˗Bhö ˈˈɲɛɛntiimɛn ˗nu ˗takun kö ˗wo Zoova dɔ
1. Yesu ˗yö ˈˈɲɛɛntiimɛn ˗nu ˗wëëzësü ˗zɔn ˗kɔ ˗kë ꞊dhɛ?
1 ˈDhɛ ˈö Yesu kun bɔ ˗ni ˈgü ˈˈkwipö ˈwo˗ ˗dhɛ Zedhiko bhë ˗a ˈgü kö ˗a ga ˗dhɛkpaɔyi ˈyaa ꞊gblɛɛn züdɔ, ˈyö ˈˈɲɛɛntiimɛn ꞊plɛ ˗wo ˗gbla, ˈyö ˈwo˗ pö: “Dëmɛn ˗bhö ˈˈta yi ˗dhɛ!” ˈKö ˗kë ꞊dhɛ Yesu ˗kun ö ˗zota ˗ni ˈgü ˈwɔngbɩɩ˗ ˈö˗ ˈˈdhiʋ̈gan ˗ni ˗a ˈgü, ˗yö ˈduaannu ˈö mɛn ˗nu bhë ˗an ˗dhɛ, ˈö ˗an ˗dhɛ bo. (Mat. 20:29-34) Kwa ˗dho ˈˈɲɛɛntiimɛn ˗nu ˗wëëzë ꞊dhɛ Yesu ˈdhö ˗kɔ ˗kë ꞊dhɛ?
2. (a) ˗Kɔ ˗mɛɛn ˈö ˈkwa ꞊mɔɔn˗ ˗bha ˈkwa ˗zlanwopö ˗a ˈka ˈˈɲɛɛntiimɛn ˈö ˈkwa ˗kpan ˗a ˗bha mɛn ˗nu ꞊zinŋ ˈgü ˗a ˗dhɛ? (b) ˗Mën ˈö ˗dho kë kwa ˈˈɲaan ˈˈtʋ̈ŋ ˈö ˈkwa ˈˈɲɛɛntiimɛn ˗nu ˗takun ˗ni ˈgü ˗a ˈka?
2 ˗Bhö ˗an ˗takun: ꞊Ya kë ꞊dhɛ ˈbha ˗kpan ˈˈɲɛɛntiimɛn ˈbha ˗bha mɛn ˗nu ꞊zinŋ ˈgü, ˗bhö ˗a pö ˗a ˗dhɛ, ü˗ ˈˈpiʋ̈ ˈü˗ ˗takun. ˗A züdɔdhɛ ˈgü, ˗yö ꞊mɔɔn˗ ˗bha ˈö ˈˈsuʋ̈ ü ˗gɔ, ˈyö ˗tɔ ꞊dhɛ ꞊ya kë ꞊shiö ꞊shiö ˗wo ˗an ˗kwaan. ˈˈKɛɛ ˈtɔŋdëdhɛ ꞊dede ˈü˗ ˈˈpiʋ̈ kö ˈü˗ ˈkun ˗a ˗bha, waa ü ˗bha ˗zo ˗kë ˗a ˈˈpiʋ̈ ˗sü ˈö zuʋ̈ˈˈ ˈˈpuu ˈka, ˗yö ꞊mɔɔn˗ ˗bha ˈö˗ zuʋ̈ˈˈ ˗kë ˗saa. ˈˈKɛɛ ˗yö kë ü ˈˈɲaan ꞊dhɛ, mɛn ˈˈɲɛɛn ˗bha tröösü ˗gɔɔ ˗yö ꞊va. ˈMɛn ˈö ˈdhö, ˗a ˗takun ˗kɔ ˗sü ˗a ˗bha ˈˈɲɛɛn tröö ˗kɔ ˗bha. ꞊Ya kë ꞊dhɛ ˈbha ü bo ˗a ˗takun ˗sü ˈka, ˗a pö ˗a ˗dhɛ ꞊dhɛ ü Biblö ˗zɔn mɛn ˗nu ˗dhɛ ˗mɛn do ˈka. ˗A pö ˗a ˗dhɛ, ü˗ ˈˈpiʋ̈ kö ˈü Biblö ˈˈɲan do ˗wo pö ˗a ˗dhɛ. ˗Yö ꞊mɔɔn˗ ˗bha ˈö ˗kë Psaume 146:8 ɛɛnˈˈ Isaïe 35:5, 6 ˈka. ꞊Ya kë ꞊dhɛ ˗yö ꞊mɔɔn˗ ˗bha ˈö ˈsëëdhɛ ˗wo pö Blayö ˈgü, ˗a dhɛɛˈˈ ˈkpɔ ꞊dhɛ ˗ya ˈˈpiʋ̈ kö ˈsëëdhɛ ˈö Blayö ˈgü, ˈü ˗nu ˗a ˈka ˗a ꞊dhiaa, kö ˗ya ˗takun Biblö draansü ˗bha ˗ee? Ü ꞊mɔɔn˗ ˗bha ˈü˗ ˗takun ˈpö, kö ˗yö fishie ˗nu ˈwo ˈˈtʋtobhapë ˈka jw.org ˗ta, kö ˗ya ꞊slɔɔ. ꞊Ya kë ꞊dhɛ ˗a ˗bha ɔdinatëë ꞊mɔɔn˗ ˗bha ˈö pë ˗wo pö ˈˈgbɩɩ˗ eklan ˗ta, ˗yö ꞊mɔɔn˗ ˗bha kö ˈwɔn ˗gɔ ˗nu waa ˈsëëdhɛ ˗nu ˈwo˗ sü jw.org ˗ta RTF ˈgü, ˗yö kë ˗a ˗dhɛ ˗së.—˗Bhö kpɔɔˈˈ ˈkɔnën “Ü ˈˈɲɛɛntiimɛn ˗nu ˗takun ˗ni ˈgü...” ˗bha.
3. Kwa ˗dho ˈˈɲɛɛntiimɛn mɛɛnˈˈ ˗kɔ ˗kë ꞊dhɛ ü ˗bha ˗zlanwopödhɛ ˈgü?
3 ˗Bhö ˈˈɲɛɛntiimɛn ˗nu mɛɛnˈˈ: Kwa ˗zlanwopö ˗ni ˈgü ˈkɔ ˈgü ˈkɔ ˈgü, ˈkwaa ˗kpan ˈˈɲɛɛntiimɛn ˗nu ˗bha ꞊plɛplɛ, ˈyö ˗tɔ ꞊dhɛ dhiaŋ ˗zë ˗dhɛŋ ˗nu ˗dhɛ ˗sü ˗an ꞊vadhɛ ˈgü ˈlëësü. ˈDhɛ ˈö ˗kë ˈˈdhʋ̈, ˗kwa kwa ˈgü dɔ ˈˈgbɩɩ˗ kö ˈkwa ˗an “mɛɛnˈˈ,” kö ˈkwa ˗zlanwopö ˗an ˗dhɛ. (Mat. 10:11) Ü yökëyoo do, ɛɛnˈˈ mɛn do ˈö ka˗ ˗nu ka ˗bha ꞊klaŋplöödhɛ ˈdhö do, ˗a mɛn do ˗yö ˈˈɲɛɛntiimɛn ˈka ˗ee? ˗Bhö ˗a ˈˈslö mɛɛnˈˈ kö ˈü dhiaŋ ˗da ˗a ˗mɛn ˗ta. ꞊Ya kë ꞊dhɛ ˈˈɲɛɛntiimɛn ˗nu ˗bha ꞊klaŋplöödhɛ ˗yö ka ˗bha ˗zlanwopödhɛ ˈgü, ˗bhö kwa ˗bha ˈsëëdhɛ ˗nu ˈwo Blayö ˈgü ˗an nu ˗an ˗dhɛ ˗an ˗bha ˈsëëdhɛ ˗gɔkpɔdhɛ ˗bhaa ˈka. Ü mɛn ˈbha ˈö˗ ˗bha ˈkɔdhigümɛn do ˈˈɲɛɛn ˈdho tii, ˗a dɔ ˗ee? ˗Kɔlokota ˈö ˈˈɲɛɛntiimɛn ˗nu ˗takun, ɛɛnˈˈ ˈkɔ ˈbhaa ˈö ˈˈɲɛɛntiimɛn ˗nu ˗wɔ ˗a ˈgü, ˗yö ü ˗bha ˗zlanwopödhɛ ˈgü ˗ee? ˗A pö ˗a ˈkɔdhigümɛn do, ˗a ˗dhɛ ˈˈglaadhiʋ̈sümɛn, ɛɛnˈˈ ˗gɔmɛn ˗dhɛ ꞊dhɛ, ˗yö Zoova ˗bha ꞊Gbɛkiö ˗nu ˗dhɛ ˗së kö ˗wo ˈˈɲɛɛntiimɛn ˗nu ˗takun, kö ˗an ˗bha ˈsëëdhɛ ˗nu ˈwo Blayö ˈgü ɛɛnˈˈ ˈˈtʋtobhapë ˗nu, nu ˗an ˗dhɛ. ˗Bhö ˗a pö ˗a ˗dhɛ ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö ˗Zlan ˗yö ˈˈɲɛɛntröösü ˗bho ˈˈshia˗ ˈpapadhö. Video ˈö ˈwo ˈˈɲɛɛntiimɛn do ˗takun ˗a ˈgü kö ˗yö Biblö draanˈˈ Blayö ˈgü, ˈö˗ ˗gɔ ˗kë « Sans elle, je serais perdu » ˈka bhë, ü ꞊mɔɔn˗ ˗bha ˈü˗ ˗zɔn ˗a ˗dhɛ jw.org ˗ta. ꞊Ya kë ꞊dhɛ ˈbha ü ˗bha nu ˗sü ˗gɛn pö ˗a ˗dhɛ, ˗yö ꞊mɔɔn˗ ˗bha ˈö˗ ʒiaan ˗pʋ ˈü ˗gɔ kö ˈü ˗kpan ˈˈɲɛɛntiimɛn ꞊gban ˈˈpɛpɛ ˗bha.
4. −Gleŋ ˗mɛɛn ˈö Zanɛtö ˗bha ˈwɔnzuan ˗ya ˗zɔn kwa ˗dhɛ?
4 Kwa ꞊dhegblü dhebɔ do ˈö ˈˈɲɛɛn ˈdhö tii, ˈwo˗ ˗dhɛ Zanɛtö, ˈyö dho ˗wo ˈdhɛ ˈö ˈˈɲɛɛntiimɛn ˗nu ˗wɔ ˗a ˗bha ˈa ˈgü. Waa ˈnëndhiënën do ˗wo ˈˈdoo züdɔ ˗a ˗dhɛ ˈgü. Zanɛtö ˗ya ˗pö ˗a ˗dhɛ: “Yesu ˗yö ˈˈɲɛɛntiimɛn ˗nu ˈˈdhɛkë, kö ˗yö kë ˈpë ˗dho kë ˈˈɲɛɛntiimɛn ˗nu ꞊gban ˈˈpɛpɛ ˗dhɛ, ˗a blɛɛnˈˈ ˈka.” ˈYö ˈwo ˗Dhɛkpaɔ dhiaˈˈ ˈsëëdhɛ 21:3, 4 ˗wo pö, ˈyö ˗kɔ ˈö ˗Zlan dho ˗wo ˈö bhë ˗a yökodhiʋ̈ˈˈ ˗a ˈka ˗a ˗bha ꞊Gblüdëdhɛ ˈsaa˗ ˈgü, ˈyö˗ ꞊blɛɛ ˗a ˗dhɛ. ˈYö dhebɔnën bhë, ˈö ˗ya diindhö, ˈyö˗ pö: “˗Wo ˈö bhë n ˈti˗ man do ˈˈɲɛɛntiimɛn ˈˈdhii. Mɛn ˗nu ˈwo ˗dhɛ yö ˗an ꞊vadhɛ ˗bhaa ˈgü, mɛn ˗nu ˈö ˗an ˈˈɲɛɛn ˈdhö tii ˗bhë, ˗yö ˗sü pë ˈbhaa ˈö ˗an ˈˈbhɛman ˗nu ˗wa ˗kë ˗a ˗bha.” ˈYö Zanɛtö ˗yö ˈsëëdhɛ ˗be Qu’enseigne la Bible ? ꞊slɔɔdhɛ ˈö ɛntɛnɛtö ˗ta ˗a ˈˈnimlɔn ˗bɔ dhebɔnën ˈö bhë ˗a ˗dhɛ. ˈˈTʋ̈ŋ ˈö yö ˗a ˈgü, ˗wo Biblö ˗draan ˗gɛn ˗ɲaan ˈka ꞊plɛ ˈˈdhoogɔ do ˈgü.
5. ˈKö ˗kë ꞊dhɛ ˈkwaa ꞊mɔɔn˗ ˗bha ˈkwa ˈˈɲɛɛntii ˗mɛn ˗nu ˈˈdhɛkë ꞊dhɛ Yesu ˈdhö, ˈdhuëë˗ ˗mɛɛn ˈkwa ꞊mɔɔn˗ ˗bha ˈkwa˗ ꞊slɔɔ ˗zokë ˗an ˈˈpiʋ̈ ˗sü ˈgü?
5 Gagade ˗mü ˗dhɛ ˈkwaa ꞊mɔɔn˗ ˗bha ˈkwa mɛn ˗nu ˈö ˗an ˈˈɲɛɛn ˈdhö tii ˗an ˈˈdhɛkë ꞊dhɛ Yesu ˈdhö, ˈˈkɛɛ kwa ꞊mɔɔn˗ ˗bha ˈkwa mɛn ˗nu ˈö ˈˈkpɔnŋtaadhɛ ˈö yö ˗a ˗bha ˗zlan ꞊yaa˗ ˗an ˈˈgblüü ˗ɲan ꞊gban ˈwü, ˈö dho ˈö yö˗ ˈka ˈˈɲɛɛntiimɛn ˗nu ꞊dede ˗bha bhë, ˈkwa ˗an ˗takun, kö gagade ˈö ˗gban ˗Zlan ˗Wo ˗bha kö ˗wa ˈgüman. (2 Kod. 4:4) Yesu ˗yö ˈˈɲɛɛntiimɛn ꞊plɛ ˈˈdhɛkë Zedhiko ˗dhɛ ˈˈsuee, ˈyö ˗tɔ ꞊dhɛ ˗an “˗wëë” ˈnën˗ ˗kë. (Mat. 20:34) ꞊Ya kë ꞊dhɛ ˗zokë ˈˈɲɛɛntiimɛn ˗nu ˈˈpiʋ̈ ˗kɔ ꞊suu ˈö bhë ˈkwa˗ kë, kwa ˗dho ꞊mɔɔn˗ ˗bha, kö zuʋ̈gblüdhi ˈö go ˗a mɛn ˈbhaa ˗nu ˗takun ˗sü, kö ˗wo Zoova ˈö ˗dho ˈˈɲɛɛntiidhɛ bho ˈˈshia˗ ˈpapadhö ˗a dɔ ˗sü ˈgü bhë, ˈkwa˗ ꞊slɔɔ.
[ˈKɔnën, ˈˈpian 3]
Ü ˈˈɲɛɛntiimɛn ˗nu ˗takun ˗ni ˈgü...
• ˗Bhö ˈwɔn blɛɛˈˈ yö dede ˗a ˗dhɛ, ˈˈkɛɛ bha ˈdho ˈˈgbla. ˈˈɲɛɛntiimɛn ˗nu ˈwaa ˗dhɛ yö, ˈˈkɛɛ ˗an ˈˈtʋ ˈwɔnman ˗së ˈka.
• ꞊Ya kë ꞊dhɛ ü ˗dho yö ˗a ˗dhɛ ˈˈdhiʋ̈, ˗bhö ü ˗gbe yɔɔˈˈ, kö ˗yö ü ˈkun ü ˗gbeklu ˗bha. ˈBha ü ꞊zlɔɔ, yö ˗dho ꞊mɔɔn˗ ˗bha kö ˗yö ˈˈta ˈsü ü ˈˈpiʋ̈. ꞊Ya kë ꞊dhɛ ˈka yö ˗kpinŋ ˗bha, ˈka ˗kpan pë ˈö ˗gban ˗sü ˈka˗ ˗bha, ɛɛnˈˈ ˈka yö ˈˈkpankundhɛ ˈgü, ɛɛnˈˈ ˈzü ˈka ˗kpan pë ˈˈwɛɛ ˈö ꞊mɔɔn˗ ˗bha ˈö˗ ˗pö ˗a ˗bha, ˗yö ˗dho kë ˗së kö ˈü˗ blɛɛˈˈ ˗a ˗dhɛ.
• ˗Wo ˗nu ˈwo ˗kë ꞊dhɛ “ü˗ yö” “˗dhɛga” ˗nu ˈdhö bhë, ü ꞊mɔɔn˗ ˗bha ˈü ˗an pö ü ˈflëëgü. ˈˈɲɛɛntiimɛn ˗de ˈpö, ˗yö ˗wo ˗nu ˈwo bhë ˗an ˗pö. ˗An ˗dhɛ yö ˗kɔ ˗yö dhö, ˈö pë ˗nu ˈü˗ ꞊blɛɛ ˗an ˗dhɛ, ˈwo˗ ˈˈbin yö wo ˗gɔ ˈgü.
• ˗Ka ˈˈdoo dɔ ˗dhɛ ˗nu ˈö ˗zuöö ˈyaa mü ˗a ˈgü. ˗Dhɛ ˈö ˗zuöö ˈdhö mü ˗a ˗dhɔ ˈyaa ˈˈɲɛɛntiimɛn ˗nu kë, ˈyö ˗tɔ ꞊dhɛ ˈwɔn ˗nu ˈwo kë ˗ni ˈgü ˗an ˗züzü bhë, ˈwaa ꞊mɔɔn˗ ˗bha kö ˗wo ˗an ˗bhokoo dɔ.
• ꞊Ya kë ꞊dhɛ ü ˈdhö ʒiö, ˗a pö ˗a ˗dhɛ. ˗A ˗kë ˈˈdhʋ̈ ˗sü ˗dho ˗a kë ˈö ˈyaa dhiaŋ ˗zë ˗dhɛ ˈföödhɛ ˈgü.
• ꞊Ya kë ꞊dhɛ ˈˈdoo ˈö ˈka˗ dɔ bhë ˗yö ˈˈɲɛɛntiimɛn ˈö bhë ˗a ˗dhɛ ˗së, ˈˈkɛɛ kö ˈyaa ka ˗bha ˗zlanwopödhɛ ˈgü, ˗bhö dɔ ˈˈgbɩɩ˗ ˈü pë ˗ya Veuillez suivre l’intérêt (S-43) ˗ta kö ˈü˗ nu ka ˗bha ˈsëëdhɛ ˗bɛnzëmɛn ˗dhɛ.