˗Wo wo ˗wo ˗bhö Zoova ˗dhɛ

ˈDhɛ Izraɛdhömɛn ˗nu ˗wo go Ezitö ˈö ˈˈsu ꞊plɛ ˗yö ˗ʒiö, ˈwo ˗lo Sinai ˗tɔn gɛnŋdhö ˈwo wo ˗bha ꞊kanŋ˗ ˗ya mü. ˈYö Zoova ˗yö Moizö ˗dhɛ ˈö˗ pö ˗a ˗dhɛ ˗yö nu ˗tɔn ˈö bhë ˗a ˗ta. ˈDhɛ Moizö ˗yö ˗lo mü, ˈyö Zoova ˗ya pö ˗a ˗dhɛ: ‹ˈMan Izraɛdhömɛn ˗nu dha. ꞊Ya kë ꞊dhɛ ˗wa ˈwɔnman n ˗ta, ˗wa n man ˈtɔŋ˗ ˗nu ˈkun, ˗wo ˗dho kë n man ˈˈsɛgɔ ˈö ö ˗de ˗ta, ˗a ˈka.› Moizö ˗yö ö yɛɛkë ˈö pë ˈö Zoova ˗ya pö ˗a ˗dhɛ bhë, ˈö˗ pö Izraɛdhömɛn ˗nu ˗dhɛ. ˈDhɛ ˈˈdhiʋ̈ ˗lo ˗an ˗bha, ˈmën ˈwo˗ ˗kë? ˗Wa ˗yɔ ˗bɔ ˈwo˗ pö: ‹Pë ˈˈpɛpɛ ˈö Zoova ˈö˗ pö ˈyi˗ kë bhë, yi ˗dho ˗a kë.›

Moizö ˗yö ˗dho ˈzü ˗tɔn ˈö bhë ˗a ˗ta, ˈö Zoova ˗ya pö ˗a ˗dhɛ: ‹˗Dhɛkpaɔyi ˗yaaga ˗ya ˗ʒiö, a ˗dho ˈwɔn blɛɛˈˈ ü ˗dhɛ. ˗A pö ˈˈsɛgümɛn ˗nu ˗dhɛ ˈwa ˈdho ˗da ˗tɔn ˈö yö ˗a ˗ta.› Moizö ˗yö ˗go ˗tɔn bhë˗ ˗ta ˈö˗ pö ˈˈsɛgümɛn ˗nu ˗dhɛ ˗wo wo ˗de baaˈˈ kö ˗wo wo ˈˈtʋ ˈto Zoova ˗wo ˗bha.

ˈDhɛ ˗dhɛkpaɔyi ˗yaaga ˗yö ˗ʒiö, ˈyö Izraɛdhömɛn ˗nu ˗wo ˗kpan dhaŋ˗ ˈˈɲan ˈkun ˗sü waa ˈˈdhuu tii ˗an ˗bha ˗tɔn ˈö bhë ˗a ˗ta. ˗Wo dha ga waa ˈˈtrʋʋ ˗wo ˗nu ˗man ˈpö. ˈDhɛ ˗kë ˈˈdhʋ̈, ˈyö Zoova ˗yö ꞊yɔɔ ˗tɔn ˈö bhë ˗a ˗ta ˈˈwo ˈgü. ˈYö ˈˈsuʋ̈ ˗yö ˗kan Izraɛdhömɛn ˈˈgblʋ̈ ˈwo ˗ya zii ˗sü ˗bha ꞊dedewo. ˗Tɔn ˈö bhë ˗yö ˗ya vinŋ˗ ˗sü ˗bha ö ꞊faan ˈka ˈyö ˈˈwo ˈˈtëë ˗yö sɔ ˗a ˗ta. ˈˈTrʋʋ ˗wo ˈwo˗ man bhë, ˗yö ˗kun ˗da ˗ni ˈgü ˈˈdhiʋ̈ ˗kplawo. ˈÖ ˗Zlan ˗ya pö: ‹Man ˈnën ˈa ˗tɔ Zoova. Ka dua ˈyaa ˗mü kö ˈka ˗zlan ˈˈwɛɛ ˈbha ˗dhɔkë n ꞊ʒiaan˗ ˈgü.›

Moizö ˗yö ö yɛɛkë ˗tɔn ˈö bhë ˗a ˗ta ˈzü, ˈö Zoova ˗yö ˈtɔŋ˗ ˗nu ˈwo ˗gban ˗kɔ ˈö Izraɛdhönën ˗nu ˈwo ˗dho ˗a ˗dhɔkë ˗a ˈka waa ˗kɔ ˈwo ˗dho ˈˈta ˈsü ˗a ˈka bhë ˗an ˗bha, ˗an nu ˗a ˗dhɛ. Moizö ˗yö ˈtɔŋ˗ ˗nu ˈwo bhë ˗an ˗bɛnzë ˈö ˗an ˗wo pö Izraɛdhömɛn ˗nu ˗dhɛ. ˗Dhɛ ˈö ö bo ˗an ˗wo pö ˗sü ˈka, ˈyö Izraɛdhömɛn ˗nu ˗wa ˗pö: ‹Pë ˈˈpɛpɛ ˈö Zoova ˈö˗ pö ˈyi˗ kë bhë, yi ˗dho ˗a kë.› ꞊Ii, ˗wo wo ˗wo ˗bhö Zoova ˗dhɛ. ˈˈKɛɛ ˗wo ˗dho ˗a ˈgüwɔn kë ˗ee?