ˈGüdandhe ˈö ˗kun Kamɛlö ˗tɔn ˗ta

˗Gblüdë yaa ˗nu ˗wo ˈˈdhiʋ̈sü Izraɛdhö ˈkɔdhi ˗kɔŋ do bhë ˗an ˈka. ˈˈKɛɛ Akabö suu kun ˈya˗ ꞊dede. ˗Yö dhebɔ suu yaa ˗sü do ˈö Baadhö ˗dhɔkëmɛn ˈka ˗a ˗sü dhe ka. Dhebɔ ˈö ˈˈdhʋ̈ ˗wa ˗dhɛ Ʒezabɛdhö. Akabö waa Ʒezabɛdhö ˗wo Izraɛdhö ˗dhɛ ˗pa Baadhö ˗dhɔkësü ˈka ˈö ˈwo ˗zlanwodhiʋ̈lomɛn ˗nu zë. ˗Mën ˈö Zoova ˗ya ˗kë? ˗Yö ö ˗wodhiʋ̈lomɛn Edhi ˗bɔ kö ˗yö ˗a ˗bha nɔɔn˗ ˗dɔ Akabö ˗gɔ.

Edhi ˗ya ˗pö ˗gblüdë Akabö ˗dhɛ ꞊dhɛ ˗a ˗bha ˈwɔn yaa ˈkosɔn dha ˈyii ˈdho ban ˈzü Izraɛdhö ˗sɛ ˈgü. ˗Kwɛ ˗yaaga ˗yö ˗ʒiö kö tapë ˗nu ˈwaa bhɔ ˗ni ˈgü, ˈö din ˗yö ˗da Izraɛdhö ˗sɛ ˈgü. ˈYö Zoova ˗yö Edhi ˗bɔ Akabö ˈˈpiʋ̈ ˈzü. ˈYö Akabö ˗ya pö ˗a ˗dhɛ: ‹Bhi ˈnën ˈü˗ ˗kë ˈö ˈwɔn yaa ˗nu ˈwo nu yi ˗ta bhë!› ˈYö Edhi ˗ya pö: ‹ˈMaan ˈnën ˈa˗ kë ˈö dha ˈyaa ban ˈzü, ka ˗bha Baadhö ˗dhɔkësü ˗mü. Kwa dho pë ˈbhaa kë. ˈˈSɛgümɛn ˗nu waa Baadhö ˗dhɔkëmɛn ˗nu kpaaˈˈ ˈkwëë˗ Kamɛlö ˗tɔn ˗ta.›

ˈYö ˈˈsɛgümɛn ˗wo dho ˗tɔn bhë˗ ˗ta. ˈYö Edhi ˗ya pö: ‹ˈPë ˈka˗ ˈˈpiʋ̈ ˗kaa kë. ꞊Ya kë ꞊dhɛ Zoova ˈnën ˗tɔ ˗Zlan ꞊dede, ˗kaa ˗dhɔkë. ˈˈKɛɛ ꞊ya kë ꞊dhɛ Baadhö ˈnën ˗tɔ ˗Zlan ꞊dede, ˗ka yö zë˗ ˗dhɔkë ˈpö.› ˗Kwa pë ˈbhaa ˈgüdan: ‹Baadhö ˗dhɔkëmɛn ˗nu 450 ˈwo bhë, ˗wo wo ˗bha ˈˈsaapë baaˈˈ kö ˗wo bhɛɛˈˈ wo ˗bha ˗zlan ˗dhɛ, kö man ˗de ˈpö ˈa n man ˈˈsaapë baaˈˈ kö ˈa bhɛɛˈˈ Zoova ˗dhɛ. ˗Zlan ˈö ˗dho ˈˈwo ˗ya ˈö ˗dhɔkëmɛn ˗bha ˈˈsaapë ˗ta ˈnën ˈö ˗tɔ ˗Zlan ꞊dede. ˈYö ˈˈsɛgümɛn ˗nu ˗wo ˗wɩ ˗a ˗bha.

Baadhö ˗wodhiʋ̈lomɛn ˗nu ˗wo wo ˗bha ˈˈsaapë ˗baa. ˗Wo ˗gloo ˗a ˗dhɛ ˗sü ˗bha yi bhë ˗a ˈka ˈwo˗ pö: ‹Baadhö, ˗bhö ˈˈwɩ yi ˗gɔ.› Baadhö ˈyaa kun ˗a ˗daa kë ˗ni ˈgü. ˈYö Edhi ˗yö ꞊wɛɛ dɔ ˗an ˗bha ˈö˗ pö: ‹˗Kaa ˗dhɛ ka ꞊faan ꞊gban ˈka. ˗A ˈbha ˗ya kë kö ˗yö yi zë ˗ni ˈgü, ka dua ˗mu kö ˈka ˈpa ˗a ˗bha.› ˗Wo ˗to ˗a ˗dhɛ ˗sü ˗bha ˈö ˈˈbin ˗yö mën. ˈˈKɛɛ yö ˈti˗ ˗daakë ˗an ˗gɔ.

Edhi ˗yö ˈˈyi ꞊va ꞊loo ö ˗bha ˈˈsaapë ˗ta, ˈö ꞊bhɛɛ ˈö˗ pö: ‹ˈAa Zoova, ˗bhö ˗a ˗zɔn ˈˈsɛgümɛn ˗nu ˗dhɛ ꞊dhɛ bhi ˈnën ˈü ˗tɔ ˗Zlan ꞊dede.› ˗Yo ˗to mü ˈö Zoova ˗ya ˗kë ˈö ˈˈwo ˗yö go dhaŋ˗ ˈgü ˈö˗ ˗bha ˈˈsaapë ˗gʋ̈. ˈYö ˈˈsɛgümɛn ˗nu ˗wa pö: ‹Zoova ˈnën ˈö ˗tɔ ˗Zlan ꞊dede!› ˈYo Edhi ˗ya pö: ‹ˈKa ˈdho ka ꞊kwaa Baadhö ˗wodhiʋ̈lomɛn ˗nu ˗zü kö ˗wo ꞊duëë!› ˗Dhɛkpaɔyi ˈö bhë˗ ˈka, Baadhö ˗dhɔkëmɛn ˗nu 450 ˈwo ˗an ˗zë.

ˈDhɛ ˈˈdhuu kpö ˈˈtɩtɩ ˗yö ˗ya ꞊weeyi ˗ta, ˈyö Edhi ˗ya pö Akabö ˗dhɛ: ‹Dha ˈkpii˗ yöö ban, ü ˗bha ˗gblü ˗gɔn ˗a ˈka gɔnën baaˈˈ kö ˈü ˈdho ˈˈkwɛɛnŋdhö.› Dhaŋgüdhɛ ˗yö ˗ya ꞊tröö ˗sü ˗bha ˈˈdhuu kpö tii ˗nu ˈka ˈö ˈˈtee ˗yö ˗ya ʒiö ˗sü ˗bha, ˈö dha ˈkpii˗ ˗yö ˗ya ban ˗sü ˗bha. ˈYö ˗kë dha ban ˗sü züdɔ ˈˈtʋ̈ŋ ˈka. Akabö ˗yö ö ˗bha gɔnën bhë ˗a ˗blü ˗bia ꞊dede ˈka. ˈYö Edhi ˗yö ˗bialö ˈˈvaandhö ˈö ˗ziö gɔnën bhë ˗a ˗ta Zoova ˗bha ˗ˈˈpiigbɩɩdhɛ ˈsaa˗ ˈgü. ˈˈKɛɛ Edhi ˗bha ˈwɔn ˈgbɩɩ˗ ˗nu ˗wa ɲën ˗ee? ˈWɔn ˗gɔ ˈö ˗dɔ ˗a ˗dhɛ ˈö yö ˈˈpiʋ̈ ˗dho ˗a ˗zɔn kwa ˗dhɛ.