Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
MARCH 7-13
BAABOLE POƆ YELNIMIZEERE | 1 SAAMIUEL 12-13
“Zɛgemeŋɛ Maŋ Wanɛɛ Vi”
w00 8/1 13 wɛl. 17
Zɛgemeŋɛ Maŋ Wanɛɛ Vi
17 Ka hooŋ ba teɛre a yɛlɛ gaa tɔɔre, ho na teɛre ka yelfaa zaa kye yɛlɛ na Sɔɔl naŋ da e na poɔŋ. Bonso a yelkpeɛŋaa na Naaŋmen noba naŋ da tuore na, da vɛŋɛɛŋ baŋ nyɛ ka “a moɔ̃yɛŋ,” baŋ da be “ŋmɛnnoo poɔŋ” a kyɛ miine yaga zaa. (1 Saamiuel 13:6, 7) Yelmeŋɛ la, ka yɛlɛŋ ba kyɛnɛ soŋ a ba e faa ka te de gbɛre wieoŋ ka te e yelkaŋa. Kyɛ teɛre baŋ ka, Jehoova baŋ la yɛlɛ naŋ be te sukyie poɔŋ ane te poteɛrɛ zaa. (1 Saamiuel 16:7) Azuŋ, o da nyɛɛ gyogri mine Sɔɔl naŋ taa kyɛ baŋ ba sɛgaa eŋ a Baabole poɔŋ. Aŋa mannoo poɔŋ, aminekaŋaŋ Jehoova da nyɛɛŋ ka zɛgemeŋɛ la da vɛŋ ka Sɔɔl ba di kannyiri. Kyɛbee aminekaŋaŋ Sɔɔl suuri da ireeŋ te gaali, bonso ona Sɔɔl naŋ e a Izerayɛl biiri zaa naa seŋ ka o are kyɛnlɛ dɔɔ nyaaŋaa kaŋa naŋ e daŋyele a ba maŋ erɛ yɛlɛ wieoŋ na! Kyɛ lɛ zaa naŋ la, Sɔɔl da de ka Saamiuel naŋ ba waana wieoŋ na a da kooŋ sori ka o e lɛ zaa o naŋ boɔrɔ, a zagre ka o tu a sowuli na baŋ da ko o aŋ pɛle yaga zaa na. Boŋ da yi a poɔŋ wa? Saamiuel da ba pugi Sɔɔl a kyaare yɛlɛ na oŋ da e na. Kyɛ, Saamiuel da yelee Sɔɔl nimiri yɛlɛ ko o. Saamiuel da yeleeŋ ka: “Ho naaloŋ koŋ la gaa nimitɔɔre . . . bozuŋ ho ba tu yɛlɛ na Jehoova naŋ ko bo na.” (1 Saamiuel 13:13, 14) A yɛlɛ ŋa meŋ poɔŋ, te lɛ nyɛɛŋ ka zɛgemeŋɛ maŋ wanɛɛ vi.
w07 6/15 27 wɛl. 8
Jehoova De La Ho Noɔre Sagebo Na Tegroŋ Yaga Zaa
8 Naa Sɔɔl yɛlɛ naŋ be a Baabole poɔŋ na wuli teŋ lɛ a naŋ e nimizeɛ ka te sagra noɔre. A piilee na, Sɔɔl da e la naa naŋ sigri o meŋɛ a baŋ o e ta zie, bonso o da nyɛɛŋ ka ‘o e la fẽẽ o meŋɛ niŋeŋ.’ Kyɛ wagre naŋ gɛrɛ poɔŋ na, zɛgemeŋɛ ane teɛroŋ faare da wa vɛŋɛɛŋ oŋ piili derɛ gbɛɛ naŋ ba soma. (1 Saamiuel 10:21, 22; 15:17) Saŋa kaŋa, Sɔɔl da gaayɛŋ ka o zɔɔ neŋ a Filiisitiya noba. Saamiuel da yelkooŋ ka o mãã o meŋɛ a kyɛnloo ka o wa iri sareka ko Jehoova a kyɛ de sowuli meŋ ko o. Kyɛ, Saamiuel da ba wa wieoŋ aŋa lɛ ba naŋ kaara soriŋ na, azuŋ a noba da leɛ gɛrɛɛ ba deri. Sɔɔl naŋ da wa nyɛ lɛ na, oŋ daaŋ “iri a sareka nyugiroo.” A yɛlɛ ŋa da ba pɛle Jehoova poɔ fẽẽ zaa. Saŋa na Saamiuel naŋ wa wa na, naa Sɔɔl da piili iree yɛlɛ noɔre a kyaare bon naŋ vɛŋ oŋ e tokpeɛne. O da yeleeŋ ka, Saamiuel naŋ ba wa wieoŋ zuŋ la so ‘aŋ wa e ferebo ko o’ ka o iri a sareka ko Jehoova, ka o pɛle Jehoova poɔ. Naa Sɔɔl yɛŋ sɛŋ, sareka na oŋ na iri naŋ e nimizeɛ a gaŋ oŋ na tu sowuli na Saamiuel naŋ de ko o ka o kyɛnloo ka o wa iri a sareka na. Saamiuel da yelko la Sɔɔl ka: “Ho e la zɔliyɛlɛ. Ho ba tu Jehoova ho Naaŋmen noɔre oŋ ko bo.” Sɔɔl naŋ da ba tu Jehoova noɔre na da vɛŋɛɛŋ ka a naaloŋ yi o nuureŋ.—1 Saamiuel 10:8; 13:5-13.
Baabole Poɔ Yelsonne
w11 7/15 13 wɛl. 15
Ka Lɛ Ho Na Tu La Jehoova Sowuli Na O Naŋ Maŋ Korɔ Te Nɔmmo Poɔŋ Na Bee?
15 Ka lɛ a Izerayɛl biiri da teɛre ka, ka nensaalaaŋ dire naaloŋ a kaara ba, onaŋ na e neɛ naŋ bebe meŋɛmeŋɛ baŋ na toɔ̃ dɛloo a gaŋ Jehoova bee? Ka lɛ na, a noba da boɔrɛɛ bonkaŋa naŋ da ba bebe meŋɛmeŋɛ! A yɛlɛ ŋa da lɛ yuo la sori ko ba ka ba te bɔ Setaana yelkpala na mine meŋ poɔ. Noba naŋ da maŋ dire naaloŋ a kaara ba na da maŋ de baŋ weɛ baŋ te puoro baga. Noba naŋ puoro baga ba taa teɛroŋ naŋ soma. Teŋ koŋ baŋ de te nimie nyɛ Jehoova na zuŋ, noba naŋ puoro baga maŋ teɛre ka bon ba naŋ de ba nimie nyɛrɛ, aŋa ŋmema ba naŋ de daare bee kubo maale e la boma naŋ bebe meŋɛmeŋɛ, a be dɛlebo, a gaŋ Jehoova Naaŋmen naŋ maale boma zaa na. Kyɛ, aŋa lɛ bitontona Pɔɔl naŋ da yel na, baga ba e “bonzaa.” (1 Kor. 8:4) A koŋ baŋ nyɛ yɛlɛ, bee a woŋ yɛlɛ, bee a yeli yɛlɛ, bee a e yelkaŋa. Ho na baŋ de la ho nimie nyɛ a, a de ho nuure siinaa meŋ, kyɛ ka hooŋ puoro baga, ho e la neɛ naŋ boɔrɔ bonkaŋa naŋ ba bebe meŋɛmeŋɛ, yelkpala naŋ maŋ de sããmmo yoŋ waaneŋ.—Yiem. 115:4-8.
MARCH 14-20
BAABOLE POƆ YELNIMIZEERE | 1 SAAMIUEL 14-15
“Noɔre Tuubu Seɛ La Sareka Iribo”
w07 6/15 26 wɛl. 4
Jehoova De La Ho Noɔre Sagebo Na Tegroŋ Yaga Zaa
4 Jehoova naŋ Maale boma zaa na zuŋ, o naŋ so bon la bonzaa te naŋ taa. Azuŋ, bonkaŋa bebeŋ teŋ meŋ na toɔ̃ de ko o bee? Ɛɛ, te na toɔ̃ kooŋ bonkaŋa naŋ e nanee yaga zaa. Boŋ na lɛ? Te na baŋ nyɛɛ a noɔre iribo yi a kawane ŋa poɔŋ: “E yɛŋbanna, N bidɔɔ, a vɛŋ ka N sukyiri taa popɛle. Ka N toɔ̃ deɛ yeli ko neɛ naŋ tonɔ N lolo bee a dɔɔnɔ N suuri.” (Yeng Yelibie 27:11) Te noɔre sagebo e la kyɔɔtaa teŋ de korɔ Naaŋmen. Aneazaa ka te zaa ba tuoro yelyeni te zemmo poɔŋ, a e noba naŋ ba yi ziyeni meŋ, kyɛ ka te naŋ sagra Jehoova noɔre, te na wuliŋ ka yɛlɛ na Setaana a Dɛɛvul naŋ yel ka neɛzaa koŋ di yelmennoŋ ko Naaŋmen saŋa na oŋ tuoro yelkpeɛne na e la zirii. Nyɛ apoɔsori naŋ seŋ lɛ!
it-2 521 wɛl. 2
Noɔre Sagebo
Te koŋ baŋ de bonzaa leɛre noɔre sagebo voɔreŋ. Ka teneeŋ ba sagra Naaŋmen noɔre te koŋ baŋ nyɛ o maaloo. Saamiuel da yelko la Naa Sɔɔl ka: “Jehoova nɔŋɛɛ sareka nyugirihi ane sarekare yaga zaa a te seŋ Jehoova noɔre tuubu? [a Hiburu yelbiri naŋ are ko noɔre tuubu la sha·maʽʹ] Nyɛ! Noɔre tuubu [bee yɛlɛ wommu] seɛ la sareka iribo, ka yɛlɛ kyɛlloo meŋ seɛ pedɛɛ kãã.” (1Sa 15:22) Ka teneeŋ zagre ka te tu Jehoova noɔre lɛ wuleeŋ ka te zagrɛɛ Jehoova yelbiri na. A lɛ eebo meŋ na wuliŋ ka, te ba sagedi, bee a dɛle, bee a taa sagediibu o yelbiri na eŋɛŋ ane Neɛ na zie a yelbie naŋ yire na eŋɛŋ. A lɛ zuŋ na, neɛ naŋ ba sagra noɔre ane neɛ naŋ waa bageboorɔ zaa e la bonyeni. (1Sa 15:23; de manne neŋ Ur 6:16.) Noɔre yelyaga ba taa tɔnɔ zaa ka o sobaŋ ba de o yel-erre wuli yɛlɛ na o naŋ de o noɔre yel na; ka neɛŋ ba de o yel-erre wuli yɛlɛ na o naŋ yel na, lɛ wuleeŋ ka o soba ba sagedi bee a taa gyeremɛ ko neɛ naŋ koroo a sowuli na. (Mt 21:28-32) Noba naŋ maŋ woŋ Naaŋmen yelbiri a sage ka a e la yelmeŋɛ ba teɛroŋ poɔŋ, a kyɛ ba de ba eebo wuli ka ba sagɛɛ lɛ di na vɛŋɛɛŋ ka ba teɛroŋ faa na bɛnle ba, ba koŋ nyɛ maaloo meŋ. (Gyi 1:22-25) Naaŋmen Bidɔɔ na da vɛŋɛɛŋ aŋ pɛle ka, noba naŋ erɛ yɛlɛ na meŋɛ Naaŋmen naŋ ko noɔre ka ba erɛ na, a kyɛ ba eraa sori naŋ seŋ poɔŋ bee a de poteɛre faare eraa na, ba koŋ nyɛ sori kpɛ a Naaloŋ poɔ, kyɛ ba na zagre baŋ bare kpɛlɛŋkpɛlɛŋ.—Mt 7:15-23.
Baabole Poɔ Yelsonne
it-1 493
Nimimaaroŋ
Ka a naŋ ba e Naaŋmen boɔbo ka te wuli nimimaaroŋ ko neɛ kaŋa kyɛ ka te vɛŋ ka noba fere te ka te e lɛ, a na toɔ̃ deɛ sããmmo waneŋ te zuŋ. Te zannɛɛ a yɛlɛ ŋa a yi yɛlɛ naŋ pɔge Naa Sɔɔl na. Wagre da taɛɛŋ ka Naaŋmen de sããmmo waneŋ a Amɛlek noba zuŋ. Bozuŋ saŋa na a Izerayɛl biiri naŋ da yi Ijipiti a gɛrɛ a noɔre emmo teŋgane na, ba da ba e a Amɛlek noba yelzaa kyɛ baŋ iri tuore ba neŋ zɔɔre. Ba da ko la Sɔɔl noɔre ka o ta wa wulo ba nimimaaroŋ. Kyɛ Sɔɔl da vɛŋɛɛŋ ka a Izerayɛl biiri mine feroo ka lɛ vɛŋ oŋ da ba tu Naaŋmen noɔre na zaa te baare. Azuŋ, Jehoova da deɛ la a naaloŋ yi Sɔɔl nuureŋ. (1Sa 15:2-24) Ka neɛŋ taa nimipa naŋ e zuluŋ a ko sori na Jehoova naŋ maŋ tu kyɛ erɛ o yɛlɛ na, a maŋ de yelmennoŋ na oŋ na dire korɔ Jehoova na fɔrɔ o zemmo poɔŋ, a na toɔ̃ somooŋ ka o ta wa ŋmeɛrɛ a gbɛ-faa ŋa Sɔɔl naŋ da ŋmɛ na, ka lɛ vɛŋ ka o neŋ Jehoova niiloŋ sãã na.
MARCH 21-27
BAABOLE POƆ YELNIMIZEERE | 1 SAAMIUEL 16-17
“Jehoova La So A Zɔɔre”
wp16.5 11 wɛl. 2-3
“Jehoova La So A Zɔɔre”
Deevid da vɛŋɛɛŋ ka Sɔɔl baŋ ka a ba seŋ ka o zoro dabeɛ̃, o da mannɛɛ lɛ na oŋ da ko gbɛŋni ane beer na yɛlɛ ko o. Ka lɛ Deevid da wulee o meŋɛ bee? Ai. Deevid da baŋɛɛ neɛ naŋ somoo oŋ toɔ̃ ko a gbɛŋni ane a beer. Azuŋ o da yeleeŋ ka: “Jehoova naŋ faa ma a gbɛŋni nuŋ a faa ma a beer meŋ nuŋ na, onaŋ na faa ma a Filiisitiya neɛ ŋa nuŋ.” Sɔɔl da ba lɛ pigoo sori, kyɛ o da yelkooŋ ka: “Gɛrɛ, kyɛ Jehoova be ho sɛŋ.”—1 Saamiuel 17:37.
Ho meŋ na boɔrɔŋ ka ho taa sagediibu aŋa Deevid bee? Ka hooŋ nyɛ, Deevid sagediibu na da ba e yɛlɛ oŋ da teɛrɛ yoŋ. Kyɛ bammo ane yɛlɛ naŋ pɔge Deevid o zemmo poɔŋ la da vɛŋ oŋ taa sagediibu Naaŋmen eŋɛŋ. O da baŋɛɛŋ ka Jehoova naŋ taa nɔmmo na zuŋ, o na go la o noba a kyɛ paale o nɔ-ennee zaa. Ka teneeŋ boɔrɔ ka te taa Deevid sagediibu ŋa tɔ, aseŋ ka te moɔ̃ nimiri zanna Naaŋmen yelbiri a Baabole. Aseŋ ka te maŋ de yɛlɛ na teŋ zanna na tonɔ neŋ toma te zemmo poɔŋ. Ka teneeŋ wa nyɛrɛ maaloo saŋa na teŋ de yɛlɛ na teŋ zanna na tonɔ neŋ toma na, a na vɛmeŋ ka te sagediibu maaleŋ e kpeɛŋaa.—Hiburu 11:1.
wp16.5 11-12
“Jehoova La So A Zɔɔre”
A wa tɔ zenɛ, yɛlɛ na Deevid naŋ da yel na da wulee lɛ o sagediibu naŋ e kpoŋ seŋ. Hooŋ leɛ ŋmaa a yɛlɛ ŋa foto ho teɛroŋ poɔŋ a nyɛ a baapaalaa ŋa naŋ de kɔkɔkpeɛŋaa a yele korɔ Golaiyat ka: “Takobi bee zɔɔzɔɔsoɔ ane kpane ane kpaŋbile hoŋ waana neŋ N eŋɛŋ. Kyɛ maaŋ yɛŋ, bonnaaŋgyemaa Jehoova, Izerayɛl sogyare Naaŋmen na yuoriŋ maŋ waana ho eŋɛŋ. O na hoŋ boɔle zaala na.” Deevid da baŋɛɛŋ ka nensaalaa kpeɛ̃o ane ba zɔɔzɔɔ boma ba e bonzaa ko Jehoova. Golaiyat da ba wuli gyeremɛ ko Jehoova Naaŋmen, azuŋ aseŋ ka Jehoova tage o toorii. A ture da waa ŋa lɛ na Deevid naŋ yel na, “Jehoova la so a zɔɔre.”—1 Saamiuel 17:45-47.
Deevid da baŋɛɛŋ ka Golaiyat e la kpoŋ yaga zaa a taa zɔɔzɔɔ boma meŋ. Kyɛ Deevid da ba vɛŋ ka a lɛ boma na e ka dabeɛ̃ kpɛ o. O da ba ŋmɛ a gbɛre na Sɔɔl ane a Izerayɛl sogyare naŋ da ŋmɛ na. Deevid da ba de o meŋɛ manna neŋ Golaiyat. Kyɛ, Deevid da de la Golaiyat manne neŋ Jehoova. Golaiyat da e la dɔɔ gandaa naŋ e wogi ta gbɛɛ mannoo awae neŋ kyɛlee bee metare 2.9. Golaiyat da e la wogi gaŋ dɔɔ zaa naŋ da be a lɛ zie naŋ, kyɛ wala ka Golaiyat na e kpoŋ seŋ ka hooŋ de o manne a Soobu Kpeɛ̃o Zaa Daana na? Aŋa nensaaleba zaa na, Golaiyat da waa ŋa sɛllensooree. Sɛllensooree Jehoova naŋ na ko!
wp16.5 12 wɛl. 4
“Jehoova La So A Zɔɔre”
Zenɛ ŋa, Naaŋmen puorebiiri ba maŋ lɛ de ba menne eŋnɛ a donɛɛ zɔɔzɔɔ yɛlɛ poɔŋ. A lɛ saŋa na parɛɛŋ. (Matio 26:52) Kyɛ, aseŋ ka te tɔglɔ Deevid sagediibu na. Aŋa Deevid, aseŋ ka te sagedi ka Jehoova sereŋ bebeŋ meŋɛmeŋɛ. Ona yoŋ aŋ seŋ ka te puoro a taa gyeremɛ naŋ e kpoŋ a koroo. Saŋa kaŋa, ka teneeŋ de te menne manne neŋ yelkpeɛne na te naŋ tuoro na, te na maŋ nyɛŋ ka te e la fẽẽ lɛ. Te na nyɛŋ ka te yelkpeɛne na eɛ fẽẽ lɛ ka teneeŋ de a manne neŋ Jehoova naŋ e kpeɛ̃o zaa daana na. Ka teneeŋ kaa iri Jehoova ka o e te Naaŋmen, a taa sagediibu o eŋɛŋ aŋa lɛ Deevid naŋ da taa sagediibu o eŋɛŋ na, yelkpeɛŋaa zaa kyebe, toɔrɔ zaa meŋ kyebe a na vɛŋ ka dabeɛ̃ kpɛ te. Yelzaa kyebe a gaŋ Jehoova faŋa ka o zɔɔtoɔ̃!
Baabole Poɔ Yelsonne
it-2 871-872
Sɔɔl
A yɛlɛ ŋa eebo puoreŋ, ba da sɔ la Deevid naaloŋ kãã ka o wa e naa a kaara a Izerayɛl paaloŋ, a saŋa ka Jehoova vooroŋ soŋ na da yi Sɔɔl eŋɛŋ. A yi a lɛ saŋa na “sefaa kaŋa naŋ yi Jehoova sɛŋ da maŋ dɔnnooŋ.” Jehoova naŋ iri o vooroŋ soŋ a yi Sɔɔl eŋɛŋ na da yuo la sori ko a lɛ sefaa na oŋ wa be Sɔɔl eŋɛŋ. A lɛ sefaa ŋa da vɛŋɛɛŋ ka Sɔɔl teɛroŋ da ba maŋ gaŋ ziyeni. A da vɛŋ ka o yel-erre, o teɛrɛ ane lɛ oŋ da maŋ teɛrɛ yɛlɛ gɛrɛ tɔɔre zaa e yelfaare yoŋ. Sɔɔl naŋ da zagre ka o tu Jehoova noɔre na wuleeŋ ka o e la neɛ naŋ taa teɛroŋ faa ane sukyiri faa. Naaŋmen vooroŋ soŋ na meŋ koŋ baŋ pigi Sɔɔl sori ka o ta taa a lɛ sukyiri faa bee teɛroŋ faa na. Kyɛ, Jehoova naŋ tere sori ka a lɛ “sefaa” ŋa wa leɛre o vooroŋ soŋ na voɔreŋ a dɔgrɔ Sɔɔl na zuŋ baŋ da boɔloo ka “sefaa kaŋa naŋ yi Jehoova sɛŋ.” A lɛ zuŋ ka Sɔɔl tontonneba na da yelka o e la “sefaa naŋ yi Naaŋmen sɛŋ.” Sɔɔl tontonneba na kaŋa da wa pugee Deevid ko Sɔɔl. A lɛ zuŋ Sɔɔl da toŋɛɛŋ ka ba te taa Deevid waaneŋ a nayiri, ka o wa ŋmeɛrɛ yiele naŋ na maŋ mãã o sukyiri saŋa na zaa a lɛ “sefaa” ŋa naŋ maŋ wa dɔnnoo na.—1Sa 16:14-23; 17:15.
MARCH 28–APRIL 3
BAABOLE POƆ YELNIMIZEERE | 1 SAAMIUEL 18-19
“Naŋ Sigri Ho Meŋɛ Ka Hooŋ Wa Toɔ̃ E Yelkaŋa”
w04 4/1 15 wɛl. 4
Ka Yɛlɛŋ Wa Leɛre Ho Zemmo Poɔŋ, Dɛle Naaŋmen Vooroŋ Soŋ Na
4 A koŋ kɔɔre kyɛ ka a bibile ŋa naŋ e pekyeena na yuori na do a Izerayɛl paaloŋ zaa. Ba boɔlooŋ ka o wa tonɔ korɔ a naa, a kyɛ ŋmeɛrɛ yiele meŋ koroo. Onaŋ da ko a dɔɔ gandaa na ba naŋ boɔlɔ Golaiyat na. O da e la dɔɔ gandaa ka o yɛlɛ taa dabeɛ̃ yaga, haali a Izerayɛl sogyare naŋ da kyili zɔɔre poɔŋ na zaaŋ da zoro dabeɛ̃ ka ba zɔɔ ne o. Ba da iree Deevid ka o e a sogyare zaa zukaara. Azuŋ o da maŋ de baŋ weɛ baŋ te zɔɔtoɔ̃ a Filiisitiya noba. A noba da nɔnɔ la o yɛlɛ yaga. Ba da maŋ yielee yiele danna o yuori. Sɛre ka a yɛlɛ ŋa zaa na e na, neɛ naŋ da maŋ korɔ Naa Sɔɔl kawane na da mannɛɛ a baapaalaa ŋa baŋ boɔlɔ Deevid na yɛlɛ ko Naa Sɔɔl. O da yelka, o baŋɛɛŋ kɔni bee koriŋgyo “ŋmeɛbo” a kyɛ lɛ e “dɔɔkpeɛŋaa naŋ tare nyaa, a e tammo zɔɔzɔɔrɔ, a baŋ yelyaga kyɛ e nakyiima bee a e dɔɔ naŋ veɛlɛ yaga.”—1 Saamiuel 16:18; 17:23, 24, 45-51; 18:5-7.
w18.01 28 wɛl. 6-7
Baŋ Ka Nensaaleba Ba Yi Taa
6 Ka noba mineŋ wa veɛlɛ, ka ba yuori do, a baŋ yiele yieluu, a taa faŋa bee a taa arezie naŋ e kpoŋ, ba maŋ zɛgrɛɛ ba menne. A yɛlɛ ŋa bonyeni soba naane ka Deevid da taa, o da taaɛ a boma ŋa zaa. Kyɛ o da wulee sigrimennoŋ gyogo o nyɔvore zemmo zaa poɔŋ. A yi saŋa na oŋ da ko Golaiyat baare na, Naa Sɔɔl da de la o pɔgeyaa koo ka o e o pɔge. Deevid da yelka: “Nembuo la ma, bo la N nyɔvore, bee N denoɔre, bee booree Izerayɛl paaloŋ poɔŋ, aŋa N naŋ na leɛ naa deɛŋ-dɔɔ?” (1 Saa. 18:18) Boŋ da soŋ Deevid oŋ toɔ̃ taa a sigrimennoŋ gyogo ŋa? Deevid da baŋɛɛŋ ka Naaŋmen naŋ ‘sigri o meŋɛ’ a teɛrɛ o yɛlɛ zuŋ la so oŋ taa a lɛ gyogri na, a kyɛ la toɔ̃ e yɛlɛ na zaa o naŋ e na ane a apoɔsoe zaa o naŋ taa na. (Yiem. 113:5-8) Deevid da baŋɛɛŋ ka bonsoŋ zaa o naŋ taa yi la Jehoova zie.—De manne neŋ 1 Korinti 4:7.
7 Aŋa Deevid, Jehoova puorebiiri naŋ bebe zenɛ ŋa maŋ mɔɔrɔŋ ka ba wulo sigrimennoŋ gyogo. Te noɔre zaaŋ maŋ mãã saŋa na teŋ wa baŋ ka Jehoova naŋ e Neɛ naŋ e kpoŋ a gaŋ neɛ la neɛzaa, meŋ taa la a sigrimennoŋ gyog-soŋ ŋa. (Yiem. 18:35) Azuŋ, yɛ vɛŋ ka te moɔ̃ niŋe a de a Baabole kawane ŋa tonɔ neŋ toma: “Yɛ de nyonono, nimimaaroŋ, sigruumilluu, sumaaroŋ ane kannyiri su pɔge yɛmenne aŋa bonsuuri.” (Kol. 3:12) Te baŋɛɛŋ meŋ ka nɔmmo ba erɛ “meŋɛ wuluu, bee pɔloo.” (1 Kor. 13:4) Ka teneeŋ wulo sigrimennoŋ gyogo, noba na boɔrɔŋ ka ba wa baŋ Jehoova. Aŋa lɛ pɔgeba naŋ na toɔ̃ tu ba gyog-soŋ eŋɛŋ a soŋ ba sereba ka ba wa nyɛ a yelmeŋɛ ka ba ba yel yelzaa na, lɛ meŋ la teŋ na baŋ soŋ noba ka ba wa baŋ te Naaŋmen na, saŋa na teŋ wulo sigrimennoŋ gyogo na.—1 Pit. 3:1.
Baabole Poɔ Yelsonne
it-2 695-696
Daŋyele
Aneazaa ka Naaŋmen da maŋ de la o vooroŋ soŋ na kaa iri daŋyelba, kyɛ a waa ŋa wagre zaa naane ka Naaŋmen vooroŋ soŋ na da maŋ eŋ ba faŋa baŋ yele yɛlɛ. Kyɛ Naaŋmen vooroŋ soŋ na ‘da maŋ wa la ba eŋɛŋ’ wagre mine poɔŋ, a wuli ba duoro naŋ seŋ ka ba moɔlɔ. (Iz 11:4, 5; Mai 3:8) Ka lɛŋ wa e a maŋ nyɛ la kpeɛ̃o ba eŋɛŋ, a eŋ ba faŋa baŋ moɔlɔ a duoro. (1Sa 10:10; Jr 20:9; Em 3:8) Ba yel-erre yoŋ naane baŋ da maŋ de wuli ka ba nyɛɛ duoro yi Naaŋmen zie, kyɛ ba yelyaga ane ba gyogo da maŋ wulee lɛ a duoro naŋ e nimizeɛ seŋ, a kyɛ lɛ wuli ka a yɛlɛ sereŋ e la yelmeŋɛ. Ba yel-erre meŋ da maŋ wuliŋ ka a yɛlɛ e la tegroŋ yaga. Aminekaŋaŋ a yɛlɛ ŋa mine zuŋ la so ka a Baabole yelka noba mine da maŋ erɛɛ ba yɛlɛ aŋa “daŋyelba.” (1Sa 10:6-11; 19:20-24; Jr 29:24-32; de manne neŋ Tm 2:4, 12-17; 6:15; 7:55.) Lɛ na baŋ da maŋ de ba teɛroŋ zaa eŋ ba toma na eŋɛŋ, ane eŋnyagroŋ ane nyaa na baŋ da maŋ de tonɔ a toma na da maŋ vɛmeŋ ka noba nyɛ ka ba gyogo leɛrɛɛŋ, a gba e yelseɛlii a ko noba saŋa kaŋa. Aŋa saŋa na daŋyele kaŋa naŋ da wa sogyare nembɛrɛ mine nimitɔɔre saŋa na baŋ da soɔrɔ Jeehu naaloŋ kãã na. Kyɛ saŋa na baŋ wa baŋ ka o e la daŋyele na, a sogyare nembɛrɛ da de la o duoro na nimizeɛ yaga zaa. (2Nm 9:1-13; de manne neŋ Tm 26:24, 25.) Saŋa na Sɔɔl naŋ da yɔ boɔrɔ Deevid ka o ko na, a da wa ta la saŋa kaŋa oŋ ‘erɛ o yɛlɛ aŋa daŋyele.’ O da yagɛɛ o bonsuurii zaa kyɛ gaŋ “a lɛ ŋmentoŋ-gbuli na zaa ane a yieŋuu bee zisoɔree zaa.” A lɛ da vɛŋɛɛŋ ka Deevid nyɛ sori zo sɔgle. (1Sa 19:18–20:1) Lɛ ba wuli ka daŋyelba da maŋ yagɛɛ ba bonsuurii a kyɛ kyɛnɛ eŋkponkpoli, bonso a Baabole ba wuli lɛ. Kyɛ a ziiri ayi na a Baabole naŋ yelka daŋyelba yagɛɛ ba bonsuurii kyɛ gaŋ eŋkponkpoli na wuleeŋ ka, a daŋyelba da taaɛ ananso ba naŋ e lɛ, a kyɛ da wulo a daŋyelbo duoro na baŋ da manna na yelnimizeɛ kaŋa. (Ai 20:2-4; Mai 1:8-11) Te ba baŋ te baare bon nanso ka Sɔɔl da gaŋ eŋkponkpoli. Ka lɛ da nyɛɛ eebo a na vɛŋ ka Sɔɔl baŋ ka, ka ba naŋ yage o nabonsuurii na bare, o na e la dɔɔ naŋ ba e bonzaa. Kyɛbee ka a yɛlɛ da nyɛɛ eebo a na vɛŋ ka Sɔɔl baŋ ka o ba taa a kpeɛ̃o ka o pigi Jehoova kpeɛ̃o bee o faŋa na sori, bee ka yelzaala kaŋa yɛlɛ la. Te ba baŋ te baare.
APRIL 4-10
BAABOLE POƆ YELNIMIZEERE | 1 SAAMIUEL 20-22
“Lɛ Hoŋ Na Toɔ̃ E Zɔmeŋ Soŋ”
w19.11 7 wɛl. 18
Vɛŋ Ka Ho Neŋ Ho Yɔɔmine Nyɔge Zɔmennoŋ Naŋ E Kpeɛŋaa Sɛre Ka A Baaroo Saŋa Ta
18 Zenɛ ŋa, te yɔɔdɔba ane te yɔɔpɔgeba tuoree yelkpeɛne naŋ e tɛɛtɛɛ yaga zaa. Aŋa mannoo poɔŋ, ba mine tuoree sããmmo bɛrɛ, saŋa kaŋa nensaaleba la maŋ waneŋ a sããmmo bɛrɛ ŋa. Ka lɛŋ wa e, te na baŋ yuo la te die ko te yɔɔmine ŋa a ko ba waayaane meŋ. Te mine na toɔ̃ de la te libie soŋ ba. Kyɛ te kaŋa zaa na baŋ puore sɔrɛɛ Jehoova ka o soŋ te yɔɔdɔba ane te yɔɔpɔgeba ŋa. Saŋa kaŋa, ka teneeŋ wa baŋ ka te yɔɔdɔɔ kaŋa bee te yɔɔpɔge kaŋa eŋɛ kyoɔrɛɛŋ, te ba maŋ baŋ yɛlɛ na teŋ na yel bee lɛ na teŋ na e. Kyɛ te zaa taaɛ bonkaŋa teŋ na toɔ̃ de soŋ o soba. Aŋa mannoo poɔŋ, te na baŋ bɔɛ wagre a gaa te zɔmeŋɛ na zie. Saŋa na o soba naŋ yele yɛlɛ na, te na baŋ yi la nyonono poɔŋ meŋ a kyɛlle woŋ o yɛlɛ. Te na baŋ mannɛɛ sɛgre kaŋa naŋ diire sukyiri yaga zaa yɛlɛ a ko o soba. (Aiz. 50:4) Yɛlɛ naŋ fɛre la ka, ho be ho zɔmenne zieŋ saŋa na ba naŋ boɔrɔ ho sommo na.—Kanne Yeng Yelibie 17:17.
w08 2/15 8 wɛl. 7
Kyɛnɛ Jehoova Soe Naŋ
7 Naaŋmen boɔrɔŋ ka te e zɔmenne naŋ be dɛlebo. (Yeng. 17:17) Naa Sɔɔl bidɔɔ Joonataŋ da nyɔgɛɛ Deevid zɔmennoŋ. Saŋa na Joonataŋ naŋ da wa woŋ ka Deevid ko la Golaiyat na, “Joonataŋ suuhu bee nyɔvore daaŋ marɛɛ Deevid suuhuŋ bee nyɔvore. Ka Joonataŋ daaŋ nɔmoo aŋa o meŋɛ.” (1 Saa. 18:1, 3) Joonataŋ gba da kpãã la Deevid ka, Sɔɔl boɔrɔŋ ka o ko o. Saŋa na Deevid naŋ da zo sɔgle na, Joonataŋ da gaa la o zie ka ba bayi te laŋ noɔre. A da kyɛre fẽẽ lɛ ka Joonataŋ kɔŋ o nyɔvore saŋa na oŋ da manna Deevid yɛlɛ korɔ Sɔɔl na. Kyɛ a lɛ puoreŋ, Deevid neŋ Joonataŋ da lɛ nyɛɛ taa a eŋ ba zɔmennoŋ na faŋa yaga zaa. (1 Saa. 20:24-41) A yi a baaraa saŋa ba naŋ nyɛ taa na, Joonataŋ da eŋ la Deevid faŋa a tuuro “Naaŋmen eŋɛŋ.”—1 Saa. 23:16-18.
w09 10/15 19 wɛl. 11
Vɛŋ Ka Ho Neŋ Ho Yɔɔmine Zɔmennoŋ Na E Kpeɛŋaa A Donɛɛ Ŋa Nɔmmo Naŋ Ba Kye Na Poɔŋ
11 E yelmeŋɛ daana. Soolomoŋ da sɛgɛɛŋ ka “zɔmeŋa maŋ taaɛ nɔmmo wagre zaa. Ba maŋ dɔgɛɛ babie meŋ dɔgɛɛ daare sommo zuŋ.” (Yeng. 17:17) Saŋa na Soolomoŋ naŋ da wa sɛgrɛ a yɛlɛ ŋa na, aminekaŋaŋ o da teɛrɛɛ zɔmennoŋ naŋ da be o saa Deevid ane Joonataŋ kpakyagaŋ na. (1 Saa. 18:1) Naa Sɔɔl da boɔrɔŋ ka o bidɔɔ Joonataŋ di a Izerayɛl naaloŋ o kũũ puoreŋ. Kyɛ Joonataŋ da sagɛɛŋ ka Jehoova la kaa iri Deevid ka o di a naaloŋ Sɔɔl kũũ puoreŋ. Joonataŋ da ba tɔglɔ Sɔɔl a meŋ erɛ Deevid nyuuri. O poɔ da ba sãã neŋ puubu na zaa baŋ da de korɔ Deevid na, o da ba kyɛllɛ zirii na meŋ Sɔɔl naŋ da ŋmaara kyaara Deevid na. (1 Saa. 20:24-34) Ka lɛ te meŋ na baŋ tɔglɛɛ Joonataŋ bee? Ka te zɔmenneŋ wa nyɛ apoɔsoe mine, te poɔ maŋ pɛleŋ bee? Ka ba naŋ wa tuoro yelkpeɛne te maŋ dii la ba sukyie a soŋ ba meŋ? Ka teneeŋ woŋ yelfaa kaŋa kyaare te zɔmeŋɛ na, ka lɛ te maŋ lonnee wieoŋ lɛ a sagaadi bee? Kyɛbee, te maŋ e la te yɛlɛ aŋa Joonataŋ, a maŋ yi yelmennoŋ poɔŋ a are te zɔmeŋɛ na puoreŋ?
Baabole Poɔ Yelsonne
w05 3/15 24 wɛl. 4
Yelnimizeere Naŋ Be A Dɛndɛŋ Saamiuel Gane Poɔ
21:12, 13. Jehoova kaarɛɛ soriŋ ka te maŋ teɛre yɛlɛ gaa tɔɔre a kyɛ de bammo na o naŋ ko te na toŋ neŋ toma soŋ, ka lɛ vɛŋ ka te toɔ̃ are te yelkpeɛne zaa noɔreŋ. O ko teŋ o Yelbiri na, o Yelbiri na maŋ soŋ teŋ teŋ baŋ yɛlɛ naŋ na baŋ yi te yel-erre poɔŋ wa, a ko te bammo a kyɛ maŋ soŋ te teŋ teɛre yɛlɛ gaa tɔɔre meŋ. (Yeng Yelibie 1:4) A lantaapuoruu nembɛrɛ meŋ bebeŋ a na toɔ̃ de sommo ko te.
APRIL 18-24
BAABOLE POƆ YELNIMIZEERE | 1 SAAMIUEL 23-24
“Di Kannyiri A Kyɛnlɛ Jehoova”
w04 4/1 16 wɛl. 8
Ka Yɛlɛ Mineŋ Wa Leɛre Ho Zemmo Poɔŋ, Dɛle Naaŋmen Vooroŋ Soŋ Na Sommo
8 Deevid da ba boɔrɔ ka o de o nu siine Sɔɔl. O da wulee sagediibu a kyɛ di kannyiri meŋ. O da de la a yɛlɛ zaa eŋ Jehoova nuureŋ. Saŋa na a naa naŋ da yi a pi-bɔge poɔ a gaa na, Deevid da de la kɔkɔkpeɛŋaa a boɔloo, a yelkoo ka: “Jehoova di N ne bo sɛrɛɛ. Jehoova yaa N sane ho eŋɛŋ. Kyɛ maaŋ nu koŋ siine bo.” (1 Saamiuel 24:12) Aneazaa ka o da baŋɛɛŋ ka yɛlɛ na Sɔɔl naŋ erɛ na ba soma, kyɛ Deevid da ba boɔrɔ ka o yaa a sane o meŋɛŋ. O da ba yele yelfaare meŋ korɔ Sɔɔl bee a yele Sɔɔl yelfaare. Gbɛɛ yaga poɔŋ, Deevid da maŋ nyɔgɛɛ o meŋɛ, azuŋ o da ba de o meŋɛ faŋa e yelzaa. Kyɛ, o da dɛlɛɛ Jehoova ka o na sɛgrɛɛ yelzaa soŋ.—1 Saamiuel 25:32-34; 26:10, 11.
w04 6/1 22-23
Ho Vɛŋɛɛŋ Ka Yelkpeɛne Ho Naŋ Tuoro Wulo Bo Yɛlɛ Naŋ Seŋ Ka Ho E Ho Zemmo Poɔŋ Bee?
Yɛlɛ ata soba teŋ zanne la ŋa, aseŋ ka te maŋ di kannyiri kyɛ kyɛnlɛ Jehoova, a ba seŋ ka te tu sori naŋ ba kyaare a Baabole a mɔɔrɔ ka te leɛre te zemmo yɛlɛ na. Yezu potuuro Gyimisi da sɛgɛɛŋ ka: “Yɛ vɛŋ ka kannyiri diibu paale o toma, ka yɛ nyɛ paale a koŋ kɔŋ yelzaa.” (Gyimisi 1:4) Ka teneeŋ di kannyiri saŋa na teŋ tuoro yelkpeɛne, lɛ na vɛmeŋ ka te “kannyiri diibu na paale o toma.” Ka teneeŋ di kannyiri a are te yelkpeɛne zaa noɔreŋ, a zagre ka te tu sori naŋ ba kyaare a Baabole a iri te yelkpeɛne na bare, lɛ yɛŋ te sagediibu na paaleŋ a e kpoŋ, teneeŋ meŋɛ na nyɛɛ lɛ te sagediibu naŋ e kpeɛŋaa a seŋ. Gyoosef ane Deevid da taaɛ ana kannyiri ŋa tɔ. Saŋa na baŋ da tuoro yelkpeɛne na, ba da ba boɔrɔ ka ba tu sori kaŋa naŋ na sãã Jehoova poɔ kyɛ iri ba dɔgɛɛ na bare. Kyɛ, ba da mɔɔɛ ba mɔɔbo zaa a are a yelkpeɛne na baŋ da tuoro na noɔreŋ. Ba da kyɛnlɛɛ Jehoova, ba da nyɛɛ maaloo yaga zaa baŋ di kannyiri kyɛ kyɛnlɛ Jehoova na! Jehoova da tu la a dɔbɔ ŋa eŋɛŋ kyɛ faa o noba na, a iri ba baŋ deɛ o noba na weɛ.—Munpiilee 41:39-41; 45:5; 2 Saamiuel 5:4, 5.
Te meŋ na baŋ tuoree yelkpeɛne te zemmo poɔŋ naŋ na baŋ vɛŋ ka te boɔrɔ ka te tu sori naŋ ba kyaare a Baabole kyɛ sɛgre a yɛlɛ. Aŋa mannoo poɔŋ, ka lɛ ho eŋɛ kyoɔrɛɛŋ ho naŋ kyɛnlɛ saŋa zaa kyɛ naŋ ba nyɛ kultatɔ na bee? Ka lɛ na, kaara soŋ a ta wa zagre Naaŋmen noɔre na o naŋ ko te ka te kulo taa “a Daana eŋɛ” na. (1 Korinti 7:39) Ka lɛ ho tuoree yelkpeɛne ho kultaa na poɔŋ bee? Ka hooŋ tɔglɔ a donɛɛ ŋa siiloŋ na, lɛ na vɛmeŋ ka ho bare a kultaa bee ka yɛ wɛltaa, kyɛ a aseŋ ka ho mɔɔ kyɛ vɛŋ ka yɛ sɛgre yelkpeɛne zaa yɛ naŋ tuoro ho kultaa na poɔŋ. (Maalakai 2:16; Efesu 5:21-33) Ka lɛ libie yɛlɛ eɛ kpeɛŋaa ko bo, ka lɛ vɛŋ aŋ e kpeɛŋaa ka ho kaara ho booree deme yelfɛree zieŋ bee? Ka hooŋ di kannyiri a kyɛnlɛ Jehoova, lɛ na vɛmeŋ ka ho ta gaa toŋ toma mine naŋ ba seŋ neŋ, bee toma a paaloŋ bege naŋ ba tere sori ka noba tonɔ, ka lɛ na vɛŋ ka ho nyɛ libie kaa ho yideme na. (Yieme 37:25; Hiburu 13:18) Yelmeŋɛ la, aseŋ ka te zaa maŋ mɔɔ te mɔɔbo zaa saŋa na teŋ tuoro yelkpeɛne na, ka teneeŋ e lɛ Jehoova na maale teŋ. A yi saŋa na teŋ moɔ̃ nimiri a erɛ lɛ na, yɛ vɛŋ ka te naŋ are kpeɛŋaa a kyɛnlɛ Jehoova, o na sɛgrɛɛ a yɛlɛ wagre naŋ seŋ poɔŋ a ko te.—Maika 7:7.
Baabole Poɔ Yelsonne
w17.11 27 wɛl. 11
Ta Tere Sori Ka Bonzaa Vɛŋ Ka Ho Kɔŋ A Kyɔɔtaa
11 Ka teneeŋ taa nɔmmo ane nimimaaroŋ te sukyieŋ, a na vɛmeŋ ka te ta erɛ nyuuri. Naaŋmen Yelbiri na yelka: “Nɔmmo waa la kannyiri, nɔmmo waa la nimibaaloŋ, nɔmmo ba erɛ nyuuri.” (1 Kor. 13:4) Ka teneeŋ boɔrɔ ka te iri nyuuri yi te sukyie poɔŋ, aseŋ ka te taa teɛroŋ na Naaŋmen naŋ taa kyaare te yɔɔmine na. Aseŋ ka te nyɛ te yɔɔdɔba ane te yɔɔpɔgeba ka te zaa e la a Krista eŋdaa bonyeni. A yɛlɛ ŋa na soŋ teŋ ka te maŋ taa te yɔɔmine yɛlɛ, aŋa lɛ a Baabole naŋ ko te kawane ka: “Ka a nandaa kaŋaŋ wa nyɛ yuori, a zaa maŋ laŋ ne o la a kyellɛ.” (1 Kor. 12:16-18, 26) Ka te yɔɔ kaŋaŋ wa nyɛ maaloo, a ba seŋ ka te erɛ nyuuri, kyɛ aseŋ ka te vɛŋ ka te poɔ pɛle o yɛlɛ. Hooŋ leɛteɛre Naa Sɔɔl bidɔɔ Joonataŋ ewuli soŋ na. O da ba erɛ nyuuri saŋa na baŋ da iri Deevid ka o zeŋ a nakogi zuŋ Sɔɔl kũũ puoreŋ na. Kyɛ, o da eŋɛɛ Deevid faŋa. (1 Saa. 23:16-18) Ka lɛ te meŋ na baŋ taaɛ nimimaaroŋ ane nɔmmo aŋa Joonataŋ bee?
APRIL 25–MAY 1
BAABOLE POƆ YELNIMIZEERE | 1 SAAMIUEL 25-26
“Ka Ho Suuriŋ Wa Iri Ho Maŋ Erɛɛ Yelzaa Naŋ Wa Ho Teɛroŋ Poɔ Bee?”
ia 78 wɛl. 10-12
O Da De La Yɛŋ Toŋ Neŋ Toma
10 Bo gyogo ka a sogyare naŋ da tonɔ tonkpeɛne na da taa neŋ a pekyeeneba? A da naŋ e la mɔlɔ ko ba ka ba maŋ nyɔge a pere kaŋa ko a ɔɔ. Kyɛ lɛ naane baŋ da erɛ. Kyɛ a sogyare bama da waa ŋa daŋkyini naŋ ŋmaa gyeere Neebal peere ane o tontonneba na. (Kanne 1 Saamiuel 25:15, 16.) Peere ane pekyeeneba da maŋ tuoree yelkpeɛne yaga moɔ poɔŋ. Dun-faare da maŋ bebeŋ yaga zaa. A Izerayɛl samun-duri sɛŋ tɛribogu na meŋ da peɛlɛɛ zie kaŋa nannyige faare naŋ da maŋ wa zu bee a fa noba boma.
11 A da ba e mɔlɔ ko Deevid ka o ko a dɔbɔ ŋa zaa bondirii a wɛgyɛŋ poɔŋ. Azuŋ, bebiri kaŋa Deevid da toŋ la o tontonneba pie ka ba gaa te sɔre sommo yi Neebal zie. Deevid da kaa iree wagre naŋ seŋ neŋ. A da e la saŋa na baŋ dire tigri kaŋa, azuŋ ba da ko la peere yaga. A da eɛ saŋa meŋ baŋ da maŋ tɔrɔ boma ka bondirii meŋ da maŋ pore. Deevid da kaa iree yelbie naŋ soma yaga, o da de la yelbie naŋ wulo gyeremɛ a kyɛ soma ko neŋkpoŋ meŋ toŋ neŋ toma. O gba da yelko la Neebal ka “o bidɔɔ Deevid” la. Neebal naŋ da kore Deevid zuŋ, Deevid da korooŋ gyeremɛ. Wala ka Neebal da e o yɛlɛ?—1 Saa. 25:5-8.
12 O suuri da iree yaga zaa! A bipɔlee na yɛlɛ teŋ yeli a piilee saŋa na da mannɛɛ a yɛlɛ ko Aabigel ka “o nyɔge baŋ toto.” Neebal naŋ da ba zoro vii na zuŋ, o da piili ŋmoonɔŋ yaga, bonso o boroboro, o koɔ̃, ane o nɛne na yɛlɛ da fɛrooŋ yaga oŋ ba boɔrɔ ka o de a ko ba. O da eɛ Deevid seɛ la, a yeli ka o ba taa tɔnɔ zaa. A de o manne neŋ gbaŋgbaa naŋ zo yi o neŋkpoŋ zie. Teɛroŋ na Neebal naŋ da taa kyaare Deevid na neŋ o zu ka Sɔɔl da taa. Sɔɔl da haɛ Deevid. Kyɛ ba kaŋa zaa da ba taa teɛroŋ na Jehoova naŋ taa na. Naaŋmen da nɔŋ la Deevid, o da ba nyɛ Deevid ka o e la gbaŋgbaa naŋ zo yi o neŋkpoŋ zie, kyɛ o da nyɛɛŋ ka o e la neɛ naŋ na di naaloŋ a kaara a Izerayɛl paaloŋ.—1 Saa. 25:10, 11, 14.
ia 80 wɛl. 18
O Da De La Yɛŋ Toŋ Neŋ Toma
18 Aabigel da yelko la Deevid ka o na la ŋmɛ gbɛre a kyɛ da sɔre Deevid ka o vɛŋ koo. O da yelee yelmeŋɛ naŋ be a yɛlɛ poɔŋ ka o serɛ ba taa tɔnɔ zaa, aŋa lɛ o yuori naŋ wuli na. Aminekaŋaŋ o da boɔrɔŋ ka Deevid baŋ ka, ka o naŋ de suuri te tage a dɔɔ ŋa naŋ ba taa tɔnɔ na toorii o koŋ nyɛ gyeremɛ zaa yi a poɔŋ. O yelyaga na da wuleeŋ ka o dɛlɛɛ Deevid bonso Deevid da arɛɛ Jehoova gbɛbɔgreŋ. A da yelka Deevid zɔɔrɔ la “Jehoova zɔɔre.” O yelyaga na da wuleeŋ ka o baŋ la noɔre emmo na Jehoova naŋ eŋ ka Deevid na di la a naaloŋ na, saŋa na o naŋ yelka: “Jehoova . . . na iri boŋ ka ho e kaara bee wedeɛrɛ Izerayɛl” paaloŋ poɔŋ. O da la eŋɛɛ Deevid faŋa ka o ta wa erɛ yelzaa naŋ na vɛŋ ka o di zĩĩ sane, bee yelkaŋa naŋ na vɛŋ ka Deevid taa “sukyiri-daŋ.” Aminekaŋaŋ o da boɔrɔŋ ka o wuli ka a na toɔ̃ vɛmeŋ ka Deevid zoma dɔnnoo a puoreŋ. (Kanne 1 Saamiuel 25:24-31.) Yelbie na oŋ da yi nimimaaroŋ poɔŋ yele na da toɔrɛɛ sukyiri yaga zaa!
Baabole Poɔ Yelsonne
ia 80 wɛl. 16
O Da De La Yɛŋ Toŋ Neŋ Toma
16 A yɛlɛ ŋa wuleeŋ ka Aabigel da zagrɛɛŋ ka o sigri o meŋɛ ko o serɛ naŋ da e a booree zudaana na bee? Ai, teɛre ka neɛ na Jehoova naŋ sɔ naaloŋ kãã na la ka Neebal da e potuo. A yɛlɛ ŋa oŋ da e na da na toɔ̃ de la kũũ waneŋ Neebal die noba zaa naŋ da ba baŋ o faaloŋ tommo na zuŋ. Ka Aabigeleŋ da ba e yelkaŋa, ka lɛ o nu da koŋ poɔ o serɛ faaloŋ tommo na poɔŋ bee? A yi a yɛlɛ ŋa poɔŋ, o da nyɛɛŋ ka aseŋ ka o sigri o meŋɛ ko Naaŋmen sɛre kyɛ sigri o meŋɛ ko o serɛ na meŋ.