Bonso Ka Naaŋmen Maŋ Sɛgre O Puorebiiri Velaa Zaa?

1. Bonso ka Naaŋmen da sɛgre a takoreŋ saŋa Izerayɛl biiri na?

Naaŋmen da sɛgrɛɛ a booree zudaana Aboraham yaane na a vɛŋ baŋ leɛ paaloŋ. O pãã da de la bege ko ba. O da boɔlɛɛ ana paaloŋ na ka “Izerayɛl.” A Izerayɛl noba la oŋ da de yelmeŋɛ puoruu yɛlɛ ane o yelbiri na ko. (Yieme 147:19, 20) Azuŋ, ka neɛŋ yi paaloŋ yuo a boɔrɔ ka o puoro Naaŋmen, a da seŋ ka o de o meŋɛ te mare a Izerayɛl biiri.​—Kanne Munpiilee 22:18.

Naaŋmen da kaa iree a Izerayɛl biiri baŋ e o sieree deme. A Izerayɛl paaloŋ takoreŋ yɛlɛ wuleeŋ peɛlaaŋ ka, ka nobaŋ wa tuuro Naaŋmen bege na ba maŋ nyɛɛ tɔnɔ yaga. (Duturoonomi 4:6) Azuŋ, ka nobaŋ boɔrɔ ka ba baŋ Naaŋmen, aseŋ ka ba tu a Izerayɛl noba zie.​—Kanne Aizeeya 43:10, 12.

2. Bonso baŋ sɛgre yelmeŋɛ Kristabiiri?

Wagre naŋ gɛrɛ poɔŋ na, Naaŋmen da zagrɛɛ a Izerayɛl paaloŋ na bare ba tokpeɛne zuŋ. Azuŋ, Jehoova da kaa iree a Krista lantaapuoruu na oŋ wa leɛre a Izerayɛl paaloŋ gbɛbɔgriŋ. (Matio 21:43; 23:37, 38) Zenɛ ŋa, a yelmeŋɛ Kristabiiri na naŋ de a Izerayɛl paaloŋ noba gbɛbɔgriŋ na la Jehoova Sieree Deme.​—Kanne Toma 15:14, 17.

Yezu da sɛgrɛɛ o potuuribo na ka ba moɔlɔ a duorisoŋ a donɛɛ lombori zaa, a lɛ sonnɔ noba ka ba wa leɛ o potuuribo meŋ. (Matio 10:7, 11; 24:14; 28:19, 20) Te be la a donɛɛ baaroo saŋa, azuŋ a toma ŋa waanɛɛ o baaroo. A dɛndɛŋ saŋa la ŋa a yi nensaaleba zemmo zaa poɔŋ, ka Naaŋmen lagra noba naŋ yi a teŋɛzu zaa laŋna taa ka ba de yelmeŋɛ puoruu koroo. (Yel-iriwulaa 7:9, 10) Ba maŋ sɛgrɛɛ yelmeŋɛ Kristabiiri ka ba eŋnɛ taa faŋa, a lɛ sonnɔ taa meŋ. A yi a donɛɛ lombori zaa te zaa maŋ zannɛɛ Baabole poɔ yɛlɛ na te yɔɔmine zaa naŋ zanna na.​—Kanne Hiburu 10:24, 25.

3. Wala ka Jehoova Sieree Deme naŋ bebe zenɛ na lantaapuoruu na e piili?

A yi yuoni 1870 poɔŋ a gɛrɛ, Baabole zannezanneba mine da piili boɔrɛɛ a Baabole poɔ yelmenne naŋ da bɔre kɔɔre na. Ba da baŋɛɛŋ ka Yezu da sɛgrɛɛ a dɛndɛŋ Krista lantaapuoruu na ka ba moɔlɔ a duorisoŋ. Azuŋ, ba da piileeŋ a moɔlɔ a Naaloŋ duorisoŋ a donɛɛ lombori zaa. Yuoni 1931 poɔŋ, ba da boɔlɛɛ ba menne Jehoova Sieree Deme.​—Kanne Toma 1:8; 2:1, 4; 5:42.

4. Sobuo baŋ tu a sɛgre Jehoova Sieree Deme?

A dɛndɛŋ yuoŋ kɔɔ na saŋa, Kristabiiri naŋ da be a teŋɛzu zaa da maŋ nyɛrɛɛ sowuli yire a lantaa zukaareba zie. A lantaa zukaareba da maŋ sigree ba menne ko Yezu naŋ la a lantaapuoruu Zusoba na. (Toma 16:4, 5) Lɛ neŋ o zu la, zenɛ ŋa meŋ, Jehoova Sieree Deme naŋ be a donɛɛ lombori zaa maŋ nyɛrɛɛ sowuli yire a Lantaa Zukaareba zie. A Lantaa Zukaareba eɛ lantaapuoruu nembɛrɛ naŋ kyile. Ba na la maŋ kaara Jehoova Sieree Deme bɛɛtil tomaziiri naŋ be a donɛɛ lombori zaa na zu. A bɛɛtil tomaziiri ŋa maŋ leɛrɛɛ te gama na gaaneŋ kɔkɔyobo, a printi a gama, a lɛ de gama naŋ na baŋ soŋ noba ka ba zanne a Baabole meŋ tɔre ko noba kɔkɔɛ naŋ pare 600 poɔŋ. A sori ŋa poɔŋ la ka a Lantaa Zukaareba maŋ tu a de Baabole sowuli, ane faŋa emmo korɔ lantaapuoruuhi naŋ pare 100,000 a be a donɛɛ lombori zaa. A yi a lantaapuoruu kaŋa zaa poɔŋ, ba maŋ kaa iree dɔba naŋ kyile a Kristaaloŋ poɔŋ baŋ e a lantaapuoruu nembɛrɛ, kyɛbee zukaareba. A dɔba ŋa maŋ yi la nɔmmo poɔŋ a kaara Naaŋmen peere na zu.​—Kanne 1 Piita 5:2, 3.

Ba sɛgrɛɛ Jehoova Sieree Deme ka ba moɔlɔ a duorisoŋ, a lɛ sonnɔ noba meŋ ka ba wa leɛ Yezu potuuribo. Aŋa lɛ na a bitontonee naŋ da erɛ na, te meŋ maŋ gɛrɛɛ die neŋ die a moɔlɔ a duorisoŋ. (Toma 20:20) Te maŋ boɔrɛɛ sukyiri-sonne deme ka te ne ba zanne a Baabole. Jehoova Sieree Deme ba e noba ba naŋ sɛgre ba yoŋ, kyɛ te eɛ booree naŋ taa Saa naŋ nɔŋ te yaga zaa. Te eɛ yɔɔmine meŋ naŋ maŋ teɛrɛ taa yɛlɛ yaga zaa. (2 Tɛsalonika 1:3) Jehoova Sieree Deme la booree deme naŋ taa popeɛloŋ yaga zaa a teŋɛzuŋ, bonso ba eɛ noba baŋ sɛgre ka ba erɛ yɛlɛ naŋ pɛlɛ Naaŋmen poɔ, a kyɛ lɛ sonnɔ ba taaba meŋ.​—Kanne Yieme 33:12; Toma 20:35.