Kwa ˗dho yö kë ˈˈtʋtobhapë ˗nu ˈka ˗kɔ ˗kë ꞊dhɛ?
1. ꞊Ya ˈgo kwa ˗bha ˈsëëdhɛ ˗nu ˈwo ˗bɛn zë ˗sü ˈka ˗an ˈgü, pë ˗së ˗mɛɛn ˈö kwa ˗gɔ ˈzü?
1 Gagade ˈˈnɛɛnɛn ˈö kpɛnŋdhö, ˗a ˗wo pö ˗dhɔ ꞊dede ˗yö mɛn ꞊vadhɛ ˗kë jw.org ˗ta. (Eccl. 12:10) ˈˈKɛɛ, ˈbha yö kë ˈˈtʋtobhapë ˗nu ˈka ˗blɛɛsü do ˗ee? ˈˈTʋtobhapë ˗nu ˈwo bhë, ˗wa ˗kë ˈö mɛn ˗nu ˗wo wo ˈˈtʋ ˈto ˈwɔn ꞊va ˗bha kwa ˗bha ɛntɛnɛtö ˈˈnimlɔn ˗ta. ꞊Trɔɔn ˗mɛɛn ˈö yö ˗kë ˗an ˈka ˗sü ˈgü?
2. Kwa ˗dho ˈˈtʋtobhapë ˗nu ˈsü ˗kɔ ˗kë ꞊dhɛ kö ˈkwa kwa ˗bha ˈkɔdhigümɛn ˗nu waa kwa ꞊dede kwa ꞊klaŋ kë ˗an ˈka?
2 Kö ˈkwa kwa ˗bha ˈkɔdhigümɛn ˗nu waa kwa ꞊dede kwa ꞊klaŋ kë ˗a ˈka: ˈˈTʋ ˗to Biblö ˗bha ˈˈtʋtobhapë ˗nu, kwa ˗bha ˈˈsu ˗bha ˈsëëdhɛ ˗be ˈnën ˗nu, ɛɛnˈˈ ˈsëëdhɛ ˈˈwɛɛ ˗nu ˗bha ˈˈtʋtobhapë ˗nu ˗bha ˗sü, kö ˈkwa ˈdho ˗ni ˈgü ˈˈta ˈgü, ɛɛnˈˈ kö ˈkwa yö kë ˗ni ˈgü bhë, ˗yö ꞊mɔɔn˗ ˗bha kö ˗yö kwa ˗takun kö ˈkwa pë ˗tiaandhö kë kwa ˗bha ˈˈtʋ̈ŋ ˈka. (Efɛ. 5:15, 16) Kwa ꞊mɔɔn˗ ˗bha ˈö ˈkwa pë ˗dɛɛ ˈbhaa ˗nu ˗da kwa ˗bha ˗Zlan ˗dhɔkë ˈkɔɔ ˗sü ˈgü, ˈˈtʋ ˗to pë ˗nu ˈö ˈkwa ˗dho ˗an draanˈˈ ˗an ˗bha ˗sü ˈka, kö ˗a ˈsëëdhɛ ˗yö kwa ꞊kwɛɛ˗. ꞊Ya kë ꞊dhɛ kwa˗ ˈˈpiʋ̈ kö ˈkwa ˈsëëdhɛ ˗wo pö ˗së ˈka, ɛɛnˈˈ kö ˈkwa ˗wo ˈbha draanˈˈ, yö ˗kë ˈˈtʋtobhapë ˗nu ˈka ˗sü ˈö kwa ˗bha Biblö draanˈˈ ˈˈtʋ̈ŋ ˈka bhë, ˗yö ꞊mɔɔn˗ ˗bha kö ˗yö kwa ˗takun ˗a ˗bha ꞊dedewo.
3. De ˗nu ˈö kwa ˗bha ˈˈtʋtobhapë ˗nu ˈdhö ˗së ˗an ˗bhaa ˈka kwa ˗bha ˗zlanwopödhɛ ˈgü?
3 ˗Kwa yö kë ˗an ˈka ˗zlanwopodhɛ ˈgü: Mɛn ˗nu ˈö ˈwo kwa ˗bha ˗zlanwopödhɛ ˗nu ˈgü, ˈö ˈwo˗ pö ꞊dhɛ ˈˈtʋ̈ŋ ˈyaa ˗an ˗gɔ kö ˈwo ˈsëëdhɛ ˗wo pö bhë, ˗wo ꞊mɔɔn˗ ˗bha ˈö ˈwo ˗we wo ˈtʋ ˗to ˈˈtʋtobhapë ˗nu ˗bha ˗sü ˗bha. Kwa ꞊mɔɔn˗ ˗bha ˈzü ˈö ˈkwa ˗kpan ˗wo ˈˈwɛɛ pömɛn ˗nu, ˈö ꞊wa wo ˈˈtʋ ˈto ˗Gblüdëdhɛ ˗nɔɔn ˗bha wo “˗dɩ ˗wʋ ˈgü” ˈö ˈwo ˗dho ˈˈwɩ˗ ˗bha, ˗an ˗bha. (Këw. 2:6-8) ˗Dhɛ ˈbhaa ˗nu ˈgü, ˈˈtʋ ˈto ˗sü ˗yö ꞊bhlëë ˗wɔn do ˈbha ˈka wɔkɔ ˈbhaa ˗nu ˈgü. ˗A ˈwɔnzuan ꞊nɛn: Hmɔng ˗nu ˗bha wɔkɔ ˗nu ˈgü, mɛn ˗nu ˗wo wo ˗bha ˗kwɛzlan ˗nu ˗gɛndɔ wo ˗bha ˈnën ˗nu ˗dhɛ wo ˈˈdhii. ˈYö ˗a ˈnën ˗nu dua ˗mü ˈpö kö ˈwɔn ˗nu ˈwo ˗an man, ˗yö ˈto ˗an ˈˈtʋʋdhö. Mɛn tii ˈˈsɛ ꞊vadhɛ ˈgü, pë draansü ˗dhɔ mɛn ˗nu ˗kë wo ˈˈtʋ ˗to ˗kwɛzlan ˗nu ˗bha ˗sü ˈka.
4. Dhɛɛˈˈ ˗mɛɛn ˗nu ˈö ˈkwa ꞊mɔɔn˗ ˗bha ˈkwa ˗an ˈkpɔ kwa ˗de ˗gɔ ˈwo ˗gban mɛn ˗nu ˗takun ˗sü ˗bha?
4 Kwa ˗bha ˗zlanwopödhɛ ˈgü, ˗yö ˗dho kë ˗së kö mɛn ˈö ˈkwa dhiaŋ zë ˗ni ˈgü ˗a ˗dhɛ, ˈkwa kwa ˗bha ˈˈtʋtobhapë do ˈˈwɩ ˗a ˗dhɛ ˗a ˗de ˗wo ˈgü ˗ee? Mɛn ˈbha ˈö ˈkwa kwa ˗bha ˈˈtʋtobhapë bɔ ˗a ˗dhɛ ˗a ˗bha ɛntɛnɛtö ˈˈnimlɔn ˗ta, ꞊ya˗ ꞊trɔɔn ꞊slɔɔ ö ˈˈtʋ ˗to ˗a ˗bha ˗sü ˈgü ˗ee? Kwa ꞊mɔɔn˗ ˗bha ˈö ˈkwa kwa ˗bha ˈˈtʋtobhapë do ˈsü kwa ˗bha ɛntɛnɛtö ˈˈnimlɔn ˗ta, ˈö ˈkwa˗ ˗ya CD ˗ta, kö ˈkwa ˗a ˈsëëdhɛ ˗be ꞊nënŋ ˗a ˗bha, kö ˈkwa˗ nu mɛn ˈbha ˈö˗ ˗dhɔ ˈdhö˗ ˗bha ˗a ˗dhɛ ˗ee? ˈSëëdhɛ ˗be ˗nu, ˈsëëdhɛ ˗be ˈnën ˗nu, ˈˈsu ˈbha ˈsëëdhɛ ˗be ˈnën ˗nu waa ˈsëëdhɛ ˈˈpɛn ˗nu ˈˈpɛpɛ ˈö ˈkwa ˗a ˗todhʋ̈sü ˗bha ˈˈtʋtobhapë nu mɛn ˗nu ˗dhɛ, kwa ꞊mɔɔn˗ ˗bha ˈö ˈkwa ˗an ꞊dhʋŋ, ˈkwa ˗an ˈˈdhi ˗bɛn zë kwa ˗bha ˈˈklɔnŋbho ˈsëëdhɛ ˗ta. ˗Wo ˈˈtʋtobhapë ˗nu ˗pëkë kö kwa ꞊dede ˈkwa pë draanˈˈ ˗an ˈka, kö gagade ˗nu ˈwo ˗gban ˗Zlan ˗bha ˗Gblüdëdhɛ ˗bha, ˈkwa˗ ta ˗zlanwopödhɛ ˗nu ˈgü.—1 Kod. 3:6.