ˗bha bɔmɛn ˗nu ˗wo ˗kë ˗a ˈka wo ˗de ˈgü, ˗a ˈgü! ˈYö ˈwo˗ pö Yesu ˗dhɛ: ‹˗Zlan Gbö ꞊dede ˗mü ü ˈka.›

Yesu ˗kɔ ˗bha ˗ʒiö ˈˈtɛɛ ˗gɔ ˗sü ˗blɛɛsü ˈyaa kë ˈˈdhʋ̈. ˈˈTʋ̈ŋ do ˈbha ˈka kö waa ö ˗bha bɔmɛn ˗nu ˗wo ꞊weeyi ˗ta, ˗yö ˗dho ˈö yi zë ˗a ˈˈyitagɔ ꞊zlöö. ˗Dhɛ ˈö kun yi ˈgü, ˈyö ˈˈtɛɛ ˈˈgbɩɩ˗ ˗ziisü ˗yö ˗ya ʒiö ˗sü ˗bha. ˈˈYi kpökpö ˗nu ˗kun man ˗ni ˈgü ˗an ˗bha ˈˈyitagɔ ˗bha, ˈö˗ ˈˈyi ˗ya pa. Yesu ˗bha bɔmɛn ˗nu ˗wo ˗pa ˗a ˗bha ˈö ˈwo˗ pö: ‹˗Gɔmɛn, ˗bhö nu yi ˗dhɛ! Ga ˗ya dun kwa ˗ta!› ˗Dhɛ ˈö ˗kë ˈˈdhʋ̈, ˈyö Yesu ˗yö ꞊luu ˈö˗ pö ꞊weeyi ˗dhɛ: ‹˗Dhɛga ü ˗ta!› ˈYö ˗dhɛ ˗yö ga ˈˈtɛɛ waa ꞊weeyi bhë ˗an ˗ta, ˈö ˗dhɛ ˗yö dɔ dinŋdhö. ˈYö Yesu ˗ya ˗pö ö ˗bha gwëëˈˈ ˗nu ˗dhɛ: ‹Ka ˗bha ˗zoyödhe ˗yö ˈˈmɛn?› ˈYö ˈwo˗ pö: ‹ˈˈTɛɛ waa ꞊weeyi ˗ʒiaan ˗wo ˈwɔn ˗man ˗a ˗ta ˗wa!› Yesu ˗bha gwëëˈˈ ˗nu ˗wa ˈgüman ꞊dhɛ ꞊ya kë ꞊dhɛ ˗wa wo ˗zoyö ꞊dedewo Yesu ˗dhɛ, ˗a ˗dhɛ ˈyaa˗ ˗bha kö ˗wo ˈˈsuʋ̈ pë ˈbha ˗gɔ.