Bo Duorisoŋ La Bebe A Kyaare Puoruu Yɛlɛ?

1. Puoruu zaaŋ soma bee?

Noba naŋ taa sukyiri-sonne be la puoruu zaa poɔŋ. A eɛ duorisoŋ ka te baŋ ka Naaŋmen nyɛrɛɛ a noba ŋa zaa, a lɛ wuli meŋ ka o taaɛ ba yɛlɛŋ. Kyɛ, a yɛlɛ nembao zie la ka noba tu la puoruu eŋɛŋ a e yelfaare yaga. (2 Korinti 4:3, 4; 11:13-15) A yi duoro na noba naŋ maŋ moɔlɔ poɔŋ, ba maŋ yeliŋ ka puoruu mine noba maŋ de la ba menne eŋnɛ neŋko yɛlɛ ane zɔɔre poɔŋ. Ba mine meŋ maŋ sããnɛɛ bibiiri. A yɛlɛ ama maŋ vɛŋeŋ ka noba naŋ taa sagediibu Naaŋmen eŋɛŋ poore maŋ sãã yaga zaa!​—Kanne Matio 24:3-5, 11, 12.

Yelmeŋɛ puoruu maŋ korɛɛ Naaŋmen gyeremɛ, kyɛ zirii puoruu yɛŋ maŋ erɛɛ yɛlɛ naŋ ba pɛlɛ o poɔ. Zirii puoruu noba maŋ wulee yɛlɛ naŋ ba be a Baabole poɔŋ. Ba maŋ lɛ wulee yɛlɛ naŋ e zirii a kyaare Naaŋmen ane kũũni yɛlɛ. Kyɛ, Jehoova boɔrɔŋ ka noba baŋ a yelmeŋɛ a kyaaroo.​—Kanne Iziikiel 18:4; 1 Timoti 2:3-5.

2. Bo duorisoŋ la bebe a kyaare puoruu yɛlɛ?

A yɛlɛ soŋ zie la ka, noba naŋ maŋ de ba nɔɛ a yelka ba nɔŋ la Naaŋmen, a kyɛ de ba sukyie nɔŋ Setaana donɛɛ ŋa koŋ baŋ bɛnle Naaŋmen. (Gyimisi 4:4) Naaŋmen Yelbiri na boɔlɛɛ zirii puoruu zaa ka “Baabilɔŋ Kpoŋ.” Baabilɔŋ da eɛ takoreŋ saŋa teŋkpɛŋ kaŋa. A yi Noowa Kɔmpiiri na puoriŋ, beŋ ka zirii puoruu yɛlɛ piili. A koŋ kɔɔre, Naaŋmen na sãã la puoruu zaa naŋ bɛnlɛ a lɛ dɔgrɔ nensaaleba meŋ.​—Kanne Yel-iriwulaa 17:1, 2, 5, 16, 17; 18:8.

Duorisonne mine meŋ lɛ bebe. Jehoova ba inni noba naŋ be a donɛɛ lombori zaa a taa sukyiri-sonne a be zirii puoruu poɔŋ na yɛlɛ. A Baabole poɔ yelmeŋɛ na Jehoova naŋ wulo ba na vɛŋɛɛŋ ka a noba ŋa taa noɔreyeni.​—Kanne Maika 4:2, 5.

3. Wala ka noba naŋ taa sukyiri-soŋ na seŋ ka ba e?

Jehoova taaɛ noba naŋ nɔŋ yelmennoŋ ane yelsonne yɛlɛŋ. O eŋnɛ baŋ faŋa ka ba yi zirii puoruu poɔŋ. Noba naŋ nɔŋ Naaŋmen maŋ eɛ siri ka ba leɛre yɛlɛ ba zemmo poɔŋ, ka lɛ na toɔ̃ vɛŋ ka ba pɛlɛ o poɔ.​—Kanne Yel-iriwulaa 18:4.

A yi a dɛndɛŋ yuoŋ kɔɔ na saŋa, sukyiri-sonne deme da de la popeɛloŋ a sagede a duorisoŋ na a bitontonee naŋ da moɔlɔ na. Yɛlɛ na baŋ da zanne yi Jehoova zieŋ na da vɛŋɛɛŋ baŋ leɛre ba zemmo yɛlɛ kpɛlɛŋkpɛlɛŋ. Lɛ da vɛŋɛɛŋ baŋ erɛ yɛlɛ na Naaŋmen naŋ maale ba ka ba erɛ na, a da lɛ taa teɛretɔ meŋ. Zenɛ ŋa, ba eɛ ewuli soŋ a ko te ka te tɔglɔ ba, bonso ba da sagede la a duorisoŋ a de Jehoova yɛlɛ meŋ de weɛ ba zemmo poɔŋ.​—Kanne 1 Tɛsalonika 1:8, 9; 2:13.

Jehoova maŋ ko la neɛzaa naŋ bare zirii puoruu waayaane waneŋ o puorebiiri na poɔŋ. Ka hooŋ sage Jehoova toŋboɔle na, ho neŋ o na nyɔgɛɛ zɔmennoŋ. Ho na lɛ nyɛɛ booree deme naŋ taa nɔmmo yaga, ane nyɔvore naŋ ba taa baaraa meŋ.​—Kanne Marko 10:29, 30; 2 Korinti 6:17, 18.

4. Wala ka Naaŋmen na e a vɛŋ ka neɛzaa naŋ be a teŋɛzuŋ taa popeɛloŋ?

Lɛ na Naaŋmen naŋ waana ka o di zirii puoruu sɛrɛɛ na eɛ duorisoŋ. A na vɛŋeŋ ka noba naŋ be a teŋɛzu zaa nyɛ pɛnnoo. Zirii puoruu daaŋ koŋ lɛ bɛnle nensaaleba, kyɛbee a waneŋ wɛltaa ba kpakyagaŋ. Neɛzaa naŋ be a teŋɛzuŋ na de la noɔreyeni a puoro a yelmeŋɛ Naaŋmen yoŋ.​—Kanne Yel-iriwulaa 18:20, 21; 21:3, 4.