“Te Zemmo Ane Te Naaŋ Moɔloo Toma Lammo Yelsɛgree” Yelpeɛre Gane

Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

NOVEMBER 6-12

BAABOLE POƆ YELNIMIZEERE | JOOB 13-14

“Ka Nensaalaaŋ Kpi, O Na Baŋ Iri Yi La Kũũ Poɔŋ A Voorɔ?”

w99 10/15 3 wɛl. 1-3

Lɛ Noba Naŋ Mɔɔrɔ Ba Mɔɔbo Zaa Ka Ba Nyɛ Nyɔvo-Tɔɔre

HAALI zenɛ ŋa gba, noba yaga wa nyɛɛŋ ka nensaalaa nyɔvore eɛ ŋmaa. Aneazaa ka a Baabole yelee lɛ yuomo 3,500 naŋ pare. Noba yaga wa nyɛɛŋ ka, ka neɛŋ wa leɛ baapaalaa, o ba maŋ woŋ noɔ̃ yaga sɛre kyɛ leɛ neŋnyaaŋaa a kpi. Azuŋ, nensaaleba mɔɔ la ba mɔɔbo zaa a bɔ tẽẽnɛɛ, a e yɛlɛ meŋ yaga ka lɛ na vɛŋ ka ba taa nyɔvo-tɔɔre.

Gyoob saŋa na, Igyipiti noba da maŋ ɔɔrɛɛ dunni lama. Ba da teɛrɛɛŋ ka lɛŋ na vɛŋ ka ba leɛ baapaalba, kyɛ lɛ da ba maŋ toɔ̃ nyɛ eebo. A puoreŋ, noba mine da bebeŋ a maŋ mɔɔrɔ ka ba tu sɔyɛlɛ eŋɛŋ a kyɛ vɛŋ ka kuree mine leɛ salema. Ba da teɛrɛɛŋ ka, ka ba naŋ toɔ̃ vɛŋ ka kuree mine leɛ salema, ka ba de maale neŋ tẽẽ koɔ̃ mine, a na toɔ̃ vɛmeŋ ka noba taa nyɔvo-tɔɔre. A noba ŋa maŋ teɛreŋ ka, ka ba naŋ maale a salema a na toɔ̃ vɛmeŋ ka noba bebe tegitegilɛ. Ba lɛ sagedieŋ meŋ ka, ka neɛŋ dire bondirii salema laare pooreŋ, a na vɛmeŋ ka o soba taa nyɔvo-tɔɔre. Takoreŋ saŋa China paaloŋ ŋmenpuore yɛlɛ ane saakomyɛlɛ wuleeŋ ka, a Tao noba na maŋ teɛreŋ ka, ka ba naŋ maŋ zeŋ bɔin a gyiele yɛlɛ gɛrɛ tɔɔre, a nyɔgrɔ ba vooroŋ, a kyɛ dire bondirii naŋ soma, a na toɔ̃ vɛmeŋ ka ba bebe tegitegilɛ a koŋ kpi.

Dɔɔ kaŋa naŋ yi Spain paaloŋ baŋ boɔlɔ Juan Ponce de León da eɛ neɛ naŋ da mɔɔrɔ o mɔɔbo zaa ka o baŋ lɛ neɛ naŋ na toɔ̃ e a e baapaalaa tegitegilɛ. Dɔkta kaŋa naŋ da bebe yuomo 300 mine naŋ pare sɛgɛɛŋ eŋ gane kaŋa baŋ boɔlɔ ka Hermippus Redivivus a yelka, ba maŋ nyɔge pɔgsaree naŋ ba baŋ dɔɔ a eŋ debile kaŋa poɔŋ seɛ̃kpɛpaalaa saŋa. O da lɛ sɛgɛɛŋ ka ba maŋ de bonkaŋa a nyɔge ba vooroŋ na baŋ maŋ voore bare na, a de a vooroŋ maale tẽẽ koɔ̃ mine naŋ na baŋ vɛŋ ka neɛ taa nyɔvo-tɔɔre. A yɛlɛ nembao zie la ka, a yɛlɛ na zaa ba naŋ erɛ na ba toɔ̃ vɛŋ baŋ leɛ baapaalba kyɛbee a taa nyɔvo-tɔɔre.

w15 4/15 32 wɛl. 1-2

Teɛ Ba Naŋ Ŋmaa Lɔɔ Na Baŋ Leɛ Baaŋ Bee?

A SIIDA teere naŋ be Leebanoŋ na maŋ veɛlɛŋ yaga, kyɛ ka hooŋ de o manne neŋ a olif teɛ [Science noba boɔlooŋ ka Olea europaea] naŋ taa kpogree na, ho na nyɛŋ ka a olif teɛ la maŋ soma yaga zaa. A maŋ eɛ kpeɛŋaa ka olif teere kpi. Noba mine yeleeŋ ka olif teere mine bebeŋ a kɔɔre ta ŋa yuomo 1,000. A olif teɛ nyaga la maŋ somoo oŋ naŋ bebe, haali saŋa na ba naŋ ŋmaa a teɛ lɔɔ a kyɛ bare a da-kpiri na. Ka a teɛ nyagaŋ ba sãã yɛŋ, a teɛ na leɛ baaŋ.

Gyoob da eɛ booree zudaana, o da taaɛ sagediibu naŋ e kpeɛŋaa ka ka o naŋ kpi, Naaŋmen na baŋ seŋooŋ ka o iri yi kũũni poɔŋ. (Joob 14:13-15) O da de la teɛ kaŋa, aminekaŋaŋ olif teɛ la oŋ da de wuli lɛ oŋ taa sagediibu ka Naaŋmen na toɔ̃ seŋooŋ ka o naŋ kpi. Gyoob da yeleeŋ ka, “Bozuŋ tamaa bebeŋ a ko teɛ gba. Ka ba naŋ ŋmaa o lɔɔ, kyɛ o na leɛ bɔreŋ, a danuuri meŋ naŋ na teɛnɛŋ.” Ka wareŋ wa le, a olif da-kpiri maŋ koŋ, azuŋ a maŋ waa ŋa o naŋ kpi. Kyɛ ka saaŋ wa mi, ho maŋ nyɛɛ a teɛ ulli naŋ piili yire a olif teɛ nyagaŋ. A ulli ŋa la maŋ baa a wa leɛ “danuuri aŋa te-paalaa.”—Joob 14:7-9.

w11 3/1 22 wɛl. 5

“Ho Boɔrɛɛ Ho Nuure Toma Yaga Zaa”

Gyoob yelbie ŋa vɛŋɛɛŋ teŋ baŋ yelnimizeɛ kaŋa a kyaare Jehoova: Jehoova nɔnɛɛ o yelmeŋɛ puorebiiri naŋ maŋ erɛ ba yɛlɛ aŋa Gyoob. Aŋa Gyoob, ka teneeŋ meŋ de te menne eŋ Jehoova nuureŋ, a tere sori ka o wulo te a kyɛ leɛre te ka te waa ŋa lɛ na oŋ boɔrɔ na, a maŋ vɛmeŋ teŋ e neŋtegrɛ Jehoova nimitɔɔreŋ. (Aizeeya 64:8) Jehoova ba derɛ o yelmeŋɛ puorebiiri yɛlɛ deɛnɛ neŋ fẽẽ zaa. Jehoova ‘boɔrɔŋ’ yaga zaa ka o seŋ ba ka ba iri yi kũũni poɔŋ. Gaŋbaŋna kaŋa yeleeŋ ka, a Hiburu yelbiri ŋa wulee “neɛ naŋ taa a boɔbo ka o e yelkaŋa yaga zaa, ka lɛ na oŋ taa a boɔbo ka o e a yɛlɛ vɛŋ ka o eŋɛ kyerɛ.” Yelmeŋɛ la, Jehoova maŋ teɛrɛɛ o yelmeŋɛ puorebiiri zaa yɛlɛ, kyɛ o eŋɛ lɛ nyagraŋ yaga zaa ka o seŋ noba naŋ kpi na ka ba iri yi kũũni poɔŋ a voorɔ.

Baabole Poɔ Yelsonne

it-1 191

Tampɛloŋ

A yi a Baabole poɔŋ, tampɛloŋ na baŋ are ko la bon naŋ ba taa tɔnɔ, kyɛbee bon naŋ ba e tegroŋ. Aboraham da yelko la Jehoova ka, “N eɛ tane ane tampɛloŋ.” (Mn 18:27; kanne Ai 44:20; Jb 30:19.) Gyoob da yeleeŋ ka sekpɔgɔ na o zɔmenne naŋ da wa ka ba dii o sukyiri naŋ da lɔɔrɔ na waa ŋa “tampɛloŋ sekpɔgɔ.”—Jb 13:12.

NOVEMBER 13-19

BAABOLE POƆ YELNIMIZEERE | JOOB 15-17

“Ta Wa Tɔglɔ Eelifaz Saŋa Na Hoŋ Wa Diire Noba Sukyie Na”

w05 9/15 26 wɛl. 4-5

Zagre Teɛroŋ Faare Bare!

A yi a gbɛre bota na zaa Eelifaz naŋ yeli yɛlɛ na poɔŋ, yɛlɛ na oŋ da yeli na wuleeŋ ka Naaŋmen eɛ potuo soba, azuŋ yelzaa kyebe ka Naaŋmen puorebie na baŋ e a pɛle o poɔ. Eelifaz da yelko la Gyoob ka, “Nyɛ! O ba taa sagediibu o tontonneba eŋɛŋ, o maŋ nyɛɛ gbɛ-ŋmɛ o malekere meŋ eŋɛŋ.” (Joob 4:18) A puoreŋ, Eelifaz da yelee yɛlɛ a kyaare Naaŋmen ka: “O ba taa sagediibu o neŋforifori eŋɛŋ, haali a sazu meŋɛ ba e forifori o nimieŋ.” (Joob 15:15) Eelifaz pãã da soorɛɛ Gyoob ka: “Ka hooŋ e sontuuro, lɛ na vɛmeŋ ka a Kpeɛ̃o Zaa Daana taa popeɛloŋ bee?” (Joob 22:3) Yɛlɛ na Biilidad naŋ da yeli na wuleeŋ ka o da sagɛɛ teɛroŋ na Eelifaz naŋ da taa na. O da yeleeŋ ka: “A kyuu meŋɛ gba ba kyaane; a ŋmarbie gba ba e forifori [Naaŋmen] nimieŋ.”—Joob 25:5.

Aseŋ ka te go te menne velaa a yi a teɛrɛ ŋa taa poɔŋ. A na baŋ vɛmeŋ ka te teɛrɛ ka Naaŋmen boɔrɔŋ ka te erɛ yɛlɛ naŋ gaŋ te faŋa. A teɛrɛ ŋa taa na baŋ sãã la te neŋ Jehoova niiloŋ na. Ka teneeŋ vɛŋ ka a nyɛ kpeɛ̃o te zuŋ, a na baŋ eɛ kpeɛŋaa ko te ka te sage Naaŋmen dɛnnoo. Ka ba naŋ wa ko te dɛnnoo, a na somaŋ yaga ka te maŋ sigri te menne a sage a dɛnnoo. Kyɛ ka a teɛrɛ ŋa taaŋ nyɛ kpeɛ̃o te zuŋ, ka ba naŋ wa ko te dɛnnoo te ‘suuri na baŋ iree Jehoova eŋɛŋ.’ Lɛ na baŋ vɛmeŋ ka te piili tagra te menne yire Jehoova zie. (Yeng Yelibie 19:3) Ka teneeŋ wa e lɛ, te neŋ Jehoova niiloŋ na na sããmeŋ kpɛlɛŋkpɛlɛŋ!

w15 2/15 9 wɛl. 16

Tɔglɔ Yezu Sigrimennoŋ Ane O Bɔinloŋ Na

Aseŋ ka te maŋ yele yɛlɛ naŋ eŋnɛ faŋa. Ka teneeŋ taa nɔmmo naŋ e zuluŋ a ko te taaba, a na vɛmeŋ ka te maŋ “yele yɛlɛ diire noba na enne naŋ kyoɔre na sukyie.” (1 Tɛs. 5:14) Bo yɛlɛ teŋ na baŋ yeli a de eŋ a noba ŋa taa faŋa? Ka teneeŋ maŋ vɛŋ ka ba baŋ ka te boɔrɛɛ ba yɛlɛ, a kyɛ lɛ wuli ka te taaɛ ba yɛlɛ yaga zaa meŋ, a na toɔ̃ eŋ baŋ faŋa yaga. Te na baŋ yi la te poore zaa meŋ poɔŋ a pugi ba, a soŋ ba ka ba nyɛ ka ba taaɛ gyog-sonne a na baŋ e yɛlɛ yaga meŋ a soŋ Jehoova puoruu. Te na baŋ lɛ teɛre baŋ ka, Jehoova la tage ba waneŋ o Bidɔɔ na zie. Lɛ wuleeŋ ka ba eɛ noba naŋ e tegroŋ yaga Jehoova nimitɔɔreŋ. (Gyn. 6:44) Te na baŋ vɛmeŋ ka ba baŋ ka, Jehoova sereŋ taaɛ o puorebiiri na “sukyie naŋ gyɛre” kyɛbee “noba na enne naŋ kyoɔre na” yɛlɛ yaga zaa. (Yiem. 34:18) Yelbinoɔ̃ne na teŋ maŋ yele korɔ ba na na toɔ̃ dii la ba sukyie a kyɛ eŋ ba faŋa meŋ yaga zaa.—Yeng. 16:24.

Baabole Poɔ Yelsonne

w06 3/15 14 wɛl. 11

Yelnimizeere Naŋ Be A Gyoob Gane Poɔ

7:9, 10; 10:21; 16:22—Yɛlɛ na Gyoob naŋ yeli zie ŋaŋ na wuleeŋ ka o ba sagedi ka kũũ leɛ-iruu bebeŋ bee? Yɛlɛ na Gyoob naŋ yeli zie ŋaŋ na wulee yɛlɛ naŋ na pɔgoo ka o naŋ kpi. Azuŋ, bo ka Gyoob da boɔrɔ ka o wuli a zie ŋaŋ? Aminekaŋaŋ, Gyoob da boɔrɔŋ ka o wuli ka, ka o naŋ kpi, o zɔmenne na koŋ lɛ nyɛ o zaa. A yi o zɔmenne na zieŋ, Gyoob koŋ leɛ gaa o die, kyɛbee ka noba leɛteɛrɛ o yɛlɛ a te ta saŋa na Naaŋmen naŋ nare biŋ na. Aminekaŋaŋ, Gyoob da boɔrɔŋ ka o wuli ka neɛzaa kyebe a taa kpeɛ̃o a na baŋ iri yi o Yaa poɔŋ. Ka hooŋ kanne Joob 14:13-15, te na baŋ nyɛŋ ka Gyoob sereŋ da taaɛ sagediibu a kũũ leɛ-iruu eŋɛŋ.

NOVEMBER 20-26

BAABOLE POƆ YELNIMIZEERE | JOOB 18-19

“Daŋ Ta Wa Zagra Ho Kristabitaaba Bara Zaa”

w22.01 16 wɛl. 9

Yɛlɛ Teŋ Na Baŋ Zanne Yi Yezu Nentaŋ Ŋmaabo Na Eŋɛŋ

Ho na baŋ soŋɛɛ noba naŋ dire woore. Saŋa na Yezu naŋ wa nyɛ Maata ane Mareya naŋ kono na, o meŋ da koŋeeŋ. Kyɛ lɛ yoŋ naane, Yezu da mãã la o meŋɛ a kyɛlle woŋ ba yɛlɛ, a kyɛ lɛ yeli yɛlɛ naŋ diire sukyiri meŋ a ko ba. Te meŋ na baŋ eɛ lɛ ko te yɔɔmine naŋ dire woore. Te yɔɔdɔɔ kaŋa naŋ e a lantaapuoruu neŋkpoŋ a be Australia paaloŋ baŋ boɔlɔ Dan yeleeŋ ka: “Saŋa na N pɔge naŋ wa kpi na, N da boɔrɛɛ sommo. Kultaa deme yaga da maŋ de la ba menne tere a wa N zie ŋmenaa neŋ zisoɔree a wa kyɛlle woŋ N yɛlɛ. Ba da maŋ ko maŋ sori maŋ koŋ. N nentaŋ ŋmaabo na da ba e vi yɛlɛ a ko ba. Ba da lɛ eɛ yɛlɛ yaga meŋ a de soŋ ma, ba da maŋ pɛgɛɛ N lɔɔre, a gaa daa te da boma wa ko ma, a maale bondirii ko ma saŋa na maŋ ba taa a kpeɛ̃o ka N e lɛ na. N ne ba da maŋ laŋ puoreŋ gbɛɛ yaga. Ba sereŋ da eɛ N zɔmenne, a kyɛ lɛ e N yɔɔmine ba naŋ ‘dɔge dɔgɛɛ daare zuŋ.’”—Yeng. 17:17.

w21.09 30 wɛl. 16

Saŋa Na Te Nɔŋna Kaŋa Naŋ Wa Zagre Jehoova Bare

Yɛ naŋ kyɛnɛ sonnɔ booree deme naŋ puoro Jehoova yelmennoŋ poɔŋ. Ba boɔrɛɛ yɛ nɔmmo ane faŋa emmo a gaŋ saŋa zaa naŋ pare. (Hib. 10:24, 25) Saŋa kaŋa, ka booree kaŋaŋ wa bebe ka ba iri a booree neɛ kaŋa bare a lantaapuoruu poɔŋ, ba maŋ nyɛŋ ka a lantaapuoruu noba maŋ tagɛɛ ba menne yi a booree deme zaa zieŋ. A ba seŋ ka te erɛ lɛ! Baapaalba dɔgreba naŋ bare Jehoova puoruu eɛ noba naŋ seŋ ka te maŋ pugiro ba, a kyɛ eŋnɛ ba faŋa yaga zaa. Maria eɛ te yɔɔpɔge kaŋa ba naŋ iri o serɛ bare a lantaapuoruu poɔŋ, saŋa na baŋ wa iri o serɛ bare na, o serɛ na da barɛɛ a booree deme zaa kyɛ gaa. Maria yeleeŋ ka: “N zɔmenne mine da maŋ wa la N die a wa maale bondirii a kyɛ soŋ te teŋ toɔ̃ e te booree zannoo. Ba da de la ba menne eŋ N gbɛbɔgriŋ ka N ne ba zaa da maŋ laŋ koŋ. Saŋa na baŋ da woŋ noba naŋ yele yelfaare kyaara ma na, ba da arɛɛ N puoreŋ a yeli a yɛlɛ yelmeŋɛ ko a noba. Ba sereŋ da eɛ noba naŋ eŋ ma faŋa yaga zaa!”—Uro. 12:13, 15.

w90 9/1 22 wɛl. 20

Ho Nyɛrɛɛ Nimitɔɔre Gaabo Jehoova Puoruu Poɔŋ Bee?

Aseŋ ka a lantaapuoruu nembɛrɛ baŋ ka, ka ba naŋ deɛ apoɔsori na te yɔɔdɔɔ kaŋa naŋ taa aŋa lantaapuoruu neŋkpoŋ kyɛbee a lantaapuoruu nembɛrɛ sonnɔ kaŋa na, a na baŋ vɛmeŋ ka teɛroŋ gyɛre kpɛ o soba. Haali ka o sobaŋ yi o meŋɛ poɔ zaa a yelka o ba lɛ boɔrɔ ka o e a lantaapuoruu neŋkpoŋ kyɛbee a lantaapuoruu nembɛrɛ sonnɔ na kaŋa, kyɛ teɛroŋ gyɛre na baŋ kpɛɛ o soba. Ka ba naŋ ba iri o soba bare a lantaapuoruu poɔŋ yɛŋ, ka a lantaapuoruu nembɛrɛŋ wa nyɛ ka teɛroŋ gyɛre la kpɛ o soba, aseŋ ka ba mɔɔ kyɛ de sommo naŋ seŋ neŋ koo. (1 Tɛsalonika 5:14) Aseŋ ka ba vɛŋ ka o baŋ ka o eɛ neŋtegroŋ a lantaapuoruu poɔŋ. Haali ka a naŋ fɛre ka ba de kawane a ko o soba, kyɛ ka o sobaŋ sigri o meŋɛ a taa bareka puoruu gyogo, a ba seŋ ka a kɔɔre kyɛ ka ba lɛ de apoɔsoe mine koo a lantaapuoruu poɔŋ.

Baabole Poɔ Yelsonne

w94 10/1 32

Lɛ Na Nimimaaroŋ Yelbie Naŋ Na Baŋ Soŋ Neɛ Aseŋ

Gyoob da boɔrɛɛ faŋa emmo yaga zaa. Kyɛ Eelifaz neŋ o taaba na da ba de nimimaaroŋ yele yɛlɛ korɔ Gyoob. Ba da yeleeŋ ka, Gyoob la vɛŋ ka a yeltuo na zaa naŋ pɔgoo na wa o zuŋ. Ba da boɔrɔŋ ka ba wuli ka Gyoob da sɔglɔ erɛɛ yelfaare mine. (Joob 4:8) The Interpreter’s Bible yeleeŋ ka: “Gyoob da boɔrɛɛ neɛ naŋ na baŋ de o meŋɛ eŋ o gbɛbɔgriŋ a baŋ lɛ yɛlɛ naŋ dɔɔnoo aseŋ. Kyɛ o zɔmenne na da yelee yɛlɛ naŋ da e ‘yelmeŋɛ’ ane ŋmenpuore yɛlɛ naŋ da bebe takoreŋ saŋa zaa ka noba yaga baŋaa meŋ. Ba da yelee gyog-soŋ meŋ yɛlɛ aŋa a naŋ e yelpaala a ko Gyoob.” Azuŋ, saŋa na Gyoob naŋ da wa woŋ Eelifaz neŋ o taaba na yelyaga baare na, o eŋɛ zaaŋ da kyoɔre, o da koŋeeŋ a kyɛ yelka: “Wala yɛŋ na dɔɔnɔ N nyɔvore a kɔɔre seŋ, wala yɛŋ na de yɛ yelbie meŋ a ŋmore ma kɔɔre seŋ?”—Joob 19:2.

Aseŋ ka te kaara soŋ a daŋ ta wa yele potu-yɛlɛ naŋ na dɔŋ te yɔɔ kaŋa ka lɛ vɛŋ ka o koŋ sɔre Naaŋmen ka o somoo. (De manne neŋ Duturoonomi 24:15.) Yeng Yelibie gane na kpãã teŋ ka: “Ho yelyaga na baŋ terɛɛ nyɔvore kyɛbee a sãã nyɔvore; azuŋ aseŋ ka ho baŋ ka ho yelyaga na baŋ vɛmeŋ ka yɛlɛ mine wa ho zuŋ.”—Yeng Yelibie 18:21, TEV.

NOVEMBER 27–DECEMBER 3

BAABOLE POƆ YELNIMIZEERE | JOOB 20-21

“Bondaanoŋ Naaneŋ Maŋ Wuli Ka Neɛ Eɛ Sontuuro”

w07 8/1 29 wɛl. 12

Ho Eɛ ‘Bondaana Naaŋmen Zieŋ’?

Yɛlɛ na Yezu naŋ yeli na wuleeŋ ka, ka neɛŋ moɔ̃ niŋe a boɔrɔ bondaaŋ boma korɔ o meŋɛ, kyɛbee a boɔrɔ ka o taa bontaree yaga, o soba koŋ baŋ e bondaana Naaŋmen nimitɔɔreŋ. Yezu da boɔrɔŋ ka o wuli ka, a ba seŋ ka te de biŋ te nimitɔɔreŋ ka te na bɔ la bondaaŋ boma ka lɛ vɛŋ ka te toɔ̃ taa popeɛloŋ a donɛɛ ŋa zuŋ. Kyɛ, Yezu da boɔrɔŋ ka te baŋ ka, aseŋ ka te de te bontaree erɛ neŋ yɛlɛ naŋ na vɛŋ ka te neŋ Jehoova niiloŋ na e kpeɛŋaa. Ka teneeŋ erɛ lɛ, te na eɛ bondaaneba Naaŋmen nimitɔɔreŋ. Bonso teŋ yeli lɛ? Ananso la ka, ka teneeŋ erɛ lɛ, a maŋ yuo la sori ko Naaŋmen ka o ko te maaloo yaga zaa. A Baabole yelko teŋ ka: “Jehoova maaloo la maŋ vɛŋ ka neɛ e bondaana, o ba maŋ de eŋbaare meŋ poɔ a eŋɛŋ.”—Yeng Yelibie 10:22.

Baabole Poɔ Yelsonne

w95 1/1 9 wɛl. 19

Lɛ Teŋ Na Toɔ̃ E A Zɔɔtoɔ̃ Setaana Ane O Toma

A Baabole vɛŋɛɛŋ teŋ baŋ ka, yɛlɛ na Setaana naŋ da tu Eelifaz ane Zoofer zieŋ kyɛ yelko Gyoob na da vɛŋɛɛŋ oŋ taa “teɛroŋ gyɛre yɛlɛ.” (Joob 4:13-18; 20:2, 3) Yɛlɛ na baŋ da yelko Gyoob na da ‘ŋmaarɛɛ o vooroŋ,’ lɛ da vɛŋɛɛŋ ka Gyoob yele yɛlɛ naŋ e “tuluŋ.” O da lɛ yelee yɛlɛ a kyaare “dabeɛ̃ yɛlɛ” naŋ da be o teɛroŋ poɔŋ a dɔɔnoo na. (Joob 6:2-4; 30:15, 16) Elaihu da mãã la o meŋɛ a kyɛlle woŋ Gyoob yɛlɛ na, a da yi o poɔ zaa a soŋ Gyoob oŋ wa nyɛ ka, Jehoova eɛ neɛ naŋ taa yɛŋ yaga zaa, a baŋ yelzaa meŋ a kyaare a yɛlɛ. Zenɛ ŋa, a lantaapuoruu nembɛrɛ naŋ teɛrɛ yɛlɛ gɛrɛ tɔɔre maŋ mɔɔrɛɛ ba mɔɔbo zaa ka ba ta wa erɛ yelzaa naŋ na vɛŋ ka ba de “ferebo” a dɔgle noba naŋ dire dɔgɛɛ yaga zaa na zuŋ. Kyɛ aŋa Elaihu, ba maŋ di la kannyiri a kyɛlle woŋ ba yɔɔmine yɛlɛ, a de Naaŋmen Yelbiri naŋ waa ŋa kãã na a sɔ ba. (Joob 33:1-3, 7; Gyimisi 5:13-15) Azuŋ ka neɛŋ wa tuore yɛlɛ mine naŋ dɔɔnɔ o sukyiri, ka a eɛ yɛlɛ naŋ sereŋ e, kyɛbee ka a naŋ e yɛlɛ naŋ be o teɛroŋ poɔŋ yoŋ, o soba na baŋ nyɛɛ Baabole poɔ sukyiridii yi a lantaapuoruu noba zieŋ. Ka ‘gaŋ-zannoo yɛlɛ naŋ eŋnɛ dabeɛ̃, kyɛbee yelnyɛree la’ vɛŋ ka neɛ kaŋa miine aŋa lɛ na aŋ da pɔge Gyoob na, ba meŋ na baŋ nyɛɛ Baabole poɔ sukyiridii yi a lantaapuoruu noba zieŋ.—Joob 7:14; Gyimisi 4:7.

DECEMBER 4-10

BAABOLE POƆ YELNIMIZEERE | JOOB 22-24

“Nensaalaa Taaɛ Tɔnɔ Ko Naaŋmen Bee?”

w05 9/15 27 wɛl. 1-3

Zagre Teɛroŋ Faare Bare!

Gyoob zɔmenne na mine da yeleeŋ ka Naaŋmen eɛ potuo soba naŋ boɔrɔ ka te maŋ erɛ yɛlɛ naŋ gaŋ te faŋa a koroo. Kyɛ lɛ yoŋ naane, ba da lɛ yeleeŋ ka nensaalaa ba taa tɔnɔ zaa a ko Naaŋmen. A yi Eelifaz yelyaga ata soba na poɔŋ, o da soorɛɛŋ ka: “Nensaalaa taaɛ tɔnɔ ko Naaŋmen bee? Neɛ naŋ teɛrɛ yɛlɛ gɛrɛ tɔɔre taaɛ tɔnɔ koo bee?” (Joob 22:2) Eelifaz da boɔrɔŋ ka o wuli ka nensaalaa ba taa tɔnɔ zaa a ko Naaŋmen. Lɛ neŋ o zu ka Biilidad meŋ da yeli. O da yeleeŋ ka: “Sobuoŋ ka nensaalaa naŋ na baŋ kpi na toɔ̃ e sontuuro Naaŋmen nimitɔɔreŋ, kyɛbee sobuo ka neɛ pɔge naŋ dɔge na baŋ e forifori?” (Joob 25:4) Yɛlɛ baŋ da boɔrɔ ka ba wuli la ka, Gyoob eɛ nensaalaa naŋ na baŋ kpi, azuŋ, bonso aŋ seŋ ka o teɛre ka o na baŋ eɛ sontuuro Naaŋmen nimitɔɔreŋ.

Zenɛ ŋa, noba mine bebeŋ a maŋ teɛrɛ yelfaare yoŋ a kyaara ba menne. Aminekaŋaŋ lɛ na baŋ guoli ba, yelkpeɛne ba naŋ tuore ba zemmo poɔŋ, kyɛbee aminekaŋaŋ paaloŋ bee bale na baŋ yi na vɛŋɛɛŋ ka noba mine ba nɔnɔ ba yɛlɛ. A yɛlɛ ŋa zaa na baŋ vɛmeŋ ka ba teɛre ka ba ba taa tɔnɔ zaa. Setaana neŋ o malekefaare na maŋ mɔɔrɛɛ ba mɔɔbo zaa ka ba vɛŋ ka neɛ eŋɛ kyoɔre. Ka ba naŋ vɛŋ ka neɛ teɛre ka yelsoŋ zaa oŋ na e koŋ baŋ paale a Kpeɛ̃o Zaa Daana Naaŋmen niŋe, a na baŋ vɛmeŋ ka o soba eŋɛ kyoɔre ka o faŋa meŋ zaa baare. A yi wagre naŋ gɛrɛ poɔŋ na, ka o sobaŋ ba kaa soŋ, o na baŋ tagɛɛ o meŋɛ yi a Naaŋmen vore na zieŋ.—Hiburu 2:1; 3:12.

Ka te yuomoŋ wa gɛrɛ nimitɔɔre, ka baaloŋ meŋ wa kpɛ te, a na baŋ vɛmeŋ ka te koŋ baŋ lɛ e yɛlɛ mine Jehoova puoruu poɔŋ. Aminekaŋaŋ, te na wa nyɛŋ ka toma na te naŋ tonɔ Jehoova puoruu poɔŋ na eɛ fẽẽ yaga, a gaŋ lɛ na teŋ da tonɔ Jehoova puoruu toma saŋa na teŋ da e baapaalba a taa faŋa ane laafeeloŋ naŋ paale na. Azuŋ, a eɛ nimizeɛ yaga zaa ka te baŋ ka, Setaana neŋ o malekefaare na boɔrɔŋ ka te teɛre ka yelsonne na zaa teŋ erɛ korɔ Naaŋmen na koŋ baŋ pa o niŋe! Aseŋ ka te zagre a teɛroŋ faare ŋa bare.

w95 2/15 27 wɛl. 6

Lɛ Hoŋ Na Baŋ E Soŋ Ho Yɔɔmine Naŋ Tuoro Yelkpeɛne

Gyoob zɔmenne bata na da lɛ yelee yɛlɛ mine naŋ da kyoɔre Gyoob eŋɛ yaga zaa. Ba da de la ba menne teɛroŋ a yele neŋ a yɛlɛ, Naaŋmen teɛroŋ naane baŋ da de yele neŋ a yɛlɛ. Eelifaz gba da gaaɛ nimitɔɔre a yelka, ‘Naaŋmen ba taa sagediibu o tontonneba eŋɛŋ.’ O da boɔrɔŋ ka o wuli ka, ka Gyoob eɛ sontuuro kyɛbee ka o naŋ ba e sontuuro, Jehoova yɛlɛ kyebe. (Joob 4:18; 22:2, 3) A yɛlɛ na Eelifaz naŋ da yeli na da kyoɔrɛɛ eŋɛ yaga zaa. Ziri-kpoŋ meŋ da la! A ba e seɛlee Jehoova naŋ da yeli Eelifaz neŋ o taaba na nimiri yɛlɛ ko ba a puoreŋ. Jehoova da yelka ba yelee yɛlɛ naŋ ba seŋ neŋ a kyaaroo. Jehoova da yeleeŋ ka, “yɛ ba yeli yɛlɛ naŋ e yelmeŋɛ a kyaare ma.” (Joob 42:7) Kyɛ ba da naŋ waanaŋ ka ba yeli yelkaŋa naŋ kyoɔrɔ eŋɛ yaga zaa a ko Gyoob.

w03 4/15 14-15 wɛl. 10-12

Baapaalba Naŋ Vɛŋ Ka Jehoova Poɔ Pɛle

Aŋa lɛ na a Baabole naŋ wuli na, Setaana yeleeŋ ka Gyoob ba puoro Jehoova o naŋ nɔmoo zuŋ. Kyɛ lɛ yoŋ naane ka Setaana yeli, Setaana lɛ yeleeŋ ka nensaalaa zaa kyebe a de nɔmmo puoro neŋ Naaŋmen. Ho meŋ nu poɔ la be. Ŋaaŋ ka Setaana da yeli nensaaleba zaa yɛlɛ a ko Jehoova: “Nensaalaa [Gyoob yoŋ naane] na de la bonzaa oŋ taa tere kyɛ na deɛ o nyɔvore.” (Joob 2:4) Ho nyɛɛ ferebo toma na hoŋ taa a yelnimizeɛ ŋa poɔŋ? Aŋa lɛ na Yeng Yelibie 27:11 naŋ wuli na, Jehoova vɛŋɛɛŋ teŋ baŋ ka te taaɛ bonkaŋa teŋ na baŋ de koo. Te na baŋ tu la te yel-eree eŋɛŋ a kyɛ vɛŋ ka o iri yɛlɛ noɔre a ko Setaana. Teɛre a yɛlɛ ŋa soŋ nyɛ, a Soobu Kpeɛ̃o Zaa Daana yuo la sori ko bo ka ho somoo ka o toɔ̃ sɛgre a yelkpoŋ ŋa naŋ e nimizeɛ yaga zaa na. Nyɛ ferebo toma neŋ apoɔsori naŋ e kpoŋ yaga zaa Jehoova naŋ de ko te! Ho na toɔ̃ e la yɛlɛ na Jehoova naŋ boɔrɔ ka ho e na bee? Gyoob da toɔ̃ eɛ lɛ. (Joob 2:9, 10) Yezu meŋ ane nensaaleba yaga zaa toɔ̃ eɛ lɛ. Baapaalba mine meŋ toɔ̃ eɛ lɛ. (Filipae 2:8; Yel-iriwulaa 6:9) Ho meŋ na toɔ̃ eɛ lɛ. A yɛlɛ yelnimizeɛ meŋɛ la ŋa, aseŋ ka ho are Jehoova puoreŋ, kyɛbee Setaana puoreŋ. Ho koŋ baŋ are ba seŋsooreŋ. A tuuro ho yel-eree eŋɛŋ, ho na baŋ vɛmeŋ ka Setaana erɛ Jehoova lolo yɛlɛ, kyɛbee ka ho vɛŋ ka Jehoova iri yɛlɛ noɔre ko Setaana. A yɛlɛ ŋa buo soba la hoŋ boɔrɔ ka ho erɛ?

Jehoova Taaɛ Ho Yɛlɛŋ!

Gbɛre na teŋ na de kyaare a yɛlɛ ŋa fɛrɛɛ Jehoova bee? Noba yaga di la yelmennoŋ ka lɛ vɛŋ ka Jehoova iri Setaana soorebiri na noɔre koo. Yelmeŋɛ la, a Dɛɛvul yeleeŋ ka neɛzaa kyebe a de nɔmmo a puoro neŋ Jehoova. Noba yaga de la ba yel-eree a wuli ka yɛlɛ na Setaana naŋ yeli na eɛ zirii. Kyɛ, Jehoova naŋ boɔrɔŋ ka ho de gbɛre a wa are o puoreŋ a yelnimizeɛ ŋa poɔŋ. Ananso la wala? Ananso la ka, Jehoova taaɛ ho yɛlɛŋ. Yezu yeleeŋ ka: “A ba e N Saa naŋ be sazuŋ boɔbo ka a bibiiri bama bonyeni gba bɔre.”—Matio 18:14.

Azuŋ, a pɛlɛɛŋ ka Jehoova boɔrɔŋ ka o baŋ gbɛre hoŋ na de. Kyɛ lɛ yoŋ naane, gbɛre na hoŋ na de na na baŋ vɛmeŋ ka o poɔ pɛle kyɛbee ka o poɔ sãã. A Baabole vɛŋɛɛŋ aŋ pɛle ka, ka teneeŋ wa erɛ yɛlɛ naŋ soma, a maŋ vɛmeŋ ka Jehoova poɔ pɛle. Kyɛ ka teneeŋ wa erɛ yɛlɛ naŋ ba soma, a maŋ vɛmeŋ ka o poɔ sãã. Aŋa mannoo poɔŋ, saŋa na a Izerayɛl biiri naŋ da maŋ erɛ tokpeɛne gbɛɛ yaga na, a da maŋ vɛmeŋ ka Jehoova “poɔ sãã yaga.” (Yieme 78:40, 41) Sɛre ka a Noowa Kɔmpiiri na wa na, ‘nensaaleba da tonɛɛ toŋfaare yaga,’ lɛ da vɛŋɛɛŋ ka Jehoova ‘sukyiri da dɔɔnoo yaga zaa.’ (Munpiilee 6:5, 6) Teɛre a yɛlɛ ŋa soŋ. Ka hooŋ wa erɛ yɛlɛ naŋ ba soma, a na baŋ vɛmeŋ ka Neɛ naŋ maale bo na poɔ sãã yaga zaa. Lɛ ba wuli ka Naaŋmen eɛ bambaala, kyɛbee a e neɛ naŋ ba maŋ teɛrɛ yɛlɛ gɛrɛ tɔɔre kyɛ erɛ yɛlɛ. Ai, lɛ naane, kyɛ a wuleeŋ ka Naaŋmen nɔŋ la ho yɛlɛ a teɛrɛ ho yɛlɛ meŋ. Ka hooŋ wa erɛ yɛlɛ naŋ soma, Jehoova poɔ zaaŋ maŋ pɛle. A ba e ka oŋ na nyɛ noɔre iribo ko Setaana na zuŋ la, kyɛ o poɔ maŋ pɛleŋ bonso, a maŋ yuo la sori koo ka O ko bo kyɔɔtaa. Jehoova eŋɛ nyagraŋ yaga ka o maŋ ko o puorebiiri kyɔɔtaa. (Hiburu 11:6) Te Saa Jehoova Naaŋmen sereŋ taaɛ nɔmmo naŋ e zuluŋ yaga zaa a ko te!

Baabole Poɔ Yelsonne

w04 7/15 21-22

De Yɛlɛ Biŋ Ho Nimitɔɔreŋ Jehoova Puoruu Poɔŋ, Ka Lɛ Vɛŋ Ka Ho Toɔ̃ De Pugibu Naŋ Seŋ Neŋ Ko Neɛ Naŋ Maale Bo Na

Hooŋ teɛre nyɛ sori na Jehoova naŋ tu kyɛ maale a aŋdonɛɛ zaa. Saŋa na Jehoova naŋ wa maala a boma na, a Baabole maŋ yeliŋ ka, “ka zie da soɔ ka zie da nyaa.” (Munpiilee 1:5, 8, 13, 19, 23, 31) Sɛre ka Jehoova na piili ka o maale bonkaŋa na, o maŋ baŋɛɛ bon na aŋ seŋ ka o maale ane sori na aŋ seŋ ka o tu kyɛ maale a bon baare. A sori ŋa ka Naaŋmen da tu kyɛ maale boma na zaa oŋ da boɔrɔ ka o maale na. (Yel-iriwulaa 4:11) A booree zudaana Gyoob da yeleeŋ a kyaare Jehoova ka, “Ka onaŋ wa maale o teɛroŋ ka o e yelkaŋa, nembuoŋ na baŋ pigoo sori? Ka onaŋ boɔrɔ ka o e yelkaŋa, o maŋ eɛ a yelbalaa.” (Joob 23:13) Saŋa na Jehoova naŋ wa maale boma zaa baare na, o da leɛ kaa la, “boma na zaa oŋ maale na” a yelka a “somaŋ yaga zaa”!—Munpiilee 1:31.

Ka teneeŋ na toɔ̃ ta yɛlɛ na teŋ de biŋ te nimitɔɔreŋ, aseŋ ka te taa a boɔbo yaga ka te ta yɛlɛ na teŋ de biŋ te nimitɔɔreŋ na. Boŋ na toɔ̃ soŋ te ka te taa a boɔbo yaga zaa ka te ta a yɛlɛ? Haali saŋa na a teŋgane naŋ da gaŋ kpale ka bonzaa da ba kye o poɔŋ na, kyɛ Jehoova da baŋɛɛŋ ka o na baŋ maalɛɛ a teŋgane ka o veɛlɛ yaga zaa. O da baŋɛɛŋ ka o na baŋ maalɛɛ a teŋgane ka boma naŋ be o poɔŋ na de gyeremɛ ane emmo naŋ seŋ neŋ koroo. Lɛ neŋ o zu la, ka teneeŋ boɔrɔ ka te ta yelkaŋa te naŋ de biŋ te nimitɔɔreŋ, aseŋ ka te maŋ teɛrɛ tɔnɔ ane maaloo teŋ na nyɛ ka teneeŋ toɔ̃ ta a yɛlɛ. Lɛ ka te yɔɔdɔɔ kaŋa naŋ nyɛ yuomo 19 baŋ boɔlɔ Tony da wa nyɛ. A dɛndɛŋ saŋa na oŋ da gaa Jehoova Sieree Deme bɛɛtil tomazie naŋ be Western Europe na, yɛlɛ na oŋ da nyɛ beŋ na da tɔ la o sukyiri yaga zaa. A yi ana bebiri na gɛrɛ, soorebiri naŋ da be Tony teɛroŋ la ka, ‘Wala ka zemmo waa a ko noba naŋ kpeɛrɛ a kyɛ tonɔ a zie ŋaŋ?’ Tony da maŋ teɛrɛɛ lɛ oŋ na toɔ̃ e a ta yɛlɛ na oŋ de biŋ o nimitɔɔreŋ na, o da moɔ̃ la niŋe a erɛ yɛlɛ naŋ na vɛŋ ka o toɔ̃ ta a yɛlɛ. Yuomo yaga puoreŋ, o poɔ zaaŋ da pɛle saŋa na a bɛɛtil tomazie naŋ da toŋboɔloo ka o wa tonɔ toma beŋ na!

DECEMBER 11-17

BAABOLE POƆ YELNIMIZEERE | JOOB 25-27

“Teŋ Na Dire Yelmennoŋ Ba Wuli Ka Aseŋ Ka Te E Noba Naŋ Pɛgeyi”

it-1 1210 wɛl. 4

Yelmennoŋ

Gyoob. A waa ŋa Gyoosɛf kũũ puoreŋ a te ta Moosis saŋa na kpakyagaŋ la ka Gyoob da zeŋ a teŋgane ŋa zuŋ. A Baabole yeleeŋ ka o da eɛ “dɔɔ yelmeŋɛ soba [Heb., tam] naŋ maŋ erɛ yɛlɛ naŋ tori; o da zoree Naaŋmen kyɛ kyiire yelfaare.” (Joob 1:1; kanne GYOOB.) Saŋa na a malekere zaa naŋ da lantaa Naaŋmen nimitɔɔreŋ sazuŋ na, dama na Jehoova Naaŋmen ane Setaana naŋ da di na da vɛŋɛɛŋ aŋ pɛle ka, nensaalaa naŋ na dire yelmennoŋ korɔ Naaŋmen poɔ la yelnimizeere Setaana naŋ yeli kyaare Jehoova na. Setaana da yeleeŋ ka poteɛre faare la ka Gyoob de puoro neŋ Naaŋmen. O da boɔrɔŋ ka o wuli ka nɔmmo naane ka Gyoob de puoro neŋ Naaŋmen, kyɛ boma na oŋ nyɛrɛ yire Naaŋmen zie na zuŋ oŋ puoruu. Setaana da boɔrɔŋ ka o wuli ka Gyoob ba dire yelmennoŋ korɔ Naaŋmen. Jehoova da terɛɛ sori ka Setaana sãã Gyoob bontaree zaa a ko o biiri meŋ. Kyɛ, Setaana da ba toɔ̃ sãã Gyoob yelmennoŋ na. (Joob 1:6–2:3) A puoreŋ Setaana da lɛ yeleeŋ ka, ka Gyoob kɔŋ o biiri ane o bontaree, o na baŋ arɛɛ a noɔreŋ. Kyɛ, ka toɔrɔŋ wa Gyoob meŋɛ zuŋ, o koŋ toɔ̃ are a noɔreŋ. (Joob 2:4, 5) A puoreŋ, Setaana da de la baaloŋ faa kaŋa naŋ beɛrɛ yaga zaa eŋ Gyoob. Saŋa na a baaloŋ naŋ wa kpɛ o na, o pɔge da yelee yɛlɛ naŋ ba seŋ neŋ a ko Gyoob. Ka Gyoob zɔmenne naŋ da ba baŋ Naaŋmen bege ane o poboɔbo yɛlɛ gaa tɔɔre na da yeli yelfaare naŋ dɔɔnɔ suuri yaga a ko Gyoob. (Joob 2:6-13; 22:1, 5-11) Kyɛ Gyoob da naŋ nyɔgɛɛ o yelmennoŋ na kpeɛŋaa. Gyoob da yeleeŋ ka, “A te ta saŋa na maŋ na kpi, N koŋ bare N yelmennoŋ! N naŋ na nyɔgɛɛ N sontuubu, N daaŋ koŋ baroo zaa; N sukyiri koŋ korɔ ma sããnaa N zemmo poɔŋ.” (Joob 27:5, 6) Lɛ na Gyoob naŋ da nyɔge o yelmennoŋ kpeɛŋaa na wuleeŋ ka Setaana eɛ ziri-ŋmaara.

w19.02 3 wɛl. 3-5

Naŋ Nyɔge Ho Yelmennoŋ Na Kpeɛŋaa!

Ka ba naŋ yelka te dire yelmennoŋ korɔ Naaŋmen, wala ka lɛ wuli? A wuleeŋ ka aseŋ ka te nɔŋ Jehoova ane te sukyiri zaa, a kpimare Jehoova, a kyɛ lɛ puoro ona yoŋ. A lɛ wuleeŋ meŋ ka, aseŋ ka te maŋ de Jehoova yɛlɛ de weɛ te gbɛ-deree zaa poɔŋ. Hooŋ leɛteɛre a yɛlɛ ŋa soŋ a nyɛ. A yi a Baabole poɔŋ, a yelbiri “yelmennoŋ” na baŋ wulee bon naŋ paale, a seŋ neŋ, a e gbuli. Aŋa mannoo poɔŋ, a Izerayɛl biiri da maŋ de la dunni ire sarekare korɔ Jehoova. A Bege da wuleeŋ ka aseŋ ka ba maŋ de dunni naŋ seŋ neŋ a ire a sarekare. (Liiv. 22:21, 22) Ka duŋo kaŋaŋ bebe ka o gbɛre bonyeni kaŋa, kyɛbee o toori, kyɛbee ka o nimiriŋ ba kyebe, a ba seŋ ka ba de a duŋo iri sareka ko Jehoova. Ka a duŋo meŋ taa baaloŋ, a ba seŋ ka ba de o iri sareka koo. A da eɛ nimizeɛ yaga ka a duŋo baŋ na de iri sareka ko Jehoova na paale, a seŋ neŋ, a e gbuli meŋ. (Maal. 1:6-9) Sori bebeŋ ka Jehoova yelka ba maŋ de duŋo naŋ seŋ neŋ, a paale a iri neŋ sareka koo. Ka tenee menneŋ gaa ka te da bonkaŋa, aminekaŋaŋ tewɔnee, gane, kyɛbee tontoŋ bonkaŋa. Te koŋ boɔrɔ ka ba de kaŋa na naŋ popo vɔɛ, kyɛbee kaŋa na o kyɛlee naŋ ba kyebe ko te. Te maŋ boɔrɔŋ ka ba de bon naŋ paale, a seŋ neŋ, a e gbuli a ko te. Lɛ neŋ o zu la ka Jehoova boɔrɔ ka te meŋ nɔnoo, a kyɛ dire yelmennoŋ koroo. Aseŋ ka te nɔmmo na ane te yelmennoŋ na paale, a seŋ neŋ, a kyɛ e gbuli meŋ.

Azuŋ, lɛ wuleeŋ ka aseŋ ka te pɛgeyi sɛre kyɛ na toɔ̃ dire yelmennoŋ korɔ Naaŋmen bee? Ka hooŋ teɛre a yɛlɛ soŋ, te ba e noba naŋ seŋ neŋ, kyɛbee te eɛ noba naŋ maŋ ŋmeɛrɛ gbɛɛ yaga. A yɛlɛ ayi ŋa na toɔ̃ soŋ teŋ ka te nyɛ ka a ba seŋ ka te zoro dabeɛ̃. A dɛndɛŋ soba, Jehoova ba maŋ de o teɛroŋ zaa eŋ te gbɛ-ŋmɛ eŋɛŋ. A Baabole yeleeŋ ka: “Oo Jah, ka yelfaare la hoŋ da kaara, Oo Jehoova, nembuoŋ na toɔ̃ are?” (Yiem. 130:3) Jehoova baŋɛɛŋ ka te ba pɛgeyi, a e noba naŋ maŋ erɛ yɛlɛ naŋ ba seŋ neŋ meŋ. Azuŋ, o maŋ diree suuri korɔ te yaga zaa. (Yiem. 86:5) A yiiloŋ soba, Jehoova baŋɛɛ te zaa e ta zie. Azuŋ, o ba kaara soriŋ ka te erɛ yɛlɛ naŋ gaŋ te faŋa. (Kanne Yieme 103:12-14.) Sobuoŋ teŋ na baŋ e noba naŋ e gbuli, a seŋ neŋ, a paale Naaŋmen nimitɔɔreŋ?

Jehoova puorebiiri baŋɛɛŋ ka, ka banaŋ na toɔ̃ dire yelmennoŋ korɔ Jehoova, aseŋ ka ba nɔmoo. Nɔmmo te naŋ taa ko Naaŋmen, ane lɛ na te naŋ dire yelmennoŋ a korɔ te sazu Saa na seŋ ka o paale, a seŋ neŋ, a e gbuli meŋ. Ka teneeŋ taa a nɔmmo ŋa tɔ, a na toɔ̃ soŋ teŋ ka te nyɔge te yelmennoŋ na kpeɛŋaa saŋa na teŋ wa tuoro yelkpeɛne na. (1 Tun. 28:9; Mat. 22:37) Hooŋ leɛteɛre Jehoova Sieree Deme bata na teŋ manne ba yɛlɛ a piilee zie na. Bonso baŋ da e lɛ na baŋ e na? Te yɔɔpɔgebile na ba boɔrɔ ka o taa popeɛloŋ sakuuŋ bee? Te yɔɔdɔɔ naŋ e baapaalaa na boɔrɔŋ ka o te are noba denɔɛŋ ka ba iroo laara bee? A dɔɔ na naŋ e booree zudaana meŋ boɔrɔŋ ka o toma yi o nuureŋ bee? Ai, ba ba boɔrɔ lɛ. Kyɛ, ba baŋɛɛŋ ka Jehoova biŋee bege naŋ soma, azuŋ ba de la ba teɛroŋ zaa eŋ lɛ baŋ na toɔ̃ e a pɛle ba sazu Saa na poɔ. Nɔmmo na baŋ taa koo na la vɛŋ baŋ de o yɛlɛ de weɛ ba gbɛ-deree zaa poɔŋ. Ba de la ba yel-eree a wuli ka ba diree yelmennoŋ korɔ Jehoova.

Baabole Poɔ Yelsonne

w16.11 9 wɛl. 3

Ba Sɛgrɛɛ Naaŋmen Puorebiiri A Tuuro Lɛ Na A Baabole Naŋ Wuli Na

Naaŋmen bonmaalee vɛŋɛɛŋ teŋ baŋ ka o eɛ neɛ naŋ maŋ sɛgre o boma velaa zaa, ka neɛ kyebe a na baŋ de o meŋɛ manne ne o. A Baabole yeleeŋ ka, “Jehoova de la yɛŋ a maale a teŋgane biŋ o binzieŋ. O de la bammo naŋ e zuluŋ maale a sazu biŋ soŋ zaa.” (Yeng. 3:19) Yɛlɛ na teŋ baŋ a kyaare Jehoova na eɛ ‘o soe bammo piilee; O yɛlɛ fẽẽ lɛ la ka nensaaleba woŋ.’ (Joob 26:14) Yɛlɛ fẽẽ na teŋ baŋ a kyaare ŋmarbie naŋ gyeerɛ a ŋmenaa ane ŋmarbie naŋ be a saluoni, ane ŋmarbi sugu sugu na vɛŋɛɛŋ teŋ wa baŋ ka, Naaŋmen maalɛɛ a boma ŋa kaŋa zaa a ko kaŋa zaa meŋ arezie ane sori naŋ seŋ ka a maŋ tu. (Yiem. 8:3, 4) Ŋmarbie turituri la maŋ wa lantaa a e ŋmarbi sugu. Kyɛ ŋmarbi sugu gyamaa la be a saluoni poɔŋ, kyɛ kaŋa zaa taaɛ sori ane zie naŋ seŋ ka o maŋ tu. Ka hooŋ kaa a ŋmarbie na Jehoova naŋ maale aŋ gyeerɛ a ŋmenaa na, kaŋa zaa taaɛ sori oŋ maŋ tu a kyɛnɛ, aŋa lɛ na lɔɛ naŋ maŋ ta traffic a are a tuuro a traffic bege na! Lɛ na Jehoova naŋ sɛgre boma soŋ zaa a saluoni poɔŋ na vɛŋɛɛŋ teŋ baŋ ka o “de la yɛŋ maale a saluoni” ane a teŋgane. Aseŋ ka te dire yelmennoŋ a koroo, a pugiroo, a kyɛ puoruu meŋ.—Yiem. 136:1, 5-9.

DECEMBER 18-24

BAABOLE POƆ YELNIMIZEERE | JOOB 28-29

“Ho Taaɛ Yosoŋ Aŋa Gyoob Bee?”

w02 5/15 22 wɛl. 19

Wulo Nimimaaroŋ Korɔ Noba Naŋ Be Awonaa Poɔŋ

A Baabole poɔ yɛlɛ te naŋ zanne ŋa vɛŋɛɛŋ teŋ baŋ ka, a eɛ nimizeɛ yaga zaa ka te wulo nimimaaroŋ a korɔ noba naŋ be awonaa poɔŋ a koŋ baŋ e yelzaa soŋ ba menne na. Aboraham da boɔrɔŋ ka o dɔge-tutaa tɔnne a gɛrɛ, azuŋ o da sɔrɛɛ sommo yi Bɛtuwɛl zie. Gyekɔb da boɔrɔŋ ka ba de o kɔbɔ a yi neŋ Igyipiti a gaaneŋ Keenan, azuŋ, o da yelko la Gyoosɛf ka o e lɛ koo. Neomi meŋ da boɔrɛɛ yaaŋaa, azuŋ, o da yelko la Ruut ka o somoo a dɔge yaaŋaa koo. Aboraham, Gyekɔb, ane Neomi da koŋ toɔ̃ e yelzaa a soŋ ba menne a yi yɛlɛ na poɔŋ baŋ da be na. Zenɛ ŋa meŋ, aseŋ ka te maŋ wulo nimimaaroŋ a korɔ noba naŋ be awonaa poɔŋ. (Yeng Yelibie 19:17) Aseŋ ka te tɔglɔ a booree zudaana Gyoob, o da ‘maŋ deɛ la nandaana naŋ kono boɔrɔ sommo, a deɛ bikpeebɛ ane neɛ naŋ ba taa neɛzaa naŋ na soŋ ba meŋ.’ O da maŋ sonnɛɛ neɛ “naŋ waana ka o wɛ.” Gyoob da maŋ lɛ vɛmeŋ ka ‘ko-pɔge taa popeɛloŋ.’ O da lɛ waa ŋa ‘nimie a ko zɔŋa ane gbɛɛ a ko gbɛree.’—Joob 29:12-15.

it-1 655 wɛl. 10

Bonsuurii

Ka hooŋ kaa a Baabole poɔŋ, saŋa kaŋa o maŋ de la bonsuurii are ko yɛlɛ mine. Aŋa mannoo poɔŋ, ka hooŋ boɔrɔ ka ho baŋ yelsɛgraa kaŋa poɔŋ neɛ naŋ be, kyɛbee yelsɛgraa kaŋa o naŋ are o puoreŋ, ka hooŋ kaa o bonsuurii ho na baŋeŋ. Lɛ neŋ o zu la, saŋa kaŋa, a Baabole maŋ de la bonsuurii a de wuli te arezie ane yɛlɛ na poɔŋ te naŋ be. Aŋa lɛ na Yezu naŋ da de kultaa bonsuurii a toŋ neŋ toma o yelmannaa na poɔŋ na. (Mt 22:11, 12; kanne ZUTARAA; NƆƆTEƐ.) A yi Yel-iriwulaa 16:14, 15, te Daana Yezu Krista da kpãã teŋ ka te kaara te menne velaa a ta wa gbire siiloŋ poɔŋ. Ka lɛ naane, ba na eɛrɛɛ ŋmaaroŋ na naŋ wuli ka te eɛ a yelmeŋɛ Naaŋmen puorebiiri na. “Naaŋmen a Kpeɛ̃o Zaa Daana zɔɔre bebi-kpoŋ na” peɛlɛɛŋ, azuŋ a koŋ soma ka te kaŋa zaa gbire siiloŋ poɔŋ.

w09 2/1 15 wɛl. 3-4

Boŋ Ka Yuori Na Baŋ Are Ko?

Saŋa na baŋ wa dɔge te na te dɔgreba la maŋ kaa iri yuori ko te. Te menne ba taa a kpeɛ̃o te dɔgebo saŋa ka te iri yuori ko te menne. Kyɛ, saŋa na teŋ wa baara na, te yel-eree la na wuli ka te na taaɛ yosoŋ bee te koŋ taa yosoŋ. (Yeng Yelibie 20:11) Azuŋ, ho na baŋ soorɛɛ ho meŋɛ ka: ‘Ka Yezu kyɛbee a bitontoneeŋ taa apoɔsori ka ba kaa iri yuori kaŋa ko ma, bo yuori la baŋ na de ko ma? Bo yuori naŋ wuli gyogo na maŋ taa ane yosoŋ na maŋ taa la baŋ na de ko ma?’

Aseŋ ka te teɛre a soorebiri ŋa yɛlɛ nimizeɛ̃. Ananso la wala? Naa Soolomoŋ da sɛgɛɛŋ ka, “Yosoŋ la aŋ seŋ ka ho kaa iri, a ba seŋ ka ho kaa iri bondaaŋ boma yaga.” (Yeng Yelibie 22:1) Ka teneeŋ e noba naŋ taa yosoŋ te gbandige na poɔŋ, a eɛ yɛlɛ naŋ na baŋ soŋ te yaga zaa. Kyɛ a yelnimizeɛ meŋɛ la ŋa, ka teneeŋ taa yosoŋ Naaŋmen nimitɔɔreŋ, te na nyɛɛ maaloo naŋ na bebe tegitegilɛ. Sobuoŋ? Naaŋmen eŋɛɛ noɔre ka, o na sɛgɛɛ noba na zaa naŋ zoroo na yoe eŋ “o teɛroo gane na poɔ.” Noba na yoe naŋ be a gane ŋa poɔŋ taaɛ teɛretɔ ka ba na nyɛɛ nyɔvore naŋ ba taa baaraa.—Maalakai 3:16; Yel-iriwulaa 3:5; 20:12-15.

Baabole Poɔ Yelsonne

g00 7/8 11 wɛl. 3

Maŋ Morɔ Laare—A Na Toɔ̃ Soŋ Boŋ!

Ka teneeŋ maŋ morɔ laare a sereŋ eɛ yɛlɛ naŋ na toɔ̃ soŋ te bee? Tɔɔ, ho daaŋ teɛrɛɛ saŋa kaŋa neɛ kaŋa naŋ leɛ kaabo a more laare ka lɛ vɛŋ hoŋ nyɛ pɛnnoo ane popeɛloŋ kaŋa bee? Kyɛbee neɛ kaŋa daaŋ sãã la o niŋe eŋ bo ka lɛ vɛŋ ka ho pulaa teɛrɛ kyɛbee hoŋ teɛre ka o ba nɔŋ ho yɛlɛ bee? Ɛɛ, yelmeŋɛ la, ka teneeŋ morɔ laare a na baŋ soŋ teŋ yaga zaa. Ka teneeŋ maŋ erɛ lɛ a na baŋ soŋɛɛ te menne ane noba na teŋ morɔ a laare tɔglɔ na. Gyoob da yeleeŋ a kyaare o dɔndɔnne na ka: “Ka maaŋ wa more laare tɔgle ba, a na eɛ kpeɛŋaa ka ba sage lɛ di; lɛ na N niŋesogɔ naŋ kyaane na na dii la ba sukyie.” (Joob 29:24) Lɛ na Gyoob niŋesogɔ naŋ “kyaane” na wulee popeɛloŋ ane emmaaroŋ na oŋ da taa.

DECEMBER 25-31

BAABOLE POƆ YELNIMIZEERE | JOOB 30-31

“Lɛ Gyoob Naŋ Da E A Toɔ̃ E Forifori”

w10 4/15 21 wɛl. 8

Iri Ho Nimie Yi Yelfoglo Eŋɛŋ!

A nimie vɔlaa ane a eŋgannoŋ vɔlaa na toɔ̃ kpɛɛ yelmeŋɛ Kristabiiri meŋ. Azuŋ ka Naaŋmen Yelbiri na eŋnɛ te faŋa ka, te baŋ te menne taabo a kyaare bon teŋ de te nimie kaara a kyɛ boɔrɔ eŋɛŋ. (1 Kor. 9:25, 27; kanne 1 Gyɔɔn 2:15-17.) A nemmeŋɛ Gyoob da eɛ neɛ kaŋa naŋ baŋ ka bon neɛ naŋ de o nimiri a kaara maŋ toɔ̃ vɛmeŋ oŋ taa vɔlaa a ko a yelbalaa. Azuŋ o da yelka: “N biŋee nɔlaŋ neŋ N nimie. Azuŋ, bonso aŋ seŋ ka N kaa pɔgsaraa naŋ ba baŋ dɔɔ sori naŋ ba seŋ neŋ poɔŋ?” (Joob 31:1) Gyoob da yelka o koŋ de o nu siine pɔge zaala zaa sori naŋ ba seŋ neŋ poɔŋ, kyɛ lɛ yoŋ naane, o da eɛ siri ka o koŋ vɛŋ ka a lɛ yɛlɛ na gba kpɛ o sukyiri poɔ. Yezu meŋ da wulee lɛ a naŋ e nimizeɛ ka te iri teɛroŋ faare yi te teɛroŋ poɔŋ saŋa na o naŋ yelka: “Kyɛ N yele korɔ yɛŋ, neɛzaa naŋ kaara pɔge lɛɛŋ a te taa peɛ̃mo vɔlaa koo saaŋɛɛ kultaa ne a pɔge o sukyiriŋ.”—Mat. 5:28.

w08 9/1 11 wɛl. 4

Maŋ Teɛre “A Baaraa Yɛlɛ Nyɛ”

Sɛre hoŋ na de gbɛre e a yɛlɛ na, aseŋ ka ho soore ho meŋɛ ka, ‘Yenee ka a sori ŋa taa ma gɛrɛ neŋ?’ Ka hooŋ maŋ mãã ho meŋɛ a teɛre “yɛlɛ naŋ na baŋ yi” ho gbɛ-deree na poɔŋ wa, a na toɔ̃ soŋ boŋ ka ho tage ho meŋɛ yi yɛlɛ naŋ na baŋ de toɔrɔ yaga waneŋ ho zuŋ. Noba naŋ zagre ka ba maŋ teɛre a yɛlɛ ŋa gaa tɔɔre, a kyɛ boɔrɔ ka ba erɛ yɛlɛ na baŋ boɔrɔ na, a baaraa zaa ba maŋ nyɛ la AIDS baaloŋ ane gaŋneŋ taa baaloŋ. Ba mine meŋ maŋ taaɛ poɔ a yi saŋa na baŋ ba boɔrɔ poɔ taabo, ka lɛ vɛŋ ka ba mine maŋ iri a poɔ bare. Ba mine neŋ ba taaba niiloŋ maŋ sããmeŋ, a e noba naŋ taa zoma naŋ dɔɔnɔ ba yaga zaa meŋ. A baaraa zaa, bo yɛlɛŋ na yi ba peɛ̃mo toma na poɔŋ a pɔge ba? Bitontona Pɔɔl da yeleeŋ ka, ba “koŋ kpɛ a Naaŋmen naaloŋ poɔ.”—1 Korinti 6:9, 10.

w10 11/15 5-6 wɛl. 15-16

Baapaalba—Yɛ Vɛŋ Ka Naaŋmen Yelbiri Na Wulo Yɛ Sori

Ho teɛre ka bo saŋa meŋɛ la aŋ na baŋ e kpeɛŋaa ko bo ka ho maŋ dire yelmennoŋ korɔ Naaŋmen? Saŋa na hoŋ wa be ho taaba poɔŋ kyɛbee saŋa na hoŋ wa e ho yoŋ? Tɔɔ, ka hooŋ wa be sakuuŋ kyɛbee tomazieŋ, ho maŋ toɔ̃ teɛrɛɛ yɛlɛ velaa. A maŋ eɛ mɔlɔ ka ho tage ho meŋɛ yi yelzaa naŋ na baŋ sãã ho neŋ Jehoova niiloŋ na. Kyɛ ka hooŋ wa e ho yoŋ a zeŋ pɛnnɛ, a saŋa ka pigrinyɛ na baŋ wa ka ho e yɛlɛ mine naŋ na sãã Naaŋmen bege na o biŋ na.

Bonso aŋ e nimizeɛ ka ho naŋ erɛ yɛlɛ Jehoova naŋ boɔrɔ saŋa na hoŋ wa e ho yoŋ? Teɛre a yɛlɛ ŋa soŋ: Ho yel-eree na baŋ vɛmeŋ ka Jehoova poɔ pɛle, kyɛbee ka o poɔ sãã. (Mun. 6:5, 6; Yeng. 27:11) Jehoova “taaɛ ho yɛlɛŋ,” lɛ zuŋ ka ho yel-eree na toɔ̃ vɛŋ ka o poɔ sãã bee a pɛle. (1 Pit. 5:7) Jehoova boɔrɔŋ ka ho sagra o nɔɛ, bonso o baŋɛɛŋ ka lɛ yoŋ na toɔ̃ soŋ bo. (Aiz. 48:17, 18) Saŋa na a takoreŋ saŋa Izerayɛl biiri mine naŋ da zagre Jehoova kawane na, a da beɛrɛɛ Jehoova yaga zaa. (Yiem. 78:40, 41) Kyɛ, Jehoova da taaɛ nɔmmo naŋ e zuluŋ yaga a ko daŋyele Daaniel. Jehoova maleke da yelka Daaniel eɛ ‘dɔɔ ba naŋ boɔrɔ o yɛlɛ yaga zaa.’ (Daan. 10:11) Ananso la wala? Ananso la ka, Daaniel da maŋ diree yelmennoŋ korɔ Naaŋmen saŋa na o be noba poɔŋ, ka o naŋ wa e o yoŋ meŋ, o da naŋ maŋ diree yelmennoŋ korɔ Naaŋmen.—Kanne Daaniel 6:10.

Baabole Poɔ Yelsonne

w05 11/15 11 wɛl. 3

Lɛ Hoŋ Na Toɔ̃ Yi Nɔmmo Poɔŋ A Kyɛllɛ Wono Ho Taaba Yɛlɛ

Gyoob da yelee yɛlɛ naŋ ta ŋa yelyaga pie ko o zɔmenne na. Kyɛ, Gyoob da yeleeŋ ka: “Oo aŋa neɛ kaŋa da naaŋ kyɛlle woŋ N yɛlɛ!” (Joob 31:35) Bonso ka Gyoob da yeli lɛ? Ananso la ka, o zɔmenne na da ba mãã ba menne a na kyɛlle woŋ Gyoob yɛlɛ na, ka lɛ vɛŋ ka ba toɔ̃ baŋ lɛ yɛlɛ naŋ dɔɔnoo aseŋ. Ba da ba taa Gyoob yɛlɛŋ, ba da ba boɔrɔ ka ba lɛ baŋ lɛ a yɛlɛ naŋ beɛrɛ Gyoob aseŋ. Gyoob zɔmenne na da ba de ba menne eŋ Gyoob gbɛbɔgriŋ a na baŋ lɛ a yɛlɛ naŋ dɔɔnoo aseŋ. Kyɛ, bitontona Piita ko teŋ kawane ka: “Yɛ zaa yɛ taa teɛroŋ yeni, a sonnɔ banaŋ naŋ be tuo poɔ, a nɔnɔ taa, a taa nimibaaloŋ ne taa ane sigrimennoŋ.” (1 Piita 3:8) Wala teŋ na baŋ e a de wuli ka te taaɛ te yɔɔmine yɛlɛŋ? Sori na kaŋa teŋ na baŋ tu kyɛ e lɛ la, te na maŋ de te menne eŋ ba gbɛbɔgriŋ a baŋ lɛ na yɛlɛ naŋ dɔɔnɔ ba seŋ, a kyɛ lɛ wuli ka te taaɛ yɛlɛ muni wommu meŋ a ko ba. Te na baŋ de la kɔkɔbaaloŋ a yelka, “oo a yɛlɛ ŋa dɔɔnɛɛ suuri yaga zaa.” Kyɛbee ka te yelka, “o da ba baŋ a yɛlɛ pare te baare kyɛ yeli lɛ.” Ka teneeŋ yeli lɛ a na wuliŋ ka te taaɛ o soba yɛlɛŋ. Ka o sobaŋ wa manne yɛlɛ naŋ dɔɔnoo na ko te, te na baŋ leɛ de la te menne yelbie a leɛ manne a yɛlɛ ko o soba ka o woŋ. Lɛ na wuliŋ ka te baŋɛɛ lɛ a yɛlɛ naŋ ferɛ o soba aseŋ. Aseŋ ka te maŋ yi nɔmmo poɔŋ a kyɛllɛ wono ba yɛlɛ na velaa zaa. Kyɛ lɛ yoŋ naane, aseŋ ka te maŋ mɔɔrɔ ka te baŋ lɛ a yɛlɛ naŋ fɛrɛ ba a kyɛ dɔɔnɔ ba meŋ aseŋ.