Mɛn ˗nu ˈka ka ˈko sü ˗dɛɛ ˈgü, ˗ka ˗klu Zoova ˗bha yö ˗bha

1-2. (1) ˈMën ˗kë ˈö mɛn ˗nu ˈwo wo ˈko sü ˗dɛɛ ˈgü, ˈwo dho wo ˗zo yö Zoova ˗dhɛ? (Psaume 37:3, 4) (2) ˈMën ˈkwa dho ˗a draanˈˈ ˈwɔn ˗gɔ ˈö yö ˗a ˈgü?

KA KA ˈko ˗sü ˗dɛɛ ˈgü, ɛɛnˈˈ ka˗ ˈˈpiʋ̈ ˈka ka ˈko ˈsü ˗ee? ˈYaa za ˈgü ꞊dhɛ ˗tosɛta ˗kë zuʋ̈gblüdhi ˈgü ˗sü ˈö mɛn ˈö˗ ˗dhɔ ˗yö ka ˗kë ꞊dedewo bhë ˗a ˈˈpiʋ̈, ˗a ˗lele ka ˗ta. ˈˈKɛɛ ˗yö kë ka ˈˈɲaan ꞊dhɛ ˈkosüsü ˈö bhë ˈwɔn ˈˈgbɩɩ˗ ˗nu ˗wa ˈgü. ˈGo mü ˈzü mɛn ˗nu ˈwo wo ˈko sü ˗dɛɛ ˈgü, ˗an dua ˗mü ˗wo ˗da ˈwɔn ˈbha ˗nu ˗ʒian ˗ta. ˗Kɔ ˈö ˈka dho ˈwɔn ˈˈgbɩɩ˗ ˗nu ˈkun ˗a ˈka waa ˈwɔn ˗nu ˈö ˈka dho ˗da ˗an ˗ʒian ˗ta, ˗wo ꞊mɔɔn˗ ˗bha ˗wo ˈˈyɛ ka ˗bha zuʋ̈gblüdhi ˗bha ˗kwɛ ꞊va ˈˈpiʋ̈. ˈKa ka ˗zo yö Zoova ˗dhɛ, ka ˗dho ˈwɔn ˗nu kë ꞊kpɔɔdhɛ ˈka, ˈö ka ˗bha ˈkɔdhi ˗gɛn ˗yö ˗gban, ˈka ˗kë zuʋ̈gblüdhi ˈgü. ˈˈKɛɛ ka ˈti ˗Zlan ˗bha ˗dhioo ˗nu ˗ya ꞊bhlëë ˈgü, ka ˗dho nu ˈwɔn ˈˈgbɩɩ˗ ˗nu ˈka ka ˗de ˗ta, ˈö zuʋ̈niidadhe ˈti ˗dho kë ka ˗gɔ.​—Psaume 37:3, 4 ˗wo pö.

² ˈKö ˗kë ꞊dhɛ ˈwɔn ˗gɔ ˈö yö ˗yö ˗gban mɛn ˗nu ˈwo wo ˈko sü ˗dɛɛ ˈgü ˗an ˗bha, ˈwɔn ˈˈgbɩɩ˗ ˗nu ˈö ˗an ˗wɔn ꞊blɛɛ ˗wo ˗gban ˈkosümɛn ˗nu ˈˈpɛpɛ ˗bha. Gɔɔn˗ ˗nu, dhebɔ ˗nu ˈwo ˗klu ˗Zlan ˗bha ꞊kwɛŋzü, kwa ˗dho ˗gleŋ ˗nu ˈsü ˗a mɛn ˈbha ˗nu ˗bha. ˗A ˗gleŋ ˗nu ˈwo ˈˈdhʋ̈, kwa ꞊mɔɔn˗ ˗bha ˈkwa ˗an ˗ya ꞊bhlëë ˈgü kwa ˗bha ˗tosɛta ɛɛnˈˈ kwa ˗bha ˈkɔdhi ˈgü. Kwa ˗dho ˗gleŋ ˈsü ˈpö ˈkosümɛn ˈbha ˗nu ˈwo ꞊dɛɛ ˗an ˗bha.

ˈWƆN ˈˈGBƖƖ˗ ˗NU ˗MƐƐN ˈWO ꞊MƆƆN˗ ˗BHA ˗WO NU MƐN ˗NU ˈWO WO ˈKO SÜ ˗DƐƐ ˈGÜ ˗AN ˗TA?

3-4. ˈWɔn ˈˈgbɩɩ˗ ˗nu ˗mɛɛn ˈö mɛn ˗nu ˈwo wo ˈko sü ˗dɛɛ ˈgü ˈwo ꞊mɔɔn˗ ˗bha ˗wo bɔ ˗an ˈgü?

³ Mɛn ˗nu ˗wa wo ˈko ˈsü ˗dɛɛ ˈgü, mɛn ˈbha ˗nu ꞊mɔɔn˗ ˗bha ˈwo ˗an ꞊faanmën kö ˗wo ˗tosɛta kë ꞊dhɛ ˗kɔ ˈö mɛn ꞊vadhɛ ˈdhö˗ kë ˗ni ˈgü ˗a ˈka ꞊dɛɛ ˗a ˈdhö. ˗A ˈwɔnzuan ˈnën ˗tɔ ꞊dhɛ ˗an ˗mɛn ˗nu ɛɛnˈˈ ˗an ꞊dhegblü ˗nu ꞊mɔɔn˗ ˗bha ˈwo ˗fɛɛ ˗ya ˗an ˗bha ꞊dhɛ ˗wo ˈnën ˈkpɔ ˈzozodhö. Ɛɛnˈˈ ˈzü ˗an ˈˈtɔŋdë ˗nu waa ˗an ˗bha ˈkɔdhigümɛn ˗nu ꞊mɔɔn˗ ˗bha ˈwo˗ pö ˗an ˗dhɛ ꞊dhɛ ˗wo ˈkɔ ˈdhɔ, kö ˗wa ˈgüdhɛ pa pë ˗sɛŋbɔ ˗nu ˈka.

⁴ ˈKosümɛn ˗nu ˈti kë wo ˈsuaan˗ ˈka, ˗wo ˗dho ˈwɔn ˈbha ˗nu ˈwo dho ˈˈpö ꞊va ˗ya ˗an ˗bha ˗an kë, ˈö ˗an ꞊plɛ ꞊gban ˗wo ˈˈtʋ̈ŋ ꞊va ˗kë yökësü ˗bha kö ˈˈpö ˈö ˈˈdhʋ̈ ˗wa bho. ˗Yö ꞊mɔɔn˗ ˗bha ˈö˗ ˗kë ˈö ˈˈtʋ̈ŋ ˈyaa kë ˗an ˗gɔ kö ˗wo Biblö draanˈˈ, ˗wo ˗Zlan ˗dhɔkë ˈkɔɔ, ɛɛnˈˈ ˗wo ˗zlanwopö. ˗Wo ꞊mɔɔn˗ ˗bha ˈzü ˈwo zë ˈwëëga ꞊va ɛɛnˈˈ yö ˗wɔn ˗dhɛ ˈwo kun ˗nu ˗bhɔkwëë ˗nu ˗ta ˗sü ˈka. ꞊Waa˗ kë ˈˈdhʋ̈, ˈwɔn ˗së ˗nu ˈwo Zoova ˗bha yökësü ˈgü, ˗wo ˗dho ʒiö ˗an ˗ta.

5. ˈWɔn ˈö Klausö waa Madhisa ˈwo bɔ ˗a ˈgü bhë, ˗gleŋ ˗mɛɛn ˈka˗ sü ˗a ˈgü?

⁵ ˈWɔnzuan ꞊va ˗wo ˗dhö, ˈwo˗ ˗zɔn ꞊dhɛ ꞊nɔɔnpë ꞊va mɛɛnˈˈ ˗sü ˈyaa zuʋ̈gblüdhi nu mɛn ˗dhɛ. ˗Kwa kwa ˗zota Klausö waa Madhisa ˗an ˗bha ˈwɔnzuan ˈgü.b ˗Dhɛ ˈwo wo ˈko sü ˗dɛɛ ˈgü, ˗kɔ ˈwo˗ ˗bha ꞊plɛ ˗wo ˗kun yö kë ˗ni ˈgü ˈˈtʋ̈ŋ ꞊gban ˈgü, kë ˈˈdhʋ̈ kö ˈwo ˗tosɛta ˗së kë. ˈˈKɛɛ zuʋ̈gblüdhi ꞊dede ˈyaa kun ˗an ˗gɔ. Klausö ˗ya ˗pö: «Yi pë ꞊va ˗slɔɔ, ˈˈkɛɛ yi ˗bha ˗Zlan ˗dhɔkësü ˗gɔ ˈyaa kun ˗dhö. Gagade ˈgü, yi ˗bha ˗tosɛta ˗kun kaanˈˈ ˗sü ˈka ˈˈkwöö, ˈö zuʋ̈dhiʋ̈tɛ kun yi ˗bha.» ˗A ˈbha ˗ya kë kö ka ꞊dede ˈka˗ yö ˈpö ꞊dhɛ ꞊nɔɔnpë ˗nu ˗wɔn ˗bɔ ˈˈdhiʋ̈ ˗sü ˈyaa zuʋ̈gblüdhi nu mɛn ˗dhɛ. ˗Ya kë kwa ˈka ˈˈdhʋ̈, kwa ˈgü ˈya ˗dho ga. Kwa ˈˈtʋ̈ŋ ˗kë mɛn ˈˈwɛɛ ˗nu ˗bha ˈwɔnzuan ˗së ˈgü ˗sü ˗dho kwa ˗takun kö ˈkwa ˈwɔn ˗nu bho ˈˈgblʋʋ kwa ˗bha ˗tosɛta ˈgü. ˗A zübhodhɛ ˈgü, ˗gleŋ ˈö dhegɔndë ˗nu ꞊mɔɔn˗ ˗bha ˈwo˗ ˈsü ˗gblüdë Zozafa ˗bha, ˗kwaa ˗ga.

˗KA KA ˗ZO YÖ ZOOVA ˗DHƐ ꞊DHƐ ˗GBLÜDË ZOZAFA ˈDHÖ

6. ˈDhɛ ˈˈsɔdha kpö ˗ziisü ˗yö nu Zozafa waa ö ˗bha ˈˈsɛgümɛn ˗nu ˗an ˗gɔ, ˗yö ˗dhioo ˈö Proverbes 3:5, 6 ˈgü bhë ˗a ˗ya ꞊bhlëë ˈgü ˗kɔ ˗kë ꞊dhɛ?

⁶ Dhegɔndë ˗nu, ˈˈtʋ̈ŋ ˈbha ˗nu ˈka yö ˗nu ˗wo ˗lö ka ˗kɔ ˗zü ˗ee? ꞊Ya kë ꞊dhɛ ˗yö ˈˈdhʋ̈, ka ꞊mɔɔn˗ ˗bha ˈka ˗gleŋ sü ˗Gblüdë Zozafa ˗bha. ˈDhɛ ˗kë ꞊dhɛ yö ꞊nën ˈö kun ˗gblüdë ˈka, ˗a ˗dhɛ ˗kun ˗a ˗bha kö ˗yö ö ˗zokë wo ˗bha ˈˈsɛgümɛn ˗nu ꞊gban ˈˈpɛpɛ ˈˈpiʋ̈. Yö ˈˈsinman suu ˈö ˈˈdhʋ̈ ˗yö ˗mɔn ˗a kë ˗sü ˗bha ˗kɔ ˗kë ꞊dhɛ? Pë ˗dhɛ ˈö ꞊mɔɔn˗ ˗bha ˗ya ˗kë kö ˈö ö ˗bha ˈˈsɛgümɛn ˗nu ˗takpa. ˗Yö ˈˈkplʋʋ ˗nu ˗klëën Zuda ˗pö ˈbha ˗nu ˗züzü, ˈyö ˈˈsɔdha ˗nu ˈwo ˗ʒiö 1.160.000 ˗ta ˗an dho ˈkwëë˗. (2 Chron. 17:12-19) ˈˈTʋ̈ŋ do ˈbha ˗yö ˗wo, ˈö ˈwɔn ˈˈgbɩɩ˗ do ˗yö ˗kan Zozafa ˈgü. ˈˈSɔdha kpö ˈkpii˗ ˈwo ˗kë Amonitö ˗nu, Moabitö ˗nu, waa ˈˈsɛ ˗nu ˈwo ˗tɔn ˈgü ꞊ʒiaan Seii ˗sɛ ˈgü ˗a ˈgümɛn ˗nu ˈka, ˗wo ˗nu ˈko ˈka yö ˗nu, ˗a ˗bha ˈkɔdhigümɛn ˗nu waa˗ ˗bha ˈˈsɛgümɛn ˗nu ˗an ˗gɔ. (2 Chron. 20:1, 2) ˈMën Zozafa ˗ya ˗kë? ˗Yö ˗takundhe waa ꞊faan ˗dhɛ Zoova ˗gɔ. ˗A kë ˈö˗ wo ˈˈdhʋ̈ bhë, ˗yö ˗bɛ ꞊dedewo ˗dhioo ˗së ˈö ˗ya ˗sü ˈka Proverbes 3:5, 6 ˈgü bhë, ˗a ˗bha. (˗A ˗wo pö.) Bhɛɛˈˈ ˈö˗ wo Zoova ˗dhɛ ˗dekëtɩtɩsü ˈka, ˈö ˗bɛnzë ˗sü ˈka 2 Chroniques 20:5-12 ˈgü bhë, ˗ya ˗zɔn ꞊dhɛ ˗yö ö ˗zoyö ꞊dedewo Zoova ˗dhɛ. Zoova ˗yö Zozafa ˗bha bhɛɛwo ˗daa ˗kë ˗kɔ ˗kë ꞊dhɛ?

7. Zoova ˗yö Zozafa ˗bha bhɛɛwo ˗daa ˗kë ˗kɔ ˗kë ꞊dhɛ?

⁷ Zoova ˗bɔ dhevimi do ˈwo˗ ˗dhɛ Ʒaaziɛdhö ˗a ˗ta, ˈö ˈwɔn ꞊blɛɛ Zozafa ˗dhɛ. ˗Ya ˗pö ˗an ˗dhɛ: «˗Ka ˈto ka ˗duɛ ˈgü, ˈka dɔ ˈˈsɛnŋdhö, kö ˗kɔ ˈö Zoova dho ka dha ˗a ˈka, ˈka˗ yö.» (2 Chron. 20:13-17) ˗Yö ˈˈdhʋ̈ gagade ˈka ꞊dhɛ ˗kɔ ˈwo ˈkozë ˗a ˈka ˗be ˈyaa kë ˈˈdhʋ̈. ˈˈKɛɛ ˗dhioo ˈdhɛ ˈwo˗ dɔ ˗an ˗ta bhë ˈyii ˈgo mɛnbhɩɩdhe ˈgü, ˗yö ˗go Zoova ˈgü. Zozafa ˗yö ö ˗zoyö ˗Zlan ˗dhɛ ꞊dedewo, ˈyö ˈpë ˈwo˗ pö ˗a ˗dhɛ bhë, ˈö˗ ˗kë. ˈDhɛ waa ö ˗bha ˈˈsɛgümɛn ˗nu ˈwo dho wo ˈyɔɔ˗ ˗nu ˗gɔ, ˈˈsɔdha ˗nu ˈwo ˗gblü gɔn ˗dhɛ dɔ ˈyaa ˈnën ˗an bɔ ˈˈdhiʋ̈. ˈˈTanbhomɛn ˗nu ˈö ˈko ˗zë ˗a ˈka ˗piö ˈyaa ˗an ˗gɔ, ˈyö ˗an yö wo ˗dhɛ ˈˈdhiʋ̈. ˈPë Zoova ˗ya ˈˈplüün bho Zozafa ˗dhɛ bhë ˗ya ˗kë, ˈyö˗ ˗kɔ ˗yö ˗ʒiö ˗a ˈyɔɔ˗ ˗nu ˗gɔ.​—2 Chron. 20:18-23.

8. ˗Gleŋ ˗mɛɛn ˈö dhegɔndë ˗nu ꞊mɔɔn˗ ˗bha ˈwo˗ sü Zozafa ˗bha?

⁸ Dhegɔndë ˗nu, ka ꞊mɔɔn˗ ˗bha ˈka ˗gleŋ sü Zozafa ˗bha. Ka ˈnën ka dua ˈdhö ˗mü kö ˈka ka ˗zokë ka ˗bha ˈkɔdhigümɛn ˗nu ˈˈpiʋ̈. ˗A ˗wɔn ˈgü ka yö ˈˈgbɩɩ˗ ˗nu ˗kë kö ˈka ˗an ˗takpa, ˈka ˗an ˗bhawɔnyëëpë ˗nu nu ˗an ˗dhɛ. ˈWɔn ˈˈgbɩɩ˗ ˗nu ˗wa nu ka ˗ta, ˗yö ꞊mɔɔn˗ ˗bha ˈö ˗kë ka ˈgü ꞊dhɛ ka ꞊dede ka ꞊mɔɔn˗ ˗bha ˈka˗ ˈˈɲan bhɔ. ˈˈKɛɛ ˈka ˗dho ka ˗zo yö ka ˗de ꞊faan ˗dhɛ. ˈPë ˈka dho ˗a kë ꞊ʒiaan ˈyö ˗tɔ ka ˗bha bhɛɛwo ˗nu ˈgü, ˗ka ˗takundhe ˗dhɛ Zoova ˗gɔ. ˗Ya ˈgo mü kaa ka ˗bha dhebɔ ˗nu ˗ka bhɛɛˈˈ ꞊dedewo ka ˈkwëë˗. ˗Ka Zoova ˗bha ˗dhioo ˗nu mɛɛnˈˈ Biblö waa kwa ˗bha ˈsëëdhɛ ˗nu ˈgü, ˈka ˗an ˗ya ꞊bhlëë ˈgü. ˈKa ˗gban Biblö ˗ta ˈka ˈwɔn ˗nu kë, ˗yö ꞊mɔɔn˗ ˗bha ˈö ˗kë mɛn ˈbha ˗nu ˈgü ˈya˗, ˈö ˈwo˗ pö ˗ʒiaanwo ꞊dhɛ slaaˈˈ ˗ya ˗da ka ˈgü. ˗Wo ꞊mɔɔn˗ ˗bha ˈzü ˈwo˗ pö ˈwëëga ɛɛnˈˈ ꞊nɔɔnpë ˗nu ˈnën ˈwo dho ka ˗bha ˈkɔdhi ˈwaannu. ˈˈKɛɛ ka ˗zo ˈya ˗dho bhɔ Zozafa ˗bha ˈwɔnzuan ˈka. ˗Yö ö ˗zoyö Zoova ˗dhɛ, ˈö˗ ˗zɔn ˈˈdhʋ̈ ö këwɔn ˗nu ˈgü. Zoova ˈyii ˈˈkan Zozafa ˗bha, ˈyii ˗dho ˈˈkan ˈpö ka ˗bha. (Ps. 37:28; Ebl. 13:5) ˗Mën ˈö ˈkosümɛn ˗nu dho ˗a kë ˈzü kö ˗wo zuʋ̈gblüdhi ꞊slɔɔ wo ˗bha ˈkɔdhi ˈgü.

꞊DHƐ IZAI WAA Ö ˗BHA DHEBƆ ˗AN ˈDHÖ, ˗KA ZOOVA ˗DHƆKËSÜ ˈKUN ˈˈGBƖƖ˗

9. ˈMën ˈkwa ꞊mɔɔn˗ ˗bha ˈkwa˗ pö ˗Zlan ˗wodhiʋ̈lomɛn Izai waa ö ˗bha dhebɔ ˗an ˗bha?

⁹ ˗Zlan ˗wodhiʋ̈lomɛn Izai waa ö ˗bha dhebɔ ˗wo wo ˗bha ˗tosɛta ˗kë Zoova ˗bha yökësü ˈgü. Izai ˗kun ˗Zlan ˗wodhiʋ̈lomɛn ˈka, ˈˈkɛɛ ˗a ˈbha ˗ya kë kö ˗a ˗bha dhebɔ ˗de ˈpö ˗Zlan ˗yö yö ˗dɔ ˗a ˗kɔ ˈka, ˈyö sü ꞊dhɛ ˗wa ˗dhɛ «˗Zlan ˗wodhiʋ̈lodhe.» (Is. 8:1-4) Izai waa ö ˗bha dhebɔ ˗wo Zoova ˗dhɔkësü ˗wɔn ˗bɔ ˈˈdhiʋ̈ wo ˗bha ˗tosɛta ˈgü. ˈWɔnzuan ˗së ꞊dede ˗mü ˈwo˗ to ˈkosümɛn ˗nu ˈwo ꞊dɛɛ ˗an ˗gɔ.

10. ˈWɔn ˗nu ˈö Biblö ˗an to ˈˈdhiʋ̈ ˈö˗ pö ˗an draansü ˗dho ˈkosümɛn ˗nu ˗takun ˗kɔ ˗kë ꞊dhɛ?

¹⁰ ˈKosümɛn ˗nu ˈwo ꞊dɛɛ ˗wo ꞊mɔɔn˗ ˗bha ˈwo wo ˗bha ˗tosɛta nu Zoova ˗bha yökësü ˗dhɛ. ˗Wo ꞊mɔɔn˗ ˗bha ˈwo wo ˗bha ˗zoyö Zoova ˗dhɛ ˗sü ˗dadhiʋ̈ ˈwɔn ˗nu ˈö Biblö ˗yö ˗an to ˈˈdhiʋ̈ ˈö˗ pö waa ˗kɔ ˗nu ˈwo yö ˗a ˈka ˈko ˈˈdhiʋ̈, ˗an ˗draan wo ˈkwëë˗ ˗sü ˈka.c (Tit. 1:2) ˗Wo ꞊mɔɔn˗ ˗bha ˗wo wo ˗zota ˈpë ˈwo dho ˗a kë kö ˗an ˗kɔ ˗yö kë ˈwɔn ˗nu ˈö Biblö ˗yö ˗an pö ˗an ˗yökodhiʋ̈sü ˈgü, ˗a ˈgü. ˗A ˈwɔnzuan ꞊nɛn: ˗Wo ꞊mɔɔn˗ ˗bha ˈwo wo ˗kɔ ˗da yö ˈö Yesu ˗ya to kwa ˗gɔ ˈö ˗gban nɔɔn˗ ˗së ˗pö ˈˈkpɔnŋtaadhɛ ˗todhʋ̈sü ˈgü ˗sü ˗bha bhë, ˗a ˈgü. (Mat. 24:14) ˈKosümɛn ˗nu ꞊waa˗ yö ꞊dhɛ ˈwɔn ˗nu ˈö Biblö ˗an to ˈˈdhiʋ̈ ˈö˗ pö ˗wo ˗yö wo ˈko ˈˈdhiʋ̈ ꞊dede ˈka, ˗wo ˗dho wo ˗de nu Zoova ˗bha yö ˗dhɛ ˈzü ˈgbɛ.

꞊DHƐ PLISIDHÖ WAA AKIDHASÖ ˈDHÖ, ˗KWA ˗ZLAN ˗BHA ˗GBLÜDËDHƐ ˗WƆN BƆ ˈˈDHIƲ̈

11. ˈMën Plisidhö waa Akidhasö ˈwo˗ ˗kë? ˈYö ˈmën ˗kë?

¹¹ Mɛn ˗nu ˈwo wo ˈko sü ˗dɛɛ ˈgü, ˗wo ꞊mɔɔn˗ ˗bha ˈwo ˗gleŋ sü Plisidhö waa Akidhasö ˈwo kun Zuifö ˗nu ˈka Wlɔmö ꞊kwɛŋzü ˗an ˗bha. ˈDhɛ ˈwo nɔɔn˗ ˗së ˈö ˗gban Yesu ˗bha ˗a man, ˗wo ˗kë kletiɛn ˈka. ˈYaa za ˈgü ꞊dhɛ ˗an ˗bha ˗tosɛta ˗kun ˗an ˗dhɛ ˗së. ˈˈKɛɛ ˗dhɛ ˈö ˈˈsɛkɔɔnmɛn Klodö ˗ya pö Zuifö ˗nu ˈˈpɛpɛ ˗dhɛ ˗wo ˈgo Wlɔmö, ˈyö to mü ˈö ˗an ˗bha ˗tosɛta ˗yö go ˈˈgblʋʋ. ˗Kɔ ˈö ˗yɛ ˗a ˈka Akidhasö waa Plisidhö ˗an ˗bha, ˗kwa kwa ˗zota ˗a ˈgü. ˗An dua ˗mü kö ˗wo ˈgo ˗dhɛ ˈwo˗ dɔ ˗së ˈka bhë ˗a ˈgü, kö ˗wo ˈdho ˈkɔ ˗dɛɛ mɛɛnˈˈ ˈˈsɛ ˈˈwɛɛ ˈgü, kö ˗wo ꞊kun ˗ya wo ˗bha sɔ ˈkɔ ˗nu ˗yökësü waa˗ ˈˈdhoodɔ ˗sü ˗bha. ˈWɔn ˈˈgbɩɩ˗ ˗nu ˈwo ˗kan ˗an ˈgü ˈˈdhʋ̈ bhë, ˗wo ˗an ˗kan ˗Zlan ˗bha ˗Gblüdëdhɛ ˗wɔn ˗bɔ ˈˈdhiʋ̈ ˗sü ˗bha ˗ee? Dhɛɛˈˈ ˈö bhë kwa˗ ˗yɔ ˗dɔ. ˈDhɛ ˗wa ˗lo wo ˗yɛɛbhaadhɛ ˗dɛɛ ˈgü Kodhɛŋtö, Akidhasö waa Plisidhö ˗wo ˗zlanwokɔdhi ˗takun, ˈö waa bɔmɛn Pɔdhö ˗nu ˈwo ˗ya wo ꞊dhegblü ˗nu ˗zo ˗gban ˗sü ˗bha. ꞊Taabha, ˗wo ˗dho ˈwo ˗ya ˈˈkwipö ˈbha ˈö ˗zlanwopömɛn ˗nu ˈwaa kun mü ꞊va ˗a ˈgü. (Këw. 18:18-21; Wlɔ. 16:3-5) ˗An ˗bha ˗tosɛta ˗kë ˗së, ˈö zuʋ̈gblüdhi ˗yö ˗kë ˗an ˗gɔ.

12. ˈMën ˗kë ˈö ˈkosümɛn ˗nu dua ˈdhö ˗mü kö ˗wo Zoova ˗bha yökësü ˗wɔn ˗ya wo ˗zo ˈˈpiʋ̈?

¹² ˈKosümɛn ˗nu ꞊mɔɔn˗ ˗bha ˈpö ˈwo to Plisidhö waa Akidhasö ˗an ˗bha ˈwɔnzuan ˈˈpiʋ̈ ˗Zlan ˗bha ˗Gblüdëdhɛ ˗wɔn ˗bɔ ˈˈdhiʋ̈ ˗sü ˈka. Mɛn ꞊plɛ ˈwo dho wo ˈko ˈsü, ˈˈtʋ̈ŋ ˗së ˈwo ꞊mɔɔn˗ ˗bha ˗wo ˈwɔn ˗nu ˈwo ˈˈdhʋ̈ ˗an ˗yökodhiʋ̈ kë ˗a ˈka, ˈyö ˗tɔ ˗an ˗bha ˈko ˗ga ˈˈtʋ̈ŋ. ˈKosümɛn ˗nu ˗wa Zoova ˗bha yökësü ˗wɔn ˗ya wo ˗zo ˈˈpiʋ̈, ˗wa pë ˈˈpɛpɛ kë ˗wa ˗mɔn ˗a kë ˗sü ˗bha, ˗wo ˗dho Zoova ˗bha ˗takundhe yö wo ˗bha ˗tosɛta ˈgü. (Eccl. 4:9, 12) ˗Kwa Dhusɛdhö waa Edhizabɛtö ˗an ˗bha ˈwɔnzuan ˗ga. Dhusɛdhö ˗ya ˗pö: «ˈˈSanni ˈyi yi ˈko ˈsü, yi ˈpë ˈyi dho ˗a kë Zoova ˗dhɛ ˗a ˈˈdoo ˗dɔ.» Edhizabɛtö ˗de ˈpö ˗ya ˗pö: «Yi ˈwɔn ˗nu bhë ˗an ˗yökodhiʋ̈ ˗kë, kë ˈˈdhʋ̈ kö dhiʋ̈ˈˈ ˗nu ö ꞊taabha ˗nu ˈka ˈya˗ pö ˈyi ˗da ˈwɔn ˈbha ˗ʒian ˗ta, yi ˗zo ˈya ˗dho bɔ pë ˈyi˗ ˗ya yi ˗zo ˈˈpiʋ̈ kö ˈyi˗ kë Zoova ˗dhɛ bhë ˗a ˈka.» Dhusɛdhö waa Edhizabɛtö ˗wo ˗wɩ ˗a ˗bha kö ˈwo ˈdho ˈwo ˗ya Miklonezi, ˗dhɛ ˈö ˗zlanwopömɛn ˗nu ˈwaa˗ ˗bha ꞊va ˗a ˈgü.

13. Psaume 28:7 ˗ya ˗pö ˈkwa kwa ˗zo yö Zoova ˗dhɛ, ˗a ˈgüwɔn ˗dho kë ˗mën ˈka?

¹³ ꞊Dhɛ Dhusɛdhö waa Edhizabɛtö ˗an ˈdhö, ˈkosümɛn ˗nu ꞊vadhɛ ˈwo ꞊dɛɛ ˗wa wo ˗bha ˗tosɛta kë ˗bhaasü, kë ˈˈdhʋ̈ kö ˈwo wo ˗de nu ˗zlanwopösü waa mɛn ˗nu ꞊klaŋkë ˗yö ˗dhɛ. Mɛn ꞊plɛ ˈwo wo ˈko sü ˗wa Zoova ˗bha yökësü ˗wɔn ˗ya wo ˗zo ˈˈpiʋ̈, ˗wa wo ˈgü dɔ ˈˈgbɩɩ˗ ꞊waa˗ kë, ˈwɔn ˗së ꞊va ˗go ˗a ˈgü. ꞊Waa˗ kë ˈˈdhʋ̈, ˗wa ˗yö ꞊dhɛ Zoova ˗yö ö ˗zokë wo ˈˈpiʋ̈, ˈö ˗an ˗bha ˗zoyö ˗a ˗dhɛ ˗sü ˗yö ˗dadhiʋ̈, ˈö zuʋ̈gblüdhi ꞊dedewo ˗kë ˗an ˗gɔ.​—Psaume 28:7 ˗wo pö.

꞊DHƐ PIƐDHÖ WAA Ö ˗BHA DHEBƆ ˗AN ˈDHÖ, ˗KWA KWA ˗ZO YÖ ˈWƆN ˗NU ˈÖ ZOOVA ˗YÖ ˗AN ˈˈPLÜÜN BHO ˗AN ˗DHƐ

14. Piɛdhö waa ö ˗bha dhebɔ ˗wa ˗zɔn ˗kɔ ˗kë ꞊dhɛ ꞊dhɛ wo wo ˗zoyö ˗wo ˈö Matiö 6:25, 31-34 ˈgü bhë, ˗a ˗dhɛ?

¹⁴ ˈKosümɛn ˗nu ꞊mɔɔn˗ ˗bha ˈpö ˈwo ˗gleŋ sü bɔmɛn Piɛdhö waa ö ˗bha dhebɔ ˗an ˗bha. ˈDhɛ ˗kpan Yesu ˗bha ˈö ˈpë ˗ʒiö ˈˈsu ˈˈsɔɔdo ˗ta ˈö ˗ʒiö, ˗a ˗dhɛ ˗kun ˗a ˗bha kö Piɛdhö ˗yö ˗da ˈwɔn ˈkpii˗ do ˈbha ˗ʒian ˗ta. ˗A ˗bha yö ˈö˗ ˗kë ˈö ö ˗zokë ö ˗bha ˈkɔdhigümɛn ˗nu ˈˈpiʋ̈ ˈyö ˗tɔ ˈˈyiblɩɩkësü. ˗A ˗wɔn ˈgü ˈdhɛ Yesu ˗ya ˗dhɛ kö ˗yö ʒiö ö ˈˈpiʋ̈, ˗a ˗dhɛ ˗kun ˗a ˗bha kö ˗yö ö ˗zota ö ˗bha ˈkɔdhigümɛn ˗wɔn ˈgü, kö pë ˈö dho ˗a kë ˗yö ꞊kun ˗a kë. (Dhu. 5:1-11) Piɛdhö ˗yö ˗wɩ ˗a ˗bha kö ˈö ʒiö Yesu ꞊kee˗ ˗zlanwopösü ˈka. ˗Ya ˗kë ꞊kpɔɔdhɛ ˈgü, ˈö ˈkwa ꞊mɔɔn˗ ˗bha ˈkwa˗ pö ꞊dhɛ ˗a ˗bha dhebɔ ˗yö ö ˗kɔ ˗da ˗a ˗dhɛ ˈwɔn ˈö ˗da ˗a ˗ʒian ˗ta bhë, ˗a ˈgü. Biblö ˗ya ˗pö ꞊dhɛ kö Yesu ˗ya ˈgo ga ˈgü, Piɛdho ˗bha dhebɔ ˗yö ˗ʒiö ö ꞊gɔɔn ꞊kee˗ ˈö waa˗ ˗nu ˈwo dho ˈˈta ˗nu ˈgü. (1 Ko. 9:5) ˈDhɛ ˗kë ꞊dhɛ ˗yö ˗kun dhebɔ ˗tiaandhö ˈka, Piɛdhö ꞊yaa˗ pö ˈö ˗dhioo dɔ ˈkosümɛn ˗nu ˗ta, ˗a ˈˈtëŋ ˈyaa ˈsü. (1 Piɛ. 3:1-7) ˗Ya ˗zɔn ꞊dhɛ Piɛdhö waa ö ˗bha dhebɔ ˗wo wo ˗zoyö pë ˈö Zoova ˗ya ˈˈplüün bho ˗a ˗dhɛ, ꞊dhɛ ˈwa˗ ˗bha ˗Gblüdëdhɛ ˗wɔn bɔ ˈˈdhiʋ̈, ˗yö ˗dho ö ˗zokë wo ˈˈpiʋ̈.—Matiö 6:25, 31-34 ˗wo pö.

15. ˗Gleŋ ˗mɛɛn ˈka˗ sü Tiago waa Ɛstɛɛ ˗an ˗bha?

¹⁵ ꞊Ya kë ꞊dhɛ ka ka ˈko ˗sü ˗a ˗kwɛ ˈnën ˈbha ˗ya kë, ˈmën ˈka dho ˗a kë kö ˗Zlan ˗bha yökësü ˗dhɔ ˗yö ˗da ka ˈgü? ˗A ˈˈslö do ˈnën ˗tɔ ˗gleŋ ˗sü ˈkosümɛn ˈˈwɛɛ ˗nu ˗bha ˗sü. ˈWɔn ˗gɔ ˗nu ˈwo ˗kë ꞊dhɛ «Mɛn ˗bha ˗kwɛzlan» ˗nu ˈdhö kwa ˗bha ˈˈGlaadhiʋ̈ ˗Tɔn ˗nu ˈgü bhë, ka ꞊mɔɔn˗ ˗bha ˈka ˗an ˗wo pö. ˗An ˗wopösü ˗yö Tiago waa Ɛstɛɛ ˈwo Blezidhö ˗an ˗takun, ˈyö ˈdho ˗sü ˈwo ˗ya ˗dhɛ ˈˈwɛɛ ˈgü kö ˗wo ˗zlanwopö, ˗a ˗dhɔ ˗yö ˗da ˗an ˈgü. Tiago ˗ya ˗pö: «˗Kɔ ˈö Zoova ˗yö ö ˗dhɔkëmɛn ˗nu ˗takun ˗a ˈka kwa ˗bha ˈˈtʋ̈ŋ ˈgü ꞊dɛɛ yi˗ ˗wo pö ˗ni ˈgü, ˗yö yi ˗blü kö ˈyi yi ꞊kwaa yi ˗de ˗zü kö ˗yö ˈˈdhiʋ̈sü yi ˈka, kö ˈyi ˗a ˗bha mɛn ˗takun ˗sü ˗dhɛ yö.» ˗Dhɛ ˈö ˗kë ˈˈdhʋ̈, ˗wo ˗dho ˈwo ˗ya Padhague ˗sɛ ˈgü. ˈÖ sü ˗kwɛ 2014 ˗bha, ˗wo ˗zlanwopö ˗ni ˈgü mü Pɔtigɛ ˗wo ˈgü. Ɛstɛɛ ˗ya ˗pö: «Biblö ˈˈɲan do ˈö˗ ˗dhɔ ˗yö mɛn ꞊plɛ ꞊gban yi ˗kë, ˈyö ˗tɔ Efɛzö 3:20. ˗Wo ˈö pö ˗sü ˈka Biblö ˈˈɲan ˈö bhë ˗a ˈgü, ˗ya yökodhiʋ̈ yi ˗bha ˗gɛn ˗ɲaan ˈka ꞊va.» ˈSëëdhɛ ˈö bɔmɛn Pɔdhö ˗ya bɔ Efɛzömɛn ˗nu ˗dhɛ bhë ˗a ˈgü, ˗ya ˈˈplüün ˗bho ꞊dhɛ Zoova ˗dho ˈpë ˈkwa˗ ˗dhɛ ˗a ˗gɔ ˗a nu kwa ˗dhɛ, ˈö ˗ʒiö ˗a ˈka mü. Pë ꞊dede ˈö˗ ˈka yö ˗mü.

16. ˈKosümɛn ˗nu ˗wo wo ˗zota ˗ni ˈgü yö ˈwo dho ˗a kë Zoova ˗dhɛ ˗a ˈgü, de ˗nu ˈwo dho ˗dhioo ˗dhɛ ˗an ˗gɔ?

¹⁶ ˈKosümɛn ˗nu ˈwo ꞊dɛɛ ˗wo ꞊mɔɔn˗ ˗bha ˈwo ˗gleŋ sü mɛn ˗nu ˈwo ˗zoyö Zoova ˗dhɛ ˗sü ꞊draan ˗an ˗bha. ˈKösümɛn ˈbha ˗nu ˗wa ˗kwɛ ˗kɔŋ ꞊va kë Zoova ˗bha ˈˈtʋ̈ŋ ꞊gban ˈgü ˗yö ˈgü. ꞊Ya kë ꞊dhɛ ka˗ ˈˈpiʋ̈ ˈka˗ kë ꞊dhɛ ˗an ˈdhö, ka ꞊mɔɔn˗ ˗bha ˈka ˗dhioo ˗dhɛ ˗an ˗gɔ. Kwa ˗bha ˗zoyö Zoova ˗dhɛ ˗sü ˗zɔn ˗kɔ ˈbha ˈnën bhë. (Prov. 22:17, 19) Mɛn zii ˗nu ˗de ˈpö ˗wo ꞊mɔɔn˗ ˗bha ˈwo ˈkosümɛn ˗nu ˗takun kö ˗wo Zoova ˗bha yö ˗wɔn ˗ya wo ˗zo ˈˈpiʋ̈, ˗wa kë.

17. ˈWɔn ˈö Klausö waa Madhisa ˈwo bɔ ˗a ˈgü bhë, ˗gleŋ ˗mɛɛn ˈwo˗ ˗da kwa ˗bha?

¹⁷ ˈˈTʋ̈ŋ ˈbha ˗nu ˈka, ˈpë ˈkwa˗ ˗ya kwa ˗zo ˈˈpiʋ̈ kö ˈkwa˗ kë Zoova ˗dhɛ ˗yö ꞊mɔɔn˗ ˗bha ˈö˗ to, ˈö yö ˈˈwɛɛ dɔ kwa ˗kɔ ˈka. ˈPë ˗kë Klausö waa Madhisa ˈkwa ˗an ˗wɔn ꞊blɛɛ ꞊klöö˗ yö ˗an ˈka, ˈyö bhë. ˈDhɛ ˈwo wo ˈko sü ˈö˗ ˗kwɛ ˗yaaga ˗yö ˗ʒiö, ˗wo wo ˗bha ˈkɔ ˗to, ˈwo wo ˗de nu ˈkɔ dɔ ˗yö ˗dhɛ Betɛdhö ˈö Fɛnlanŋdö ˗a ˈgü. ˈˈKɛɛ ꞊taabha ˗wa ˗man ꞊dhɛ ˈwaa ꞊mɔɔn˗ ˗bha ˈwo ˈto ˈdhɛ bhë˗ ˈgü kö ˈˈsu ˈˈsɔɔdo ˗yö ʒiö wo ˗ta. ˗A zübhodhɛ ˈgü ˗an ˈgü ˗yö ˗ga, ˈˈkɛɛ ˗a ˗dhɛ ˈti ꞊gwëë ˈyö ˈwo ˗an ˗dhɛ kö ˗wo Laabö ˗wo draanˈˈ. ˈˈTʋ̈ŋ ˈö yö ˗a ˈgü ˗wo ˈˈsɛ ˈˈwɛɛ ˈgü, ˈö ˈwo ˗zlanwopö ˗ni ˈgü Laabö ˗wo ˈgü. Madhisa ˗ya ö ˗zota ˈwɔn ˗nu ˈwo ˗kë ˗a ˈgü, ˗ya ˗pö: «A ˗kun ˈˈsuʋ̈ ˗ni ˈgü pë ˗nu ˈö n ˈti ˗an kë do ˗a ˗blɛɛsü kë ˗sü ˗dhɛ. ˗A ˗dhɛ ˗kun ˗a ˗bha kö ˈa n ˗zo ꞊dede yö Zoova ˗dhɛ. ˗Kɔ ˈö Zoova ˗yö yi ˗takun ˗a ˈka yi ˗de ˈtii˗ ˈka, n ˈˈɲan ˗yö ˗da ˗a ˈgü. ˈDhɛ ˈa bɔ ˈwɔn suu ˗nu ˈwo ˈˈdhʋ̈ ˗an ˈgü, n ˗bha ˗zoyö Zoova ˗dhɛ ˗sü ˗ya kë ˈˈgbɩɩ˗.» ꞊Dhɛ ˗kɔ ˈö ˗an ˗bha ˈwɔnzuan ˗ya ˗zɔn ˗a ˈka bhë ˗a ˈdhö, ˈkwa kwa ˗zo yö Zoova ˗dhɛ kwa zuʋ̈ˈˈ ꞊gban ˈka, ˗yö ˗dho ˈdhuëë˗ ˈkpɔ kwa ˗bha.

18. ˈKosümɛn ˗nu ˗dho ˗a ˗zɔn ˗kɔ ˗kë ꞊dhɛ ꞊dhɛ wo wo ˗zoyö Zoova ˗dhɛ?

¹⁸ ˈKosüsü ˗yö gbɔɔdhe ˈö go Zoova ˈˈpiʋ̈ ˗a ˈka. (Mat. 19:5, 6) ˗Ya ˈˈpiʋ̈ kö gbɔɔdhe ˈö ˈˈdhʋ̈ ˗yö ˈkosümɛn ˗nu zuʋ̈ˈˈ ˈˈgblü dhi. (Prov. 5:18) Mɛn ˗nu ˈö ˈka ka ˈko sü ˗dɛɛ ˈgü, ˗ka ka ˗zota ˗kɔ ˈö ˈka dho ka ˗bha ˗tosɛta kë ˗a ˈka ˗a ˈgü. Pë ˈˈpɛpɛ ˈö ˈka ˗mɔn ˗a ˗bha ka˗ kë ˗ni ˈgü, kö ˈka˗ ˗zɔn Zoova ˗dhɛ ꞊dhɛ gbɔɔdhe ˈö˗ ˗kë ka ˗dhɛ bhë ˗yö ka ˗dhɛ ˗së ˗ee? ˗Ka bhɛɛˈˈ Zoova ˗dhɛ ˗a ˗wɔn ˈgü. ˗Ka ˈtɔŋ˗ ˗gɛngbandhɛ ˗nu ˈwo ˗gban ka ˗bha ˗an mɛɛnˈˈ ˗a ˗Wo ˈsëëdhɛ ˈgü. ˗Dhioo ˗nu ˈö Zoova ˈdhö ˗an dɔ ˗ni ˈgü ka ˗ta bhë, ˗ka ˈto ˗an ˈˈpiʋ̈. ˗Yö ga ka ˈgü ꞊dhɛ ˈka ka ˗bha ˈkosüsü ˗gban Zoova ˗bha yökësü ˗ta, ka zuʋ̈ˈˈ ˈˈgblü ˗dho dhi, ˈö ˈdhuëë˗ kpɔ ka ˗bha.