Imitez leur foi
1. ˈˈDhoogɔ ˈö˗ zü bho Ɔtɔblö 19 ˗ta bhë ˗a ˈgü, ˗Mën ˈö ˈkwa ˗dho ˗a draanˈˈ ˗zlanwokɔdhi ˗bha Biblö draansü ˈˈtʋ̈ŋ ˈka?
1 ˈˈDhoogɔ ˈö˗ zü bho ˗kwɛ 2015, Ɔtɔblö ˈˈsu ˗dhɛkpaɔyi 19 ˗ta bhë ˗a ˈgü, ˈsëëdhɛ ˗be Imitez leur foi ˈnën ˈkwa ˗dho ˗a draanˈˈ ˗zlanwokɔdhi ˗bha Biblö draansü ˈˈtʋ̈ŋ ˈka. ˈSëëdhɛ ˗be ˈö bhë, ˗yö mɛn 14 ˈwo ˗kë dhoŋ ˗nu waa gɔɔn˗ ˗nu ˈka, ˈö ˈwo kun wo ˗zo yö ˗ni ˈgü ˗Zlan ˗dhɛ, ˗an ˗bha ˗kwɛzlan ˈö go Biblö ˈgü, ˗an ˗wɔn ˗blɛɛ. ˗A ˗bɛn zë ˗kɔ ˗yö kwa ˗takun kö kwa ˗zo ˈya ˗dho bhɔ mɛn ˗nu ˈwo bhë ˗an ˈka, kö ˈkwa ˗an yö ꞊dhɛ mɛn ꞊dede ˗nu ˈwo bɔ ˈpö ˈwɔngbɩɩ˗ ˗nu ˈgü ˗an ˗bha Zoova ˗dhɔkësü ˈgü ˗a ˈdhö. ˈSëëdhɛ ˗be ˈö bhë, ˗yö ˗gleŋ ˗nu ˈwo go ˗kwɛzlan ˗nu bhë ˗an ˈgü ˗an ˗wɔn ˗blɛɛ, kö kwa ꞊dede ˈkwa ˗gleŋ ˈsü ˗an ˗bha ꞊dɛɛ.—Ebl. 6:12.
2. −Mën ˈbhaa ˗nu ˈö ˈwo ˈsëëdhɛ ˗be Imitez leur foi ˈgü?
2 ˗A ˈgüpë ˗nu: ˈˈTʋ̈ŋ ˗bhüöö do waa ˈˈsɛ ˈˈbin ˗nu ˗wo ˈsëëdhɛ ˗be bhë˗ ˈgü kö ˗wo kwa ˗takun ˗dhɛ ˗nu ˈö˗ mɛn ˈö ˈdhö ˈö kun ˗a ˗bha, waa ˈˈtʋ̈ŋ ˈö ˗tosɛta ˗kë ˗a ˈka, ˗an dɔ ˗sü ˗bha. ꞊Ya ˈgo ˗a ˈgü ˈzü, ˗a ˈwɔn ˗gɔ ˈdhɛ ˈö ˈdhö, ˗a ˈˈpian ˈbha ˗yö ˗dhö ˈö˗ ˗gɔ ˗kë « Qu’en penses˗ tu? » ˈka. ˗Yö ˗dho kwa ˗takun kö ˈkwa kwa ˗zota ˗kwɛzlan ˗nu bhë ˗an ˈgü, kö ˗gleŋ ˗nu ˈö ˈkwa ˗an ꞊draan bhë, ˈkwa ˗an ˗ya ꞊bhlëë ˈgü. ˈSëëdhɛ ˗be ˈö bhë ˗a ˈgü ˈzü, pë ˈˈbin ˗sɛŋbɔ ˗nu ˈö ˈwo ˗an ˗bho ˈkoo kë ˗sü ˈka ˗së ˈka, ˗wa ˈgü kö ˗wo kwa ˗takun ˗kwɛzlan ˗nu ˈwo bhë ˗an ˈgüman ˗sü ˗bha.
3. −Mën ˈö ˈkwa ˗dho ˗a kë kö ˈkwa ꞊trɔɔn ꞊slɔɔ ˈsëëdhɛ ˗be ˈö bhë ˗a draanˈˈ ˗sü ˈgü?
3 Ka ˗dho ˗a ꞊trɔɔn ꞊slɔɔ˗ ˗kɔ ˗kë ꞊dhɛ? ˈSëëdhɛ ˈö kwa ˈˈdhiʋ̈ziöwomɛn ˗nu ˗wa bɔ kwa ˗dhɛ ˗yö kwa ꞊faan ˗mën ˈö˗ pö: “˗Ka ka ˗zota, ˗ka pë ˗nu ꞊fii ˈkun, ˗ka pë ˗nu din ˗ga, ˗ka ka ˗kɔ ˈpa pë ˗nu ˈka, ˗ka ˗wo ˗nu man, ˗ka pë ˗nu ˈsuan˗ bho. ˗Ka ka ˗de ˗ya ˗an ˗duɛɛ ˈgü, kö pë ˗nu ˈö ˗an ˈˈɲan ˗yö ˗kpan ˗a ˗bha, ˈka ˗an yö ˈpö. Pë ˗nu ˈwo˗ ˗kë waa pë ˈö ˈka ˗dho ˗a kë ˗be kö ka ˗kë ˗an ˈˈgblʋʋ ˈgü, ˈka ˗an dan ˈˈkwëë.” ˈˈKɛɛ kwa ˗zo ˗ta ˗an ˈgü ˗sü ˈyaa ˈnën ˗tɔ, kwa ˗zo ˗ta ˈwɔn ˗nu ˈwo ˗dhi kwa ˗dhɛ ˗an ˈgü ˗sü. Yö ˈnën ˗tɔ ˗zota Biblö ˈgü ˗kwɛzlan ˗nu ˈwo bhë ˗an ˈgü ˗sü, waa ˈˈtɔŋdëdhɛ ˗kun mɛn ˗nu ˈwo bhë ˗an ˈka ˗sü. Kwa ˗bhawɔn ˗yö ˈˈtʋ̈ŋ ꞊va ˗bha kö ˈkwa kwa ˗zota ˗an ˈgü. (Neh. 8:8) ꞊Ya kë ꞊dhɛ ˗a ˈˈpian ˈö ˗dho draanˈˈ ˗a zü ˗yö ˗dɔ ˈwɔn ˗gɔ ꞊zinŋ ˈgü, ˗a ˈˈdhiʋ̈sümɛn dua ˗mü kö ˗yö minitö do ɛɛnˈˈ ˗a ˈˈgbu ˈsü kö ˗yö ʒiö ˗a ˈˈpian ˗blɛɛsü ˈgü. ꞊Ya kë ꞊dhɛ ˗a ˈˈpian ˈö kë “« Qu’en penses˗tu? »?” ˈka bhë, ˈyaa˗ ˈˈpian ˈö ˗dho draanˈˈ ˗a ˈgü, ˗a ˈˈdhiʋ̈sümɛn ꞊mɔɔn˗ ˗bha kö ˗ya ˈˈdhiʋ̈ta ˗zo ˗bo dhɛɛˈˈ do ɛɛnˈˈ ꞊plɛ ˈkpɔ ˗sü ˈka.
4. −Mën ˈö ˗kë ˈö ˗dho ˗kë ˗së kö ˈkwa ˈsëëdhɛ ˗be Imitez leur foi draanˈˈ?
4 ˈˈKpɔnŋtaadhɛ ˈö ˈkwa˗ ˈgü ꞊dɛɛ, ˗ya ˈˈpiʋ̈ ˗kɔ ꞊gban ˗kɔ ꞊gban ˗ta kö ˈö kwa ˗bha ˗zo ˗yö ˗Zlan ˗dhɛ ˗sü ˈˈyi bhüʋ̈ˈˈ. ˈSëëdhɛ ˗be ˈö yö,—waa ˈwɔn ˗gɔ ˗nu ˈwo La Tour de Garde ˈgü ˈö ˗an ˗gɛn ˗gban ˗a ˗ta, ˗wo gbɔɔdhe ˗tiaandhö ˈö Zoova ˗ya ˗kë kwa ˗gɔ, kö ˗wo kwa ˗bha ˗zo ˗yö ˗Zlan ˗dhɛ ˗sü ˗da ˈˈdhiʋ̈ ˗an ˈka. (Zak. 1:17) ˗Kwa ˈdho ˗zlanwokɔdhi ˗bha Biblö draansü ˗ta yi ꞊gban ˈˈpɛpɛ ˈka. ˗Kwa kwa ˗kɔ ˈˈdhiʋ̈ wlüüˈˈ kö ˈkwa ˈwɔn ˗daa kë ꞊va ˈsëëdhɛ ˗be ˈö bhë ˗a draansü ˈˈtʋ̈ŋ ˈka. ˈKwa˗ kë ˈˈdhʋ̈, kwa ˗dho ˗a ꞊trɔɔn ꞊va ꞊dede ꞊slɔɔ.