ˈWƆN ˗GƆ 47
ˈBha ˗mɔn ˗bɔyibhaasü ˗bha ˗ee?
Ü ˗bha Biblö draansü ꞊yaa˗ kë ˈbha ˈwɔn ꞊vadhɛ dɔ Zoova ˗bha. ˈYaa za ˈgü ꞊dhɛ ˈbha ü ˈˈtakɔ ˈbhaa ˗nu bho ˈˈgblʋʋ kö ˈü kë ˗a ˗dhɛ ˗së. ˈˈKɛɛ ˗a ˈbhaa ˗ya kë kö pë ˈbhaa ˗nu ˈö ˈwo ü ˗gɛn ꞊nënŋ ˈö ü ˈti ü ˗de nu ˗a ˗dhɛ ꞊köŋ kö ˈü bɔ ˈˈyi ꞊bhaa ˗wo ˗dhö. ˈWɔn ˗gɔ ˈö yö, ˗yö pë ˈö mɛn ˈbhaa ˗nu ˗gɛn ꞊nënŋ ˈö ˈwaa ˈdho ˈˈdhiʋ̈ kö ˗wo bɔ ˈˈyi ꞊bhaa bhë ˗an ˗wɔn ˗blɛɛ, ˈyö ˗kɔ ˈü ˗dho bɔ ˗a ˈka ˗an ˈgü ˈö˗ ˗zɔn ˈpö.
1. Ü dua ˗mü kö ˈü ˈwɔn ꞊gban ˈˈpɛpɛ dɔ Biblö ˈgü kö ˈü ꞊kun bɔ ˈˈyi ꞊bhaa ˗ee?
ˈBha˗ pö ˈü bɔ ˈˈyi ꞊bhaa, ü dua ˗mü kö ˈü «gagade dɔ ˗së ˈka.» (1 Timote 2:4, NWT) ˗A ˗pö ˈˈdhʋ̈ ˗sü ˗gɛn ˈyaa ˈnën ˗tɔ dhɛɛˈˈ ˈˈpɛpɛ ˈwo ˗an kpɔ ü ˗gɔ ˈö ˈwo ˗gban Biblö ˗bha ˈü ˗an ꞊gban ˗yɔ dɔ. Kletiɛn ˗nu ˈö ˗wa bɔ ˈˈyi ꞊bhaa ˈö˗ ˗dhɛ ˗ya ꞊gwëë ˗ʒiaanwo, ˗wo ꞊kun Biblö draanˈˈ ˗ni ˗kplawo. (Kɔdhɔsö 1:9, 10) ˈˈKɛɛ ü dua ˗mü ꞊köŋ ˗blɛɛsü kö gagade ˈbhaa ˗nu ˈö ˗an ˗wɔn ˈdhö ˈˈgbɩɩ˗, ˈö ˈwo Biblö ˈgü ˈü ˗an dɔ. Mɛn zii ˗nu ˈwo ˗zlanwokɔdhi ˈgü, ˗wo ˗dho ü ˗takun kö ꞊ya kë ꞊dhɛ gagade ˗nu ˈwo ˈˈdhʋ̈ ˈbha ˗an dɔ ˈü˗ ˈwɔn dɔ.
2. ˗Mën ˗nu ˈö ü dua ˈdhö ˗mü kö ˈü ˗an kë kö ˈü ꞊kun bɔ ˈˈyi ꞊bhaa?
ˈBha˗ pö ˈü bɔ ˈˈyi ꞊bhaa, ü dua ˗mü ꞊köŋ kö ˈü ü ‹zuëˈˈ slëë˗ kö ˈü ü wë ˗ya ˗Zlan ˈˈpiʋ̈.› (Këwɔn ˗nu 3:19 ˗wo pö.) ˗A ˗pö ˈˈdhʋ̈ ˗sü ˗gɛn ˈnën ˗tɔ pë yaa ˗nu ˈü ˗an ˗kë ˈˈdhiʋ̈ ˗be, ˗yö ˈmën ü ˈka ꞊dedewo, kö ˈü bhɛɛˈˈ Zoova ˗dhɛ kö ˗yö ü ˗bhawɔn ˈto. Ü dua ˗mü ˈpö kö ˈü ü ˈgü dɔ ˈˈgbɩɩ˗ kö ˈü ˈˈkan pë ˗nu ˈwo ˗Zlan ˗dhɛ ˈyaa˗ ˗an ˗bha, kö ˈwɔn ˗nu ˈwo˗ ˗dhɛ ˗së ˈü ˗an kë. ꞊Ya ˈgo mü ˈzü, ü dua ˗mü kö ˈü kë ˗zlanwopömɛn ˈö yö ˈti bɔ ˈˈyi ꞊bhaa ꞊köŋ ˗a ˈka, kö ˈü ü ˗kɔ ˗da ˗zlanwokɔdhi ˈgü ˗wɔn ˗nu ˈgü, kö ˈü ˗zlanwopö, kö ˈü nu ˗bhɔkwëë ˗nu ˗ta.
3. ˈMën ˗kë ˈö ü dua ˈyaa ˗mü kö ˈˈsuʋ̈ ˗yö ü kë?
ˈPë˗ ˈˈsuʋ̈ ˗yö mɛn ˈbhaa ˗nu ˗kë ˈyö ˗tɔ ˈwaa˗ ˈˈpiʋ̈ ˈwo wo ˗wo ˗bhö Zoova ˗dhɛ kö ˈwo ˈgo mü ˈzü ˈwo˗ ˈgügawɔn ˗nu kë. ˈYaa za ˈgü ꞊dhɛ ˈwɔn ꞊mɔɔn˗ ˗bha ˈö zë ü ˗gɔ ꞊shiö ꞊shiö. ˗Zlan ˗dhɔkëmɛn ˗nu ˈö ˈwo kun ꞊kwɛŋzü ˗ʒiaanwo ˈö Biblö ˗yö ˗an ˗wɔn ꞊blɛɛ, ˈwɔn ˗yö ˗zë ˗an ˗gɔ ˈpö. ˈˈKɛɛ Zoova ˗ya ˈwɔn ˗dɔ ꞊dhɛ ˈwɔn yaa kë ˗dhii ˗yö kwa kwi ˈgü. (Psaume 103:13, 14 ˗wo pö.) Pë ˈö˗ ˈˈpiʋ̈ ˈyö ˗tɔ ˈü ü ˈgü dɔ ˈˈgbɩɩ˗ kö ˈü ö ˗bha ˈtɔŋ˗ ˗nu ˈkun. ˗Yö ˗dho ü ˗takun ˗a ˗kë ˈˈdhʋ̈ ˗sü ˗bha. ˗A ˈˈDhiwo ˗yö kwa ꞊faanmën ꞊dhɛ «kwa ˗kan [˗a] ˗dhɔ bha˗ ˗bha ˗pë ˈbhaa [ˈyaa] ˈdhö.»—Wlɔmö 8:38, 39 ˗wo pö.
˗KAA ˈˈPIƲ̈ ˈPƆN
˗Kɔ ˈü ˗dho Zoova dɔ ˗sü draanˈˈ ˗a ˈka kö ˈü ˈˈwɩ ˗a ˗bha ˗takundhe ˗bha, kö ˈü ˈto ˗a ˈˈgbɩɩ˗ ˈka ˈwɔn ˗nu ˈwo mɛn ˗gɛn ꞊nënŋ ˈö ˈwaa bɔ ˈˈyi ꞊bhaa ˗an ˗ta bhë, ˗kwaa ˗ga.
4. ˈWɔn ˗nu ˈwo ˗gban Zoova ˗bha ˗an draanˈˈ ˗së ˈka.
Ü ˗dho Zoova dɔ ˗kɔ ˗kë ꞊dhɛ kö ˈü ꞊kun bɔ ˈˈyi ꞊bhaa? Ü dua ˗mü kö ˈü˗ dɔ ˗së ˈka, kö ˗a ˗dhɔ ˗yö ü kë, kö ˗kë ˗a ˗dhɛ ˗së ˗sü ˗dhɔ ˗yö ü ˗kë ˈpö. ˗Kaa VIDEO ˗ga, kö pë ˈö Biblö draanmɛn ˗nu ˈwo ˈˈkpɔnŋtaadhɛ ˗todhʋ̈sü ˈgü ˈwo˗ ˗kë kö ˈka˗ dɔ. ˈKa ka bo kö ˈka dhɛɛˈˈ ˈö ˈˈshia bhë ˗a ˗yɔ mɛɛnˈˈ.
Video ˈö bhë ˗a ˈgü, kwa ꞊dhegblü ˗nu ˗wo wo ˗de ˗baa ˗bɔyibhaasü ˗bha ˗kɔ ˗kë ꞊dhɛ?
˗Ka Wlɔmö 12:2 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Pë ˈbhaa ˈö Biblö ˗ya pö ˈö ˈbhaa ˈdhaŋ˗ bho ˗a ˈˈdhiʋ̈ ˗së ˈka ˗yö ˗dhö ˗ee, ɛɛnˈˈ ü ü ˗de dhɛɛˈˈ ˈkpɔ ˗ni ˈgü ꞊dhɛ Zoova ˗bha ꞊Gbɛkiö ˗nu ˗wo gagade ˗pö ˗ee?
꞊Ya kë ꞊dhɛ ˗yö ˈˈdhʋ̈, ˈmën ˈü ꞊mɔɔn˗ ˗bha ˈü˗ ˗kë?
5. ˗Bhö ˈto ˗a ˈˈgbɩɩ˗ ˈka mɛn ˗gɛn ꞊nënŋ ˗wɔn ˗nu ˗ta kö ˈü bɔ ˈˈyi ꞊bhaa.
꞊Ya kë ꞊shiö, mɛn ˗nu ˈwo wo ˗de nu Zoova ˗dhɛ kö ˈwo bɔ ˈˈyi ꞊bhaa bhë, ˈwɔn ˈˈgbɩɩ˗ ˗nu ˗wo ˗nu ˗an ˗ta. ˗Kaa VIDEO ˗ga, kö ˈka˗ ˈwɔnzuan do dɔ. ˈKa ka bo kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
ˈWɔn ˈˈgbɩɩ˗ ˗nu ˗mɛɛn ˈö Naranʒerɛlö ˗yö to ˗a ˈˈgbɩɩ˗ ˈka ˗an ˗ta kö ˗yö Zoova ˗dhɔkë?
Zoova ˗dhɔ ˗ya ˗takun ˗kɔ ˗kë ꞊dhɛ ˈö to ˗a ˈˈgbɩɩ˗ ˈka ˈwɔn ˗nu ˈwo bhë ˗an ˗ta?
˗Ka Proverbes 29:25 waa 2 Timote 1:7 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Mën ˈö ꞊faan nu kwa ˗dhɛ ˈö ˈkwa bɔ ˈwɔn ˈˈgbɩɩ˗ ˗nu ˈgü?
6. Ü ˗zo yö Zoova ˗dhɛ.
Zoova ˗yö kwa ˗takun kö pë ˈö˗ ˗dhɛ ˗së ˈkwa˗ kë. ˗Kaa VIDEO ˗ga, kö dhɛɛˈˈ ˗nu ˈwo ˈˈshia bhë ˈka ˗an ˗yɔ mɛɛnˈˈ.
Video ˈö bhë ˗a ˈgü, ˈmën ˈö Biblö draanmɛn ˈö bhë ˗a ˗gɛn ꞊nënŋ ˗bɔyibhaasü ˗bha?
˗Mën ˈö˗ ˗takun ˈö˗ ˗bha ˗zo ˗yö Zoova ˗dhɛ ˗sü ˗gɛn ˗yö ˗gban?
˗Ka Isaïe 41:10, 13 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö ü dua ˈdhö ˗mü kö ü zuʋ̈ˈˈ ˗yö kë ˗saa ꞊dhɛ ü ˗wo ˈü ˗dho ˗a ˗bhö ü ˗bɔ ˈˈyi ꞊bhaa ˈˈtʋ̈ŋ ˈka bhë, ü ˗dho ˈto ˗a ˗ta?
7. Ü ˗bha Zoova ˈˈnuɛ bho ˗sü ˗dhɔ ˗dadhiʋ̈ ü ˗dhɔ ˈö˗ ˗kë bhë ˗a ˗wɔn ˈgü.
˗Kɔ ˈö ü ˗dhɔ ˗yö Zoova ˗kë ˗a ˈka, ü ü ˗zota ˗ni ˗a ˈgü ˗kplawo, ˗a ˈˈnuɛ bho ˗sü ˗dhɔ ˗dho ˗dadhiʋ̈ ü zuʋ̈ˈˈ ˈgü, ˈö ü zuʋ̈ˈˈ ˗yö bhɔ ˗a ˗dhɔkësü ˗bha. ˗Ka Psaume 40:5 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Zoova ˗bha ˈdhuëë˗ ˗nu ˗mɛɛn ˈö ˗an ˗dhɔ ˗yö ü ˗kë ꞊dedewo?
Zoova waa ö ˈˈDhiwo ˗an ˗dhɔ ˗yö ˗kun ˗a ˗wodhiʋ̈lomɛn Zedhemi kë ˗ni ˈgü ꞊dedewo, ˈö Zoova ˈtɔ ˗bha ˗kë ˗a ˗bha ˗sü ˗yö kun ˗a ˗dhɛ ꞊bhlëësü. ˗Ya ˗pö: «ˈAa ˗Zlan ˗Gblüdë Zoova, ü ˗wo ˗yö n zuʋ̈ˈˈ ˈˈgblü ˗dhi ꞊dedewo, ˗a ˗gɛn ˗mü ꞊dhɛ ü ˈtɔ ˗yö n ˗bha.» (Jérémie 15:16) ˗Ka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˗kë ˈö ˗kë Zoova ˗bha ꞊Gbɛkiö ˈka ˗sü ˈdhö ꞊bhlëëwɔn ꞊dede ˈka?
Ü˗ ˈˈpiʋ̈ ˈü bɔ ˈˈyi ꞊bhaa kö ˈü kë Zoova ˗bha ꞊Gbɛkiö ˈka ˗ee?
ˈWɔn ˈbhaa ˗ya ü ˗gɛn ꞊nënŋ ˗a ˗kë ˈˈdhʋ̈ ˗sü ˗bha ˗ee?
Ü ˗bha ˈgü, ˈmën ü dua ˈdhö ˗mü ˈü˗ kë kö ˈü bɔ ˈˈyi ꞊bhaa?
MƐN ˈBHAA ˗NU ˗WA ˗PÖ: «˗Bɔyibhaasü ˈö bhë trʋʋˈˈ ˗kë ˗a ˈka ˗wɔn ˈyaa ˗mü, n ˗man ˈgü n ˗kɔ ˈyaa ˗mɔn ˗a ˗bha.»
˗Yö ü ˈgü ˈˈdhʋ̈ ˈpö ˗ee?
˗A ˈDHƐ TO KWA ˈˈƝAAN
Zoova ꞊mɔɔn˗ ˗bha ˈö ü ˗takun kö ˈwɔn ˗nu ˈwo mɛn ˗gɛn ꞊nënŋ ˗bɔyibhaasü ˗bha bhë ü ˗kɔ ˗yö ʒiö ˗an ˗gɔ, kö ˈü bɔ ˈˈyi ꞊bhaa.
˗Zobuödhe
Ü dua ˗mü kö ˈü ˈwɔn ꞊gban ˈˈpɛpɛ ˈwo Biblö ˈgü ˗an dɔ kö ˈü ꞊kun bɔ ˈˈyi ꞊bhaa ˗ee?
˗A ˈbhaa ˗ya kë kö ˗mën ˈö˗ ˈˈɲanbhɔ ˗wɔn ˗ya ˈto ü ˗bha ü ˗bha ˗tosɛta ˈgü kö ˈü bɔ ˈˈyi ꞊bhaa?
- ˈMën ˗kë ˈö ü dua ˈyaa ˗mü kö ˈˈsuʋ̈ ˗yö ü kë ˗bɔyibhaasü ˗gɔ, kö ü ˈgü ˗yö ga?
˗AN ˗GA ˈPÖ
Pë ˈö ˗dho ü ꞊faanmën ˗bɔyibhaasü ˗bha ˗a ˗ga.
«ˈBha ˗mɔn ˗bɔyibhaasü ˗bha ˗ee?» (˗Kwɛ 2020 Masö ˗bha ˈˈGlaadhiʋ̈ ˗tɔn)
Pë ˈbhaa ˗nu ˈwo mɛn ˈgü ga ˗bɔyibhaasü ˗bha, ˗kɔ ˈü ˗dho ˈto ˗a ˈˈgbɩɩ˗ ˈka ˗an ˗ta, ˗a ˗ga.
«˗Mën ˈö˗ ˗wɔn ˗ya ˈto kö ˈa bɔ ˈˈyi ꞊bhaa?» (˗Kwɛ 2019 Masö ˗bha ˈˈGlaadhiʋ̈ ˗tɔn)
ˈWɔn ˈbhaa ˗nu ˈö gɔndënën do ˗yö ö ˈgü dɔ ˈˈgbɩɩ˗ ˈö ˗kan ˗an ˗bha kö ˈö bɔ ˈˈyi ꞊bhaa, ˗an ˗ga.
Pë ˈö gɔndënën do ˗takun ˈö˗ yö ꞊dhɛ ö dua ˗mü kö ˈö bɔ ˈˈyi ꞊bhaa ˈˈvaandhö, ˗a ˗ga.
˗A ˗dhɛ ˗mü kö ˗wo ꞊bhlëë suu ˈö ˈˈdhʋ̈ ˗a ˗ya n ˗man ˗ee? (7:21)