˗Kwa mɛn ˗nu ꞊klaŋ kë ˈsëëdhɛ ˗be ˈnën Nɔɔn˗ ˗së ˗nu ˈka
1. ˈSëëdhɛ ˗be ˈnën Nɔɔn˗ ˗së ˗nu ˗yö ˗pë kë ˗sü ˈka ˗kɔ ˗kë ꞊dhɛ?
1 ˈˈDoo ˈö ˈkwa˗ dɔ Ʒue ˈˈsu ˗bha Kwa ˗bha ˗Gblüdëdhɛ ˗yö ˈsëëdhɛ ˈgü bhë, ˗ya ˗zɔn ꞊dhɛ kwa ˗bha mɛn ꞊klaŋ ˗kë ˗a ˈka pë ˈˈgbɩɩ˗ do ˈbha ˈnën ˗tɔ Nɔɔn˗ ˗së ˗nu ˈwo go ˗Zlan ˈˈpiʋ̈! Biblö ˈˈɲan ˈˈwɛɛ ˈbha ˈyaa ˗bɛn zë ˗sü ˈka ˗a ˈgü, kë ˈˈdhʋ̈ kö mɛn ˗nu ˗wa ˗wo pö vɛɛdhö wo ˗de ˗bha Biblö ˈgü. Kwa ˗bha ˈsëëdhɛ ꞊vadhɛ ˗wo ˗pë kë ˗sü ˈka kö ˗a ˗wopömɛn ˗ya draanˈˈ ö do ˈka. ˈˈKɛɛ ˈsëëdhɛ ˗be ˈnën ˈö bhë, ˗wa ˗pë ˗kë kö ˗a ˗wopömɛn ˗ya draanˈˈ ˗zlanwopömɛn do ˈka. ˈDhɛ ˈö ˈˈdhʋ̈, ˈkwa˗ nu mɛn ˈbha ˗dhɛ, ˗kwa kwa ˈgü dɔ ˈˈgbɩɩ˗ kö ˈkwa ˗a draanˈˈ ˗kɔ ˗zɔn ˗a ˗dhɛ, kö ˗a ˗mɛn ˗ya yö ꞊dhɛ nɔɔn˗ ˗së ˗nu ˈwo go Biblö ˈgü, ˗an draansü din ˗yö ˗së.—Mat. 13:44.
2. Kwa ˗dho yö kë ˈsëëdhɛ ˗be ˈnën Nɔɔn˗ ˗së ˗nu ˈka ˗kɔ ˗kë ꞊dhɛ ˗womɛndhɛsü ˗blɛɛsü ˈˈtʋ̈ŋ ˗nu ˈka?
2 ˗Womɛndhɛsü ˗blɛɛsü ˈˈtʋ̈ŋ ˈka: Ü ꞊mɔɔn˗ ˗bha ˈü˗ pö: “˗A yö ꞊dɛɛ ˈyö ˗tɔ ꞊dhɛ pë ˈö ˈˈkpɔnŋtaadhɛ dho kë ˗a ˈka ˈˈdhiʋ̈, mɛn ˈbha ˈyaa˗ ˗dɔ. Ü ˗bhaa ˈgü ˈwɔn ˗nu ˗dho ˗wɔ wo ꞊wɛɛ ˈgü ˗ee? [Ü ˈˈtʋ ˈto ˗a ˗wo ˗bha.] Nɔɔn˗ ˗së ˗nu ˈwo ꞊mɔɔn˗ ˗bha ˈö ˈwo ˗zoyödhe nu kwa ˗dhɛ, ˗wo Biblö ˈgü. Dhɛɛˈˈ ˈbhaa ˗nu ˈö ˗an ˗yɔ ˗nu ˈdhö Biblö ˈgü wo ˈnën ˈwo yö.” ˗Bhö ˗a ˈsëëdhɛ ˗be ˈnën nu ˗a mɛn ˗dhɛ, ˈü˗ pö ˗a ˗dhɛ ˗yö ö ˗kɔ ˈˈyɛ dhɛɛˈˈ ˗nu ˈwo ˗a ꞊taa bhë, ˗a do ˗bha. ꞊Ya ˈgo mü, ˗bhö ˗a draanˈˈ ˗kɔ ˗zɔn ˗a ˗dhɛ ˈwɔn ˗gɔ ˈö ö ˗kɔ ˗yɛ ˗a ˗bha bhë, ˗a ˗wo ˗bhüöö kpö ˗blɛɛsü draanˈˈ ˗sü ˈka. ˗A kë ˗kɔ ˈˈwɛɛ ˈbha ˈnën ˗tɔ dhɛɛˈˈ ˗tiaandhö ˈö ˗gban ˈwɔn ˗gɔ ˈö ü ˗zo ˈˈpiʋ̈ ˗be ˗a ˗bha, ˗a ˗kpɔ ˗a ˗mɛn ˗gɔ ˗sü. ꞊Ya kë ꞊dhɛ ˗a ˈwɔn ˗gɔ bhë ˗a ˗bha video ˗yö ˈdhö jw.org ˗ta, ˗zlanwopömɛn ˈbhaa ˗nu ˗wa ˗ya mü ˗an ˗bha ˈsëëdhɛ ˗nu ˗kɔ ˈˈslö ˈˈtʋ̈ŋ ˈka.
3. Kwa ˗dho mɛn ˗nu ꞊klaŋ ˗kë ˈsëëdhɛ ˗be ˈnën Nɔɔn˗ ˗së ˗nu ˈka ˗kɔ ˗kë ꞊dhɛ?
3 Kwa ˗dho mɛn ˗nu ꞊klaŋ kë ˗a ˈka ˗kɔ ˗kë ꞊dhɛ?: (1) Dhɛɛˈˈ ˈö˗ ˈˈnimlɔn ˈdhö ˗ya ˗sü ˈka ˗a ˈˈsɔɔ ˈö ˗tii ꞊dede ˈka bhë, ˗bhö ˗a ˗wo pö kö ˈü˗ ˗mɛn ˗takun kö ˗yö ö ˈˈtʋ̈ŋ kë ˗a ˗yɔ ꞊dede ˈgü. (2) ˗Bhö ˗wo ˗bhüöö kpö ˈdhɛ ˈö dhɛɛˈˈ bhë˗ ꞊wlöö ˗a ˗wo pö. (3) Biblö ˈˈɲan ˗nu ˈwo italikö ˈgü bhë ˗bhö ˗an ˗wo pö, ˈü dhɛɛˈˈ ˗nu ˈkpɔ ˗a ˗gɔ, kö ˗kɔ ˈö Biblö ˈˈɲan ˗nu bhë ˈwo dhɛɛˈˈ ˈö ˈˈnimlɔn ˈdhö˗ ˈˈsuee bhë ˗a ˗daa ˗kë ˗a ˈka, ˗ya yö. (4) ꞊Ya kë ꞊dhɛ ˗wo ˗bhüöö kpö ˈˈwɛɛ ˈbha ˗yö dhɛɛˈˈ bhë ꞊wlöö, ˗bhö ˈˈslö 2 waa˗ 3 ˗naan bhë, ˗an kë. ꞊Ya kë ꞊dhɛ video do ˗bha ˗yö ˗bɛ ˗a dhɛɛˈˈ ˗bha, ˈö ˈbhii˗ ˗ya mü ꞊köŋ, ˗bhö ˗a ˗ya mü.(5) ˗A ˈˈdhiʋ̈tasü ˈka, ˗bhö ˗a pö ˗a ˗dhɛ kö ˗yö dhɛɛˈˈ bhë ˗a ˗yɔ bɔ kö ˗ya kë ꞊dhɛ ˗ya ˈgüman kö ˈü˗ ˈwɔn dɔ.
4. −Mën ˈö ˗dho ˈkwa ˗takun kö ˈkwa yö kë ˗së ˈka ˈsëëdhɛ ˗be ˈnën ˈö bhë ˗a ˈka?
4 ˗Kwa kwa ˈgü dɔ ˈˈgbɩɩ˗ kö ˈkwa ˈsëëdhɛ ˗be ˈnën ˈö bhë ˗a dɔ ˗së ˈka. ˗Kwa yö kë ˗a ˈka ˈˈtʋ̈ŋ ˗së ꞊gban ˈˈpɛpɛ ˈka. ˈKa˗ pö ˈka Biblö draansü zü bhö, ˗ka ka ˗zota ka ˗bha ꞊klaŋ ˗bhawɔn ˗nu waa ˗kɔ ˈö ˈka ˗dho ˗a ꞊klaŋ kë Biblö ˈˈɲan ˗nu ˈwo ˈwɔn ˗gɔ bhë ˗a ˈgü ˗an ˈka, ˗an ˈgü ˗be. (Prov. 15:28; Këw. 17:2, 3) ꞊Ya kë ꞊dhɛ ka kë ˗ni ˈgü ˈˈgbɩɩ˗ mɛn ˗nu ꞊klaŋ kë ˗sü ˈgü, ˈsëëdhɛ ˗be ˈnën ˈö bhë ˗yö ˗dho kë ka ˗bha mɛn ˗nu ꞊klaŋ ˗kë gagade ˈka pë ˗wɔngbɩɩsü do ˈka.