Yesu ˗yö ˗dhidha ꞊va ˗kë

Yesu ˗yö ˗nu ˈˈsɛ ˗ta kö ˗yö nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha ˗a pö. Zoova ˗yö ö ˗bha ˗zuu ˈˈslʋ̈ʋ̈slʋ̈ ˗nu ˗a ˗dhɛ kö ˗yö ˗dhidha ˗nu kë, kö pë ˈö dho ˗a kë kö ˗ya kë ˗Gblüdë ˈka ˈö˗ ˗zɔn. ˗Yö ˈˈyua suu ˈˈpɛpɛ ˗bho mɛn ˗nu ˗bha. ˗Dhɛ ˈˈpɛpɛ ˈö dho ˗a ˗bha, ˈˈyuamɛn ˗nu ˗dho ˗a ꞊kee˗ kö ˗yö ˗an ˗takun, ˈö ˗an ˗dhɛ bo. ˈˈƝɛɛntiimɛn ˗nu ˈˈɲan ˗yö ˗dhɛ yö, ˈˈtʋgbumɛn ˗nu ˈwo ˈwɔnman, ˗niɔɔnmɛn ˗nu ˗wo ˈˈta ˗sü, ˈö mɛn ˗nu ˈö ˗zuu yaa ˈdhö ˗an ˈgü, ˈwo go ˗an ˈgü. ˈKö ˗kë ꞊dhɛ ˗wa ˗bha sɔ bɛɛnˈˈ ˗kun, ˗an ˗bha ˈˈyua ˗yö ˗bo. ˗Dhɛ ˈˈpɛpɛ ˈö Yesu ˗yö dho ˗a ˗bha, ˗wo ˗to ˗a ꞊kee˗. ˈDhɛ kun ˗a ˈˈpiʋ̈ ˗ʒiaanwo ˈö kë ö do ˈka, mɛn ˗nu ˗wo ˗nu ˗a ꞊kee˗ ˗kplawo.

Yi do ˈka ˈdhɛ ˈö kun wɔ ˗ni ˈgü ˗a ˗bha bhë, mɛn ˗nu ˗wo ˗nu ˗gɛnlomɛn do ˈka ˗a ˗dhɛ. ˈˈKɛɛ ˈkɔɔdhɛ ˗kun pa ˗sü ˈka, bɔdhɛ ˈyaa kun dhö. ˗Wo ˈkɔ ˗gba ˈˈpian ˈbha bho mü ˈyö ˈwo ˈˈyuamɛn ˈö bhë ˗a ꞊yɔɔ Yesu ꞊kee˗ mü. ˈYö Yesu ˗ya pö gɔndë bhë ˗a ˗dhɛ: ‹˗Bhö luuˈˈ kö ˈü ˈˈtasü.› ˈDhɛ ˗kë ˈˈdhʋ̈, ˗a ˈwɔn ˗yö mɛn ˗nu ˗kun ꞊dedewo.

Yi ˈˈwɛɛ ˈbha ˈka, kö Yesu ˗yö ˗da ˗ni ˈgü ˈpödhɛ do ˈgü, ꞊weeyuamɛn ˗kɔŋ do ˈwo kun dɔ ˗sü ˈka mü. ˗Wo ˗gbla ˈwo˗ pö: ‹Yesu ˗bhö nu yi ˗dhɛ!› ˗A ˈˈtʋ̈ŋ bhë ˗a ˈka ˗weeyuamɛn ˗nu dua ˈyaa ˗mü kö ˗wo ꞊ɲɔɔn mɛn ˗nu ˈˈsuee. ˈDhɛ ˈö Yesu ˗yö ˗an ˈˈdhɛkë, ˗ya ˗pö ˗an ˗dhɛ ˗wo ˈdho ˗Zlan ˗dhɔkëgükɔ ˈgü kö ˗ya kë ꞊dhɛ ˈˈyua ˈyaa ˗an ˗bha ˈzü ˗wa ˈwɔn dɔ, ꞊dhɛ ˗kɔ ˈö Zoova ˗bha ˈtɔŋ˗ ˗ya pö˗ ˈka ˗a ˈdhö. ˈDhɛ ˈwo kun ˈdho ˗ni ˈgü, ˈyö ˗an ˗bha ˈˈyua ˗yö bo. ˈDhɛ ˈö˗ mɛn do ˗ya ˈwɔn dɔ ˈˈdhʋ̈, ˈyö ö ꞊yɛɛkë ˈö Yesu waa ˗Zlan ˗an ˈˈnuɛ bho. Mɛn ˗kɔŋ do ˗nu ˈö ˗an ˗bha ˈˈyua ˗yö bo bhë, ˗a mɛn dosɛnŋ ˈnën Yesu ˈˈnuɛ bho.

Dhebɔnën do ˈö ˈˈyua ˗ya ˗kë ˗kwɛ 12 ˈˈpiʋ̈ bhë, ˗yö ˗kun ˗a ˈˈpiʋ̈ ꞊dedewo kö˗ ˗bha ˈˈyua ˗yö bo. ˗Yö ˗bɔ Yesu ꞊zlöö ˈö˗ ˗bha sɔ bɛɛnˈˈ kun. ˗Yö ˗to ˈˈshia˗ mü ˈö˗ ˗bha ˈˈyua ˗yö bo. Yesu ˗yö dhɛɛˈˈ ˗kpɔ ˈö˗ pö: ‹˗De ˈö ˗pa n ˈka?› ˈˈSuʋ̈ ˗kun dhebɔnën bhë˗ ˈgü, ˈˈkɛɛ ˗yö ˗ɲɔɔn Yesu ˈˈsuee ˈö gagade pö ˗a ˗dhɛ. Yesu ˗ya ˗zogban ˈö˗ pö: ‹N ˈdhu, ˗bhö ˈdho ü ˈflëë˗ ˈgü.›

ˈˈSɔdha do ˈwo˗ ˗dhɛ Zailisö ˗ya ˗pö Yesu ˗dhɛ: ‹˗Bhö nu n ˗gɔ ˈkɔɔ n ˈdhu ˈyaa ö ˈflëëgü.› ˈˈKɛɛ Yesu yö ˈti wo ˗a ˗gɔ ˈkɔɔ ˈyö Zailusö ˈdhu ˗yö ga. ˗Dhɛ ˈö Yesu ˗yö ˗wo mü, ˗yö ˗kpan mɛn ˗nu ˗bha kö ˗wo ˈˈgbʋ bɔ ˗ni ˈgü. ˈÖ Yesu ˗ya pö: ‹˗Mën ˈö ˈka˗ ˗gbʋ bɔ. ˈNën ˈö bhë yö ˈti ga, yi ˈnën ˈö˗ zë ˗ni ˈgü.› ˗Yö ˗ya ˈnën bhë ˗a ˗kɔ ˗bha ˈö˗ pö: ‹N man ˈnën, ˗bhö luuˈˈ!› ˈYö ˗luu ˈö ˗ya ö ˗gɛan ˈö Yesu ˗ya pö ˗a ˗mɛn ˗nu ˗dhɛ ꞊dhɛ ˗wo ˗bhöpë nu ˗a ˗dhɛ. ˗Kɔ ˈö ˈnënmɛn ˗nu bhë ˗wo ˗kë ˗a ˈka wo ˗de ˈgü, ˗bhö ü ˗zota ˗a ˈgü!