Wala Hoŋ Na Toɔ̃ E Ka Popeɛloŋ Be Ho Booree Poɔŋ?

1. Ka dɔɔŋ wa maale pɔge yɛlɛ sɛre ka o ne o laŋ kpeɛrɛ, bonso aŋ na baŋ vɛŋ ka ba taa popeɛloŋ?

A duorisoŋ yi la a popeɛloŋ Naaŋmen Jehoova zie. A eɛ Jehoova boɔbo ka booree deme taa popeɛloŋ. (1 Timoti 1:11) Jehoova la da sɛgre a dɛndɛŋ kultaa na. Azuŋ, a eɛ nimizeɛ yaga zaa ka dɔɔ maale pɔge yɛlɛ sɛre kyɛ ka ba laŋ kpeɛrɛ aŋa dɔɔ neŋ pɔge. Lɛ eebo maŋ vɛŋeŋ baŋ toɔ̃ guoli ba biiri na velaa zaa. Kristabiiri seŋ ka ba tuuro bege na ba paaloŋ gɔmenante naŋ biŋ a kyaare lɛ na aŋ seŋ ka noba maŋ sɛge ba kultaa yɛlɛ eŋ a paaloŋ gɔmenante gama poɔŋ na.​—Kanne Luka 2:1, 4, 5.

Bo teɛroŋ ka Naaŋmen taa kyaare kultaa? Jehoova boɔrɔŋ ka kultaa deme maŋ laŋ kpeɛrɛ aŋa dɔɔ neŋ pɔge tegitegilɛ. Jehoova boɔrɔŋ ka dɔɔ neŋ o pɔge maŋ dire yelmennoŋ korɔ taa. (Hiburu 13:4) O ba nɔŋ ka dɔɔ neŋ o pɔge bare taa. (Maalakai 2:16) Kyɛ ka a dɔɔ bee a pɔgeŋ yi o tɔsoba na puoriŋ a te toŋ peɛ̃mo toma, lɛ yɛŋ Jehoova terɛɛ sori ka soba na naŋ ba taa sããnaa na na baŋ barɛɛ a kultaa, a kyɛ lɛ te kuli neŋyuo.​—Kanne Matio 19:3-6, 9.

2. Bo gyogo la aŋ seŋ ka dɔɔ neŋ o pɔge de taa neŋ taa?

Jehoova maalɛɛ dɔɔ neŋ pɔge ka ba sonnɔ taa a kultaa poɔŋ. (Munpiilee 2:18) A dɔɔ la a booree zusoba, azuŋ onaŋ seŋ ka o de weɛ a kaara a booree eŋgannoŋ poɔ yɛlɛ zu. Aseŋ ka o lɛ de weɛ a wulo a booree Naaŋmen yɛlɛ. Aseŋ ka a dɔɔ taa meŋɛ deterebo nɔmmo ko o pɔge na. Aseŋ ka a dɔɔ neŋ o pɔge taa nɔmmo ane gyeremɛ korɔ taa. A dɔɔ neŋ o pɔge ba pɛgeyi, azuŋ ka ba naŋ dire suuri korɔ taa, a na soŋ baŋ ka ba taa popeɛloŋ a kultaa poɔŋ.​—Kanne Efesu 4:31, 32; 5:22-25, 33; 1 Piita 3:7.

3. Ka hooŋ ba nyɛrɛ popeɛloŋ ho kultaa na poɔŋ, lɛ wuleeŋ ka aseŋ ka ho bare ho kultatɔ na bee?

Ka hooŋ tuoro yelkpeɛne ho kultaa na poɔŋ, aseŋ ka yɛ zaa bayi moɔ a maaleŋ wulo taa nɔmmo. (1 Korinti 13:4, 5) Naaŋmen Yelbiri na ba eŋnɛ kultaa deme faŋa ka, ka ba naŋ wa tuoro yelkpeɛne ba kultaa poɔŋ aseŋ ka ba wɛltaa.​—Kanne 1 Korinti 7:10-13.

4. Bibiiri, bo teɛroŋ ka Naaŋmen taa kyaare yɛ?

Jehoova boɔrɔŋ ka yɛ taa popeɛloŋ. O maŋ ko yɛŋ kawane a kyaare lɛ yɛŋ na toɔ̃ e a taa popeɛloŋ yɛ baapaaloŋ saŋa. O boɔrɔŋ ka yɛ nyɛ tɔnɔ yi yɛ dɔgreba zemmo yɛlɛ, ane yɛŋ naŋ e zuluŋ na baŋ taa na poɔŋ. (Kolosi 3:20) Jehoova boɔrɔŋ ka yɛ taa popeɛloŋ saŋa na yɛŋ tonɔ toma koroo ane o Bidɔɔ na.​—Kanne Ikilisiasitiz 11:9–12:1; Matio 19:13-15; 21:15, 16.

5. Bidɔgreba, wala yɛŋ na toɔ̃ e a soŋ yɛ biiri ka ba taa popeɛloŋ?

Aseŋ ka yɛ moɔrɔ yɛ moɔbo zaa a maŋ korɔ yɛ bibiiri bondirii, gaazie, ane bonsuurii. (1 Timoti 5:8) Kyɛ ka yɛneeŋ boɔrɔ ka yɛ biiri na taa popeɛloŋ yɛŋ, aseŋ ka yɛ wuli ba ka ba nɔnɔ Naaŋmen, a lɛ zanna yɛlɛ yire o zieŋ meŋ. (Efesu 6:4) Ka yɛneeŋ de yɛ zemmo yɛlɛ wulo ka yɛ nɔnɔ la Naaŋmen, a na tɔ la yɛ biiri na sukyie yaga zaa. Ka hooŋ maŋ de sowuli na hoŋ de korɔ ho biiri na yire neŋ a Baabole poɔŋ, a na toɔ̃ soŋ baŋ ka ba leɛre ba teɛroŋ soŋ zaa.​—Kanne Duturoonomi 6:4-7; Yeng Yelibie 22:6.

Yɛ maŋ eŋnɛ yɛ biiri na faŋa, a maŋ lɛ pugiro ba meŋ, a na soŋ baŋ yaga zaa. Aseŋ ka yɛ maŋ korɔ ba sowuli, a lɛ dɛnnɛ ba meŋ. A wuluu ŋa maŋ soŋ baŋ baŋ tage ba menne yi gyogri naŋ na baŋ sãã popeɛloŋ na baŋ taa na. (Yeng Yelibie 22:15) Kyɛ, a ba seŋ ka yɛ maŋ de nimikuonii kyɛbee potuoloŋ a dɛnnɛ neŋ yɛ biiri na.​—Kanne Kolosi 3:21.

Jehoova Sieree Deme sɛgɛɛ gama yaga naŋ na baŋ soŋ bidɔgreba ane bibiiri. A Baabole poɔŋ baŋ maŋ kaa a sɛge ana gama na zaa.​—Kanne Yieme 19:7, 11.