ˈˈƝan ˗to ˗kashokɔbhamɛn ˗ya gagade yö

꞊Dhuëŋdhe do ˈö ˗zuu yaa ˗yö kun ˗a ˈgü, ˗yö ˗kun Filipö. ˗Zuu yaa ˈö bhë ˗ya ˗kë ˈö ꞊dhuëŋdhe ˈö bhë, ˈö ˈwɔn ˗nu to ˈˈdhiʋ̈ ˈö˗ ꞊blɛɛ. ˗A sˈaa˗ ˈgü, ˗a ˗gɔmɛn ˗nu ˗kun ˈwëëga ꞊va ꞊slɔɔ ˗ni ˈgü. ˈDhɛ Pɔdhö waa Silasö ˗wo wo Filipö, ˗yö ˗ʒiö ˗an ꞊kee˗ ˗dhɛkpaɔyi ꞊va ˈˈpiʋ̈ kö ˗yö ˈˈgbla ˗ni ˈgü ˈö˗ pö: ‹Mɛn ˗nu ˈwo yö, ˗Zlan ˈö pë ꞊gban ˈˈpɛpɛ ˗gɔ ˗ta bhë ˗a ˗bha yökëmɛn ˗nu ˗mü ˗an ˈka.› ˈDhɛ ˈö ˗kë ˈˈdhʋ̈ ˈyö Pɔdhö ˗yö ˗gbla ˗zuu yaa ˈö bhë ˗a ˗ta ˈö˗ pö: ‹Yesu Klito ˈtɔ ˈgü, a˗ ˗pö ü ˗dhɛ ˈü ˈgo dhebɔnën ˈö bhë ˗a ˈgü.› ˈYö ˗zuu yaa ˗yö go ˗a ˈgü.

ˈDhɛ ˈö dhebɔnën ˈö bhë ˗a ˗gɔmɛn ˗nu ˗wa yö ꞊dhɛ wo ˗bha pë ˗slɔɔ ˗a ˈgü ˗pë ˈyaa ˗dhö ˈzü, ˈyö ˈwɔn ˗yö ˗shiö ˗an ˗dhɛ ꞊dedewo. ˈYö ˈwo Pɔdhö waa Silasö ˗an kun ˈwo dho ˗an ˈka ˈpö˗ ꞊kɔɔnmɛn ˗nu ˗kuu ˈˈdhiʋ̈. ˗Wa ˗po an ˗bha: ‹Mɛn ˗nu ˈwo yö ˗wa ˈtɔŋ˗ ꞊lögü, ˈgo mü ˗wa ˗bhluubhludhe ˗da kwa ˗bha ˈpö˗ ˈö yö ˗a ˈgü ˈgbɛ.› ˈYö ˈpö˗ ꞊kɔɔnmɛn ˗nu ˗wa pö ˗wo Pɔdhö waa Silasö ˗an man kö ˗wo ˗an ˗zuö ˗kasho ˈgü. ˈˈƝan ˗to ˗kashokɔbhamɛn ˗yö ˗an ˗da ˗kasho ˈkɔdhi tii ꞊dede do ˈgü, ˈö ˗an ˗gɛn ˗nu yö ˈˈdhü ˈgu.

ˈDhɛ ˈö Pɔdhö waa Silasö ˈwo kun Zoova ˈtɔ bhɔ ˈˈtan ˗nu bho ˗ni ˈgü, ˗kashogümɛn ˈˈwɛɛ ˗nu ˈwo ˈto, ˗wo ˗kun wo ˈˈtʋ ˈto ˗ni ˈgü ˗an ˗wo ˗bha. ˈDhɛ ˈkwa dɔ gbeŋ ꞊zinŋgü, ˈyö ˈˈsɛ ˗yö ˗ya ꞊ziisü ˗bha ˈˈgbɩkɩgbɩkɩ ˈka. ˗Kasho ˗kɔ ˈö bhë ˗a ˗gɛngbandhɛ ˗nu ˗wo ꞊zii ˈpö ˈö˗ ˈˈkwɛɛ ˗nu ꞊gban ˗wo ˈˈpʋ, ˈö kashogümɛn ˗nu ˗bha ꞊yɔɔ˗ ˗nu ˗wo pʋ. ˈˈƝan ˗to ˗kashokɔbhamɛn ˗yö ˗dho ˗biaa ˈka ˈö ˗kpan ˈˈkwɛɛ ˗nu ˗bha kö ˗wo ˈˈpʋ ˗sü ˈka. ˗A ˗bhaa ˈgü ˗be ˗kashogümɛn ˗nu ꞊gban ˗wa ꞊duëë. ˗A ˗wɔn ˈgü, ˗yö ö ˗bha ˗blaan ˗dhaa ˗sü kö ˈö ö ˗de zë.

ˈˈKɛɛ ˈyö Pɔdhö ˗yö ˗gbla ˈˈgbɩɩ˗ ˈö˗ pö: ‹ˈBha ˗dho pë ˈˈdhiʋ̈˗ kë ü ˗de ˈka, mɛn ꞊gban yi ˈyö!› ˈˈƝan ˗to ˗kashokɔbhamɛn bhë, ˗yö ˗yö ö kpɔn ˈgü Pɔdhö waa Silasö ˗an wëëdhö ˈö˗ pö: ‹ˈMën ˈö n dua ˈdhö ˗mü ˈa˗ kë kö ˈa dha?› ˈYö ˈwo˗ pö ˗a ꞊dhɛ: ‹Kaa ü ˗bha ˈkɔɔmɛn ˗nu ˗todhʋ̈sü ˗ka ˈdhaŋ bho Yesu ˈˈdhiʋ̈.› Pɔdhö waa Silasö ˗wo ˗an ꞊klaŋ ˗kë Zoova ˗wo ˈka ˈö waa ö ˗bha ˈkɔdhigümɛn ˗nu ˗todhʋ̈sü ˈwo bɔ ˈˈyi ꞊bhaa.