Ka ˗zo ˗yö ˗büö Lɔtö bɔɔ ˗wun ˈka

Lɔtö ˗yö ˗kun ö ꞊dhegblü Ablaamö ˈˈpiʋ̈ Kanaan ˗sɛ ˈgü. Ablaamö waa Lɔtö ˗nu ˗bha ˗tuëë ˗nu ˗wo ˗dho ˈwo kë ꞊va ꞊dedewo. ˗Dhɛ ˈö ˈˈtʋ̈ŋ ˈbha ˗yö ꞊lo, ˗dhɛ ˗nu ˈwo dho ˗tuëë ˗nu ˗to ˗a ˗bha ˈwaa kun ꞊va ˈzü. ˗A ˗wɔn ˈgü Ablaamö ˗ya ˗pö Lɔtö ˗dhɛ: ‹ˈKwaa ꞊mɔɔn˗ ˗bha ˈzü kö ˈkwa kë kwa ˈko ˗nu ˈˈsuee. ˗Bhö dɔ ˈˈgbɩɩ˗ kö ˈˈsɛ ˈˈpian ˈdhɛ ˈü˗ ˈˈpiʋ̈ ˈü ˈdho mü, kö man ˗de ˈpö ˈa ˈdho ˗a ˈˈpian ˈˈwɛɛ ˗ta.› ˈWɔn kë ˗kɔ suu ˈö bhë ˈya˗ ˗zɔn ꞊dhɛ Ablaamö ˈˈgblü ˗kun ˗së ꞊dedewo ˗ee?

Lɔtö ˗yö ˗dho ˈö ˗ya ˗dhɛ ˗së do ˈö kun Sodɔmö ˈˈkwipö ˈˈsuee ˗a ˈgü. ˈˈYi waa blëë ˗nu ˗wo ˗kun mü ꞊va. Lɔtö ˗yö ˗we ˗a ˗bha kö waa ö ˗bha ˈkɔdhigümɛn ˗nu ˗wo ˗ya mü.

Sodɔmö waa Gomɔɔ ˗wo ˗kun wo ˈko ˈˈsuee, ˈyö ˗an ˈgümɛn ˗nu këwɔn ˗nu ˈdhö ˗kun ˈya˗. ˗A ˗wɔn ˈgü, Zoova ˗ya ˗pö ö ˗dho ˈˈkwipö ˗nu ˈwo bhë ˗an ˈˈgü shiʋ̈ˈˈ. ˈˈKɛɛ Zoova ˗yö ˗kun ˗a ˈˈpiʋ̈ kö ˈö Lɔtö waa ö ˗bha ˈkɔdhigümɛn ˗nu dha. ˗A ˗wɔn ˈgü, ˗yö ö ˗bha ˈˈkië ꞊plɛ ˗bɔ kö ˗wa pö ˗an ˗dhɛ: ‹˗Ka wluuˈˈ ˈˈvaandhö ˈka ˈgo ˈˈkwipö ˈö yö ˗a ˈgü, ˗a ˗gɛn ˗mü ꞊dhɛ Zoova ˗dho ˗a ˈwü.›

ˈˈKɛɛ Lɔtö yö ˈti ˈto mü kö ˗yö ʒiö. ˈGo mü ˈzü ˈyaa kun ˈwɔn ˗nu kë ˗ni ˈgü ˈˈvaandhö. ˗A ˗wɔn ˈgü ˈˈkië ˗nu bhë ˗wa ˗bha dhebɔ, ˗a ˈdhu ˗nu ꞊plɛ, waa Lɔtö ꞊dede ˗an ˗kɔ ˗kun ˈwo ˗nu ˗gan ˈwo go ˗nu ˈka ˈˈkwipö ˈö bhë ˗a ˈgü. ˈDhɛ ˗kë ˈˈdhʋ̈ ˈyö ˈˈkië do ˗ya pö ˗an ˗dhɛ: ‹˗Ka ˗duë kö ˈka dha, kö ˈka ˗dhɛga ka ꞊zlöö, ka dho ga.›

ˈDhɛ ˈwo ˗lo Zoa, ˈö ˈˈshiʋ̈ waa blɔɔnˈˈ ˗nu ˗wo ˗go dhaŋ˗ ˈgü ˈö ˈwo ban ꞊dhɛ dha ˈdhö Sodɔmö waa Gomɔɔ ˗an ˗ta, ˈö ˈˈkwipö ˗nu bhë ˗an ˈgü ˗yö ꞊shiʋ̈. ˈDhɛ Lɔtö bɔɔ yö ˈti ˈwɔnman Zoova ˗ta ˈö ˗dhɛga ö ꞊zlöö, ˗yö ˗kë ꞊wee ˗dhü ˈka. ˈˈKɛɛ Lɔtö waa ö ˈˈdhu ˗nu ꞊plɛ ˗wo ˗to wo ˈflëë˗ ˈgü ˈö sü ꞊dhɛ ˗wo ˈwɔn ˗man Zoova ˗ta. Gɔɔgbɩɩdhɛ ˈö Lɔtö bɔɔ ˗ya ˗kë bhë, ˗yö ˗wëë ˗bɔ ˗an ˗ta ꞊dedewo. ˈˈKɛɛ ˗an zuʋ̈gblü ˗kun dhi ˗sü ˈka, ˈö sü ꞊dhɛ ˗wo ˈwɔn ˗man Zoova ˗ta.