ˈWƆN ˗GƆ 10
ˈWɔn ˗së ˗mɛɛn ˈö Zoova ˗bha ꞊Gbɛkiö ˗nu ˗bha ˗bhɔkwëë ˗nu ꞊mɔɔn˗ ˗bha ˈwo˗ ˗kë ü ˗dhɛ?
ˈBha ˈˈdhʋ Zoova ˗bha ꞊Gbɛkiö ˗nu ˗bha ˗bhɔkwëë ˗ta do ˗ee? ꞊Ya kë ꞊dhɛ ü ˈti ˈˈdhʋ mü do, ˗dho mü ˗sü ˗blɛɛsü ꞊mɔɔn˗ ˗bha ˈö ˗kë ü ˈgü ˈˈgbɩɩ˗ ˈnën ˈbhaawo. Ü ꞊mɔɔn˗ ˗bha ˈü ü ˗de dhɛɛˈˈ kpɔ ꞊dhɛ: ‹ˈMën ˈwo˗ ˗kë ˗bhɔkwëë ˗nu bhë ˗an ˗ta? ˈMën ˗kë ˈö ˗an ˗wɔn ˈdhö ˈˈgbɩɩ˗? ˈMën ˗kë ˈö n dua ˈdhö ˗mü kö ˈa ˈdho ˗an ˗ta? ˈWɔn ˗gɔ ˈö yö, ˗yö ˗dho ˗a ˗zɔn ꞊dhɛ ˗bhɔkwëë ˗kë mɛn ˈˈwɛɛ ˗nu ˈˈpiʋ̈ ˗sü ˗dho kaa ˗Zlan ka ˗bha ˗mlɛɛn ˗gɛn ˗gban, ˈö ü ˗takun ü ˗bha ˗tosɛta ˈgü.
1. ˈMën ˗kë ˈö Zoova ˗bha ꞊Gbɛkiö ˗nu ˗wo ˗bhɔkwëë ˗kë?
Biblö ˗bɛnzëmɛn do ˗ya ˗gɛn ˗pö. ˗Ya ˗pö: «˗Bhɔkwëë ˈkpii˗ ˗ta a ˗dho zoova ˈtɔ bhɔ.» (Psaume 26:12) ꞊Dɛɛ ˈpö Zoova ˗bha ꞊Gbɛkiö ˗nu ˗wo ˗bhɔkwëë ˗kë ˗kplawo, ˈö ˗an ˗dhɛ ˗së. ˈˈSɛ ˗todhʋ̈sü ˈgü, ˗wo ˗dho wo ˈkwëëdhö ˈˈdhoogɔ ˈˈpɛpɛ ˈka ˈö ˈwo ˗Zlan ˗dhɔkë, ˈö ˈwo˗ ˈtɔ bhɔ ˈˈtan bho, ˈö ˈwo ꞊bhɛɛ. ˗Wo ˗bhɔkwëë ˈˈgblʋ̈gblʋ̈ ˗nu ˗kë ˈzü ˗kwɛ ˈˈpɛpɛ ˈka ˈö ˈwo Zoova ˗dhɔkë.
2. ˗Mën ˈü ˗dho ˗an draanˈˈ ˗bhɔkwëë ˗nu bhë ˗an ˗ta?
Zoova ˗bha ꞊Gbɛkiö ˗nu ˗bha ˗bhɔkwëë ˗ta, ˗wo Biblö ˗zɔn mɛn ˗nu ˗dhɛ, ˈö «ˈwo˗ ˈgü ˗pʋ ˈkpakpadhö, ˈö ˈwo˗ ˗gɛn pö.» (Néhémie 8:8 ˗wo pö.) Kö ˈü ˈdho ˗an ˗bha ˗bhɔkwëë ˗nu ˗ta, ˈwɔn ꞊va ˈö ˗gban Zoova waa˗ ˗bha ˈˈklʋʋsë ˗nu ˗bha, ü ˗dho ˗an dɔ. ˗Kɔ ˈö ü ˗dhɔ ˗yö Zoova ˗kë ˗a ˈka ü˗ draanˈˈ ˗ni ˈgü ꞊dedewo, ˗ɲɔɔn ˗a ˗bha ˗sü ˗dhɔ ˗dhö ˗da ü ˈgü ˈgbɛ. Ü ˗dho ˗a yö ˈpö ꞊dhɛ ˗yö ꞊mɔɔn˗ ˗bha ˈö ü ˗takun ˈö ü ˗bha ˗tosɛta ˗yö ˗kë ˗së.—Isaïe 48:17, 18.
3. ˗Mën ˈü ˗dho ˗a ꞊slɔɔ ˗bhɔkwëë ˗kë mɛn ˈˈwɛɛ ˗nu ˈˈpiʋ̈ ˗sü ˈgü?
Zoova ˗yö kwa ꞊faanmën kö ‹ˈkwa kwa ˈˈtʋ̈ng kë kwa ˈko ˈgü kö ˈkwa kwa ˈko ˗nu faan dɔ, kö mɛ ꞊gban ˗dhɔ ˗yö kwa kë kö kwa zuëˈˈ ˗yö bhɔ ˈwɔn ˗së kë ˗sü bha, kö ˈkwa ˗dho ˈˈkan ˗bhɔkwëë ˗nu ˗bha.› (Eblö 10:24, 25) ˈMɛn ˈwo wo ˈˈtʋ̈ŋ ˗kë mɛn ˈˈwɛɛ ˗nu ˈgü, ˈö ˗Zlan dɔ ˗sü ˗dhɔ ˈdhö ˗an ˗bha ꞊dhɛ ü ˈdhö, ü ˗dho ˗an yö ˗bhɔkwëë ˗nu ˗ta. Pë ˗nu ˈö ˗an ꞊faanmën Biblö ˈgü, ˗wo ˗dho ˗a blɛɛˈˈ ˈü˗ man. (Wlɔmö 1:11, 12 ˗wo pö.) Mɛn ˗nu ˈwo zuʋ̈gblüdhi ˈgü, ˈˈkɛɛ kö ˈwɔn ˈˈgbɩɩ˗ ˗yö ˗an ˗bha ꞊dhɛ mɛn ꞊gban ˈdhö, ü ˗dho ˗kpan ˗an ˗bha. ˈPë ˗kë ˈö Zoova ˈdhö˗ ˈˈpiʋ̈ kö ˈü ˗kë ˗bhɔkwëë ˗nu ˗ta, ˗a ˗gɛn ˈbhaa ˈnën ˈwo bhë.
˗KAA ˈˈPIƲ̈ ˈPƆN
Pë ˈwo˗ ˗kë Zoova ˗bha ꞊Gbɛkiö ˗nu ˗bha ˗bhɔkwëë ˗ta, waa ˈpë ˗kë ˈö ü dua ˈdhö ˗mü kö ˈü ˈdho ˗a ˗ta, ˗kwaa ˗wɔn blɛɛˈˈ.
4. Zoova ˗bha ꞊Gbɛkiö ˗nu ˗bha ˗bhɔkwëë ˗nu
Kletiɛn ˗nu ˈwo kun ˗kwɛ ꞊këŋ do ˗blɛɛsü ˈgü ꞊kwɛŋzü, ˗wo ˗kun ˈdho ˗ni ˈgü wo ˈkwëëdhö kö ˈwo Zoova ˗dhɔkë. (Wlɔmö 16:3-5) ˗Ka Kodhɔsö 3:16 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Kletiɛn ˗nu ˈwo kun ꞊kwɛŋzü ˗wo ˗kun Zoova ˗dhɔkë ˗ni ˈgü ˗kɔ ˗kë ꞊dhɛ?
꞊Dɛɛ, Zoova ˗bha ꞊Gbɛkiö ˗nu ˗wo ˗dho wo ˈkwëëdhö ˈˈtʋ̈ŋ ꞊gban ˈˈpɛpɛ ˈka wo ˗bha ˗Zlan ˗dhɔkëdhɛ ˗nu ˈgü. ˈBhaa˗ pö pë ˈwo˗ ˗kë ˗a ˗bhɔkwëë ˗nu ˗ta ˈü˗ dɔ, ˗kaa VIDEO ˗ga. ˈKa ka bo, ˗ka ˗bhɔkwëë ˈˈbin ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
Pë ˈwo˗ ˗kë Zoova ˗bha ꞊Gbɛkiö ˗nu ˗bha ˗bhɔkwëëkëgükɔ ˗nu ˈgü waa pë ˈü˗ pö Kodhɔsö 3:16 ˈgü bhë, ˗an ˗bɛkwëëdhɛ ˈtɔ˗ ˗mën?
Video ˈö bhë ˗a ˈgü ɛɛnˈˈ pë ˈˈbin ˈö bhë ˗a ˗ta, ˗mën ˈö ü ꞊faan mën ꞊dedewo ˗dho ˗bhɔkwëë ˗nu ˗ta ˗sü ˗bha?
˗Ka 2 Kodhɛngtö 9:7 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö ˈwaa ˈwëë˗ bho Zoova ˗bha ꞊Gbɛkiö ˗nu ˗bha ˗bhɔkwëë ˗nu ˗ta?
ˈPë ˗dho kë ˗bhɔkwëë ˈö ˗ya yö ꞊klöö˗ ˗a ˗ta, ˗kaa ˗ga ka ˈkwëë˗.
˗A ˗bhɔkwëë ˈˈpian ˗mɛɛn ˈö ü ˗dhɛ ˗së ɛɛnˈˈ ˈö ˗mɔn ˗a ˗bha ˗yö ü ˗takun?
Ü˗ ˈwɔn ˗dɔ ˗ee?
˗Bhɔkwëë ˈˈlɛlɛ waa˗ këdhɛ ˗nu ˈwo ˈˈkpɔnŋtaadhɛ ˗todhʋ̈sü ˈgü, ü ꞊mɔɔn˗ ˗bha ˈü ˗kpan ˗an ˗bha jw.org ˗ta.
(1) Yi ˗bha ˗bhɔkwëë ˗nu ˗ta, ˗wo ˈˈdhɛɛtadhiaŋ˗ ˗nu ˗zë, ˈö ˈwo ˗zlanwopö ˗kɔ waa mɛn ꞊klaŋ kë ˗kɔ ˗nu ˗zɔn yi ˗dhɛ. ˗A ˗bhɔkwëë zü ˗yö ˗dɔ, ˈö˗ ˈˈdhiʋ̈ ˗yö ta ˈˈtan waa bhɛɛsü ˗ta.
(2) ˗A ˗bhɔkwëë ˈˈpian ˈbhaa ˗ya yö mü, mɛn ˈˈpɛpɛ ˈö ˗dhi ˗an ˗dhɛ, ˗wo ˈwɔn ˗daa ˗kë.
(3) ˗A ˗bhɔkwëë ˈˈkwee ˗yö ˈˈpʋ ˗sü ˈka gɔɔn˗ ˗nu, dhebɔ ˗nu, mɛn zii ˗nu, wlüünën ˗nu waa mɛn suu ꞊gban ˈˈpɛpɛ ˗gɔ.
(4) ˈWaa ˈwëëga bho yi ˗bha ˗bhɔkwëë ˗nu ˗ta. Zoova ˗bha ꞊Gbɛkiö ˗nu yi ˗bha ˗bhɔkwëë ˗ta, ˗wo ˗da ˈkɔɔ ˈˈwɛɛwɛ ˈö ˈwaa ˈwëë˗ bho.
5. Mɛn ˈö ö ˈgü dɔ ˈˈgbɩɩ˗ ˈyö dho ˗bhɔkwëë ˗ta.
˗Kwa Yesu waa ö ˗mɛn ˗nu ˗an ˗bha ˈwɔnzuan ˗ga. ˗Kwɛ ˈˈpɛpɛ ˈka ˗wo ˗go Nazadhɛtö ˈö ˈwo ˈˈtasü ˗tɔn ˈgü ˈˈkidhʋŋ 100 ˈˈpiʋ̈, ˈö ˈwo dho ˗Zlan ˗dhɔkë ˗a ˈgü ˗kɔ ˈgü Zedhizadhɛmö. ˗Ka Dhukö 2:39-42 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Ü ˗bha ˈgü, ˗dho ˈˈta ˈgü ˗sü ˈö Zedhizadhɛmö bhë ˗yö ˗kun ˈˈplëëplë ˗an ˗bha ˈka ˗ee?
Ü ˗dho ü ˈgü dɔ ˈˈgbɩɩ˗ ˗kɔ ˗kë ꞊dhɛ kö ˈü ˈdho ˗bhɔkwëë ˗nu ˗ta ˈpö?
Ü ˗bha ˈgü, ˗a ˗kë ˈˈdhʋ̈ ˗sü ꞊trɔɔn ˗yö ˗dhö ˗ee? ˈMën ˗kë ˈü˗ pö ˈˈdhʋ̈?
Biblö ˗ya ˗pö ˗dho wo ˈkwëëdhö ˗sü ˈö ˈwo ˗Zlan ˗dhɔkë bhë ˗a ˗wɔn ˗yö ˈˈgbɩɩ˗. ˗Ka Eblö 10:24, 25 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö kwa dua ˈdhö ˗mü kö ˈkwa ˈdho ˗bhɔkwëë ˗nu ˗ta ˗kplawo?
MƐN ˈBHAA ˗NU ˗WA ˗PÖ: «ˈˈGbɩɩdhɛ ˈyaa ˗mü kö ˈü ˈdho mɛn ˈˈwɛɛ ˗nu ˈˈpiʋ̈ kö ˈka ˗Zlan ˗dhɔkë, ˈbha ˈto ˈkɔɔ ˈbha Biblö ˗wo pö, kö za ˗ya ɲën.»
Biblö ˈˈɲan ɛɛnˈˈ ˈwɔnzuan ˗mɛɛn ˈü ˗dho ˗a ˗zɔn ˗an ˗dhɛ kö pë ˈö Zoova ˈdhö˗ ˈˈpiʋ̈ ˗wa dɔ?
˗A ˈDHƐ TO KWA ˈˈƝAAN
˗Dho ˗bhɔkwëë ˗ta ˗sü ˗dho ü ˗takun kö ˈü ˈwɔn ꞊vadhɛ ˈwo ˗gban Zoova ˗bha ˗an draanˈˈ, kö ka ˗bha ˗mlɛɛn ˗yö ˈyɔ, kö kaa mɛn ˈˈwɛɛ ˗nu ˈka˗ ˗dhɔkë ka ˈkwëë˗.
˗Zobuödhe
ˈMën ˗kë ˈö Zoova ˗yö kwa ꞊faanmën ˗bhɔkwëë kë ˗sü ˗bha?
˗Mën ˈü ˗dho ˗a draanˈˈ Zoova ˗bha ꞊Gbɛkiö ˗nu ˗bha ˗bhɔkwëë ˗nu ˗ta?
ˈBha ˗dhɛga, ˈwɔn ˗së ˈˈwɛɛ ˈbhaa ˗mɛɛn ˗nu ˈö ˗bhɔkwëë ˗nu dho ˗an kë ü ˗dhɛ?
˗AN ˗GA ˈPÖ
˗Dho ˗bhɔkwëë ˗ta ˗sü ˗yö ˈü ˈgü ˈˈgbɩɩ˗ ˈnën ˈbhaa wo ˗ee? ˗Yö ˗kë ˈˈdhʋ̈ gɔndë do ˈbhaa ˈka, ˈˈkɛɛ ˗bhɔkwëë ˗nu kë ˗sü ˗dhɔ ˗yö ˗da ˗a ˈgü. ˗Kɔ ˈö ˗kë ˗a ˈka, ˗bhö ˗a ˗ga.
˗Bhɔkwëë ˗nu ˗dhɔ ˗yö wlüünën do ˈbhaa ˗kë, ˈö ö ˈgü dɔ ˈˈgbɩɩ˗ ˈö dho ˗a ˗ta ˗kplawo. ˗Kɔ ˈö˗ ˗kë ˗a ˈka, ˗bhö ˗a ˗ga.
˗Kɔ ˈö mɛn ˈbhaa ˗nu ˗wo ˗bhɔkwëë yö ˗a ˈka ˈö ˈwo˗ ꞊blɛɛ ˗a ˗ga.
«ˈMën ˗kë ˈö ˗së kö ˈkwa ˈdho ˗bhɔkwëë ˗nu ˗ta ˗bhɔkwëëkëgükɔ ˈgü?» (ˈWɔn ˗gɔ ˈö jw.org ˗ta)
Mɛn ˈö kun pëyaakëmɛn ˗nu kpö ˈgü, ˈdhɛ ˈö dho Zoova ˗bha ꞊Gbɛkiö ˗nu ˗bha ˗bhɔkwëë ˗ta, ˗kɔ ˈö˗ ˗bha ˗tosɛta ˗yö go ˗a ˈka ˈˈgblʋʋ, ˗bhö ˗a ˗ga.
«˗Dhɛ ˈˈpɛpɛ ˈa dho ˗a ˗bha, n ˗man bu ˗kun n ˗ta» (˗Kwɛ 2014 Ʒue 1 ˗bha ˈˈGlaadhiʋ̈ ˗tɔn)