Kö Yesu ˗yö ˈˈgla ˗ni ˈgü

Zozɛfö waa Madhi ˗wo ˗tosɛta ˗kë Nazadhɛtö Yesu waa ö ꞊dhegblü gɔɔn˗ ˗nu waa dhoŋ ˗nu ˈwo to ˗an ˈka. Zozɛfö ˗kun ˈˈdhü ꞊nën˗ ɲën ˗ni ˈgü kö ˗yö ö ˗zokë ö ˗bha ˈkɔdhigümɛn ˗nu ˈˈpiʋ̈. ˗Yö Zoova waa˗ ˗bha ˈtɔŋ˗ ˗nu ˗zɔn ˗an ˗dhɛ ˈpö. ˗Wo ˗kun ˈdho ˗ni ˈgü ˗Zlan ˗dhɔkë ˗a ˗dhɔkëgükɔ ˈgü zoodhö zoodhö. ˗Wo ˗kun ˈdho ˗ni ˈgü ˈpö Zedhizadhɛmö Pakö ˈwlaan˗ ˗ta ˗kwɛ ꞊gban ˈka.

ˈDhɛ ˈö Yesu ˗kwɛ ˗yö ˗kë 12, ˗wo ˈˈta ꞊gblɛɛn ˗sü ˈwo dho Zedhizadhɛmö ꞊dhɛ ˗kɔ ˈwo˗ ˗kë ˗a ˈka ꞊shiöŋ ˗a ˈdhö. Zedhizadhɛmö ˗dhɛ ˗kun pa ˗sü ˈka mɛn ˗nu ˈwo nu Pakö ˈwlaan˗ ˗ta ˗an ˈka. ˈDhɛ ˈö ˈwlaan˗ ˗yö ɲën, Zozɛfö waa Madhi ˗wo ˗da ʒiaan˗. ˗An ˗bhaa ˈgü ˗be Yesu ˗kun mɛn ˗nu ˈö waa ˗nu ˈwo wo ꞊yɛɛ kë ˗ni ˈgü bhë, ˗an ˈˈpiʋ̈. ˈˈKɛɛ ˗dhɛ ˈwo ˗ya ˗a mɛɛnˈˈ ˗sü ˗bha wo dɔmɛn ˗nu kpö ˈgü, wo ˈti ˗kpan ˗a ˗bha.

ˈDhɛ ˗kë ˈˈdhʋ̈, ˗wo wo yɛɛkë Zedhizadhɛmö, ˈö ˈwo˗ ꞊mɛɛn ˗dhɛkpaɔyi ˗yaaga ˈˈpiʋ̈. ˗Wo ˗kpan ˗a ˗bha ˗Zlan ˗dhɔkëgükɔ ˈgü kö ˗yö ˈɲaannu ˗sü ˈka ˗Zlan ˗wo ˈtɔŋ˗ ˗zɔn mɛn ˗dhɛ ˗mɛn ˗nu ꞊zinŋgü. ˗Yö ˗kun ö ˈˈtʋ ˈto ˗ni ˈgü ˗an ˗bha, ˈö dhɛɛˈˈ ˗nu kpɔ ˗an ˗gɔ. Yesu ˗wɔn ˗yö mɛn ˗nu ˈwo bhë ˗an ˗kun. ˗A ˗wɔn ˈgü ˗wo ˗ya dhɛɛˈˈ ˗nu ˗kpɔ ˗sü ˗bha ˗a ˗gɔ. Yesu ˗bha dhɛɛˈˈ ˗yɔ bɔ ˗kɔ ˗nu ˗wɔn ˗yö ˗an ˗kun, ˈö ˈwo˗ yö ꞊dhɛ ˗yö ˗Zoova ˗bha ˈtɔŋ˗ ˗nu ˗dɔ.

˗Dhɛ ˗kë ꞊dhɛ Zozɛfö waa Madhi ˗an zuʋ̈dhiʋ̈tɛɛ ꞊dedewo bhë, Madhi ˗ya ˗pö: ‹N gbö, ˈya ü mɛɛnˈˈ ˗dhɛ ꞊gban ˈgü! Ü kun ˈˈmɛn?› ˈYö Yesu ˗ya pö: ‹ˈKaa˗ ˈwɔn dɔ ꞊dhɛ n dua ˗mü kö ˈa kë n Dë ˗gɔ ˈkɔɔ ˗ee?›

Yesu waa ö ˗mɛn ˗nu ˗wo ˗dho Nazadhɛtö. Zozɛfö ˗yö ˈˈdhüɲënsü ˗zɔn Yesu ˗dhɛ. Ü ˗bhaa ˈka, wlüünën suu ˗mɛɛn ˈö Yesu kun ˗a ˈka? Yesu ˗yö ˗kun ˈˈgla ˗ni ˈgü ꞊kpɔɔdhɛ ˈka ˗kplawo. ˗A ˈˈdhiaa ˗yö ˗kë ˗Zlan waa mɛnbhɩɩdhe ˗nu gü.