Dhɛɛˈˈ ˗nu ˈö mɛn ˗nu ˗wa kpɔ

˗A pö ˈö Davi ˗ya wo Psaume 61:8 ˈgü ꞊dhɛ ö ˗dho ˗Zlan ˈtɔ bhɔ ˈˈtʋ̈ŋ ˈˈpɛpɛ ɛɛnˈˈ ˗toëpö ˈka bhë, ˗a ˗gɛn ˈnën ˗tɔ ꞊dhɛ ˈyii ˗dho ga toŋtoŋdhö ˗ee?

˗Abin. ˗Wo ˈö Davi ˗ya pö bhë, ˗a pö ˗dhɛ ˗mü.

Pë ˈö˗ pö Biblö ˈˈɲan ˈö bhë waa ˈˈwɛɛ ˈbha ˗nu ˈgü, ˗kwaa ˗ga. ˗Ya ˗pö: «A ˗dho ü ˈtɔ bhɔ ˈˈtan bho ˈˈtʋ̈ŋ ˈˈpɛpɛ ˈka. N ˗wo ˈa˗ ˗bhö, ˗a ˗dho ˗a ˈgü ˗wɔn kë ˗dhɛkpaɔyi ꞊gban ˈˈpɛpɛ ˈka.» «ˈAa Zoova n ˗man ˗Zlan, a ˗dho ü ˈtɔ bhɔ ˗toëpö ˈka n zuʋ̈ˈˈ ꞊gban ˈˈpɛpɛ ˈka.» «A ˗dho ü ˈtɔ bhɔ ˈˈtʋ̈ŋ ꞊gban ˗tʋ̈ŋ ꞊gban ˈka.»—Ps. 61:8; 86:12; 145:1, 2.

ˈDhɛ Davi ˗yö ˗wo ˗nu ˈwo ˈˈdhʋ̈ ˗an ˗bɛnzë, ˈyaa kun ˗a pö ˗ni ˈgü ö ˗de ˗dhɛ ꞊dhɛ ö ˈti dho ga toŋtoŋdhö. ˗Ya ˈwɔn ˗dɔ ꞊dhɛ ˈdhɛ mɛnbhɩɩdhe ˗nu ˗wo ˈwɔn yaa ˗kë, Zoova ˗ya ˗pö ˗an ˗dhɛ ˗wo ˗dho ga, ˈö yöö Davi ˗mɛn ˈö kun ˈwɔnyaakëmɛn ˈka ˈpö. (ˈWun. 3:3, 17-19; Ps. 51:4, 5) ˗Ya ˈwɔn ˗dɔ ˈzü ꞊dhɛ ˗klu ˗Zlan ˗bha ˗mɛn ˗nu ˈwo ˗kë ꞊dhɛ Ablaamö, Izaakö waa Zakɔbö ˗an ˈdhö ˗wa ga, ˈö˗ yö ꞊dhɛ yö ˗de ˈpö ö ˗dho ga. (Ps. 37:25; 39:4) ˈˈKɛɛ ˗wo ˈö˗ pö Psaume 61:8 ˈgü bhë ˗ya ˗zɔn ꞊dhɛ ˗ya ˈˈpiʋ̈ kö ˈö ˗Zlan ˈtɔ bhɔ ö ˗bha ˗tosɛta ˈgü ˈˈtʋ̈ŋ ꞊gban ˈka.—2 Sam. 7:12.

˗Wo ˗nu ˈwo ˗bɛnzë ˗sü ˈka Psaumes 18; 51 waa 52 ˗gɔ ˗ta bhë, ˗wa ˗zɔn ꞊dhɛ Davi ˗kun ˈˈwɩ ˗ni ˈgü ˈwɔn ˈö yöö ꞊dede ˈö bɔ ˗an ˈgü, ˗an ˈka. Psaume 23 ˈgü, ˗ya ˗pö Zoova ˗yö ˗kë ꞊dhɛ ˗tuëë ˗maankëmɛn ˈö ˈˈdhiʋ̈sü ö ˗bha ˗tuëë ˗nu ˈka, ˈö ˗an zuʋ̈ˈˈ ˗kë ˗saa, ˈö ˗an ˗takpa, ˗a ˈdhö. ˗Tuëë ˗maankëmɛn suu ˈö Davi kun ˗a ˈka ˈyö bhë. ˗Yö ˗kun ˗a ˈˈpiʋ̈ kö ˈö ˗Zlan ˗dhɔkë «yi ꞊gban ˈka ö ˗bha ˗tosɛta ˈgü.»—Ps. 23:6.

˗Ya ˈgo mü ˈzü, kwa ˗zo ˈya ˗dho bhɔ ꞊dhɛ Zoova ˈnën Davi ˗blü ˗wo ˗nu bhë ˗an ˗bɛnzë ˗sü ˗bha. ˗Wo ˗nu ˈö ˗an ˗bɛnzë ˈˈdhʋ̈, ˗a ˈbha ˗nu ˗kun ˈwɔn ˗nu ˈwo ˗dho kë ˗dhɛkpaɔ dhiʋ̈ˈˈ ˈgü, ˗an ˈka. ˗A ˈwɔnzuan ꞊nɛn: Psaume 110 ˈgü, Davi ˗yö ˈˈtʋ̈ŋ ˈö ö Dëmɛn dho ˗ya ˗a ˈka ˗Zlan ˗kɔ ˗së ˈgü dhaŋ˗ ˈgü kö ˗yö ˗kɔmɔnwɔnbhasü ꞊slɔɔ ˗a ˈka, ˗a ˈwɔn ˗blɛɛ. ˗Ya ˗kɔmɔnwɔnbhasü ꞊slɔɔ, ˈmën dho ˗a kë? ˗Yö ˗dho ˗Zlan ˈyɔɔ˗ ˗nu ˗da ö ˗gɛn ꞊löö kö ˗yö ˗Zlan ˗bha «za dɔ ˈˈsɛgümɛn ˗nu ˗bha» ˈˈsɛ ˗ta. Davi ˗kun Yesu ˈö ˗Zlan ˗bha ˗Yamɛn ˈka, ˗a ˈˈbhɛman do ˈka. ˗Zlan ˗bha ˗Yamɛn ˈnën dho ˗Gblüdëdhɛ kë dhaŋ˗ ˈgü, ˈö ˗kë «ˈˈsaabhomɛn ˈka ˗toëpö ˈka.» (Ps. 110:1-6) Yesu ˗yö ˗wo ˈö ˗ya ˗sü Psaume 110 ˈgü bhë ˗a ˗gban ö ˗de ˗bha, ˈö˗ pö ˗yö ˗dho yökodhiʋ̈ ˗dhɛkpaɔ dhiʋ̈ˈˈ ˈgü.—Mat. 22:41-45.

Zoova ˗yö Davi ˗blü kö ˗yö ˈwɔn ˗nu ˈwo ˗kë ˗a ˗bha ˈˈtʋ̈ŋ ˈgü waa˗ ˗dhɛ ˗nu ˈwo dho kë ˗dhɛkpaɔ dhiʋ̈ˈˈ ˈgü, yi ö Davi dho ˈgo˗ ˈka ga ˈgü kö ˗yö ö ˈtɔ bhɔ ˈˈtan bho ˗toëpö ˈka bhë, ˗an ˗bɛnzë. ˗Ya kë ˈˈdhʋ̈ kö Psaume 37:10, 11, 29 ˗wo ˗gban ˈˈtʋ̈ŋ ˈwo˗ ˗bɛnzë ˗a ˈka bhë ˗a ˗bha, ˈwo ˗gban ˈpö ˈwɔn ˗nu ˈwo dho kë ˗dhɛkpaɔ dhiʋ̈ˈˈ ˈgü ˗an ˗bha. Biblö ˈˈɲan ˗nu ˈwo bhë ˗wo ˗yökodhiʋ̈ ꞊kwɛŋzü Izraɛdhö ˗sɛ ˈgü, ˈö ˈwo dho yökodhiʋ̈ ˈpö ˗dhɛkpaɔ dhiʋ̈ˈˈ ˈgü kö ˗Zlan ˗ya ö ˗zopiʋ̈wɔn kë.—Kpɔɔˈˈ ˈwɔn ˗gɔ: ‹Ü ˗dhö kë n ꞊kee˗ ꞊bhɔɔ ˈˈsɛ ˗ta› ˈö ˈˈGlaadhiʋ̈ ˗tɔn ˈö yö ˗a ˈgü bhë, ˗a ˗wo ˗bhüöö kpö 8 ˈgü.

Psaume 61:8 waa˗ ˈˈɲan ˈsɛɛn˗ ˈˈwɛɛ ˈbha ˗nu ˗wa ˗zɔn ꞊dhɛ Davi ˗kun ˗a ˈˈpiʋ̈ kö ˈö Zoova ˈtɔ bhɔ Izraɛdhö ꞊kwɛŋzü, kö ˗yö ˈdho ˗yö yö ˗a ˈka ö ga ˗yi ˗bha. ˗Wo pë ˗nu ˈö Davi dho ˗an kë ˗dhɛkpaɔ dhiʋ̈ˈˈ ˈgü kö Zoova ꞊yaa˗ bho ga ˈgü, ˗an ˗zɔn ˈpö.