Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2023 Watch Tower Bible and Tract Society of Pennsylvania
JULY 3-9
BAABOLE POƆ YELNIMIZEERE | EEZIRA 4-6
“Yɛ Iri Yɛ Nuure A Naaŋmen Die Ŋa Toma Eŋɛŋ”
w22.03 18 wɛl. 13
Ho Nyɛɛ Bon Na Zekaraiya Naŋ Da Nyɛ Na Bee?
Ba da de la ba nuure dɔgle a ŋmenpuoredie meɛbo toma na zuŋ. Kyɛ, a dɔbɔ na baŋ da kaa iri ka ba de a toma weɛ na, Ŋmenpuore Wedeɛrekpoŋ Gyɛsua (kyɛbee Gyoosua) ane Gɔbena Zeruubabɛl da ireeŋ “a piili ka ba mɛ Naaŋmen die na.” (Eezira 5:1, 2) A Gyuu noba mine teɛroŋ poɔŋ, a gbɛre ŋa baŋ da de na da ba soma fẽẽ zaa. Bonso, ba koŋ baŋ de a ŋmenpuoredie meɛbo toma sɔgle ba dɔndɔnne na. Ba dɔndɔnne na meŋ da eɛ siri ka ba tu sori zaa baŋ na toɔ̃ a sãã a ŋmenpuoredie meɛbo toma. A dɔbɔ bayi ŋa, Gyoosua ane Zeruubabɛl da boɔrɛɛ sieree naŋ wuli ka Jehoova arɛɛ ba puoreŋ. Jehoova meŋ da ko baŋ a sieree ŋa. Sobuoŋ?
w86 2/1 29, daga wɛl. 2-3
Jehoova Niŋe “Daaŋ Be La A Gyuu Nembɛrɛ Eŋɛŋ”
Saŋa na a Gyuu noba naŋ da yi Baabilɔŋ gbaŋgbaaloŋ poɔ a wa na, yuomo pie neŋ ayoɔbo da wa parɛɛŋ ka ba ba lɛ e yelzaa. Daŋyelba Haagai ane Zekaraiya da eŋɛɛ a Gyuu noba faŋa a nyagre ba enne, ka lɛ vɛŋ baŋ lɛ iri piili a meɛrɛ Jehoova ŋmenpuoredie na. A da ba kɔɔre kyɛ ka a Peerisiya paaloŋ nembɛrɛ da iri zɔɔrɔ ne ba. A Gyuu noba dɔndɔnne ŋa da soore baŋ ka, “Nembuoŋ ko yɛ noɔre ka yɛ mɛ a ŋmenpuoredie de-kpoŋ ŋa?”—Eezira 5:1-3.
Lɛ na baŋ na iri a soorebiri ŋa noɔre da eɛ nimizeɛ yaga zaa. Ka a Gyuu noba nembɛrɛŋ vɛŋ ka dabeɛ̃ kpɛ ba, ba na barɛɛ a ŋmenpuoredie meɛbo toma. Ka a nembɛrɛŋ meŋ iri zɔɔrɔ neŋ a paaloŋ kaareba ŋa, ba na de la ba nuure dɔgle a ŋmenpuoredie meɛbo toma zu. Azuŋ, a nembɛrɛ (aminekaŋaŋ Gɔbena Zeruubabɛl ane Ŋmenpuore Wedeɛrekpoŋ Gyoosua la da de ba weɛ), ba da mãã la ba menne a tu yɛŋ soriŋ kyɛ iri ba soorebiri na noɔre ko ba. Ba da leɛteɛrɛɛ a paaloŋ kaareba ŋa ka, saŋa kaŋa naŋ pare, Sairus la da ko a Gyuu noba sori ka ba wa tonɔ a toma na ba naŋ tonɔ na. A paaloŋ kaareba ŋa da baŋɛɛŋ ka, ka ba naŋ biŋ bege Peerisiya paaloŋ, neɛzaa koŋ baŋ leɛre a bege. Azuŋ, a paaloŋ kaareba ŋa da iree ba nuure yi a ŋmenpuoredie meɛbo toma poɔŋ. Lɛ da vɛŋɛɛŋ ka a Gyuu noba da lɛ moɔ̃ nimiri meɛrɛ a ŋmenpuoredie a te ta saŋa na Naa Daraiyus meŋ naŋ da ko ba sori ka ba tɔnne a toma.—Eezira 5:11-17; 6:6-12.
w22.03 15 wɛl. 7
Ho Nyɛɛ Bon Na Zekaraiya Naŋ Da Nyɛ Na Bee?
Leɛroo kaŋa da waɛŋ a da soŋ a Gyuu noba naŋ da meɛrɛ a ŋmenpuoredie na. Bo leɛroo la da wa? Yuoni 520 B.C.E. poɔŋ, napaalaa kaŋa baŋ boɔlɔ Daraiyus I, da wa piili diree naaŋ a kaara Peerisiya paaloŋ na. A yi o naaloŋ diibu na yuomo ayi poɔŋ, o da wa nyɛɛŋ ka noba mine da tu la sori naŋ ba seŋ neŋ poɔŋ a kyɛ de ba nu dɔgle a ŋmenpuoredie meɛbo toma na zu. Azuŋ, Daraiyus da de la o naaloŋ kpeɛ̃o na a ko a Gyuu noba sori ka ba toŋ a toma baare. (Eezira 6:1-3) Saŋa na a noba zaa naŋ da wa woŋ a duoro na, ba nɔɛ zaaŋ da mãã. Kyɛ a da ba baare beŋ. A naa da biŋee bege ka, noba naŋ ŋmaa gyeere a Gyuu noba na ta wa derɛ ba nuure eŋnɛ a ŋmenpuoredie meɛbo toma poɔŋ. A naa gba da lɛ yeleeŋ ka ba ko a Gyuu noba libie ane bontaree ka ba de mɛ a ŋmenpuoredie. (Eezira 6:7-12) A yɛlɛ ŋa da vɛŋɛɛŋ ka a Gyuu noba da de yuomo anaare mɛ a ŋmenpuoredie baare. Yuoni 515 B.C.E. baŋ da mɛ o baare.—Eezira 6:15.
w22.03 19 wɛl. 16
Ho Nyɛɛ Bon Na Zekaraiya Naŋ Da Nyɛ Na Bee?
Sori na kaŋa Jehoova naŋ maŋ tu kyɛ korɔ te sowuli la “a gbaŋgba-bivelaa ane yɛmbaŋna” zie. (Mat. 24:45) Saŋa kaŋa, a gbaŋgba-bivelaa na baŋ ko teŋ sowuli te naŋ ba baŋ a pare te baare. Aŋa mannoo poɔŋ, ba na baŋ ko teŋ sowuli a kyaare lɛ teŋ na toɔ̃ e a nare te menne a ko saammo kpoŋ kaŋa te naŋ teɛre ka o daaŋ koŋ baŋ e zie na te naŋ be na. Kyɛbee saŋa kaŋa, te na baŋ teɛreŋ ka a gbaŋgba-bivelaa de la baaloŋ faa kaŋa yɛlɛ nimizeɛ yaga zaa te gaali. Wala aŋ seŋ ka te e ka teneeŋ wa nyɛ ka a sowuli na baŋ korɔ te na ba e yɛlɛ naŋ na baŋ soŋ te? Te na baŋ leɛteɛrɛɛ tɔnɔ na a Izerayɛl biiri naŋ da nyɛ saŋa na baŋ da sage kawane na Gyoosua ane Zeruubabɛl naŋ da korɔ ba na. Te na baŋ lɛ teɛrɛɛ a Baabole poɔ yɛlɛ mine te naŋ kanne. Saŋa kaŋa nensaaleba nimitɔɔreŋ, yɛŋ ba maŋ kye sowuli na Naaŋmen naŋ korɔ o puorebiiri na. Kyɛ a baaraa zaa, noba naŋ maŋ tu o sowuli na maŋ deɛ la ba menne yi toɔrɔ poɔŋ.—Sar. 7:7; 8:10.
Baabole Poɔ Yelsonne
w93 6/15 32 wɛl. 3-5
Ho Na Baŋ Dɛlɛɛ A Baabole Bee?
Taasus teŋkpɛŋ na poɔŋ baŋ da maale a libi-kuruu ŋa. Zenɛ ŋa, a zie ŋa be la paaloŋ na baŋ boɔlɔ Turkey na, a zie ŋa be la a paaloŋ samun-duri sɛŋ. Ba da maalɛɛ a libi-kuruu ŋa saŋa na a Peerisiya gɔbena baŋ boɔlɔ Mazaeus naŋ da dire naaloŋ aŋa yuomo 2,400 naŋ pare. Ba sɛge eŋɛɛ a libi-kuruu ŋa poɔŋ ka a dɔɔ ŋa da la a teŋɛ na naŋ be a “Maŋ-gaŋini gbandige” na kaara. A Maŋ-gaŋini ŋa kyɛbee a baa ŋa la a Yuferate Baa na.
Kyɛ bonso ka a yɛlɛ ŋa e nimizeɛ yaga zaa? Ananso la ka, ho na baŋ nyɛɛ a yelbie ŋa neŋ a zu ho Baabole poɔŋ. Eezira 5:6–6:13 wulee lɛ na gɔbena Taatenai ane Peerisiya naa Daraiyus naŋ da sɛge lɛtare a ko taa. Dama na baŋ da dire a lɛtare poɔŋ da kyaarɛɛ lɛ na a Gyuu noba naŋ da meɛrɛ a ŋmenpuoredie naŋ be Gyɛruzɛlɛm na. Eezira da eɛ neɛ naŋ kyile, a da maŋ leɛ sɛge Naaŋmen Bege na eŋ gaŋ-yobo poɔŋ. Azuŋ, aseŋ ka o maŋ sɛge yɛlɛ naŋ da erɛ meŋɛmeŋɛ, a tori a kyɛ e yelmeŋɛ meŋ. Ho na baŋ nyɛɛ a yɛlɛ ŋa yi Eezira 5:6 ane 6:13, beŋ ka Eezira da sɛge ka Taatenai da la “a Maŋ-gaŋini gbandige na kaara.”
Eezira da sɛgɛɛ a yɛlɛ ŋa yuoni 460 B.C.E. Yuomo 100 sɛre kyɛ baŋ wa maale a libi-kuruu ŋa. Kyɛ noba mine na yeliŋ ka, ka ba naŋ nyɛ takoreŋ saŋa paaloŋ kaara kaŋa yuori libi-kuruu kaŋa eŋɛŋ a ba e yelnimizeɛ zaa. Kyɛ ka hooŋ na baŋ dɛle a Baabole sɛgsɛgreba a yi yelbilii poɔŋ, ho ba nyɛ ka yɛŋ bebeŋ ka ho sage yɛlɛ na zaa ba naŋ sɛge biŋ na di bee?
JULY 10-16
BAABOLE POƆ YELNIMIZEERE | EEZIRA 7-8
“Eezira Gyogo Na Da Vɛŋɛɛŋ Ka Jehoova Nyɛ Pugibu”
w00 10/1 14 wɛl. 8
Boma Zannoo—Te Na Baŋ Nyɛɛ Tɔnɔ Yi Be, A Eɛ Yɛlɛ Naŋ Maŋ Korɔ Te Popeɛloŋ Meŋ
Aseŋ ka te de te sukyiri zaa a nɔŋ Jehoova Yelbiri na, bonso ka neɛŋ wa boɔrɔ yelkaŋa yaga zaa, o maŋ de la a yɛlɛ eŋ o sukyiriŋ. Azuŋ aseŋ ka te maŋ mãã te menne a teɛre Baabole ziiri na teŋ kanna na yɛlɛ gaa tɔɔre. Aseŋ ka te maŋ teɛrɛ Jehoova yelbiri na yɛlɛ soŋ zaa, a toɔ̃ nyɛ lɛ teŋ na baŋ e a de a tonɔ neŋ toma meŋ. Lɛ wuleeŋ ka aseŋ ka te maŋ bɔ zie naŋ e bɔin a teɛre a yɛlɛ gaa tɔɔre, a kyɛ puore sɔre Jehoova ka o soŋ te ka te woŋ a muni meŋ soŋ. Aŋa Eezira, aseŋ ka te meŋ maŋ nare te sukyie ka te kanne a kyɛ zanne Naaŋmen Yelbiri na. A Baabole yeleeŋ a kyaare Eezira ka: ‘Eezira daaŋ [narɛɛ] o sukyiriŋ ka o bɔ Jehoova bege na, a tuuro a bege kyɛ wulo o yeltuurii ane nɔbinnii na Izerayɛl poɔŋ.’ (Eezira 7:10) Ho nyɛɛ a yɛlɛ ata na zuŋ Eezira naŋ da nare o sukyiri? O da narɛɛ o sukyiri ka o zanne a bege, a de yɛlɛ na oŋ zanna na tonɔ neŋ toma, a kyɛ wulo o taaba meŋ. Aseŋ ka te tɔglɔ o ewuli soŋ na.
si 75 wɛl. 5
A Baabole Gane Naŋ Tɔre 13—1 Tungkori
Eezira da e la dɔɔ naŋ kyile yaga zaa. Azuŋ onaŋ da seŋ neŋ ka o sɛge a takoreŋ yɛlɛ ŋa. A Baabole yeleeŋ a kyaare Eezira ka: ‘Eezira daaŋ [narɛɛ] o sukyiriŋ ka o bɔ Jehoova bege na, a tuuro a bege kyɛ wulo o yeltuurii ane nɔbinnii na Izerayɛl poɔŋ.’ (Eezira 7:10) Jehoova da de la o vooroŋ soŋ na a soŋ neŋ Eezira. A Peerisiya naa naŋ da dire naaloŋ a kaara a donɛɛ zaa na meŋɛ da wa nyɛɛŋ ka Naaŋmen da sonnɛɛ Eezira. Azuŋ o da kooŋ kpeɛ̃o ka o te kaara noba naŋ da be a Gyuuda teŋɛ na. (Eezira 7:12-26) Eezira da nyɛɛ kpeɛ̃o yi Naaŋmen zie, ka a Peerisiya naa meŋ da koo kpeɛ̃o. Lɛ da soŋɛɛ Eezira oŋ toɔ̃ peɛre yɛlɛ yaga a yi takoreŋ saŋa gan-korɔ naŋ da bebe o saŋa naŋ a toɔ̃ sɛge a yɛlɛ ŋa velaa zaa.
it-1 1158 wɛl. 4
Sigrimennoŋ
Sigrimennoŋ Maŋ Vɛmeŋ Ka Neɛ Nyɛrɛ Sowuli Naŋ Seŋ Neŋ. Naaŋmen maŋ korɛɛ neɛ naŋ sigri o meŋɛ sowuli naŋ soma. Eezira da taaɛ toŋ tegroŋ kaŋa naŋ dɔgle o zuŋ. A da eɛ o ferebo toma ka o de dɔbɔ naŋ pare 1,500 weɛ a yi Baabilɔŋ a gaaneŋ Gyɛruzɛlɛm. A ŋmenpuore wedeɛreba, a ŋmenpuoredie tontonneba, a pɔgeba ane a bibiiri da ba poɔ. Kyɛ lɛ yoŋ naane, a da seŋ ka ba da tuo salema ane ware naŋ e tegroŋ yaga a gaaneŋ Gyɛruzɛlɛm. A salema ane ware la baŋ da de maale a ŋmenpuoredie oŋ veɛlɛ yaga. Ba da boɔrɛɛ goobu a yi a sokyɛŋ ŋa poɔŋ. Kyɛ, Eezira da ba boɔrɔ ka o sɔre a Peerisiya naa ka o ko ba sogyare naŋ na beɛle ba gaaneŋ Gyɛruzɛlɛm. Ka o naŋ da e lɛ, a da naŋ wuliŋ ka o dɛlɛɛ nensaaleba kpeɛ̃o. Bonso, Eezira meŋɛ da yelko la a naa ka: “Te Naaŋmen na nu be la bana na zaa naŋ boɔroo na enneŋ, a erɛ ba soŋ.” Azuŋ, Eezira da yeleeŋ ka a noba zaa leŋ nɔɛ, a sigri ba menne Jehoova nimitɔɔreŋ. Ba da puore sɔrɛɛ Naaŋmen, ka Naaŋmen da kyɛlle woŋ ba koŋ-sɔroo na a go ba yi ba dɔndɔnne nuureŋ. Naaŋmen da soŋ baŋ baŋ kyɛŋ a sokyɛŋ ŋa naŋ e kpeɛŋaa yaga zaa na a te ta Gyɛruzɛlɛm laafeɛ. (Ez 8:1-14, 21-32) Daŋyele Daaniel da naŋ be la Baabilɔŋ teŋɛ na poɔŋ, o da eɛ neɛ Naaŋmen naŋ da nɔŋ o yɛlɛ yaga. Azuŋ, Naaŋmen da toŋ la maleke oŋ wa o zie a wa iri yelnyɛraa kaŋa koo. Bonso ka Naaŋmen da e lɛ? Ananso la ka, Daaniel da sigree o meŋɛ Naaŋmen nimitɔɔreŋ, a da maŋ boɔrɔ sowuli ane yɛlɛ muni wommu a yire o Naaŋmen na zieŋ.—Da 10:12.
Baabole Poɔ Yelsonne
w06 1/15 19 wɛl. 10
Yelnimizeere Naŋ Be A Eezira Gane Poɔ
7:28–8:20—Bonso ka a Gyuumine naŋ da be Baabilɔŋ da naara ka ba poɔ Eezira eŋɛŋ a gaa Gyɛruzɛlɛm? Saŋa na a dɛndɛŋ Gyuu noba naŋ da leɛ gaa Gyɛruzɛlɛm na, ba da ba e yaga, azuŋ ba da ba zeŋ a Gyɛruzɛlɛm teŋɛ na zaa. Yuomo 60 mine puoreŋ, Eezira neŋ a Gyuu noba mine da boɔrɔŋ ka ba leɛ gaa Gyɛruzɛlɛm. Zemmo da ba e mɔlɔ fẽẽ zaa Gyɛruzɛlɛm poɔŋ a lɛ saŋa na. A lɛ saŋa na meŋ gomeŋɛ da ba kye a teŋkpɛŋ poɔŋ. A Gyuu noba mine da eɛ bondaaneba Baabilɔŋ poɔŋ, azuŋ ka ba naŋ leɛ gaa Gyɛruzɛlɛm ba koŋ te nyɛ a bondaaŋ boma ŋa mine beŋ. A da ba e mɔlɔ meŋ ka ba kyɛŋ a sotɔɔre ŋa a yi Baabilɔŋ a gaa Gyɛruzɛlɛm. Azuŋ sɛre ka neɛ na sage a leɛ gaa Gyɛruzɛlɛm na, aseŋ ka o soba taa sagediibu naŋ e kpeɛŋaa Jehoova eŋɛŋ, a taa eŋnyagroŋ a ko yelmeŋɛ puoruu ane nyaa meŋ. Haali Eezira meŋɛ da puore sɔrɛɛ faŋa emmo yi Jehoova zie sɛre kyɛ gaa Gyɛruzɛlɛm. Eezira da eŋɛɛ a noba faŋa, ka booree deme naŋ ta 1,500, aminekaŋaŋ ba zaa noɔre da eɛ 6,000, naŋ da sage ka ba leɛ gaa Gyɛruzɛlɛm. Saŋa na Eezira naŋ da lɛ mɔɔ kyɛ e yɛlɛ mine poɔ na, Liivai noba naŋ ta 38 ane a ŋmenpuoredie tontonneba naŋ ta 220 da poɔ la o eŋɛŋ a gaa Gyɛruzɛlɛm.
JULY 17-23
BAABOLE POƆ YELNIMIZEERE | EEZIRA 9-10
“Tokpeɛne Maŋ De La Toɔrɔ Yoŋ Waneŋ”
w06 1/15 20 wɛl. 1
Yelnimizeere Naŋ Be A Eezira Gane Poɔ
9:1, 2—Saŋa na a Izerayɛl biiri naŋ da de pɔgeba naŋ ba yi Izerayɛl na, bonso ka a yɛlɛ ŋa da e nimizeɛ? A Izerayɛl biiri naŋ da yi Baabilɔŋ a gaa Gyɛruzɛlɛm na da seŋ ka ba de yelmeŋɛ puoruu a korɔ Jehoova a te ta saŋa na a Mɛzaaya naŋ na wa. Ka ba naŋ de pɔgeba naŋ ba e Izerayɛl biiri, a na toɔ̃ sããŋɛɛ yelmeŋɛ puoruu. Bonso a pɔgeba na mine a Izerayɛl biiri naŋ da de na da eɛ noba naŋ da puoro baga. Ka ba naŋ ba kaa soŋ, fẽẽfẽẽ a pɔgeba ŋa na baŋ de la zirii puoruu a wa punli a yelmeŋɛ puoruu na a Izerayɛl biiri naŋ da de korɔ Jehoova na. Ka lɛŋ wa e, a na wa ta la saŋa kaŋa ka yelmeŋɛ puoruu bɔre a teŋsare zuŋ. Aŋ mine zie ka Jehoova na tu kyɛ vɛŋ ka a Mɛzaaya wa? Azuŋ ka Eezira noɔre da mãã yaga saŋa na oŋ da nyɛ a noba naŋ erɛ tokpeɛne na.
w09 10/1 10 wɛl. 6
Bo Ka Jehoova Boɔrɔ Yire Te Zieŋ?
Ka teneeŋ maŋ yi te poɔ zaa a sagra Naaŋmen nɔɛ, te na nyɛɛ maaloo yaga. Moosis da sɛgɛɛŋ ka: ‘Tuuro Jehoova nɔkurii . . . na maŋ korɔ yɛ zenɛ na. Tuuraa ho soŋ zuŋ.’ (Wɛlbo 13) Bege zaa Jehoova naŋ ko te, yelzaa o naŋ yelka te e, te soŋ zuŋ la oŋ maŋ yelka te erɛ a yɛlɛ. Jehoova na sage yelka te e yelkaŋa naŋ na pere te bee? A Baabole yelka, “Naaŋmen waa la nɔmmo.” (1 Gyɔɔn 4:8) Azuŋ, te soŋ zuŋ ka Naaŋmen ko te a bege ŋa zaa, bonso o boɔrɔŋ ka te taa zeŋ laafeɛ. (Aizeeya 48:17) Ka teneeŋ erɛ yɛlɛ na zaa Jehoova naŋ boɔrɔ ka te erɛ na, te na deɛ la te menne yi toɔrɔ ane eŋkyere yaga poɔŋ. Kyɛ lɛ yoŋ naane, te na nyɛɛ maaloo naŋ koŋ baŋ baare a yi o Naaloŋ na poɔŋ.
Baabole Poɔ Yelsonne
w06 1/15 20 wɛl. 2
Yelnimizeere Naŋ Be A Eezira Gane Poɔ
10:3, 44—Bonso baŋ da kare a biiri ane a pɔgeba zaa bare? Ka ba naŋ da ba kare a biiri bare, a da naŋ eɛ mɔlɔ ko ba mamine na ka ba leɛ wa a biiri zie. Kyɛ lɛ yoŋ naane, gbɛɛ yaga pɔgeba la maŋ toɔ̃ kaara bibiiri soŋ.
JULY 24-30
BAABOLE POƆ YELNIMIZEERE | NIIHEMAIYA 1-2
“Beŋ La Maŋ Da Puore Sɔre Naaŋmen”
w08 2/15 3 wɛl. 5
Vɛŋ Ka Jehoova Be Ho Nimitɔɔreŋ Wagre Zaa
Saŋa kaŋa a na maŋ fɛreŋ ka te puore sɔre Naaŋmen wieoŋ a bɔ o sommo. A da wa ta la wagre kaŋa, ka Peerisiya Naa Atazɛɛkisis da nyɛ ka o dãã-purɔ na baŋ boɔlɔ Niihemaiya niŋe da sããŋɛɛŋ. Azuŋ, a naa da soorooŋ ka, “Bo yɛlɛ hoŋ boɔrɔ?” ‘Beŋ la ka [Niihemaiya] puore sɔre a Naaŋmen naŋ be sazuŋ na.’ Niihemaiya da koŋ baŋ puore a kɔɔre a lɛ saŋa na. Kyɛ, Naaŋmen da iree o puoro na noɔre koo. Bonso a naa da de la sommo ko Niihemaiya oŋ te soŋ a Gyuu noba baŋ leɛ mɛ Gyɛruzɛlɛm daŋkyime na. (Kanne Niihemaiya 2:1-8.) Ka teneeŋ puore te yoŋ sɛŋ ŋmaa lɛ gba, kyɛ a puoro maŋ taa la kpeɛ̃o yaga.
be 177 wɛl. 4
Lɛ Hoŋ Na Toɔ̃ Tere Yelyaga Ho Naŋ Ba Nare Ho Meŋɛ Kyɛ Baŋ De Ko Bo
Ka hooŋ ba kaara soriŋ kyɛ ka neɛ kaŋa yelko bo ka, ho manne ho sagediibu yɛlɛ koo, boŋ na toɔ̃ soŋ bo ka ho toɔ̃ e lɛ? Tɔglɔ Niihemaiya. O da puoree o yoŋ sɛŋ saŋa na Naa Atazɛɛkisis naŋ da sooroo soorebiri kaŋa na. (Niih. 2:4) A puoreŋ, ho na baŋ maalɛɛ ho teɛroŋ a kyaare sori na hoŋ na tu kyɛ manne a yɛlɛ ko o soba. Ho na baŋ de la a yɛlɛ ŋa mine toŋ neŋ toma: (1) Kaa iri yelnimizeɛ kaŋa kyɛbee yelnimizeere ayi mine hoŋ na baŋ de wuli a yɛlɛ muni soŋ (ho na baŋ iree a yelnimizeere ŋa a yi a Reasoning From the Scriptures gane na poɔŋ). (2) Kaa iri sɛgre na hoŋ na de wuli a yelnimizeere muni ka a pɛle. (3) Nare ho meŋɛ a kyaare lɛ hoŋ na toɔ̃ tu gyeremɛ soriŋ a manne a yɛlɛ muni ko o soba, ka lɛ vɛŋ ka o boɔrɔ ka o kyɛlle woŋ ho yɛlɛ na. Pãã piili yele ho yɛlɛ na.
Baabole Poɔ Yelsonne
w86 2/15 25
Ba Zɛgɛɛ Yelmeŋɛ Puoruu Oŋ Do Saa Yaga Zaa
Saŋa na Niihemaiya naŋ da nyɛ Gyɛruzɛlɛm naŋ gaŋ a e dabore na, a da maŋ vɛmeŋ oŋ puoro sɔrɔ Naaŋmen “ŋmenaa ane zisoɔree” wagre kɔɔroo kaŋa poɔŋ. (1:4, 6) Azuŋ, saŋa na oŋ da wa nyɛ apoɔsori ka o yelko Naa Atazɛɛkisis ka o boɔrɔŋ ka o leɛ te mɛ Gyɛruzɛlɛm daŋkyime na, Niihemaiya da lɛ puoreeŋ. Gbɛɛ yaga Niihemaiya da puore sɔrɛɛ Jehoova a kyaare a yɛlɛ ŋa. Jehoova da iree Niihemaiya puoro na noɔre koo, azuŋ o da nyɛɛ apoɔsori ka o leɛ te mɛ Gyɛruzɛlɛm daŋkyime na.
Yɛlɛ Teŋ Na Baŋ Zanne Yi Be: Niihemaiya da maŋ gaa la Jehoova zie a te bɔ sowuli. Ka a naŋ wa fɛre ka te meŋ de gbɛɛ mine naŋ e nimizeɛ yaga, aseŋ ka te meŋ maŋ “kpimare puoro tegitegilɛ.” A kyɛ de te yel-eere wuli ka te tuuree Jehoova sowuli na.—Urom 12:12.
JULY 31–AUGUST 6
BAABOLE POƆ YELNIMIZEERE | NIIHEMAIYA 3-4
“Ho Na Sage Sigree Ho Meŋɛ A Toŋ Nuure Toma?”
w06 2/1 10 wɛl. 1
Yelnimizeere Naŋ Be A Niihemaiya Gane Poɔ
3:5, 27. A ba seŋ ka te teɛre ka te eɛ neŋtegrɛ yaga zaa te gaali ka te toŋ nuure toma zaa naŋ na vɛŋ ka yelmeŋɛ puoruu nyɛrɛ nimitɔɔre gaabo. A ba seŋ ka te tɔglɔ a Tikoowa “neŋtegrɛ na.” Kyɛ aseŋ ka te tɔglɔ a Tikoowa noba na naŋ da sigri ba menne a yi ba poɔ zaa a tonɔ nuure toma naŋ na vɛŋ ka yelmeŋɛ puoruu nyɛrɛ nimitɔɔre gaabo na.
w19.10 23 wɛl. 11
Bo Ka Jehoova Na Toɔ̃ Soŋ Bo Ka Ho E?
Yuomo yaga mine puoreŋ, Saalum pɔgeyaare na da poɔ la noba naŋ da soŋ baŋ leɛ mɛ Gyɛruzɛlɛm daŋkyime na. (Niih. 2:20; 3:12) Aneazaa ka ba saa da eɛ nabie, kyɛ a Saalum pɔgeyaare ŋa da eɛ siri ka ba toŋ a tonkpeɛŋaa ŋa ane a toma ŋa naŋ eŋnɛ dabeɛ̃ na. (Niih. 4:15-18) Ba da ba waa ŋa a Tikoowa neŋtegrɛ na. A Tikoowa neŋtegrɛ na da ba e siri ‘ka ba sigri ba menne a soŋ’ a toma. (Niih. 3:5) Saŋa na baŋ da de bebie 52 mɛ a daŋkyini baare na, a Saalum pɔgeyaare ŋa poore zaaŋ da pɛle. (Niih. 6:15) Zenɛ ŋa meŋ, te taaɛ te yɔɔpɔgeba naŋ maŋ yi ba poɔ zaa a de popeɛloŋ tonɔ tone kaŋa naŋ e o yoŋ Jehoova puoruu poɔŋ. Ba maŋ sonnɔŋ a meɛrɛ a kyɛ maŋ leɛ maale Jehoova puoruu ziiri na. Ba yelbaŋ, ba eŋnyagroŋ, ane ba yelmennoŋ na maŋ soŋeŋ ka a toma nyɛrɛ nimitɔɔre gaabo.
w04 8/1 18 wɛl. 16
Ho Taaɛ Teɛroŋ Na Krista Naŋ Taa A Kyaare Nembɛree Na Bee?
Kristabiiri zaa, ka ba eɛ baapaalba kyɛbee neŋnyaane, aseŋ ka ba mɔɔ kyɛ taa teɛroŋ na Krista naŋ taa kyaare nembɛree na. A lantaapuoruu poɔŋ, toma yaga bebeŋ teŋ na baŋ toŋ. Azuŋ, ka ba naŋ ko te tone kaŋa naŋ sigi teŋɛ ka te toŋ a lantaapuoruu poɔŋ, a ba seŋ ka te ŋmoonɔ. (1 Saamiuel 25:41; 2 Namine 3:11) Bidɔgreba, yɛ maŋ eŋnɛɛ yɛ biiri ane yɛ baapaalba faŋa ka ba maŋ de popeɛloŋ a tonɔ toma zaa ba naŋ ko ba a Lammozieŋ, a lammobilii ane a lammobɛrɛ zieŋ bee? Yɛ bibiiri na maŋ nyɛ yɛŋ saŋa na yɛŋ tonɔ a toma ŋa naŋ sigi teŋɛ na bee? Te yɔɔdɔɔ kaŋa naŋ tonɔ toma Jehoova Sieree Deme donɛɛ zaa tomazikpɛŋ na pampana ŋa teɛrɛɛ ewuli soŋ na o dɔgreba naŋ e koo na. O yeleeŋ ka: “Teɛroŋ na N dɔgreba naŋ da taa kyaare a Lammozie meeloo ane a lammobɛrɛ ziiri meeloo na da vɛŋɛɛŋ maŋ baŋ ka, ba da de la a toma ŋa nimizeɛ. Gbɛɛ yaga ba maŋ de la ba menne tere ka ba toŋ a toma a soŋ a lantaapuoruu ane ba yɔɔmine, aneazaa ka a toma ŋa da sigee teŋɛ yaga zaa. A gyogo ŋa soŋ maŋ ka lɛ vɛŋ maŋ maŋ yi N poɔ zaa a sage toma zaa ba naŋ ko ma ka N toŋ Bɛɛtiliŋ.”
Baabole Poɔ Yelsonne
w06 2/1 9 wɛl. 1
Yelnimizeere Naŋ Be A Niihemaiya Gane Poɔ
4:17, 18—Sobuo ka neɛ na baŋ de o nu bonyeni a meɛrɛ daŋkyini? A da ba e kpeɛŋaa ko noba naŋ da tuoro a boma ka ba e lɛ. Bonso ka ba naŋ de a boma tuo kyɛbee a de a pare ba bage-begɛŋ, a na baŋ eɛ mɔlɔ ko ba ka ba de ba nu na kaŋa a “taa zɔɔzɔɔ boŋ.” Kyɛ noba naŋ da meɛrɛ a daŋkyini na seŋ ka ba de ba nuure ayi tonɔ a toma, azuŋ ba na yɛŋ da maŋ ‘gyerɛɛ [ba] zɔɔzɔɔsoɔ [ba] lomboriŋ kyɛ meɛrɛ.’ Ba da eɛ siri ka ba zɔɔ neŋ neɛzaa naŋ iri wa ka o zɔɔ ne ba.
AUGUST 7-13
BAABOLE POƆ YELNIMIZEERE | NIIHEMAIYA 5-7
“Niihemaiya Da Tonɔ Korɛɛ O Taaba, O Da Ba Zeŋ Ka Noba Tonɔ Koroo”
w02 11/1 27 wɛl. 3
Noba Naŋ Are Yelmeŋɛ Puoruu Puoreŋ Saŋa Kaŋa Naŋ Pare Ane Zenɛ Ŋa
Niihemaiya da de la o wagre ane o yelbaŋ sonnɔ a Gyuu noba. O da lɛ de la o bontaree meŋ sonnɔ yelmeŋɛ puoruu. O da de la o meŋɛ libie a leɛ da o yɔɔmine naŋ da e gbaŋgbaare na. O da maŋ de la o libie meŋ pɛŋ a noba, kyɛ ba maŋ eŋ koɔ̃ a pɛmmo poɔŋ. Niihemaiya da ba leɛ ‘toɔrɔ’ dɔgle a noba zuŋ. Niihemaiya da eɛ gɔbena, azuŋ a noba da seŋ ka ba maŋ koo libie ka o de kaara o meŋɛ, kyɛ Niihemaiya da yeleeŋ ka a noba ta wa erɛ lɛ. Niihemaiya da yuo la o die ko a noba ka ‘a Gyuumine ane paaloŋ kaareba kɔɔ neŋ lezaayi neŋ pie da maŋ bebe, ka bana na naŋ yi paalonne naŋ ŋmaa gyeere ba ba poɔ.’ Ba maŋ wa di la bondirii o zieŋ. Bebiri zaa, o da maŋ vɛmeŋ baŋ ko ‘nadari bonyeni ane peere naŋ nuoɔ a soma ayoɔbo. Ba da maŋ maalɛɛ noore meŋ ko ba.’ Bebie pie zaa poɔŋ, o da maŋ de la ‘waiŋ tɛɛtɛɛ zaa naŋ bebe yaga zaa a ko a noba.’ O meŋɛ libie oŋ da maŋ de e a yɛlɛ ŋa zaa.—Niihemaiya 5:8, 10, 14-18.
w16.09 6 wɛl. 16
“Ta Vɛŋ Ka Ho Nuure Kyoɔre”
Jehoova sommoŋ, Niihemaiya ane noba naŋ da be o zieŋ na da eŋɛɛ faŋa a tonɔ a toma. Ba da de la bebie 52 a mɛ a daŋkyime zaa baare. (Niih. 2:18; 6:15, 16) Niihemaiya da ba e a toma zukaara yoŋ, o da lɛ soŋɛɛŋ baŋ leɛ mɛ Gyɛruzɛlɛm daŋkyime na. (Niih. 5:16) Lɛ neŋ o zu la, zenɛ ŋa a lantaapuoruu nembɛrɛ naŋ taa nɔmmo yaga maŋ tɔglɛɛ Niihemaiya. Azuŋ, ba maŋ te soŋeŋ a mɛ te puoruu ziiri na mine, kyɛbee a soŋ baŋ meele a kyɛ leɛ maale te Lammoziiri na mine. Ka ba neŋ ba yɔɔmineŋ wa laŋ tonɔ a naaŋ moɔloo toma, kyɛbee ka ba naŋ gaa ka ba te puore ba yɔɔmine ŋa, a maŋ yuo la sori ko ba baŋ eŋ ba yɔɔmine na sukyie naŋ dɔɔnɔ ba na faŋa yaga.—Kanne Aizeeya 35:3, 4.
w00 2/1 32
Sobuo Ka Jehoova Na Tu Kyɛ Teɛre Ho Yɛlɛ?
Ka hooŋ kaa a Baabole poɔŋ, gbɛɛ yaga ka o naŋ wa yelka Naaŋmen “leɛteɛrɛɛŋ,” a wuleeŋ ka o maŋ de la gbɛre a e yelkaŋa naŋ soma. Aŋa mannoo poɔŋ, saŋa na a kɔmpiiri naŋ da wa paale a donɛɛ bebie 150 na, a Baabole yeleeŋ ka, “Ka Naaŋmen daaŋ teɛre Noowa yɛlɛ. . . . Ka Naaŋmen daaŋ vɛŋ ka saseɛ da a teŋgane zuŋ, ka a koɔ̃nɛɛ daaŋ sigi.” (Munpiilee 8:1) Yuomo mine puoreŋ, saŋa na a Filiisitiya noba naŋ da nyɔge Samsen a kyɔge o nibi-gyɛlɛ zaa ŋmare a kyɛ de banzɔlɔ leŋ ne o na, o da puore sɔrɛɛ Jehoova ka: ‘Oo Jehoova Naaŋmen, N sɔrɔ boŋ, teɛre N yɛlɛ. Oo Naaŋmen, N sɔrɔ boŋ, eŋ ma kpeɛ̃o dayeni ŋa.’ Jehoova da leɛteɛrɛɛ Samsen yɛlɛ a koo faŋa naŋ gaŋ nensaalaa faŋa, ka lɛ vɛŋ oŋ toɔ̃ yaa sane Naaŋmen dɔndɔnne na zuŋ. (Saringmaariba 16:28-30) Kyɛ Niihemaiya yɛŋ zieŋ, Jehoova da teɛrɛɛ o yɛlɛ a maale mɔɔbo na zaa o naŋ da mɔɔrɔ na. Lɛ da vɛŋɛɛŋ ka yelmeŋɛ puoruu da leɛ be Gyɛruzɛlɛm poɔŋ.
Baabole Poɔ Yelsonne
w07 7/1 30 wɛl. 15
“Yɛ De Yelsoŋ Toɔ̃ Ne Faaloŋ”
Ata soba, Niihemaiya dɔndɔnne na da tu la a Izerayɛl bie kaŋa baŋ boɔlɔ Simeeya zie kyɛ boɔrɔ ka ba bɛnle Niihemaiya ka o sãã Naaŋmen Bege na. Simeeya da yelko la Niihemaiya ka: “Vɛŋ ka te lantaa Naaŋmen die naŋ, a ŋmenpuore de-kpoŋ na poɔŋ. Vɛŋ ka te pɔge a ŋmenpuore de-kpoŋ denoɛ, bozuŋ ba waanaŋ ka ba wa ko bo.” Simeeya da yelko la Niihemaiya ka noba waanaŋ ka ba ko o, azuŋ aseŋ ka o zo te sɔgle a ŋmenpuoredieŋ. Kyɛ, Niihemaiya da ba e ŋmenpuore wedeɛrɛ. Azuŋ a da na eɛ yelfaa ka o zo te sɔgle a ŋmenpuoredieŋ. Ka lɛ Niihemaiya na sãã la Naaŋmen Bege na o naŋ boɔrɔ ka o deɛ o nyɔvore zuŋ bee? Ai. Ŋaaŋ ka Niihemaiya da yeli: ‘Nembuo la waa ŋa maaŋ a na iri boɔrɔ o zu zie kpeɛrɛ a ŋmenpuore de-kpoŋ? N ba kpeɛrɛ.’ Bonso ka Niihemaiya da zagre ka o e lɛ? Ananso la ka, aneazaa ka Niihemaiya da baŋɛɛŋ ka Simeeya da eɛ Izerayɛl bie, kyɛ o ‘daaŋ nyɛɛŋ ka Naaŋmen naaneŋ tomoo.’ Bonso Naaŋmen daŋyele zaa daŋ koŋ sage yelko Niihemaiya ka o sãã Naaŋmen Bege na. Ane meŋ, Niihemaiya da ba vɛŋ ka o dɔndɔnne yelfaare na nyɛ kpeɛ̃o o zuŋ. A da ba kɔɔre ka Niihemaiya meŋɛ da yelka: “Ka a daŋkyini daaŋ mɛ baare Elul kyuu na bebie lezare neŋ anuu daare, bebie lezaayi neŋ pie poɔŋ.”—Niihemaiya 6:10-15; Soribu 1:51; 18:7.
AUGUST 14-20
BAABOLE POƆ YELNIMIZEERE | NIIHEMAIYA 8-9
“Jehoova Popeɛloŋ La Yɛ Kpeɛ̃o”
w13 10/15 21 wɛl. 2
Yɛlɛ Teŋ Na Baŋ Zanne Yi Puoro Kaŋa Poɔŋ
Kyuu gbuli sɛre baŋ na e a lammo na, a Gyuu noba da toɔ̃ mɛ la Gyɛruzɛlɛm daŋkyime na zaa baare. (Niih. 6:15) Naaŋmen puorebiiri na da de la bebie 52 a toŋ a toma baare. Saŋa na baŋ da mɛ a daŋkyime baare na, ba pãã da boɔrɔŋ ka ba baŋ yɛlɛ baŋ na toɔ̃ e ka ba neŋ Jehoova niiloŋ na e kpeɛŋaa. Azuŋ, Tishri kyuupaalaa na bebi-dɛndɛŋ soba, ba zaa da laŋɛɛ taa zi-gbaŋgbale kaŋaŋ. Ba da laŋɛɛŋ ka ba kyɛlle woŋ Eezira ane a Liivai noba naŋ na kanne Naaŋmen Bege a kyɛ wɛle a muni ka a pɛle ko ba meŋ. Booree deme zaa, ane noba zaa ane “bana na zaa naŋ na toɔ̃ woŋaa a baŋ a muni” da arɛɛŋ a kyɛllɛ wono a yɛlɛ a ‘piili beguo a gɛrɛ ŋmenaa saŋa.’ A noba ŋa eɛ ewuli soŋ yaga zaa a ko te, bonso teneeŋ yɛŋ maŋ te zeŋ la te Lammozie na soŋ zaa a kyɛ kyɛllɛ wono a yɛlɛ. Kyɛ, saŋa kaŋa ka hooŋ wa zeŋ a Lammozieŋ a kyɛllɛ a yɛlɛ, ho teɛroŋ maŋ te be la yɛlɛ mine yɛlɛ naŋ ba fɛre yaga eŋɛŋ bee? Ka lɛ la, teɛre yɛlɛ na hoŋ na baŋ zanne yi a takoreŋ saŋa Izerayɛl biiri ŋa zieŋ. Ba da mãã la ba menne a kyɛlle woŋ a yɛlɛ a vɛŋ aŋ tɔ ba sukyie. Saŋa na a yɛlɛ naŋ da tɔ ba sukyie na, a da vɛŋɛɛŋ baŋ piili kono, bonso ba da nyɛɛŋ ka ba da ba tuuro Naaŋmen Bege na.—Niih. 8:1-9.
w07 7/15 22 wɛl. 9-10
Ho Naŋ Na Vɛŋeŋ Ka A Vooroŋ Soŋ Wulo Bo Sori Bee?
Ka neɛŋ wa taa popeɛloŋ, o eŋɛ maŋ yuoroŋ yaga zaa. Jehoova la ‘a popeɛloŋ Naaŋmen.’ (1 Timoti 1:11; Yieme 104:31) Ka a Bidɔɔŋ wa erɛ o Saa boɔbo, o maŋ taaɛ popeɛloŋ yaga zaa. (Yieme 40:8; Hiburu 10:7-9) Ane meŋ ‘Jehoova popeɛloŋ la [te] kpeɛ̃o.’—Niihemaiya 8:10.
Ka teneeŋ wa tuoro yelkpeɛne a dire woore, kyɛbee a tuoro dɔgroŋ a kyɛ naŋ moɔ̃ niŋe a erɛ yɛlɛ Jehoova naŋ boɔrɔ, a maŋ korɔ teŋ popeɛloŋ yaga zaa. Ka teneeŋ wa “nyɛ Naaŋmen bammo,” te maŋ lɛ taaɛ popeɛloŋ yaga. (Yeng Yelibie 2:1-5) Ka teneeŋ wa zanne Naaŋmen yɛlɛ a taa sagediibu o eŋɛŋ ane Yezu kũũ sareka na eŋɛŋ, a maŋ vɛmeŋ ka te ne Jehoova taa niiloŋ naŋ e kpeɛŋaa. Te neŋ Jehoova niiloŋ na maŋ korɔ teŋ popeɛloŋ. (1 Gyɔɔn 2:1, 2) Te lɛ taaɛ popeɛloŋ, bonso te poɔ la te yɔɔmine naŋ be a donɛɛ lombori zaa naŋ de yelmeŋɛ puoruu a korɔ Jehoova na poɔŋ. (Zefanaiya 3:9; Haagai 2:7) Teɛretɔ na te naŋ taa Naaŋmen Naaloŋ na eŋɛŋ, ane apoɔsori na te naŋ taa ka te moɔlɔ a duorisoŋ na meŋ maŋ korɔ teŋ popeɛloŋ. (Matio 6:9, 10; 24:14) A nyɔvore naŋ ba taa baaraa teɛretɔroo na meŋ maŋ korɔ teŋ popeɛloŋ. (Gyɔɔn 17:3) Azuŋ, te naŋ taa a teɛretɔroo ŋa na, aseŋ ka te “sereŋ nyagina.”—Duturoonomi 16:15.
Baabole Poɔ Yelsonne
it-1 145 wɛl. 2
Arameeik Kɔkɔre
Saŋa na a Gyuu noba naŋ da yi Baabilɔŋ gbaŋgbaaloŋ poɔ a gaa Gyɛruzɛlɛm na. Yuomo mine puoreŋ, ŋmenpuore wedeɛrɛ Eezira da kannɛɛ Naaŋmen Bege na a ko a Gyuu noba mine naŋ da wa lantaa Gyɛruzɛlɛm poɔŋ. O ne a Liivai noba da wulee a Bege muni ko a noba aŋ pɛle. Niihemaiya 8:8 yeleeŋ ka: ‘Beŋ la baŋ daaŋ kanne wɛlewɛle a yi a ganeŋ, Naaŋmen bege na. Baŋ daaŋ leɛroo eŋ ba kɔkɔreŋ a wɛlle a nimiri, kyɛ soŋ ba baŋ baŋ a kannoo muni.’ A Baabole naŋ yelka ba da leɛrɛɛ a kannoo eŋ ba kɔkɔre poɔŋ na wuleeŋ ka, ba da leɛrɛɛ a Hiburu sɛgre a gaaneŋ Arameeik kɔkɔre. A waa ŋa Baabilɔŋ poɔŋ la ka a Izerayɛl biiri da zanne Arameeik kɔkɔre. Saŋa na baŋ da leɛre a yɛlɛ gaaneŋ Arameeik kɔkɔre na, a da soŋɛɛ a Izerayɛl biiri naŋ da wono Hiburu kɔkɔre na baŋ toɔ̃ woŋ yelnimizeere na ba naŋ kanna korɔ ba na tɛgɛ velaa.
AUGUST 21-27
BAABOLE POƆ YELNIMIZEERE | NIIHEMAIYA 10-11
“Ba Da De La Yɛlɛ Mine Iri Sareka Ko Jehoova”
w98 10/15 22 wɛl. 13
Gyɛruzɛlɛm Da Tonɛɛ O Yuori Toma
Niihemaiya bebie na poɔŋ, ba da maalɛɛ “nɔlaŋ naŋ e kpeɛŋaa” kaŋa a bɛ o noɔre. A nɔlaŋ ŋa da sɛgrɛɛ Naaŋmen noba na a ko saŋa na baŋ na wa yuo Gyɛruzɛlɛm daŋkyini na denoɛ. Kyɛ yelnimizeɛ kaŋa da bebeŋ aŋ seŋ ka ba sɛgre. Ba da mɛɛ a daŋkyini baare, a de denoɛ naŋ ta 12 a eŋ a daŋkyini zaa wa gyili. Azuŋ, a da wa fɛrɛɛŋ ka noba yaga kpeɛrɛ Gyɛruzɛlɛm poɔŋ. Aneazaa ka a Izerayɛl biiri mine da kpeɛrɛɛ Gyɛruzɛlɛm poɔŋ, kyɛ “a yiri daaŋ eɛ kpoŋ a e yɛloŋ, kyɛ o poɔ noba yɛŋ da ba seŋ bon.” (Niihemaiya 7:4) Ba naŋ da boɔrɔ ka ba sɛgre a yɛlɛ ŋa zuŋ na, a noba da ‘lɔɔ la bie a na iri neŋyeni noba pie poɔŋ ka o wa kpeɛrɛ Gyɛruzɛlɛm poɔŋ, a teŋkpɛŋ naŋ e forifori na.’ Lɛ na a noba naŋ da yi ba poɔ zaa a sage a yelsɛgraa ŋa da vɛŋɛɛŋ ka a noba da pugiro ‘dɔbɔ na naŋ daaŋ yi ba menneŋ a na te kpeɛrɛ Gyɛruzɛlɛm poɔŋ na.’ (Niihemaiya 11:1, 2) A noba ŋa eɛ ewuli soŋ yaga zaa a ko yelmeŋɛ puorebiiri zenɛ ŋa, bonso ba mine zemmo yɛlɛ maŋ ko baŋ sori ka ba gaa zie ba naŋ boɔrɔ naaŋ moɔleba yaga a te soŋ.
w86 2/15 26
Ba Zɛgɛɛ Yelmeŋɛ Puoruu Oŋ Do Saa Yaga Zaa
A da ba e mɔlɔ ko a Izerayɛl biiri mine ka ba bare ba kyɛŋ boma a kyɛ te kpeɛrɛ Gyɛruzɛlɛm teŋkpɛŋ na poɔŋ. Bonso a lɛ eebo na baŋ vɛmeŋ ka ba ŋmɛ sane, kyɛbee ka a de yelkpeɛne mine meŋ waneŋ ba zuŋ. Noba na naŋ da kpeɛrɛ a teŋkpɛŋ poɔŋ na da tuoree yelkpeɛne mine meŋ naŋ e a yoŋ. A yɛlɛ ŋa zuŋ, noba da pugiree a Izerayɛl biiri naŋ sage ka ba te kpeɛrɛ Gyɛruzɛlɛm teŋkpɛŋ poɔŋ na. Ba da puore sɔrɛɛ Jehoova ka o ko ba maaloo.
w16.04 8 wɛl. 15
Ka Teneeŋ Wa E Yelmeŋɛ Deme, Te Na Nyɛɛ Maaloo Yaga
Ka teneeŋ wa de te nyɔvore ko Jehoova, te maŋ pɔ kooŋ ka te na maŋ yi la te sukyie zaa poɔŋ a erɛ yɛlɛ oŋ boɔrɔ wagre zaa. Te baŋɛɛŋ meŋ ka a noɔre ŋa teŋ eŋ ko Jehoova na ba wuli ka yɛlɛ na maŋ eɛ mɔlɔ ko te wagre zaa. Saŋa kaŋa, a na maŋ wa fɛreŋ ka te de yɛlɛ mine iri sareka. Kyɛ ka a naŋ wa fɛre ka te e yelkaŋa te naŋ ba boɔrɔ ka te e a piilee saŋa, a na baŋ eɛ kpeɛŋaa ko te ka te paale te pɔre na. Kyɛ ka teneeŋ wa de yɛlɛ mine iri sareka, a moɔ̃ niŋe a puoro Naaŋmen, aneazaa ka yɛlɛ eɛ kpeɛŋaa ko te, te maŋ wuliŋ ka te sereŋ eɛ yelmeŋɛ deme. Yelmeŋɛ la, a ba maŋ e mɔlɔ ka te de yɛlɛ mine iri sareka, kyɛ maaloo na teŋ maŋ nyɛ na maŋ eɛ kpoŋ yaga zaa a gaŋ yɛlɛ na teŋ de iri sareka na. (Maal. 3:10) Kyɛ, boŋ da pɔge Gyɛɛfita pɔgeyaa na meŋ?
Baabole Poɔ Yelsonne
w06 2/1 11 wɛl. 1
Yelnimizeere Naŋ Be A Niihemaiya Gane Poɔ
10:34—Bonso aŋ da e ferebo ka noba da maŋ wore daare waneŋ a ŋmenpuoredie? A Moosis Bege zie zaa da ba wuli ka a da eɛ ferebo ka noba maŋ wore daare waneŋ a ŋmenpuoredie. Kyɛ, ba da vɛŋɛɛŋ ka noba erɛ a yɛlɛ ŋa bonso a da wa eɛ yelfɛraa. Ba da boɔrɛɛ daare yaga ka lɛ na vɛŋ ka ba maŋ toɔ̃ nyege a sarekare a sareka irizieŋ. A waa ŋa a ŋmenpuoredie tontonneba naŋ da ba e Izerayɛl biiri na, a kyɛ da tonɔ toma a ŋmenpuoredieŋ na da ba e yaga a na toɔ̃ tonɔ a toma ŋa. Azuŋ, ba da lɔɔ la bie a kaa iri noba naŋ na maŋ woro daare waana neŋ a ŋmenpuoredie.
AUGUST 28–SEPTEMBER 3
BAABOLE POƆ YELNIMIZEERE | NIIHEMAIYA 12-13
“Kaa Iri Zɔmenne Naŋ Na Baŋ Soŋ Bo Ka Ho Dire Yelmennoŋ Korɔ Jehoova”
it-1 95 wɛl. 5
Ammon Noba
Saŋa na baŋ da kare Tobaiya yi a ŋmenpuoredie na, ba da kannɛɛ Naaŋmen bege naŋ be Duturoonomi 23:3-6 naŋ yelka ba ta wa terɛ sori ka Ammon noba ane Mooab noba kpeɛrɛ a Izerayɛl noba poɔŋ. Ba da de la a bege ŋa toŋ neŋ toma. (Ni 13:1-3) Yuomo 1,000 mine naŋ wa pare la ka Naaŋmen da ko ba a bege ŋa. Bonso ka Naaŋmen da ko ba a bege ŋa? Ananso la ka, a Ammon ane a Mooab noba da zagrɛɛŋ ka ba soŋ a Izerayɛl biiri saŋa na baŋ da gɛrɛ a Noɔre Emmo Teŋgane na. Kyɛ noba mine maŋ teɛreŋ ka a bege ŋa wuleeŋ ka, Ammon ane a Mooab noba koŋ baŋ wa kpɛ a Izerayɛl noba poɔ a taa apoɔsoe ane maaloo na Izerayɛl bie zaa naŋ taa na. Kyɛ a bege ŋa ba wuli ka a Ammon ane Mooab noba koŋ baŋ wa laŋneŋ a Izerayɛl biiri, kyɛbee a kpeɛrɛ a Izerayɛl biiri poɔŋ a meŋ nyɛrɛ tɔnɔ yire maaloo na Naaŋmen naŋ korɔ a Izerayɛl biiri na. Bonso teŋ yel lɛ? Ananso la ka, ka hooŋ kaa a Baabole poɔŋ, ho na nyɛŋ ka dɔɔ kaŋa baŋ boɔlɔ Ziilɛk naŋ da e Ammon neɛ da poɔ la Deevid sogyare na poɔŋ. A Baabole lɛ wuleeŋ ka Ruut da eɛ Mooab pɔgeyaa.—Ru 1:4, 16-18.
w13 8/15 4 wɛl. 5-6
Ba Pɛge Yɛŋ Ka Yɛ E Forifori
Kanne Niihemaiya 13:4-9. Noba naŋ taa gyog-faare ŋmaa gyeere teŋ. Azuŋ a ba maŋ e mɔlɔ ka te e forifori. Hooŋ teɛre Eliyaasib ane Tobaiya yɛlɛ ŋa nyɛ. Eliyaasib da eɛ ŋmenpuore wedeɛrekpoŋ. Tobaiya meŋ da eɛ Ammon neɛ. Aminekaŋaŋ, o da poɔ la noba na Peerisiya naa naŋ da kaa iri ka ba kaara Gyudiya na. Tobaiya neŋ o zɔmenne na da iri zɔɔrɔ neŋ la Niihemaiya saŋa na oŋ da boɔrɔ ka o leɛ mɛ Gyɛruzɛlɛm daŋkyime na. (Niih. 2:10) Sori zaa da ba kyebe ka Ammon neɛ kpɛ a ŋmenpuoredie poɔ. (Dut. 23:3) Azuŋ, wala aŋ ta ka a ŋmenpuore wedeɛrekpoŋ da ko Tobaiya zie a ŋmenpuoredie bondirii diibu zie na?
Tobaiya neŋ Eliyaasib da eɛ zɔmenne naŋ peɛle taa yaga. Tobaiya ane o bidɔɔ Gyɛhoohanaŋ da de la Gyuu pɔgeba. A Gyuu noba kpoŋ zie zaa da yelee Tobaiya yelsonne yɛlɛ yaga. (Niih. 6:17-19) Eliyaasib yaaŋaa kaŋa meŋ da kulee Sanbaalat naŋ da e Samareya gɔbena pɔgeyaa. Sanbaalat neŋ Tobaiya meŋ da eɛ zɔmenne naŋ peɛle taa yaga. (Niih. 13:28) Aminekaŋaŋ, a yɛlɛ ŋa zuŋ la so ka Ŋmenpuore Wedeɛrekpoŋ Eliyaasib da tere sori ka a dɔɔ ŋa naŋ ba puoro Jehoova, a kyɛ da zɔɔrɔ ne Jehoova puorebiiri da feroo oŋ erɛ yɛlɛ naŋ ba seŋ neŋ. Kyɛ Niihemaiya yɛŋ da diree yelmennoŋ a korɔ Jehoova, azuŋ o da de la Tobaiya kogre ane o tabule na yi neŋ a ŋmenpuoredie bondirii diibu zie a te za bare.
w96 3/15 16 wɛl. 6
Bon Naŋso Aŋ Maŋ E Kpeɛŋaa Ko Te Ka Te Dire Yelmennoŋ Korɔ Jehoova
Ka teneeŋ dire yelmennoŋ korɔ Jehoova Naaŋmen, te koŋ sage nyɔge noba naŋ e o dɔndɔnne zɔmennoŋ. A lɛ zuŋ ka Yezu potuuro na baŋ boɔlɔ Gyimisi da sɛge ka: “Yɛnee peɛ̃peɛ̃ toma deme ŋa! Yɛ ba baŋ ka neɛ naŋ nyɔge [zɔmennoŋ] ne a teŋɛzu deme waa la Naaŋmen dɔndɔmɔ be? Azuŋ, neɛ na zaa naŋ boɔrɔ ka o nyɔge [zɔmennoŋ] ne a teŋɛzu deme maŋ leɛ la Naaŋmen dɔndɔmɔ.” (Gyimisi 4:4) Te boɔrɔŋ ka te dire yelmennoŋ aŋa Naa Deevid, o da yeleeŋ ka: ‘N ha la bana na naŋ ha bo, oo Jehoova. N suuri iree bana na naŋ iri tuore bo na eŋɛŋ. N ha baŋ ane haabo naŋ paali. N de baŋ baŋ e N dɔndɔnne.’ (Yieme 139:21, 22) Te ba boɔrɔ ka te ne neɛ naŋ baŋ perɛ kyɛ erɛ yelfaare nyɔge zɔmennoŋ, bonso te ne ba ba laŋ yelzaa. Ka teneeŋ dire yelmennoŋ korɔ Jehoova, te koŋ sage nyɔge neɛzaa naŋ e Jehoova dɔndɔmɔ zɔmennoŋ kyɛbee a kaara o soba yɛlɛ TV zuŋ.
Baabole Poɔ Yelsonne
it-2 452 wɛl. 9
Yiele
Ba da de la yiele na baŋ da maŋ yiele a ŋmenpuoredie na tegroŋ yaga zaa. Bonso ka hooŋ kaa a Baabole poɔŋ, gbɛɛ yaga a Baabole maŋ yelee a yieloŋ yielba ŋa yɛlɛ. A Baabole lɛ wuleeŋ ka ba da ‘maŋ iree ba nu yi ba ferebo toma’ mine poɔŋ, ka lɛ na toɔ̃ vɛŋ ka ba de ba teɛroŋ zaa eŋ ba yiele yieluu toma na poɔŋ. (1Tu 9:33) A Liivai noba na baŋ da kaa iri ka ba e yieloŋ yielba na da eɛ noba naŋ e ba yoŋ. Bonso teŋ yel lɛ? Ananso la ka, saŋa na baŋ da sɛgrɛ noba naŋ yi Baabilɔŋ a leɛ wa Gyɛruzɛlɛm yoe na, ba da sɛgɛɛ a Liivai noba ŋa yoe ba yoŋ. (Ez 2:40, 41) Haali Peerisiya naa Atazɛɛkisis (ona baŋ da lɛ boɔlɔ Lɔŋgyimaanus) meŋ da de la kpeɛ̃o na oŋ taa na soŋ a noba ŋa. O da iree ba neŋ a Izerayɛl biiri mine nu a yi ‘zuyɔɔ ane lampoo’ yɔɔbo eŋɛŋ. (Ez 7:24) A puoreŋ, a naa da yeleeŋ ka ba maŋ ko ‘a yieloŋ yielba bontaree ba naŋ na maŋ de sonnɔ ba menne, bebiri zaa neŋ o toɔre.’ Aneazaa ka ba yeleeŋ ka Atazɛɛkisis la da vɛŋ baŋ erɛ a yɛlɛ ŋa, kyɛ a waa ŋa Eezira la da e a yɛlɛ ŋa, bonso Atazɛɛkisis da kooŋ kpeɛ̃o ka o e lɛ. (Ni 11:23; Ez 7:18-26) Yelmeŋɛ la, a yieli yielba zaa da eɛ Liivai noba, kyɛ gbɛɛ yaga ka hooŋ kaa a Baabole poɔŋ, ho maŋ nyɛŋ ka ba eɛ noba naŋ e ba yoŋ. Bonso a Baabole maŋ boɔle baŋ ka “a yiele yielba ane a Liivai noba.”—Ni 7:1; 13:10.