˗Wa Pɔdhö bɔ Wlɔmö ˗sɛ ˈgü

Pɔdhö ˗bha ˗zlanwopö ˈˈta ˗yaaga ˗naan ˈˈdhiʋ̈ ˗yö ˗ta Zedhizadhɛmö. ˗Wa ˗kun ˈmü ˈö ˈwo˗ ˗da ˗kaso ˈgü. Gbeŋ do ˈka, ˗yö ˈˈɲɛɛn ˗bho ˈö Yesu ˗ya ˗pö ˗a ˗dhɛ: ‹Ü ˗dho ˈdho ˈWlɔmö ˈü ˗zlanwopö mü.› ˗Wo Pɔdhö ˗sü ˈwo dho ˗a ˈka Sezadhe, ˈö ˗kwɛ ꞊plɛ ˗kë ˗kaso ˈgü mü. ˈDhɛ Pɔdhö kun ˈwɔn ˈˈgbɩɩ˗ ˈgü Fɛtusö ˗kuu ˈˈdhiʋ̈, ˗ya ˗pö: ‹A˗ ˈˈpiʋ̈ kö za ˈö yö ˗yö ˈdho Sezaa ˗kuu ˈˈdhiʋ̈, Wlɔmö.› ˈYö Fɛtusö ˗ya pö: ‹ˈDhɛ ˈö ˗kë ꞊dhɛ ˈü˗ ˈˈpiʋ̈ ˈü ˈdho Sezaa ˗kuu ˈˈdhiʋ̈ bhë, ü ˗dho ˈdho ˗a ˗kuu ˈˈdhiʋ̈.› ˗Wo Pɔdhö ˗da ˈˈyitagɔ ˈgü, ˈö ˈwo dho ˗a ˈka Wlɔmö. ˗A ꞊dhegblü Lukö waa Adhitakö ˗wo ˗dho ˗a ꞊kee˗.

ˈDhɛ ˈwo kun ˈˈyi ˗ta, ˈˈtɛɛ ˈˈgbɩɩ˗ ˗yö ˗ʒiö ˗dhɛkpaɔyi ꞊va ˈˈpiʋ̈. ˗An ꞊gban ˗bhaa ˈka ˗be ˗wo dho ga. ˈˈKɛɛ Pɔdhö ˗ya ˗pö ˗an ˗dhɛ: ‹˗Zlan ˗bha ˈˈkiö do ˗ya ˗pö n ˗dhɛ ˈˈɲɛɛn ˈgü ꞊dhɛ: «ˈˈSuʋ̈ ˈyaa ˗dho ü kë, Pɔdhö. Ü dua ˗mü kö ˈü ˈdho Wlɔmö. Mɛn ˈˈpɛpɛ ˈwo ü ˈˈpiʋ̈ ˈˈyitagɔ ˈgü bhë ˗wo ˗dho dha.»› ˗Dhɛ ˈö ˈˈdhʋ̈, ˗ka ka ˗zo ˗gban! Kwa ˈti dho ga.›

ˈˈTɛɛ ˈˈgbɩɩ˗ bhë ˗yö ˗ʒiö ö ꞊faan ˈka ˗dhɛkpaɔyi 14 ˈˈpiʋ̈. ˈDhɛ ˈö ꞊ɲɔɔn mü ˈö ˈwo ˗kpan ˈˈsɛ ˈö ˈˈyi ꞊zinŋ ˈgü ˈwo˗ ˗dhɛ Malütö bhë, ˗a ˗bha. ˗An ˗bha ˈˈyitagɔ ˗yö ˗gban pë ˈbha ˗bha ˈö wü. ˈˈKɛɛ mɛn 276 ˈö ˈwo kun ˗a ˈgü bhë, ˗an ꞊gban ˗wo ˗dha. ˗A mɛn ˈbha ˗nu ˗wo ˈˈyi ˗kë, ˈö˗ mɛn ˈbha ˗nu ˗wo ˈˈyitagɔ bhë, ˗a ˈˈpɛn ˗nu kun ˈö ˈwo yö ˈˈyi ˈˈkpɔnŋ ˈˈdhiʋ̈. Malütö ˗mɛn ˗nu ˗wo wo ˗zokë ˗an ˈˈpiʋ̈, ˈwo ˈˈshiʋ̈ ˗ya kö ˈˈwo ˗yö dɔ ˗an ˈka.

˗Dhɛ ˈˈsu ˗yaaga ˗yö ˗ʒiö, ˈˈsɔdha ˗nu ˗wo Pɔdhö ˗da ˈˈyitagɔ ˈˈwɛɛ ˈgü, ˈwo dho Wlɔmö. ˈDhɛ ˈwo ꞊lo mü, ˗a ꞊dhegblü ˗nu ˗wo ˗nu dɔ ˗a ˗gɔ ʒiaan˗. ˗Dhɛ ˈö ˗kpan ˗an ˗bha ˗yö ꞊faan ˗slɔɔ, ˈö ˗Zlan ˈˈnuɛ bho. ˈKö ˗kë ꞊dhɛ ˗yö ˗kun ˗kasogümɛn ˈka, ˗wo ˗we ˗a ˗bha kö ˗yö ö ˗dea ˈkɔ sü, ˈˈkɛɛ ˈˈsɔdha do ˗ya ˗maankë. ˗Yö ˗kwɛ ꞊plɛ ˗kë ˈkɔ bhë ˗a ˈgü. Mɛn ˗nu ˗kun nu ˗ni ˈgü ˗a ꞊tuaa bho, ˈö ˈwɔn ˈö ˗gban Yesu waa ˗Zlan ˗bha ˗Gblüdëdhɛ ˗bha, ˗a pö ˗an ˗dhɛ. Pɔdhö ˗yö ˈsëëdhɛ ˗nu ˈö ˗an bɔ ˗zlanwokɔdhi ˗nu ˈwo Azi Minë waa Zude ˗pö ˈgü, ˗an ˗bɛnzë mü. Zoova ˗yö ˗bɔ ꞊dedewo Pɔdhö ˗ta ˈö nɔɔn˗ ˗së pö mɛn ˗nu ˈö ˈwaa Zuifö ˈka ˗an ˗dhɛ.