ˈWƆN ˗GƆ 53
Trʋʋˈˈ ˗nu ˈö ˈwo Zoova ˗dhɛ ˗së
Zoova ˈnën ˗tɔ «zuʋ̈gblüdhi ˗Zlan.» (1 Timote 1:11, NWT) ˗Ya ˈˈpiʋ̈ kö ˈkwa kë zuʋ̈gblüdhi ˈgü, kö ˈkwa ˗tosɛta din yö. Kö ˈkwa ˈˈtʋ̈ŋ ˗nu ˈsü ˈkwa kwa ˈˈteepa, kö ˈkwa trʋʋˈˈ ˗nu kë, ˗yö ˗kë ˗a ˗dhɛ ˗së. ˗Kɔ ˈö ˈkwa ˗dho trʋʋˈˈ kë ˗a ˈka kö kwa zuʋ̈ˈˈ ꞊nii ˗yö ˗da, kö ˗yö kë ˈpö Zoova ˗dhɛ ˗së, kwa ˗dho ˗a yö ˈwɔn ˗gɔ ˈö yö ˗a ˈgü.
1. ˈKwa˗ pö ˈkwa trʋʋˈˈ ˈbha kë, ˗mën ˈö ˈkwa ˗dho kwa ˗zota ˗a ˈgü ˗blɛɛsü?
Trʋʋˈˈ suu ˗mɛɛn ˈö˗ kë ˗dhɔ ˗yö ü ˗kë? Pë ˈö˗ ˗dhɔ mɛn ˈbhaa ˗nu ˗kë ˈyö ˗tɔ ˗to ˈkɔɔ ˗sü ˈö ˈwo ˈsëëdhɛ ˗wo pö, ˈö ˈwo wo ˈˈtʋ to ˈˈtan ˗bha, ˈö ˈwo video ˗ga ɛɛnˈˈ ˈö ˈwo dho ɛntɛnɛtö ˗ta. Mɛn ˈbhaa ˗nu ˗de ˈpö trʋʋˈˈ ˗nu ˈwo ˗kë ꞊dhɛ ˗glü ˈˈblüblü ˗sü, ˈˈyikësü ɛɛnˈˈ ꞊balɔn ˗zuö ˗sü ˈdhö bhë, ˗a ˗kë wo ˈˈtɛɛbɔ ˗nu ˈˈpiʋ̈ ˗sü ˗dhɔ ˗yö ˗an ˗kë. ˈˈKɛɛ ˗yö ˗kë trʋʋˈˈ ˗suu ˈˈoo ˗su ˈka ˈö˗ ˗dhɔ ˗yö kwa ˗kë, ˗kwa kwa ˗zota ˗a ˈgü ˗së ˈka kö ꞊ya kë ꞊dhɛ ˗a ‹ˈˈdhia ˗dho ˈma kwa Dëmɛ ˈgü› ˈkwa˗ ˈwɔn dɔ. (Efɛzö 5:10) Kwa dua ˗mü ˈkwa˗ kë ˈˈdhʋ̈ ˈyö ˗tɔ ꞊dhɛ trʋʋˈˈ ˗nu ˈwo ꞊dɛɛ ˗an ꞊vadhɛ ˗wo mɛn ꞊faanmën pë ˗nu ˈö ˗an ˗san ˗yö Zoova ˗kë ˗an ˗bha. Pë ˗nu ˈwo ˈˈdhʋ̈ ˗an ˈbhaa ˗nu ˈnën ˈwo ˗tɔ ˈˈvaanvandhɛ, ˈˈɲangüyaa kë ˗sü waa dükësü ˗nu. (Psaume 11:5 ˗wo pö.) ˗Mën ˈö ˗dho kwa ˗takun kö ˈkwa kwa ˗kɔ ˈˈyɛ trʋʋˈˈ ˈö ˗së ˗a ˗bha?
Kö ˈkwa ꞊nënŋ mɛn ˗nu ˈö Zoova ˗dhɔ ˗yö ˗an ˗kë ˗an ˗bha, ˗wo ˗dho kwa ꞊faanmën ˈwɔn ˗së ˗bha, ˈö ˈwo kwa ˗takun ˈö ˈkwa kwa ˗kɔ ˗yɛ trʋʋˈˈ ˗së ˗nu ˗bha. Kwa˗ ˗yö ˈwɔn ˗gɔ 48 ˈgü ꞊dhɛ «ˈmɛn ˈö waa mɛn ꞊kpɔɔsü ˈwo ˈˈta sü, ˗yö ˗dho kë ꞊kpɔɔsü.» ˈˈKɛɛ mɛn ˈö ꞊nënŋ mɛn ˗nu ˈö Zoova ˗bha ˈtɔŋ˗ ˗nu ˗dhɔ ˈyaa ˗an kë ˗an ˗bha, «˗yö ˗dho ˈwɔn ꞊slɔɔ ˗a ˈgü.»—Proverbes 13:20.
2. ˈMën ˗kë ˈö kwa dua ˈdhö ˗mü kö ˈˈtʋ̈ŋ ˈö ˈkwa˗ sü ˈö ˈkwa trʋʋˈˈ ˗kë ˗a ˈka, ˈkwa kwa ˗zoto ˗a ˈˈpiʋ̈ ˗së ˈka?
ˈKö ˗kë ꞊dhɛ trʋʋˈˈ ˈö ˈkwa kwa ˗kɔ ˗yɛ ˗a ˗bha kö ˈkwa˗ kë ˗yö Zoova ˗dhɛ ˗së, kwa dua ˈyaa ˗mü kö ˈkwa ˈˈtʋ̈ŋ ꞊gban ˈto ˗a kë ˗sü ˗bha. Kö ˈkwa ˈto ˗a kë ˗sü ˗bha, kwa ˈti ˗dho ˈˈtʋ̈ŋ ꞊slɔɔ kö ˈkwa ˈwɔn ˗nu ˈwo ꞊bhlëësü ꞊dedewo ˗an kë. Biblö ˗yö kwa ꞊faanmën kö ˈkwa ‹ˈwɔn ˗së ꞊dede kë [kwa ˗bha] ˈˈtʋ̈ng› ˈka.—Efɛzö 5:15, 16 ˗wo pö.
˗KAA ˈˈPIƲ̈ ˈPƆN
˗Kɔ ˈö ˈkwa ˗dho kwa ˗kɔ ˈˈyɛ ˗a ˈka trʋʋˈˈ ˗së ˗nu ˗bha, ˗kwaa ˗ga.
3. ˗Kwa ˈˈkan trʋʋˈˈ yaa ˗nu ˗bha.
ˈMën ˗kë ˈö kwa dua ˈdhö ˗mü kö ˈkwa kwa ˗kɔ ˈˈyɛ trʋʋˈˈ ˈö ˈkwa ˗dho ˗a kë ˗a ˗bha kwa ˈsuaan˗ ˈka? ? ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
ˈˈDhinaan trʋʋˈˈ ˈö ˈˈsɔdha ˗nu ˗wo kun ˗a kë ˗ni Wlɔmö ˈˈsɛ ˈgü ꞊kwɛŋzü bhë waa trʋʋˈˈ ˈbhaa ˗nu ˈwo ꞊dɛɛ ˗wo do ˗kɔ ˗kë ꞊dhɛ?
Video ˈö bhë ˗a ˈgü, ˗gleŋ ˗mɛɛn ˈö Dan ˗ya sü trʋʋˈˈ ˗nu ˗bha?
˗Ka Wlɔmö 12:9 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Biblö ˈˈɲan ˈö bhë ˗yö ˗dho ü ˗takun ˗kɔ ˗kë ꞊dhɛ kö ˈü ü ˗kɔ ˈˈyɛ trʋʋˈˈ ˗së ˗bha?
˗Mën ˗nu ˈö ˗an ˗san ˗yö Zoova ˗kë? ˗Ka Proverbes 6:16, 17 waa Gadhatö 5:19-21 ˗an ˗wo pö. ˈKa ka bo ˗a Biblö ˈˈɲan ˗dhɛ ˈö ˈdhö ˗a ˗wo pö ˗sü ˈka kö ˈka dhɛɛˈˈ ˈö yö ˗a ˗yɔ mɛɛnˈˈ:
Pë ˗nu ˈö Biblö ˈˈɲan ˗nu ˈwo bhë ˈwo ˗we ˗an ˈka bhë, ˗an ˗mɛɛn ˗nu ˈö ˈkwa ˗an yö trʋʋˈˈ ˗nu ˈgü ꞊dɛɛ?
ˈKwa˗ pö ˈkwa kwa ˗kɔ ˈˈyɛ trʋʋˈˈ ˗së ˗nu ˗bha...
˗kwa kwa ˗de dhɛɛˈˈ ˈkpɔ ꞊dhɛ:
Trʋʋˈˈ ˈö yö, pë ˈö˗ ˗san ˗yö Zoova ˗kë ˈyaa˗ ˈgü ˗ee?
˗Yö ˗dho n ˗man ˈwɔn ꞊bhlëësü ˗nu kë ˗sü ˈˈtʋ̈ŋ ꞊gban ˈkun n ˗gɔ ˗ee?
˗Yö ˗dho ˗a kë ˈa ꞊nënŋ mɛn ˗nu ˈö Zoova ˗dhɔ ˈyaa ˗an kë ˗an ˗bha ˗ee?
Mɛn ˈö ˈbhaa˗ ˈˈpiʋ̈ pë yaa ˗yö kë ü ˈka, ü dua ˗mü ˈü ˈˈdhʋ ˈwɔn yaa ˈka ꞊gblɛɛn. ˈDhɛ ˈö ˈˈdhʋ̈, trʋʋˈˈ ˈö ˈkwa˗ yö ꞊dhɛ ˗yö ꞊mɔɔn˗ ˗bha ˈö pë yaa ˗kë kwa ˈka, kwa dua ˗mü kö ˈkwa ˈˈkan ˗a ˗bha.
4. ˈBha ˗dho ü ˗bha ˈˈtʋ̈ŋ shiʋ̈˗.
˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
ˈKö ˗kë ꞊dhɛ kwa ꞊dhegblü ˈö video bhë ˗a ˈgü pë ˗nu ˈö kun ˗an ˗ga ˗ni ˈgü ˈwaa kun ˈyaa˗, ˗mën ˈö kun ˗a ˗gɔ ˈwɔn ˈka?
˗Ka Fidhipö 1:10 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Biblö ˈˈɲan ˈö bhë ˗yö ˗dho kwa ˗takun ˗kɔ ˗kë ꞊dhɛ kö ˈˈtʋ̈ŋ ˈö ˈkwa ˗dho ˗a kë trʋʋkësü ˗bha kö ˈkwa˗ dɔ?
5. ˗Kwa kwa ˗kɔ ˈˈyɛ trʋʋˈˈ ˗së ˗nu ˗bha.
Trʋʋˈˈ ˈbhaa ˗nu ˈwaa Zoova ˗dhɛ ˗së, ˈˈkɛɛ ˗a ꞊vadhɛ ˈwo˗ ˗dhɛ ˗së ˗wo ˗dhö. ˗Ka Ecclésiaste 8:15 waa Fidhipö 4:8 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Trʋʋˈˈ ˗mɛɛn ˈö Zoova ˗dhɛ ˗së ˈö˗ ˗dhɔ ˗yö ü ˗kë?
Trʋʋˈˈ ˗së ꞊va ˈü ꞊mɔɔn˗ ˗bha ˈü ˗an kë ˗wo ˗dhö.
MƐN ˈBHAA ˗NU ˗WA ˗PÖ: «Trʋʋˈˈ ˗nu ˈö ˈˈvaanvandhɛ, ˈˈɲangüyaa ɛɛnˈˈ dükësü ˈdhö ˗an ˈgü, ˈwaa ˈya˗. ˗A ˈdhɛ ˈya˗ ˈyö ˗tɔ bhi ꞊dede ˈwɔn ˗nu ˈwo ˈˈdhʋ̈ ˗an kë ˗sü.»
Mɛn ˈö˗ pö ˈˈdhʋ̈ ü ˗dho ˗a pö ˗a ˗dhɛ ꞊dhɛ?
˗A ˈDHƐ TO KWA ˈˈƝAAN
Zoova ˗ya ˈˈpiʋ̈ kö ˈkwa kwa ˗kɔ ˈˈyɛ trʋʋˈˈ ˗nu ˈö ˈwo ˗dho kwa zuʋ̈ˈˈ ꞊nii ˗da ˈˈkɛɛ ˈö ˈwo ˗së ˗an ˗bha.
˗Zobuödhe
Trʋʋˈˈ suu ˗mɛɛn ˗nu ˈö kletiɛn ˗nu dua ˈdhö ˗mü kö ˗wo ˈˈkan ˗an ˗bha?
ˈMën ˗kë ˈö kwa dua ˈdhö ˗mü kö ˈˈtʋ̈ŋ ˈö ˈkwa˗ ˗kë trʋʋkësü ˗bha ˈkwa kwa ˗zoto ˗a ˈˈpiʋ̈?
ˈMën ˗kë ˈü˗ ˈˈpiʋ̈ kö trʋʋˈˈ ˗nu ˈü ˗dho ˗an kë ˗wo kë Zoova ˗dhɛ ˗së?
˗AN ˗GA ˈPÖ
Mɛn ˈˈwɛɛ ꞊mɔɔn˗ ˗bha ˈö ö ˗kɔ ˈˈyɛ trʋʋˈˈ ˈö ˈkwa ˗dho ˗a kë ˗a ˗bha kwa ˗bhaa ˈka ˗ee? ˗A ˗yɔ ˗ga.
˗Gleŋ ˗nu ˈwo ˗dho ü ˗takun kö ˈü ü ˗kɔ ˈˈyɛ trʋʋˈˈ ˗së ˗nu ˗bha, ˗an ˗ga.
«Trʋʋˈˈ ˗nu ˈü ˗an ˗kë ˗wo ˗së ˗ee?» (˗Kwɛ 2011 Ɔtɔblö 15 ˗bha ˈˈGlaadhiʋ̈ ˗tɔn)
˗Kɔ ˈö gɔndënën do ˗yö ˗kan˗a ˈka trʋʋˈˈ yaa ˗nu ˗bha, ˗a ˗ga ˗a ˗bha ˗kwɛzlan ˈö˗ ˗gɔ ˗kë «A ˗dho ˗ʒiaanwo ˈa ˗kan ˈˈkwi ˗nu ˗san zë ˗sü ˗bha» ˈka bhë ˗a ˈgü.
«Biblö ˗yö mɛn ˗bha ˗tosɛta ˗bho ˈˈgblʋʋ» (˗Kwɛ 2010 Fevlie 1 ˗bha ˈˈGlaadhiʋ̈ ˗tɔn)
ˈDhɛ ˈö dhebɔ do ˗ya yö ꞊dhɛ fimö ˈö˗ ˗ga ˗ni ˈgü dü ˗ya ˈgü, pë ˈö˗ ˗kë ˗a ˗ga.