ˈWƆN ˗GƆ 55
Ü ˗bha ˗zlanwokɔdhi ˗takun
ˈˈKpɔnŋtaadhɛ ˗todhʋ̈sü ˈgü, Zoova ˗dhɔkëmɛn ˗nu ˈö ˈwo ˗mɔn mɛn ˈˈmliɲɔn ꞊va ꞊dede ˗bha, ˗wo Zoova ˗dhɔkë ˗an ˗bha ˗zlanwokɔdhi ˈˈgblü ꞊va ˈgü. ˗An ꞊klaŋkësü waa ˗an ˗kiansü ˈö ˗an ˗bha ˗zlanwokɔdhi ˗nu ˈwo bhë ˗an ˈgü, ˗yö ˗an zuʋ̈ˈˈ ꞊nii ˗da ꞊dedewo, ˈö wo ˗de ˈpö ˈwo wo ˗kɔ ˗ya ˗zlanwokɔdhi ˗nu ˈwo bhë ˗an ˗gɔ ˗kɔ ꞊va ˗ta. Ü zuʋ̈ˈˈ ꞊nii ˈyaa ˗da ˗sü ˈka ˈpö ü ˗bha ˗zlanwokɔdhi ˈgü ˗ee?
1. Ü ˗dho ü ˗bha ˈˈtʋ̈ŋ waa ü ꞊faan ˗an ˈsü kö ˈü ü ˗bha ˗zlanwokɔdhi ˗takun ˗kɔ ˗kë ꞊dhɛ?
Mɛn ꞊gban ˈˈpɛpɛ kwa ꞊mɔɔn˗ ˗bha ˈkwa kwa ˗bha ˗zlanwokɔdhi ˗takun. ˗A ˈwɔnzuan ˈnën ˗tɔ, kwa ꞊dhegblü ˗nu ˈö ˗wa kë zii ɛɛnˈˈ ˈwo ꞊niɔɔnsü ˈka, ˗wa kë ü ˗bha ˗zlanwokɔdhi ˈgü, ü ꞊mɔɔn˗ ˗bha ˈü ˗an ˗takun kö ˗wo nu ˗bhɔkwëë ˗nu ˗ta. Ü ꞊mɔɔn˗ ˗bha ˈzü ˈü ˗an ˗takun ˗kɔ ˈˈwɛɛ ˗ta, ˈü dho ˗an ˗bha pë ˗nu ˈdhɔ ɛɛnˈˈ ˈü ˗an ˗bha ˈkɔɔdhɛ ˗nu ˗zu. (Zakö 1:27 ˗wo pö.) Kwa ꞊mɔɔn˗ ˗bha ˈpö ˈö ˈkwa kwa ˗kɔ ˗da kwa ˗bha ˗zlanwokɔ baasü waa˗ ˗kunsësü ˗nu ˈgü. ˈWaa kwa ˈˈgbɩɩdhɛ bho ˈwɔn ˗nu ˈwo bhë ˗an kë ˗sü ˗bha. Zoova waa kwa ꞊dhegblü ˗nu ˗dhɔ ˈnën ˈö kwa ˗blü ˈyö «[ˈkwa kwa] ˗de ˗nu ˈˈwɛɛwɛ» ˈö ˈkwa˗ ˗kë ˈˈdhʋ̈.—Psaume 110:3.
Mɛn ˗nu ˈö ˗wa bɔ ˈˈyi ꞊bhaa, ˗wo ꞊mɔɔn˗ ˗bha ˈwo ˗zlanwokɔdhi ˗takun ˈzü ˗kɔ ˈˈwɛɛ ˈbhaa ˈgü. Kwa ꞊dhegblü gɔɔn˗ ˗nu ˈö ˗wa ˗kian, ˗wo ꞊mɔɔn˗ ˗bha ˈö ˈwo ˗kë mɛn zii ˗kɔ ꞊löö ˈka, ˈö ˗an ˗gɛn ˗ya ˈdho ˈˈdhiʋ̈ ˈzü ˈö ˈwo ˗kë mɛn zii ˈka. Kwa ꞊dhegblü gɔɔn˗ ˗nu waa˗ dhoŋ ˗nu ˗wo ꞊mɔɔn˗ ˗bha ˈö ˈwo ˗kë ˗yödhiʋ̈ ˈka ˈö ˈwo wo ˗bha ˗zlanwopösü ˗dadhiʋ̈. ˗A mɛn ˈbhaa ˗nu ˗wo wo ˗kɔ ˗da ˗zlanwokɔ dɔ ˗yö ˗nu ˈgü, ˈö˗ mɛn ˈbhaa ˗nu ˗wo dho ˈwo ˗ya ˈˈsɛ ˈˈwɛɛ ˗nu ˈgü kö ˈwo ˗zlanwokɔdhi ˗nu ˈö ˗an ˗bhawɔn ˈdhö ˗takundhe ˗bha ˗an ˗takun.
2. Kwa ˗dho ˗zlanwokɔdhi ˗takun kwa ˗bha ˈwëëga waa kwa ˗bha ꞊nɔɔn ˗kwɛɛ ˗nu ˈka ˗kɔ ˗kë ꞊dhɛ?
Biblö ˗yö kwa ꞊faanmën kö ˈkwa ‹Zoova ˈtɔ bhɔ kwa ˗bha pë ꞊bhlëësü ˗nu ˈka.› (Proverbes 3:9) Kwa ˗bha ˈwëëga ɛɛnˈˈ pë ˈˈwɛɛ ˈbhaa ˈsü ˗sü kö ˈkwa kwa ˗bha ˗zlanwokɔdhi ˗takun ɛɛnˈˈ kö ˈkwa kwa ˗kɔ ˗da ˗zlanwopö ˗yö ˈö ˈˈkpɔnŋtaadhɛ ˗todhʋ̈sü ˈgü ˗a ˗dhɛ ˗bhë, ꞊bhlëëwɔn ꞊dede ˗mü kwa ˗bha ˈka. (2 Kodhɛngtö 9:7 ˗wo pö.) ˈWɔn ˈˈgbɩɩ˗ ˗nu ˗wa kë, gbɔɔdhe ˗nu ˈö ˈkwa ˗an ˗kë, ˈyö ˈwo ˗an sü ˈö ˈwo kwa ꞊dhegblü ˗nu ˗takun ˗an ˈka. Mɛn ˈbhaa ˗nu ˗wo pë ˈbhaa ˗nu ˗ya ˗de ˗ta ɛɛnˈˈ wo ˗kɔ ˈˈsuee kö ˈwo˗ gbɔɔ. (1 Kodhɛngtö 16:2 ˗wo pö.) ꞊Ya kë ˈˈdhʋ̈ ˗wo ꞊mɔɔn˗ ˗bha ˈwo˗ ˗da ˈˈkɩsʋ ˈgü ˗zlanwokɔɔdhö ɛɛnˈˈ ˈwo dho ɛntɛnɛtö ˈˈnimlɔn donate.jw.org ˗ta ˈö ˈwo˗ gbɔɔdhe ˗kë mü. Kwa ˗kɔ ˗da Zoova ˗bha yö ˗dhɛ ˗sü ˈö kwa ˗bha ꞊nɔɔn ˗kwɛɛ ˗nu ˈka bhë, ˗ya ˗zɔn ꞊dhɛ Zoova ˗dhɔ ˗yö kwa ˗kë.
˗KAA ˈˈPIƲ̈ ˈPƆN
˗Kɔ ˈö ˈkwa ꞊mɔɔn˗ ˗bha ˈkwa ˗zlanwokɔdhi ˗takun ˗a ˈka, ˗kwaa ˈbhaa ˗nu ˗ga.
3. Kwa ꞊mɔɔn˗ ˗bha ˈö ˈkwa gbɔɔdhe ˗nu ˗kë kwa ˗bha ꞊nɔɔn ˗kwɛɛ ˗nu ˈka.
Mɛn ˈö gbɔɔdhe ˗kë zuʋ̈niidadhe ˈka, ˗a ˗dhɔ ˗yö Zoova waa Yesu ˗an ˗kë. ˗A ˈwɔnzuan ˈnën ˈtɔ˗ ꞊gɛɛndhe ˈˈflɛɛsü do ˈö ö ˈgü dɔ ˈˈgbɩɩ˗ ˈö gbɔɔdhe ˗kë, Yesu ˗ya ˗wɔn ˗së ˗blɛɛ. ˗Ka Dhukö 21:1-4 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Mɛn ˈö ˈwëëga ꞊va gbɔɔ ˗zlanwokɔɔdhö yö ˈnën ˈö˗ ˗dhɔ ˗yö Zoova ˗kë ˗ee?
Kö ˈkwa gbɔɔdhe kë zuʋ̈gblüdhi ˈka, ˗yö ˗kë Zoova waa Yesu ˗an ˗dhɛ ˗kɔ ˗kë ꞊dhɛ?
ˈKwa gbɔɔdhe kë, ˈpë ˈwo˗ ˗kë ˗a ˈka, ˗kaa VIDEO ˗ga. ˈKa ka bo kö ˈka dhɛɛˈˈ ˈö ˈˈshia bhë ˗a ˗yɔ mɛɛnˈˈ.
ˈWɔn ˗së ˗mɛɛn ˈö kwa ˗bha gbɔɔdhe ˗nu ˗wa ˗kë ˗zlanwokɔdhi ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ˗dhɛ?
4. Kwa ꞊mɔɔn˗ ˗bha ˈkwa kwa ˗de nu yö ˈbhaa ˗nu kë ˗sü ˗dhɛ.
Biblö ˗ya ˈˈtʋ̈ŋ ˈgü ꞊kwɛŋzü, Zoova ˗dhɔkëmɛn ˗nu ˗wo gbɔɔdhe ˗kë, ˈˈkɛɛ ˗wo wo ˈgü ˗dɔ ˈˈgbɩɩ˗ ˈö ˈwo wo ˗bha ˗zlandhɔkëdhɛ ˗nu kun ˗së. ˗Ka 2 Chroniques 34:9-11 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Izraɛdhömɛn ˗dhɛ ˈö ˈdhö, ˗yö ö ˗kɔ ˗da wo ˗bha ˗Zlan ˗dhɔkë ˗a ˈgü ˗kɔ baasü ˈgü ˗kɔ ˗kë ꞊dhɛ?
˗Kɔ ˈö Zoova ˗dhɔkëmɛn ˗nu ˈwo ꞊dɛɛ ˗wo to ˗an ˗bha ˈwɔnzuan ˈˈpiʋ̈ ˗a ˈka, ˗kaa VIDEO ˗ga. ˈKa ka bo, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ:
ˈMën ˗kë ˈö kwa ˗bha ˗bhɔkwëëkëgükɔ dua ˈdhö ˗mü kö ˗yö kë ˈˈpuu ˈˈslʋ̈ʋ̈slʋ̈, kö ˗yö kë ˗tiaandhö?
Ü ꞊mɔɔn˗ ˗bha ˈü ˗zlanwokɔdhi ˗takun ˗kɔ ˗kë ꞊dhɛ?
5. Gɔɔn˗ ˗nu ˗bha ˗zlanwokɔdhi ˗takun ˗sü
Biblö ˗yö kwa ꞊dhegblü gɔɔn˗ ˗nu ꞊faanmën kö ˗an ˗gɛn ˗yö ˈdho ˈˈdhiʋ̈ kö ˗wo ˗zlanwokɔdhi ˗takun. ˗Kaa ˈwɔnzuan do VIDEO ˗ga. ˈKa ka bo kö ˈka dhɛɛˈˈ ˈö ˈˈshia bhë ˗a ˗yɔ mɛɛnˈˈ.
Video ˈö bhë ˗a ˈgü, ˗mën ˈö Rayanö ˗ya ˗kë kö ˗a ˗gɛn ˗yö ˈdho ˈˈdhiʋ̈ kö ˗yö ˗zlanwokɔdhi ˗takun ꞊dedewo?
Pë ˈö kwa ꞊dhegblü gɔɔn˗ ˗nu ꞊waa˗ kë ˈö ˈwo ˗kë mɛn zii ˗kɔ ꞊löö ɛɛnˈˈ mɛn zii ˈka, Biblö ˗ya ˗zɔn. ˗Ka 1 Timote 3:1-13 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Kwa ꞊dhegblü ˈö˗ ˈˈpiʋ̈ kö ˈö kë mɛn zii ɛɛnˈˈ mɛn zii ˗kɔ ꞊löö ˈka, ˗mën ˈö˗ dua ˈdhö ˗mü kö ˗yö ˗an kë?
˗A ˗bha ˈkɔdhi ˈgümɛn ˗nu ˈˈtakɔ dua ˗mü ˈpö kö ˗yö kë ꞊dhɛ?—˗Ka kpɔɔˈˈ ˗a ˈˈɲan ˈsɛɛn˗ 4 waa˗ 11 ˗bha.
Kö kwa ꞊dhegblü gɔɔn˗ ˗nu ˗wo wo ˈgü dɔ ˈˈgbɩɩ˗ kö ˗an ˗gɛn ˗yö ˈdho ˈˈdhiʋ̈ ˈˈklʋʋsë ˗nu ˈwo bhë ˗an ˈgü,˗zlanwokɔdhi ˈgümɛn ˗nu ˈˈpɛpɛ ˗wa ꞊trɔɔn ˗slɔɔ ˗kɔ ˗kë ꞊dhɛ?
MƐN ˈBHA˗ ꞊MƆƆN˗ ˗BHA ˈÖ Ü DHƐƐˈˈ KPƆ ꞊DHƐ: «Zoova ˗bha ꞊Gbɛkiö ˗nu, ˈwëëga ˈö ˈka yö ˗nu ˗kë ˗a ˈka bhë, ka ˗go ˗a ˈka ˈˈmɛn?»
Mɛn ˈö˗ pö ˈˈdhʋ̈, ü ˗dho ˗a pö ˗a ˗dhɛ ꞊dhɛ?
˗A ˈDHƐ TO KWA ˈˈƝAAN
Kö ˈkwa kwa ˗bha ˈˈtʋ̈ŋ ˗nu, kwa ꞊faan ˗nu ɛɛnˈˈ kwa ˗bha ˈwëëga ˗nu ˈsü kö ˈkwa kwa ˗kɔ ˗da ˗a ˈka ˗zlanwokɔdhi ˗dhɛ, ˗yö ˗kë Zoova ˗dhɛ ˗së ꞊dedewo.
˗Zobuödhe
Kwa ˗dho ˗zlanwokɔdhi ˗takun kwa ˗bha ˈˈtʋ̈ŋ waa kwa ꞊faan ˗nu ˈka ˗kɔ ˗kë ꞊dhɛ?
Kwa ˗dho kwa ˗bha ˗zlanwokɔdhi ˗takun kwa ˗bha ꞊nɔɔn ˗kwɛɛ ˗nu ˈka ˗kɔ ˗kë ꞊dhɛ?
˗Kɔ ˗mɛɛn ˈü˗ ˈˈpiʋ̈ ˈü ˗zlanwokɔdhi ˗takun ˗a ˈka?
˗AN ˗GA ˈPÖ
Pë ˈö˗ ˗zɔn ꞊dhɛ ˗Zlan ˈti˗ pö ˈkwa dimö bho ꞊dɛɛ, ˗a ˗ga.
«˗Mën ˈö Biblö ˗ya pö ˈö ˗gban dimö bho ˗sü ˗bha?» (ˈWɔn ˗gɔ ˈö jw.org ˗ta)
Biblö ˗yö yö ˈbhaa ˗nu ˗dɔ kwa ꞊dhegblü gɔɔn˗ ˗nu ˈö ˗wa bɔ ˈˈyi ꞊bhaa ˗an ˗kɔ ˈka. ˈˈKɛɛ ꞊ya kë ꞊dhɛ kwa ꞊dhegblüdhe ˈö ˗ya bɔ ˈˈyi ꞊bhaa ˗a dua ˗mü kö ˗yö yö ˗nu ˈwo ˈˈdhʋ̈ ˗an kë ˗mën ˈö dho ˗a kë?
«Mɛn zii ˗nu ˗bha yö ˈnën ˗tɔ ˗mën ˗zlanwokɔdhi ˈgü?» (˗Kwɛ 2021 Fevlie ˗bha ˈˈGlaadhiʋ̈ ˗tɔn)
˗Kɔ ˈö Zoova ˗bha ꞊Gbɛkiö ˈbhaa ˗nu ˗wo wo ˈgü ˗dɔ ˗a ˈka ˈˈgbɩɩ˗ kö ˈwo ˈdho ˈsëëdhɛ ˗nu ˈka wo ꞊dhegblü ˗nu ꞊dhia, ˗a ˗ga.
Zoova ˗bha ꞊Gbɛkiö ˗nu ˗wa ˗Zlan ˗bha yökë ˗wo ˗an ꞊saa ˗bho ˗ee? ˗A ˗yɔ ˗ga.
«Zoova ˗bha ꞊Gbɛkiö ˗nu ˗wo ˗go ˈwëëga ˈka ˈˈmɛn kö ˗wo ˗Zlan ˗bha yö kë?» (ˈWɔn ˗gɔ ˈö jw.org ˗ta)