ˈSëëdhɛ ˈö kwa ˈˈdhiʋ̈ʒiöwomɛn ˗nu ˈwo˗ bɔ

꞊Dhegblüzë ˗nu:

Mɛn ˗nu ˈö ˈkwa ˗kë Zoova ˗dhɔkëmɛn ˗nu ˈka ˗wo ˗nu ˈwo Biblö ˈgü bhë, ˗an ˗dhɔ ˗yö kwa ˗kë ꞊dedewo. ˗Yö ga ˗sü ˈka yi ˈgü ꞊dhɛ ˗kwɛzlan ˗nu ˈwo˗ Biblö ˈgü, ˗wo gagade ˈka ˈö ˗dhioo ˗tiaandhö ˗nu ˈwo dho kwa ˗takun kwa ˗bha ˗tosɛta ˈgü ˗an ˗dɔ kwa ˗ta. ˗Ya ˈgo ˗a ˈgü ˈzü ˗ya ˗zɔn ꞊dhɛ mɛnbhɩɩdhe ˗nu kwa ˗dhɔ ˗yö Zoova -kë ꞊dedewo. (Psaume 119:105; Lukö 1:3; 1 Zan 4:19) Gagade ˗nu ˈwo ˗Zlan ˗wo ˈgü, ˗yö yi ˈˈpiʋ̈ kö ˈyi˗ ˗zɔn mɛn ˈˈwɛɛ ˗nu ˗dhɛ. ˗A ˗wɔn ˈgü, yi zuʋ̈ˈˈ ˈˈgblü ˗yö dhi ˗sü ˈka ꞊dedewo kö ˈyi ˈsëëdhɛ be ˈö˗ ˗gɔ ˗kë ˗Gleŋ ˗nu ˈkwa ꞊mɔɔn˗ ˗bha ˈkwa ˗an sü Biblö ˗wopösü ˈgü ˈka bhë, ˗a yö ˈˈkpɛnŋ. ˈˈKɛɛ ˗yö yi ˈˈpiʋ̈ kö ˈsëëdhɛ ˗be ˈö yö, ˈyi˗ ˗wɔn blɛɛˈˈ ka ˗dhɛ ˈdɛdɛ ˈka.

˗Yö yi ˈˈpiʋ̈ kö ˈyi˗ pö ka ˗dhɛ ꞊dhɛ ˈsëëdhɛ ˗be ˈö yö, ˈyi˗ ˗pëkë ˈnën ˗nu ˗bha ˈka. ˈˈKɛɛ kwa ꞊mɔɔn˗ ˗bha ˈkwa˗ sü ˈkwa mɛn ˈˈwɛɛ ˗nu ˗takun kö ˗wo ˈwɔn ˗nu ˈwo Biblö ˈgü ˗an ˈbha ˗nu ˈgüman. ˈYö ˈdhɛ ˗kë ꞊dhɛ Biblö ˗yö mɛn ꞊gban kwa ˗bha ˈka bhë, ˗gleŋ ˗sɛŋbɔ ˗nu ˈwo˗ ˈgü mɛn ˈˈpɛpɛ ꞊mɔɔn˗ ˗bha ˈwo˗ ꞊trɔɔn ꞊slɔɔ. ˗A ˗gleŋ ˗nu ˈwo ˈˈdhʋ̈ ˗wo ꞊mɔɔn˗ ˗bha ˈwo kwa ˗takun kö kwa zuʋ̈ˈˈ ˈˈgblü ˗yö dhi ꞊dedewo.

ˈSëëdhɛ ˗be ˈö yö, ˗yö ˗gban ˗kwɛzlan ˗nu ˈwo Biblö ˈgü ˗an ˗ta, kö ˗yö ˈwɔn ˗nu ˈwo ˗gban mɛnbhɩɩdhe ˗nu ˗bha ˗tosɛta züdɔkɔ ˗bha ˈö˗ ˗wɔn blɛɛˈˈ. Yi yi ˈgü ˗dɔ ˈˈgbɩɩ˗ kö ˈyi ˗kwɛzlan ˗nu ˈwo bhë ˗an ˈgü ˈˈpʋ ˗së ˈka ö ˈˈtʋ̈ŋ ꞊dede ˗bha.

ˈˈKɛɛ ˈkö ˗kë ˈˈdhʋ̈, ˈsëëdhɛ ˗be ˈö bhë ˈyaa ˗kwɛzlan ˗nu ˈwo Biblö ˈgü ˗an ˗wɔn blɛɛˈˈ dosɛnŋ. Pë ˈˈbin ˗nu waa pë ˈyi ˗an bɛnzë ˈsëëdhɛ bhë ˗a ˈgü, ˗wo mɛn ˗nu ˈö Biblö ˗yö ˗an ˗bha ˗kwɛzlan ˗gɛn dɔ, ˗kɔ ˈwo kun ˗a ˈka wo ˗de ˈgü ˈsëëdhɛ bhë ˗a ˗wopömɛn ˗nu ˗wa ˈgüman ˗së ˈka.

ˈSëëdhɛ ˗be ˈö yö, ˗yö ˗kɔ ˈö Biblö ˗yö gɔɔn˗ ˗nu waa dhebɔ ˗nu ˈwo ˈwɔnman Zoova ˗ta ɛɛnˈˈ ˈwo ˗gban ˗a ˗gɔ, ˗an ˗wɔn ˗blɛɛ. ˗Yö kwa ˗takun ˈzü kö ˈkwa ˗gleŋ ˈsü ˗an ˗bha ˈwɔnzuan ˗nu ˗bha. (Wlɔmö 15:4; 1 Kodhɛngtö 10:6) ˈSëëdhɛ ˗be ˈö yö, ˗a ˗kɔ ˈˈpian ˗nu ˗wo 14. ˗A ˗kɔ ˈˈpian ˈdhɛ ˈdhö, ˗a zü ˗yö ˗dɔ ˗a ˈdhɛ to kwa ˈˈɲaan waa ˗gleŋ ˈkwa ꞊mɔɔn˗ ˗bha ˈkwa sü ˗an ˈgü ˗an ˗ta.

꞊Ya kë ꞊dhɛ ˈnënmɛn ˗nu ˗mü ka ˈka, kaa ü ˗bha ˈnën ˗nu ka ꞊mɔɔn˗ ˗bha ˈka ˗kwɛzlan ˗nu ˈwo˗ ˈgü ˗an ˗wo pö ka ˈkwëë˗ kö pë ˈˈbin ˗nu ˈwo˗ ˈgü ˈka ˗an ˗ta ˈˈdoodɔ ka ˈkwëë˗. ˗Ya ˈgo mü ˈzü Biblö ˈˈɲan ˗nu ˈwo ˗gban ˗kwɛzlan ˗nu ˈwo bhë ˗an ˗bha bhë, ka ꞊mɔɔn˗ ˗bha ˈka ˗an ˗wo pö ka ˈkwëë˗. ˗Bhö ü ˗bha ˈnën ˗nu ˗takun kö ˗kwɛzlan ˈö ˗an ˗wo pö ˈsëëdhɛ ˗be bhë ˗a ˈgü waa ˗kɔ ˈö ˗gban ˗a ˈka Biblö ˈˈɲan ˈö˗ ˗wo pö ˗a ˗bha bhë, ˗ya ˗bhokoo këdhɛ dɔ. ˈWɔn ˗nu kë ˗kɔ suu ˈö ˈˈdhʋ̈, ˗yö ꞊mɔɔn˗ ˗bha ˈö mɛn ˈkpii˗ ˈbha ˗takun kö nɔɔnwo ˗nu ˈwo Biblö ˈgü bhë ˈö ˗an ˈbha ˗nu dɔ.

˗Yö ga ˗sü ˈka yi ˈgü ꞊dhɛ ˈsëëdhɛ ˗be ˈö yö, ˗yö ˗dho zuʋ̈ˈˈ ˗së ˗mɛn ˗nu ˗takun ꞊dedewo. ˗Yö ˗kë wlüünën ɛɛnˈˈ mɛn ˗nu ˈö ˗wa kë zii ˗an ˈka oo ˗wo ꞊dho ˗gleŋ ꞊va ˗dede ˈsü ˈö ˈwo to ˗an ˈˈpiʋ̈ wo ˗bha ˗tosɛta ˈgü. ꞊Waa˗ kë ˈˈdhʋ̈, ˗wo ˗dho Zoova ˗dhɔkë ˈwo ˗kë ˗a ˗bha ˈkɔdhigümɛn ˗nu ˈö ˗dhɔkë ˗an ˈka ꞊dedewo bhë, ˗an ˈgümɛn ˗nu ˈka.