Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

© 2024 Watch Tower Bible and Tract Society of Pennsylvania

JANUARY 6-12

BAABOLE POƆ YELNIMIZEERE YIEME 127-134

Bidɔgreba​—Yɛ Moɔ̃ Niŋe A Kaara Yɛ Biiri Zu Velaa

w21.08 5 wɛl. 9

De Arezie Na Ho Naŋ Taa Jehoova Booree Poɔŋ Na Nanee Yaga Zaa

⁹ Jehoova ko la nensaaleba apoɔsori ka ba dɔgrɔ biiri. O lɛ ko baŋ ferebo toma ka ba wuli a biiri ka ba wa nɔmoo, a lɛ puoroo meŋ. Bidɔgreba, yɛ taaɛ kyɔɔtaa kaŋa naŋ e o yoŋ. Yɛ de la a kyɔɔtaa ŋa tegroŋ yaga zaa bee? Jehoova ko la a malekere maaloo yaga, kyɛ o ba ko ba apoɔsori ka ba dɔgrɔ biiri. Azuŋ, bidɔgreba seŋ ka ba de apoɔsori na baŋ taa ka ba guoli ba biiri na tegroŋ yaga zaa. Jehoova de la toŋ tegroŋ naŋ e forifori eŋ bidɔgreba nuuriŋ. A toma la ka ba “guoli ba [biiri] Jehoova dɛnnoo ane o kawane poɔŋ.” (Efe. 6:4; Dut. 6:5-7; Yiem. 127:3) Naaŋmen lantaapuoruu na maŋ kaa la a Baabole poɔŋ a maale gama, vidiori, yiele, ane intanɛt zu yɛlɛ naŋ na toɔ̃ soŋ bidɔgreba ka ba guoli ba biiri soŋ zaa. A pɛlɛɛŋ ka te sazu Saa na neŋ o Bidɔɔ na de la baapaalba naŋ be te poɔŋ na tegroŋ yaga zaa. (Luk. 18:15-17) Ka bidɔgrebaŋ wa moɔ ba moɔbo zaa a kaara ba biiri naŋ e nanee na zu velaa, Jehoova poɔ maŋ pɛleŋ yaga. A wuluu ŋa a bidɔgreba naŋ de korɔ ba biiri na na toɔ̃ soŋ baŋ ka ba wa poɔ Jehoova booree na poɔŋ tegitegilɛ.

w19.12 27 wɛl. 20

Bidɔgreba​​—Yɛ Guoli Yɛ Biiri Na Ka Ba Nɔnɔ Jehoova

²⁰ Maŋ teɛrɛ yɛlɛ gɛrɛ tɔɔre. Yieme 127 de la biiri manne neŋ tam-piime. (Kanne Yieme 127:4.) Noba maŋ toɔ̃ de la boma tɛɛtɛɛ maale neŋ tam-piime. Ba maŋ toɔ̃ maalɛɛ a tam-piime mine aŋ e bɛrɛ ka a mine meŋ e bilii. Lɛ neŋ o zu la, ho biiri na kaŋa zaa eɛ o yoŋ a yi o taaba na poɔŋ. Azuŋ, bidɔgreba seŋ ka ba maŋ zeŋ a teɛre yɛlɛ gaa tɔɔre, a toɔ̃ baŋ sori na baŋ na toɔ̃ tu a guoli a bie kaŋa zaa. Zenɛ ŋa, kultaa deme mine naŋ be Izerayɛl paaloŋ poɔŋ toɔ̃ guolee ba biiri bayi baŋ puoro Jehoova yelmennoŋ poɔŋ. Ba wulee bon naŋ soŋ ba baŋ toɔ̃ e lɛ. Ŋaaŋ baŋ yeli: “Te neŋ a biiri kaŋa zaa yoŋ da maŋ zannɛɛ a Baabole.” Tɔɔ, a be la bidɔgreba kaŋa zaa zieŋ ka o teɛre yɛlɛ gaa tɔɔre a nyɛ, ka lɛ aŋ seŋ ka ba meŋ e a toɔ̃ guoli ba biiri soŋ, kyɛbee ka aseŋ ka ba tu so-yuo kaŋa.

Baabole Poɔ Yelsonne

it-1 543

Teere Yoe Ba Naŋ Boɔle A Baabole Poɔŋ

A yieloŋ yiele kaŋa da de la ɔɔlif teɛ manne neŋ yelnimizeere mine saŋa na oŋ da eŋ noɔre ko noba naŋ zoro Jehoova na. O da yeleeŋ ka: ‘Ho biiri na waa ŋa ɔɔlif teere naŋ ŋmaa gyili ho bondirii di-zieŋ.’ (Ym 128:1-3) Noba maŋ toɔ̃ de la ɔɔlif teɛ wɔmɔ bore aŋ buli leɛ te-paala. Ba mine meŋ maŋ ŋmaa la a teɛ nu te sɛle oŋ leɛ te-paalaa. Ka ɔɔlif teɛ̃ wa kore, o maŋ toɔ̃ vɛŋeŋ ka boŋ yuo buli yi o nyagaŋ. A soe ŋa poɔŋ baŋ maŋ tu a sɛle ɔɔlif te-paala. Aŋa lɛ na ɔɔlif te-paala naŋ maŋ buli yi ɔɔlif teɛ nyagaŋ na, lɛ meŋ la ka biiri maŋ ŋmaa gyili ba saa, a maŋ lɛ erɛ yɛlɛ naŋ na vɛŋ ka a booree deme taa popeɛloŋ.

JANUARY 13-19

BAABOLE POƆ YELNIMIZEERE YIEME 135-137

‘Te Daana Na Eɛ Kpoŋ Gaŋ Ŋmema Zaa’

it-2 661 wɛl. 4-5

Kpeɛ̃o, Toŋseɛlɛ

Sori na Naaŋmen naŋ maŋ tu a de boma na oŋ maale na tonɔ neŋ toma eɛ o yoŋ. Jehoova la a yelmeŋɛ Naaŋmen. Azuŋ, aseŋ ka o wuli ka o taaɛ kpeɛ̃o boma na zaa oŋ maale na zuŋ. Lɛ eebo maŋ vɛŋeŋ ka o yuori na e o yoŋ a yi a ŋmema zaa poɔŋ. (Ym 135:5, 6) A ŋmenaa, kyuu, planɛtere, ane a ŋmarbie maŋ tuuree sori na Jehoova naŋ maale ko a ka a tuuro na. A teŋɛzu saluoni, aŋa boma naŋ maŋ vɛŋ ka saseɛ fuuro, ane boma naŋ maŋ vɛŋ ka saa wa, ane a yɛlɛ ama taa maŋ tuuree bege na Jehoova naŋ nare biŋ ko a na. Sɛleŋsobo ane nuuli meŋ maŋ toɔ̃ ɛgeŋ a gaa zitɔba aŋa lɛ na Jehoova naŋ maalaa ka a erɛ na. Kyɛ, ka nobaŋ wa iri zɔɔrɔ neŋ Jehoova, kyɛbee a tu zirii puoruu eŋɛŋ a dɛgrɛ o yuori na, a boma ama teŋ manne a yɛlɛ na koŋ baŋ e yɛlɛ naŋ na vɛŋ ka Jehoova yuori na pɛgeyi.

Jehoova Naaŋmen maalɛɛ boma naŋ be a teŋɛzuŋ ka a maŋ tonɔ toma wagre na oŋ nare biŋ ko a na. Kyɛ, Jehoova Naaŋmen na baŋ tu la soseɛlee kaŋa poɔŋ a vɛŋ ka a boma ŋa wa kyɛbee a toŋ toma ka wagre na oŋ nare biŋ ko a naŋ ba ta, kyɛbee ka a wagreŋ pare gba. Jehoova maŋ eɛ lɛ a vɛŋ ka o poboɔbo nyɛ eebo, a kyɛ lɛ de wuli ka o na la a yelmeŋɛ Naaŋmen. Yelmeŋɛ la, te zaa baŋɛɛŋ ka ware, saa ane a saluoni yɛlɛ ba e yelseɛlee zaa ko te. Kyɛ, saŋa kaŋa Jehoova na baŋ daŋyeliŋ ka saa na miŋ kyɛbee ware na areŋ, ka lɛ neŋ o zu nyɛ eebo. Lɛ maŋ vɛŋeŋ aŋ pɛle ka Jehoova taaɛ kpeɛ̃o a boma ŋa zuŋ. (De manne neŋ 1Nm 17:1; 18:1, 2, 41-45.) Saŋa kaŋa meŋ a yɛlɛ ŋa maŋ nyɛɛ eebo sori kaŋa naŋ e seɛlee yaga zaa poɔŋ. Aminekaŋaŋ, lɛ na a yɛlɛ naŋ maŋ wa yaga zaa, kyɛbee a e kpeɛŋaakpeɛŋaa na maŋ eɛ seɛlee yaga. (Yi 9:24) Saŋa kaŋa meŋ noba ba maŋ kaara soriŋ ka a yɛlɛ e kyɛ aŋ nyɛ eebo, a mine meŋ maŋ tu la sori kaŋa nensaaleba naŋ daaŋ ba woŋ zaa poɔŋ a kyɛ e. A mine meŋ, a wagre maŋ pareŋ sɛre kyɛ aŋ nyɛrɛ eebo.​—Yi 34:10; 1Sa 12:16-18.

w21.11 6 wɛl. 16

Bo Maaloo Hoŋ Na Baŋ Nyɛ Yi Jehoova Yelmeŋɛ Nɔmmo Na Poɔŋ?

¹⁶ Te taaɛ gomeŋɛ bonso Jehoova la te Zo-lirizie. Kyɛ, saŋa kaŋa te enne zaaŋ maŋ kyoɔre aŋ e kpeɛŋaa ko te ka te iri are gba. Ka teneeŋ wa be a yɛlɛ ŋa poɔŋ, bo ka Jehoova na e ko te? (Kanne Yieme 136:23.) Sori kaŋa poɔŋ na, o na de la o nuuri nyɔge te, a soŋ te ka te iri are te gbɛɛ zuŋ bɔin. (Yiem. 28:9; 94:18) Maaloo teŋ na nyɛ: Te baŋɛɛŋ ka wagre zaa Naaŋmen maŋ eɛ siri ka o soŋ te, azuŋ a vɛŋɛɛŋ teŋ nyɛ maaloo soe ayi mine poɔŋ. A dɛndɛŋ soba, zie zaa te naŋ be a teŋɛzuŋ kyɛ te taaɛ zo-lirizie. A yiiloŋ soba, te sazu Saa na kaarɛɛ te zu velaa zaa.

Baabole Poɔ Yelsonne

w22.10 15 wɛl. 12

‘Noba Naŋ Dire Yelmennoŋ Korɔ Jehoova Na Taa La Popeɛloŋ Yaga’

¹² Jehoova wuleeŋ ka o taaɛ kpeɛ̃o a “teŋɛzu wederebɛ” zuŋ. Yɛ vɛŋ ka te de yɛlɛ ata mine wuli a muni. Igyipiti naa Faaro da vɛŋɛɛŋ ka Jehoova puorebiiri leɛ gbaŋgbaare a tonɔ koroo. O da zagrɛɛŋ ka o bare ba ka ba gaa. Kyɛ, Jehoova da faa la o puorebiiri na yi Faaro nuuriŋ, a kyɛ vɛŋ ka Faaro nyu koɔ̃ kpi a Maŋzeɛ poɔŋ. (Yiib. 14:26-28; Yiem. 136:15) Baabilɔŋ naa Bɛlesaazɛ da maalɛɛ tigi-kpoŋ, a da lɛ ‘duori o meŋɛ sazu Daana na eŋɛŋ.’ O da zagrɛɛŋ ka o pugiro Jehoova, kyɛ o da ‘pugee ŋmema baŋ de ware neŋ salema’ maale neŋ. (Daan. 5:22, 23) Naaŋmen da sigree a dɔɔ ŋa naŋ erɛ taŋkaŋyɛlɛ na. ‘Ana zisoɔree na,’ ba da ko la Bɛlesaazɛ a kyɛ de o naaloŋ na ko a Miidiya neŋ a Pɛɛsiya noba. (Daan. 5:28, 30, 31) Palɛsitaŋ naa Hɛrɔde Ageripa a dɛndɛŋ soba da vɛŋɛɛŋ baŋ ko bitontona Gyimisi. A puoriŋ, o da nyɔgɛɛ bitontona Piita eŋ nempɔgedieŋ. O da boɔrɔŋ ka o ko bitontona Piita meŋ. Kyɛ, Jehoova da ba koo sori oŋ e yɛlɛ na oŋ boɔrɔ ka o e na. Bonso ‘Jehoova maleke deɛ da ŋmɛ la a Hɛrɔde lɔɔ,’ oŋ kpi.​—Tom. 12:1-5, 21-23.

JANUARY 20-26

BAABOLE POƆ YELNIMIZEERE YIEME 138-139

Ta Wa Vɛnɛ Ka Dabeɛ̃ Pigre Bo Sori

w19.01 10 wɛl. 10

De Puubu Korɔ Jehoova A Lantaapuoruu Poɔŋ

¹⁰ Dabeɛ̃ maŋ erɛ boŋ ka ho teɛ̃ ho nu a iri yɛlɛ noɔre bee? Ka lɛ wa la, a ba e ho yoŋ. Ho baŋɛɛ yelkaŋa? Dabeɛ̃ maŋ kpɛɛ te zaa saŋa na teŋ wa ire yɛlɛ noɔre na. Ka hooŋ baŋ bon na naŋ maŋ vɛŋ hoŋ zoro dabeɛ̃ ka ho teɛ̃ ho nu a iri yɛlɛ noɔre, a na soŋ boŋ ka ho zɔɔtoɔ̃ a yɛlɛ ŋa. Ho maŋ zoree dabeɛ̃ ka ho na innee yɛlɛ na hoŋ waana ka ho yeli na bee? Kyɛbee ho maŋ zoree dabeɛ̃ ka ho na yelee yɛlɛ naŋ ba tori? Ho maŋ teɛreŋ ka ho noɔre iribo na koŋ soma seŋ ho taaba toɔre na bee? Ka hooŋ taa a dabeɛ̃ ŋa ho eŋɛŋ, a wuleeŋ ka ho taaɛ gyog-soŋ kaŋa. A wuleeŋ ka ho taaɛ sigrimennoŋ gyogo. Lɛ zuŋ hoŋ maŋ de ho taaba ka ba seɛ boŋ. A gyogo ŋa eɛ tegroŋ yaga Jehoova nimitɔɔreŋ. (Yiem. 138:6; Fil. 2:3) Jehoova boɔrɔŋ ka ho maŋ pugiroo, a kyɛ lɛ eŋnɛ ho yɔɔmine faŋa a lammore zieŋ. (1 Tɛs. 5:11) Jehoova nɔnɔ boŋ, o boɔrɔŋ ka o ko bo nyaa ka ho toɔ̃ de iri neŋ yɛlɛ noɔre.

w23.04 21 wɛl. 7

Yɛ Maŋ Eŋnɛ Taa Faŋa A Lantaapuoruu Lammore Saŋa

⁷ Ho na baŋ nyɛɛ yɛlɛ mine naŋ na baŋ soŋ bo a yi A Kaakaara Ziduoruu gama na mine poɔŋ. Aŋa mannoo poɔŋ, maŋ nare ho meŋɛ soŋ. (Yeng. 21:5) Ka hooŋ baŋ a zannoo poɔ yɛlɛ soŋ, a na eɛ mɔlɔ ko bo ka ho zɛge ho nu a iri soorebie nɔɛ. Maŋ vɛŋ ka ho noɔre iribo meŋ e ŋmaaŋmaa. (Yeng. 15:23; 17:27) Ka hooŋ iri soorebiri noɔre naŋ e ŋmaaŋmaa, dabeɛ̃ koŋ kpɛ bo yaga. Ka hooŋ e lɛ, a na eɛ mɔlɔ ko ho yɔɔmine ka ba baŋ a tɛgɛ soŋ gaŋ hoŋ na yel yɛlɛ yaga. Ka hooŋ de ho meŋɛ yelbie iri soorebiri noɔre, a na wuliŋ ka ho narɛɛ ho meŋɛ soŋ a baŋ a zannoo meŋ poɔ yɛlɛ soŋ.

Baabole Poɔ Yelsonne

w97 12/1 19 wɛl. 15

‘Yɛ Naŋ Kyɛnɛ Vɛnɛ Korɔ Taa Zaala Zaala’

¹⁵ Te de ka neɛ kaŋa e boŋ yelkaŋa naŋ kpɛ bo yaga zaa, kyɛ o soba ba sage ka o e boŋ yelfaa, o soba ba e kaŋdabaŋkalɛ kyɛbee a sɔre vɛŋkuubu meŋ, wala aŋ seŋ ka ho e? (Yeng Yelibie 28:13) A Baabole vɛŋɛɛŋ aŋ pɛle ka, noba naŋ ko ba sukyie a erɛ yelfaare a kyɛ ba erɛ kaŋdabaŋkalɛ koŋ nyɛ Jehoova sudi. (Hiburu 6:4-6; 10:26, 27) Ka te meŋ? Insight on the Scriptures yeleeŋ ka: “Ka neɛ kaŋaŋ wa baŋ perɛ a de potuoloŋ erɛ o taaba nimikuonii, o soba maŋ wa leɛ la Naaŋmen dɔndɔma. Azuŋ, a ba e ferebo ka noba na oŋ erɛ lɛ na di suuri koo.” (Volume 1, gampɛlɛ 862) Ka Kristabieŋ wa tuore daŋkyagre naŋ ba seŋ neŋ fẽẽ zaa, kyɛbee nimikuonii, bee potu-yɛlɛ naŋ ba soma a yi neɛ kaŋa naŋ ba e kaŋdabaŋkalɛ zieŋ, a ba seŋ ka neɛ kaŋa fere a Kristabie ka o di suuri ko a potuo soba.​—Yieme 139:21, 22.

JANUARY 27–FEBRUARY 2

BAABOLE POƆ YELNIMIZEERE YIEME 140-143

Ka Hooŋ Wa Puore Sɔre Jehoova Ka O Soŋ Bo, Kyɛ Hooŋ Naŋ Moɔrɔ Ho Moɔbo Zaa

w22.02 12 wɛl. 13-14

“Wono Yɛmbanneba Yelyaga”

¹³ Maŋ de kawane ka a eɛ sori Naaŋmen naŋ maŋ tu a wulo te nɔmmo. Jehoova boɔrɔŋ ka yɛlɛ maŋ kyɛnɛ soŋ korɔ te wagre zaa. (Yeng. 4:20-22) Saŋa kaŋa, Jehoova maŋ tu la o Yelbiri eŋɛŋ, a gama na baŋ maŋ kaa a Baabole poɔŋ a maale na eŋɛŋ, kyɛbee te Kristabitɔ kaŋa naŋ kyile zie a de kawane ko te. A yɛlɛ ŋa eɛ sori kaŋa oŋ maŋ tu a wulo te ka o nɔŋ teŋ. Hiburu 12:9, 10 yeleeŋ ka “te maaloo zuŋ” oŋ maŋ e lɛ.

¹⁴ De ho teɛroŋ eŋ a kawane eŋɛŋ, ta de ho teɛroŋ eŋ sori na baŋ tu a ko bo a kawane na. Saŋa mine, te na maŋ teɛreŋ ka sori na baŋ tu a ko te a kawane na ba soma fẽẽ zaa. Yelmeŋɛ la, ka teneeŋ waana ka te ko noba kawane, aseŋ ka te maŋ moɔ a tu sori naŋ seŋ neŋ poɔŋ a tere a kawane. Lɛ na vɛŋeŋ ka a e mɔlɔ ko te yɔɔmine ka ba sagede a kawane. (Gal. 6:1) Kyɛ, ka ba naŋ wa ko te kawane, aseŋ ka te maŋ moɔ a de te teɛroŋ eŋ a kawane eŋɛŋ, haali ka o sobaŋ tu sori naŋ ba seŋ neŋ poɔŋ a tere a kawane. Te na baŋ soorɛɛ te menne ka: ‘Yelmeŋɛ la, sori na o soba naŋ tu a tere a kawane na ba soma, kyɛ yelmeŋɛ fẽẽ kaŋa be la yɛlɛ na oŋ yeli na poɔŋ bee? Neɛ naŋ ko ma a kawane na ba pɛgeyi, kyɛ N na baŋ nyɛɛ tɔnɔ kaŋa yi o kawane na poɔŋ bee?’ Ka teneeŋ maŋ moɔrɔ ka te zanne yelkaŋa yi kawane na baŋ maŋ ko te na poɔŋ, a na soŋ teŋ yaga zaa.​—Yeng. 15:31.

w10 3/15 32 wɛl. 4

Naŋ Kyɛnɛ Taa ‘Sukyiri Naŋ E Forifori’ A Wagre Kpeɛne Ŋa Poɔŋ

Dɔgroŋ naŋ yire Naaŋmen dɔndɔnne zie, naŋ, ane baaloŋ faare eɛ yɛlɛ naŋ fɛrɛ Naaŋmen puorebiiri yaga. Saŋa kaŋa, a yelkpeɛne ŋa maŋ toɔ̃ vɛŋeŋ ka te sukyie sãã. Naa Deevid meŋɛ da tuoree a yɛlɛ ama taa. O da yeleeŋ ka: ‘Azuŋ, ka N faŋa zaa baare; ka N sukyiri sãã.’ (Yiem. 143:4) Boŋ da toɔ̃ somoo oŋ toɔ̃ are a yelkpeɛne noɔreŋ? Deevid da leɛteɛrɛɛ lɛ na Naaŋmen naŋ da soŋ O puorebiiri saŋa kaŋa naŋ pare na yɛlɛ, ane lɛ na Jehoova naŋ faa o yi a yɛlɛ ama taa poɔŋ. O da lɛ teɛrɛɛ yɛlɛ na Jehoova naŋ e saŋa kaŋa naŋ pare O yo-kpoŋ na zuŋ. Deevid da maŋ leɛteɛrɛɛ Naaŋmen bonmaalee yɛlɛ gaa tɔɔre. (Yiem. 143:5) Ka teneeŋ maŋ teɛrɛ yɛlɛ na Jehoova naŋ e ko te saŋa kaŋa naŋ pare, ane yɛlɛ na oŋ naŋ kyɛnɛ erɛ korɔ te, a na soŋ teŋ ka te toɔ̃ are te yelkpeɛne noɔreŋ.

w15 3/15 32 wɛl. 2

Yɛ Kulo Taa “A Daana Poɔŋ Yoŋ”​—Lɛ Na Toɔ̃ Nyɛɛ Eebo Zenɛ Bee?

A yieloŋ yiele Deevid da yeleeŋ ka: ‘Oo Jehoova, sage N puoro wieoŋ. N faŋa baarɛɛŋ. Ta de ho niŋesogɔ sɔgle ma.’ (Yiem. 143:5-7, 10) Aminekaŋaŋ, saŋa kaŋa ho meŋ maŋ teɛrɛɛ yɛlɛ aŋa a yieloŋ yiele Deevid. Ka lɛŋ wa e, a na somaŋ ka ho di kannyiri a kyɛnlɛ ka ho sazu Saa na wuli bo yɛlɛ o naŋ boɔrɔ. Ka hooŋ maŋ mãã ho meŋɛ a kanna o Yelbiri na, a maŋ teɛre yɛlɛ na hoŋ kanne na yɛlɛ gɛrɛ tɔɔre, a na soŋ boŋ ka ho toɔ̃ e lɛ. Ka hooŋ maŋ kanna a Baabole, ho na baŋɛɛ Naaŋmen bege, ane lɛ na oŋ da soŋ o puorebiiri saŋa kaŋa naŋ pare. Ka hooŋ maŋ kyɛllɛ o yɛlɛ, a na soŋ boŋ ka ho maŋ sagra o nɔɛ. Lɛ eebo na wuliŋ ka ho eɛ yɛmbaŋna.

Baabole Poɔ Yelsonne

it-2 1151

Zɛloŋ

Yɛlɛ Oŋ Are Ko. Zirii na neŋfaare naŋ maŋ ŋmaara a sããna noba yoe na baŋ vɛŋeŋ ka neɛ yo-soŋ sãã. Azuŋ, a Baabole maŋ de la yosããna yelyelii manne neŋ waabo zɛloŋ. (Ym 58:3, 4) A Baabole yeleeŋ a kyaare yosããneba ka: “Duŋkuuree zɛloŋ be la ba nɔgbamaŋ.” Duŋkuuree zɛloŋ maŋ be la o zele puoriŋ, ka o naŋ wa iri a zɛloŋ, a maŋ tu la o nyemɛ naŋ be o noɔre poɔ sazu na a yi. (Ym 140:3; Ur 3:13) Nensaalaa zele la maŋ somoo oŋ toɔ̃nɔ yele yɛlɛ. Azuŋ, ka neɛŋ wa sããna o taaba yoe, a zuuro ba poe, a wulo zirii wuluu, kyɛbee a yele yelfaare kyaara o taaba, te na baŋ yeliŋ ka o soba zele ‘paalɛɛŋ neŋ zɛloŋ naŋ waa tuo.’​—Gyi 3:8.

FEBRUARY 3-9

BAABOLE POƆ YELNIMIZEERE YIEME 144-146

‘Noba Na Naaŋmen Naŋ La Jehoova Taaɛ Popeɛloŋ!’

w18.04 32 wɛl. 3-4

Yɛlɛ Noba Naŋ Kanna Te Gama Naŋ Maŋ Soorɔ

2. A leɛroo vɛŋɛɛŋ ka yɛlɛ naŋ be a yieme gane poɔŋ tutaa velaa. A yi o wɛlbo 12 na, ba de la a yelbie “beŋ la” toŋ neŋ toma. Lɛ wuleeŋ ka maaloo naŋ be o wɛlbo 12 te ta 14 na eɛ maaloo sontuuribo naŋ na nyɛ. Aŋa lɛ na o wɛlbo 11 naŋ wuli na, a sontuuribo ŋa maŋ puore sɔrɛɛ Naaŋmen ka o ‘faa ba a deɛ ba’ yi neŋ neŋfaare nuuriŋ. A leɛroo ŋa meŋ be la o wɛlbo 15 na. Ba de la a yelbiri ‘popeɛloŋ’ toŋ neŋ toma soe ayi mine naŋ soma yaga zaa poɔŋ. Ka hooŋ kaa a sɛgre soŋ, ho na nyɛŋ ka ‘noba na Naaŋmen naŋ la Jehoova’ la na taa a popeɛloŋ na o wɛlbo 15 naŋ manna o yɛlɛ na. Aseŋ ka te leɛteɛre ka a takoreŋ saŋa Hiburu sɛgebie na baŋ de sɛge a yɛlɛ ŋa na, ba da ba maŋ sɛge tommie naŋ wulo ka o soba yelee a yɛlɛ baare, kyɛbee a sɛge boma naŋ wuli ka neɛ kaŋa noɔre yelbie la baŋ sɛgrɛ binne eŋ a sɛgre poɔŋ. Azuŋ, ka neɛŋ wa leɛrɛ a Hiburu sɛgre gɛrɛ neŋ kɔkɔyuo kaŋa, aseŋ ka o soba maŋ kaa a sɛgre zaa velaa, a moɔ a baŋ yɛlɛ a sɛgre naŋ boɔrɔ ka a wuli, sɛre kyɛ pãã baŋ zie aŋ seŋ ka o eŋ tommie naŋ wulo ka neɛ kaŋa yelee yelkaŋa baare, kyɛbee a wulo ka neɛ kaŋa noɔre yelbie la oŋ sɛgrɛ binne. Aseŋ ka o soba lɛ kaa lɛ na baŋ sɛge a yɛlɛ Hiburu kɔkɔre sekpɔgɔ poɔŋ, sɛre kyɛ na baŋ leɛre a yɛlɛ ka a tori.

3. A leɛroo vɛŋɛɛŋ ka a Baabole ziiri na naŋ manna maaloo na Naaŋmen naŋ na ko o yelmeŋɛ puorebiiri na tutaa velaa zaa. A Hiburu yelbiri asher na baŋ are ko la yɛlɛ yaga. Azuŋ, lɛ na baŋ leɛroo waneŋ a sɛgre ŋa poɔŋ na vɛŋɛɛŋ ka a muni pɛle. Deevid da taaɛ teɛretɔ ka, ka Naaŋmeneŋ wa faa a Izerayɛl noba yi ba dɔndɔnne nuuriŋ baare, O na ko baŋ popeɛloŋ neŋ bondaaŋ boma yaga. (Liiv. 26:9, 10; Dut. 7:13; Yiem. 128:1-6) Aŋa mannoo poɔŋ, Duturoonomi 28:4 yeleeŋ ka: ‘Ho biiri na nyɛɛ maaloo, ka ho teŋgane boma ane ho dun-bɛrɛ meŋ nyɛ maaloo. Ho nii neŋ ho dun-bilii na nyɛɛ maaloo yaga.’ Yelmeŋɛ zaa, saŋa na Deevid bidɔɔ Soolomoŋ naŋ da dire naaŋ a kaara a Izerayɛl paaloŋ na, ba da taaɛ emmaaroŋ neŋ bondaaŋ boma yaga. Kyɛ lɛ yoŋ naane, yɛlɛ na naŋ da e Soolomoŋ naaloŋ diibu poɔŋ na na nyɛɛ eebo yaga zaa a Mɛzaaya naaloŋ diibu saŋa.​—1 Nam. 4:20, 21; Yiem. 72:1-20.

w22.10 28 wɛl. 16-17

Naŋ Kyɛnɛ Vɛŋ Ka Ho Kristaaloŋ Teɛretɔ Na Maaleŋ E Kpeɛŋaa

¹⁶ Te nyɔvore naŋ ba taa baaraa teɛretɔ na eɛ kyɔɔtaa naŋ e tegroŋ yaga a yi Naaŋmen zie. Te zaa taaɛ teɛretɔ ka te na nyɛɛ maaloo yaga nendaare kaŋa. Te baŋɛɛŋ meŋ ka Naaŋmen noɔre emmo na sereŋ na nyɛɛ eebo. A teɛretɔ ŋa eɛ bon naŋ nyɔge te taa, a maŋ soŋ te teŋ are yelkpeɛne, dɔgroŋ ane kũũ noɔreŋ neŋ kannyiri. A teɛretɔ ŋa lɛ waa ŋa kpogli a ko te, bonso o maŋ soŋ teŋ teŋ iri teɛroŋ faare yi te teɛroŋ poɔŋ, a lɛ eŋ te faŋa teŋ zagre yelfaare bare a kyɛ kpimare yelsonne. A teɛretɔ na a Baabole naŋ korɔ te na maŋ vɛŋeŋ teŋ tage peɛle Naaŋmen yaga, a lɛ vɛŋ teŋ baŋ ka Naaŋmen taaɛ nɔmmo naŋ e zuluŋ ko te. Ka teneeŋ vɛŋ ka te teɛretɔ na maaleŋ e kpeɛŋaa yaga zaa, a na soŋ teŋ yaga.

¹⁷ Bitontona Pɔɔl da sɛgɛɛ lɛta naŋ eŋnɛ faŋa te ko a Urom Kristabiiri. O da yelko baŋ ka, “Yɛ kyellɛ ne teɛretɔroo.” (Uro. 12:12) Pɔɔl da kyellɛŋ bonso o da baŋɛɛŋ ka ka o naŋ puore Jehoova te ta a baaraa, o na nyɛɛ nyɔvore naŋ ba taa baaraa sazuŋ. Te meŋ na baŋ kyellɛŋ bonso te na baŋ taaɛ sagediibu ka, Jehoova na paalɛɛ o nɔ-ennee zaa. A yieloŋ yiele da sɛgɛɛŋ ka, ‘Neɛ naŋ taa Gyekɔb Naaŋmen na oŋ e o sonnɔ taaɛ popeɛloŋ. Neɛ naŋ taa teɛretɔ Jehoova o Naaŋmen eŋɛŋ la lɛ. . . . Onaŋ e yelmeŋɛ soba a gɛrɛ wagre zaa na.’​—Yiem. 146:5, 6.

w18.01 26 wɛl. 19-20

Nɔmmo Buo Soba La Maŋ Waneŋ Popeɛloŋ Meŋɛmeŋɛ?

¹⁹ Yuomo turaayoɔbo la ŋa ka nensaaleba dire dɔgɛɛ. Kyɛ a koŋ kɔɔre, Setaana donɛɛ ŋa baaroo na taŋ. Noba naŋ be a donɛɛ ŋa poɔŋ kpoŋ zie zaa nɔŋɛɛ ba menne, libie, ane nimipɛle yɛlɛ yaga zaa te gaali. Ba eɛ noba naŋ maŋ pagra ka ba nu kpɛ bonzaa ba naŋ nyɛ. Ba maŋ lɛ de la ba menne poboɔbo yɛlɛ de weɛ kyɛ ka yelzaa tuuro. A noba ŋa taa daaŋ koŋ baŋ taa popeɛloŋ meŋɛmeŋɛ. A yieloŋ yiele da sɛgɛɛŋ ka: ‘Neɛ naŋ taa Gyekɔb Naaŋmen na oŋ e o sonnɔ taaɛ popeɛloŋ. Neɛ naŋ taa teɛretɔ Jehoova o Naaŋmen eŋɛŋ la lɛ.’​—Yiem. 146:5.

²⁰ Jehoova puorebiiri tɔglɛɛ Naaŋmen a wulo taa nɔmmo. Azuŋ, noba yaga waanɛɛ Jehoova puoroo poɔŋ yuoni zaa. A yɛlɛ ŋa eɛ sieree naŋ wulo ka Naaŋmen Naaloŋ na piili diree naaŋ. A koŋ kɔɔre a Naaloŋ na de la maaloo naŋ koŋ baŋ manne wa ko noba na zaa naŋ be a teŋɛzuŋ. Ka teneeŋ boɔrɔ ka te taa popeɛloŋ meŋɛmeŋɛ, aseŋ ka te erɛ yɛlɛ Naaŋmen naŋ boɔrɔ. Noba naŋ nɔŋ Jehoova na taaɛ popeɛloŋ tegitegilɛ! A yi a zannoo naŋ tɔnne na poɔŋ, te na zannɛɛ gyogri neɛ naŋ maŋ taa saŋa na oŋ nɔŋ o meŋɛ te gaali. Te na de la a gyogri ŋa manne neŋ gyogri na Jehoova puorebiiri naŋ taa na.

Baabole Poɔ Yelsonne

it-1 111 wɛl. 9

Dunni

A Baabole ko teŋ noɔre ka te maŋ kaara dunni zu velaa, a ta eraa potu-yɛlɛ. Jehoova meŋɛ yeleeŋ ka Ona la kaara a dunni zu, a maŋ lɛ koraa bondirii meŋ. (Ye 12:10; Ym 145:15, 16) A Moosis Bege da wuleeŋ ka aseŋ ka noba maŋ kaara die dunni zu velaa. Ka neɛŋ wa nyɛ die duŋo naŋ bɔre, aseŋ ka o soba nyɔgoo a leɛ te ko o daana. Ka tuobo na duŋo naŋ tuoŋ wa dii a duŋo biŋ teŋɛŋ, aseŋ ka ba iri a tuobu bare kyɛ ka a duŋo pɛnne. (Yi 23:4, 5) A da ba seŋ ka ba vɛŋ ka dunni toŋ toma lɛɛŋ aŋa a naŋ ba taa zĩĩ. (Du 22:10; 25:4) A Pɛnnoo Bebiri saŋa, dunni neŋ nensaaleba zaaŋ da maŋ pɛnne. (Yi 20:10; 23:12; Du 5:14) Ba da maŋ nyɔgɛɛ dunni naŋ perɛ noba a le, kyɛbee a ko a. (Mn 9:5; Yi 21:28, 29) A da ba seŋ ka ba vɛŋ ka dunni tɛɛtɛɛ naŋ ba yi taa lantaa a dɔge bilii.​—Lv 19:19.

FEBRUARY 10-16

BAABOLE POƆ YELNIMIZEERE YIEME 147-150

Te Taaɛ Ananso Yaga Ka Te Pugiro Jehoova

w17.07 18 wɛl. 5-6

Bonso Aŋ Seŋ Ka Te ‘Pugiro Jehoova’?

⁵ Jehoova da dii la a Izerayɛl paaloŋ noba zaa sukyie. O da lɛ dii la a Izerayɛl biiri yeni yeni zaa sukyiri. Lɛ ka Jehoova naŋ erɛ zenɛ ŋa. A yieloŋ yiele da sɛgɛɛŋ a kyaare Naaŋmen ka: ‘O maŋ tegɛɛ noba sukyie naŋ dɔɔnɔ ba yaga zaa, o maŋ le la ba felɛ.’ (Yiem. 147:3) Ɛɛ, Jehoova maŋ kaarɛɛ noba naŋ tuoro yelkpeɛne zu velaa. O maŋ kaara baŋ eŋgannoŋ poɔŋ, a maŋ lɛ diire ba sukyie meŋ. Zenɛ ŋa meŋ, Jehoova maŋ lonneŋ wieoŋ a dii te sukyie, a kyɛ tege felɛ naŋ be te sukyieŋ na. (Yiem. 34:18; Aiz. 57:15) Jehoova maŋ ko teŋ yɛŋ ane faŋa naŋ na baŋ soŋ te ka te are yelkpeɛne zaa teŋ na tuore noɔreŋ.​—Gyi. 1:5.

⁶ A yieloŋ yiele da leɛrɛɛ o teɛroŋ a gaa boma naŋ be sazuŋ. O da yeleeŋ ka Jehoova ‘maŋ sɔrɛɛ a ŋmarbie noɔre,’ o maŋ lɛ ‘boɔlɛɛ kaŋa zaa neŋ o yuori.’ (Yiem. 147:4) Bonso ka a yieloŋ yiele leɛ piili manna boma naŋ be sazuŋ na yɛlɛ? Teɛre a yɛlɛ ŋa soŋ: A yieloŋ yiele da maŋ nyɛɛ ŋmarbie naŋ be sazuŋ, kyɛ o da ba baŋ lɛ na a ŋmarbie naŋ e yaga seŋ. Saŋa na yuomo naŋ nyɛrɛ nimitɔɔre gaabo na, noba maaleŋ nyɛrɛɛ ŋmarbie naŋ e gyamaa yaga zaa. Noba mine teɛrɛɛŋ ka, a Milky Way ŋmarbi-sugu na yoŋ poɔŋ, ŋmarbie naŋ ta ŋa turiturituri la bebe. A waa ŋa ŋmarbi-sugre naŋ pare turiturituri la be a aŋdonɛɛ zaa poɔŋ. Nensaaleba yɛŋ zieŋ, a ŋmarbie ba taa noɔre. Kyɛ, Neɛ naŋ maale boma zaa na baŋɛɛ a kaŋa zaa yuori. Lɛ wuleeŋ ka Jehoova baŋɛɛ a ŋmarbiri kaŋa zaa bonyeŋ bonyeŋ yɛlɛ. Naaŋmen baŋɛɛ zie zaa a ŋmarebiri kaŋa zaa naŋ be wagre zaa. (1 Kor. 15:41) Ka nensaaleba naŋ be a teŋɛzuŋ meŋ? A yɛlɛ ŋa wuleeŋ ka te na baŋ taaɛ sagediibu ka Jehoova baŋɛɛ te yeni yeni zaa yɛlɛ. Jehoova baŋɛɛ zie te kaŋa zaa naŋ be, yɛlɛ naŋ dɔɔnɔ te, ane yɛlɛ na oŋ na baŋ de soŋ te wagre zaa.

w17.07 18 wɛl. 7

Bonso Aŋ Seŋ Ka Te ‘Pugiro Jehoova’?

⁷ Jehoova boɔrɛɛ ho yɛlɛ. Kyɛ lɛ yoŋ naane, o taaɛ nyonono ko bo, o boɔrɔŋ ka o de o kpeɛ̃o na meŋ soŋ bo ka ho toɔ̃ are ho yelkpeɛne zaa noɔreŋ. (Kanne Yieme 147:5.) Aminekaŋaŋ, ho na teɛreŋ ka yelkpeɛne na hoŋ tuoro na eɛ kpeɛŋaa yaga zaa, ka a tuobu meŋ e tegroŋ yaga. Naaŋmen baŋɛɛ ho e ta zie, ‘o baŋɛɛŋ ka tɛne la te.’ (Yiem. 103:14) Te kaŋa zaa ba pɛgeyi, azuŋ te maŋ ŋmeɛrɛɛ gbɛɛ yaga zaa te zemmo poɔŋ. Gbɛɛ yaga, te maŋ yelee yɛlɛ naŋ ba soma neŋ te zele. A eŋgane vɔlfaare meŋ maŋ daara teŋ ka te erɛ yɛlɛ naŋ ba soma. Saŋa kaŋa meŋ te sukyiri maŋ boɔrɔŋ ka te erɛ te taaba nyuuri. Jehoova ba taa a gbɛ-ŋmɛ ama taa, kyɛ o maŋ de la o meŋɛ eŋ te gbɛbɔgriŋ a baŋ lɛ na a yɛlɛ ama naŋ e kpeɛŋaa ko te ka te are a noɔreŋ.​—Aiz. 40:28.

w17.07 21 wɛl. 18

Bonso Aŋ Seŋ Ka Te ‘Pugiro Jehoova’?

¹⁸ A yieloŋ yiele da baŋɛɛŋ ka a takoreŋ saŋa Izerayɛl biiri na nyɛɛ maaloo yaga zaa yi Naaŋmen zie. Ba na la noba na Naaŋmen naŋ da de o “yelbiri” ane “o yeltuurii ane o wuluu” ko. (Kanne Yieme 147:19, 20.) Zenɛ ŋa meŋ, tenee yoŋ la noba na Naaŋmen yuori naŋ dɔgle te zuŋ. Nyɛ maaloo naŋ seŋ lɛ. Te baŋɛɛ Jehoova, a de o Yelbiri na meŋ tonɔ neŋ toma te zemmo poɔŋ, azuŋ te neŋ Jehoova taaɛ niiloŋ naŋ e kpeɛŋaa. Ho ba nyɛ ka te taaɛ ananso yaga ka te tɔglɔ a yieloŋ yiele naŋ sɛge Yieme 147 na a meŋ ‘pugiro Jehoova,’ a kyɛ lɛ eŋnɛ te taaba meŋ faŋa ka ba erɛ lɛ neŋ o zu bee?

Baabole Poɔ Yelsonne

w23.03 17 wɛl. 6

Ka Hooŋ Kaara Jehoova Bonmaalee Ho Na Baŋ Zannɛɛ Yɛlɛ Yaga A Kyaaroo

⁶ Yɛlɛ zaa Jehoova naŋ boɔrɔ ka a nyɛ eebo, o maŋ sɛgrɛɛ wagre ana yɛlɛ na kaŋa zaa naŋ na nyɛ eebo. Yuoni zaa a yi February ane May kyuure na kpakyagaŋ, a Izerayɛl biiri da maŋ nyɛɛ nuuli mine ba naŋ boɔlɔ zuŋyaaree bee kulyaaree aŋ ɛgrɛ gɛrɛ samun-gɔɔ seŋ. Naaŋmen da yelko la a Izerayɛl biiri ka, ‘Haali zuŋyaaree bee kulyaaree naŋ be sagbaniŋ baŋɛɛ o wagrebinii.’ (Jer. 8:7) Aŋa lɛ Jehoova naŋ sɛgre wagre biŋ a ko a nuuli ŋa, aŋ maŋ baŋ wagre na a naŋ seŋ ka a yi zie na a naŋ be a ɛge gaa zi-zaala na, lɛ meŋ la ka Jehoova sɛgre wagre biŋ oŋ na de di sɛrɛɛ zaa. Azuŋ zenɛ ŋa meŋ, ka saŋa kaŋaŋ wa ta ka te nyɛ nuuli naŋ ɛgrɛ yire zie a naŋ be a gɛrɛ zi-zaala, a na baŋ soŋ teŋ ka te sagedi ka Jehoova meŋ sɛgrɛɛ wagre biŋ oŋ na de a donfaa ŋa wane o baaraa.​—Hab. 2:3.

FEBRUARY 17-23

BAABOLE POƆ YELNIMIZEERE YENG YELIBIE 1

Baapaalba​—Nembuo Yɛlɛ Yɛŋ Na Kyɛllɛ?

w17.11 29 wɛl. 16-17

Yɛ Ta Tere Sori Ka Bonzaa Vɛŋ Ka Yɛ Kɔŋ A Kyɔɔtaa

¹⁶ Ho eɛ baapaalaa a teɛre ka ho dɔgreba yɛlɛ eɛ kpeɛŋaa, kyɛbee ba ba baŋ yɛlɛ na poɔŋ hoŋ be bee? Ka ho eŋɛŋ kyoɔre ka ho bale, a na baŋ vɛŋeŋ ka ho piili teɛrɛ ka Jehoova puoruu ba noma fẽẽ zaa. Kyɛ, ka hooŋ vɛŋ ka ho eŋɛ kyoɔre ka ho bare Jehoova puoruu, ho na wa nyɛŋ ka neɛzaa kyebe a nɔnɔ ho yɛlɛ aŋa ho dɔgreba naŋ puoro Jehoova ane a lantaapuoruu noba.

¹⁷ Te de ka ho dɔgreba vɛŋɛɛŋ hoŋ erɛ yelzaa hoŋ boɔrɔ, a daŋ ba de dɛnnoo meŋ ko bo zaa, ho na baŋ yeliŋ ka ba nɔŋ bo bee? (Hib. 12:8) Kyɛbee sori na ho dɔgreba naŋ maŋ tu a de dɛnnoo ko bo na la maŋ vɛŋ ka ho suuri iri? Ka lɛ wa la, maŋ moɔrɔ ka ho baŋ bon nanso baŋ maŋ tu ana sori na poɔŋ a korɔ bo dɛnnoo. Ta wa derɛ ho teɛroŋ eŋnɛ sori na baŋ maŋ tu a de a dɛnnoo korɔ bo na eŋɛŋ yaga zaa te gaali. Azuŋ mãã ho meŋɛ. Kaara soŋ a ta wa vɛnɛ ka ho suuri wa ire yaga zaa te gaali neŋ dɛnnoo na baŋ de korɔ bo na. Naaŋmen Yelbiri na yelka: “Neɛ naŋ baŋ yɛlɛ maŋ nyɔgrɛɛ o yelyaga. Neɛ naŋ taa nimiyuo eɛ neɛ naŋ e bɔin.” (Yeng. 17:27) Moɔrɔ ka ho wa leɛ neɛ naŋ na maŋ mãã ho meŋɛ a de dɛnnoo zaa ba naŋ korɔ bo tonɔ neŋ toma. Lɛ na wuliŋ ka ho eɛ neɛ naŋ kyile. Lɛ eebo meŋ na toɔ̃ soŋ boŋ ka ho maŋ nyɛ tɔnɔ yi a dɛnnoo poɔŋ, kyɛ ho koŋ maŋ de ho teɛroŋ zaa eŋ sori na baŋ tu a de a dɛnnoo ko bo na eŋɛŋ. (Yeng. 1:8) A eɛ maaloo yaga zaa ka ho taa dɔgreba naŋ puoro Jehoova. Ho dɔgreba boɔrɔŋ ka ba soŋ bo ka ho nu kpɛ a nyɔvore naŋ ba taa baaraa kyɔɔtaa na.

w05 2/15 19-20 wɛl. 11-12

Go Ho Kristabiiloŋ Ŋmaaroŋ Na

¹¹ Moɔrɔ ka ho pɛlɛ Naaŋmen poɔ, ta pɛlɛ nensaaleba poɔ. Te zaa maŋ boɔrɔŋ ka te gaa te poɔ noba mine eŋɛŋ ka te ne ba laŋ erɛ yɛlɛ. Te zaa boɔrɛɛ zɔmenne naŋ na maŋ vɛŋ ka te taa popeɛloŋ. Saŋa na teŋ wa leɛ baapaalba ka te yuomo nyɛrɛ nimitɔɔre gaabo na, a maŋ eɛ mɔlɔ ka te taaba bɛnlɛ te ka te erɛ te yɛlɛ aŋa lɛ na baŋ erɛ na. Kyɛ, saŋa kaŋa te zɔmenne ane te taaba ba maŋ taa poteɛre-sonne kyaare te. Saŋa kaŋa ba maŋ boɔrɛɛ noba naŋ na soŋ ba ka ba erɛ yelfaare. (Yeng Yelibie 1:11-19) Ka Kristabieŋ wa tere sori ka o taaba feroo ka o erɛ yɛlɛ naŋ ba soma, gbɛɛ yaga o maŋ boɔrɔŋ ka o de lɛ na oŋ waa meŋɛmeŋɛ sɔgle. (Yieme 26:4) Bitontona Pɔɔl kpãã teŋ ka: “Yɛ ta tɔglɔ a donɛɛ noba naŋ ŋmaa gyeere yɛ na gyogri.” (Urom 12:2, The Jerusalem Bible) Jehoova na ko teŋ a faŋa ka te toɔ̃ are ferebo na zaa te taaba naŋ ferɛ te ka te e yɛlɛ naŋ ba soma na noɔreŋ.​—Hiburu 13:6.

¹² Ka te taabaŋ wa ferɛ te ka te e yɛlɛ naŋ na sãã te Kristabiiloŋ ŋmaaroŋ na, a na somaŋ ka te leɛteɛre ka teŋ na dire yelmennoŋ korɔ Naaŋmen la yɛlɛ naŋ e tegroŋ yaga zaa a gaŋ teɛroŋ na noba naŋ taa, kyɛbee yɛlɛ na noba naŋ erɛ. Te na baŋ zannɛɛ yelnimizeɛ kaŋa a yi yɛlɛ naŋ be Yiibu 23:2. Be yeleeŋ ka: ‘Ta wa tuuro gyamaa te tonɔ faaloŋ.’ A da wa ta la saŋa kaŋa ka a Izerayɛl biiri mine da bonnɔ ka Jehoova koŋ paale nɔɛ na Oŋ eŋ na, kyɛ Kalɛb yɛŋ da zagrɛɛŋ ka o tu a gyamaa ŋa puori. O da sagedieŋ peɛlaaŋ ka Naaŋmen na paalɛɛ nɔɛ na zaa oŋ eŋ na. Naaŋmen da ko oŋ maaloo yaga o sagediibu na zuŋ. (Soribu 13:30; Joosua 14:6-11) Ka nobaŋ wa ferɛ bo ka ho tu yɛlɛ mine noba yaga naŋ erɛ, ho meŋ na yi la ho poɔ zaa are kpeɛŋaa a ta wa erɛ yelzaa naŋ na sãã ho neŋ Jehoova niiloŋ na bee?

Baabole Poɔ Yelsonne

it-1 846

Dambol

A Baabole poɔŋ a yelbiri “dambol” ba wulo neɛ zu naŋ ba tonɔ oŋ erɛ yɛlɛ naŋ ba seŋ neŋ. Kyɛ, a yelbiri “dambol” wulee neɛ naŋ nyɛ sieree zaa naŋ wuli ka sontuubu bege na Naaŋmen naŋ biŋ na somaŋ, a kyɛ yi o poɔ zaa a zagre ka o de a bege tonɔ neŋ toma. A Hiburu yelbie mine naŋ wulo a yɛlɛ ŋa la, kesilʹ (‘zɔle soba’; Ye 1:22), ʼewilʹ (“dambol soba”; Ye 12:15), na·valʹ (‘zukpeɛne soba’; Ye 17:7), ane lets (“neɛ naŋ erɛ noba laara”; Ye 13:1). A Giriki yelbiri aʹphron wulee “neɛ naŋ ba teɛrɛ yɛlɛ gɛrɛ tɔɔre” (Lk 12:20), a·noʹe·tos meŋ wulee “zukpeɛne daana” (Ga 3:1), ka mo·rosʹ meŋ wulo ‘dambol’ kyɛbee “damboloŋ” (Mt 23:17; 25:2).

FEBRUARY 24–MARCH 2

BAABOLE POƆ YELNIMIZEERE YENG YELIBIE 2

Bonso Aŋ Seŋ Ka Ho Maŋ De Ho Sukyiri Zaa Eŋ Ho Meŋɛ Boma Zannoo Poɔŋ?

w22.08 18 wɛl. 16

“Kyɛnɛ . . . A Yelmeŋɛ Poɔ”

¹⁶ Te zaa naaneŋ nɔŋ ka te maŋ kanna a kyɛ zanna boma meŋ. Kyɛ, Jehoova eŋnɛ teŋ faŋa ka te moɔ̃ niŋe a ‘boɔrɔ’ ka te baŋ a Baabole poɔ yɛlɛ naŋ e zuluŋ muni soŋ zaa. (Kanne Yeng Yelibie 2:4-6.) Ka teneeŋ moɔrɔ a erɛ lɛ, te na maŋ nyɛrɛɛ tɔnɔ wagre zaa. Corey yeleeŋ a kyaare o meŋɛ Baabole kannoo ka o maŋ de la o teɛroŋ eŋ a wɛlbo yeni yeni kaŋa zaa poɔŋ. O yeleeŋ ka: “N maŋ kannɛɛ a muni zie yɛlɛ, ane a Baabole ziiri mine naŋ manna ana yɛlɛ na neŋ o zu, N maŋ lɛ peɛrɛɛ yɛlɛ meŋ gaa tɔɔre. . . . Lɛ eebo maŋ soŋ maŋ maŋ nyɛ tɔnɔ yaga zaa yi N Baabole kannoo na poɔŋ!” Ka teneeŋ maŋ tu ana sori na kyɛbee soyuo kaŋa a zanna boma, a somaŋ yaga zaa. Ka teneeŋ maŋ de wagre a moɔrɔ a zanna boma, a wuleeŋ ka te taaɛ nimipa naŋ e zuluŋ ko a yelmeŋɛ.​—Yiem. 1:1-3.

w22.10 19 wɛl. 3-4

Yɛŋ Kyeerɛŋ A Sobɛrɛ Zuŋ

³ Ka neɛŋ wa de bammo na oŋ taa na toŋ neŋ toma, a toɔ̃ de gbɛɛ naŋ soma, te na baŋ yeliŋ ka o soba eɛ yɛmbaŋna. Kyɛ, yɛŋ naŋ yi Naaŋmen zie ba baare beŋ. A Baabole yeleeŋ ka: ‘Jehoova zoobu la yɛŋ munpiilee. A Soba na naŋ e forifori yaga zaa na bammo la nimiyuo.’ (Yeng. 9:10) Azuŋ, ka teneeŋ wa ka te de gbɛɛ naŋ e nimizeɛ yaga zaa te zemmo poɔŋ, aseŋ ka te maŋ bɔ Jehoova teɛroŋ a kyaare a yɛlɛ sɛre kyɛ derɛ gbɛre. Jehoova teɛroŋ na la ‘a Soba na naŋ e forifori yaga zaa na bammo.’ Te na baŋ eɛ lɛ saŋa na teŋ maŋ kanna a Baabole ane a gama na baŋ maŋ kaa a Baabole poɔŋ a maale na. Lɛ eebo na wuliŋ ka te sereŋ taaɛ yɛŋ meŋɛmeŋɛ.​—Yeng. 2:5-7.

⁴ Jehoova yoŋ zie la teŋ na baŋ nyɛ yɛŋ meŋɛmeŋɛ a yi. (Uro. 16:27) Bonso teŋ yelka Jehoova zieŋ ka yɛŋ maŋ yi wa? A dɛndɛŋ soba, Jehoova bammo na ba taa baaroo zie, o baŋɛɛ o bonmaalee meŋ velaa zaa. (Yiem. 104:24) A ayi soba, Jehoova yel-eree zaa maŋ wulee o yɛŋ. (Uro. 11:33) A ata soba, noba na zaa naŋ maŋ de Jehoova kawane tonɔ neŋ toma maŋ nyɛɛ tɔnɔ yaga zaa. (Yeng. 2:10-12) Ka teneeŋ boɔrɔ ka te nyɛ yɛŋ meŋɛmeŋɛ, aseŋ ka te sage a Baabole poɔ wuluu, a tere sori ka a Baabole wulo te sori saŋa na teŋ derɛ gbɛre kyɛbee a boɔrɔ ka te e yelkaŋa na.

w16.09 23 wɛl. 2-3

Baapaalba, Yɛ Vɛŋ Ka Yɛ Sagediibu Maaleŋ E Kpeɛŋaa

² Ho eɛ baapaalaa kyɛbee neɛ kaŋa naŋ zanna Jehoova yɛlɛ bee? Noba ferɛ boŋ ka ho tuuro yɛlɛ na noba yaga naŋ sagedi bee? A yɛlɛ ŋa mine na baŋ eɛ sagediibu na noba naŋ taa ka boma mine la leɛre a menne lɛɛŋ ka nyɔvore wa bebe na. Noba naŋ taa a teɛroŋ ŋa maŋ yeliŋ ka Naaŋmen naaneŋ maale boma. A maŋ eɛ kpeɛŋaa ko bo ka ho zagre a yɛlɛ ama taa bare bee? Ka lɛ wa la, yɛlɛ mine bebeŋ a na baŋ soŋ bo ka ho sagediibu na maaleŋ e kpeɛŋaa yaga zaa. A dɛndɛŋ soba, maŋ de teɛroŋ na Naaŋmen naŋ ko bo na tonɔ neŋ toma soŋ. A teɛroŋ naŋ soma ŋa na “kaarɛɛ ho zu velaa.” A teɛroŋ naŋ soma ŋa na soŋ boŋ ka ho tage ho meŋɛ yi a teŋɛzu teɛroŋ naŋ na baŋ sãã ho sagediibu na eŋɛŋ.​—Kanne Yeng Yelibie 2:10-12.

³ Sagediibu meŋɛ maŋ arɛɛ yelmeŋɛ bammo naŋ kyaare Naaŋmen eŋɛŋ. (1 Tim. 2:4) Azuŋ, saŋa na hoŋ wa kanna Naaŋmen Yelbiri na ane te puoruu gama na, maŋ mãã ho meŋɛ a teɛre a yɛlɛ gaa tɔɔre. Maŋ teɛre yɛlɛ na hoŋ kanne na yɛlɛ gaa tɔɔre, a moɔrɔ ka ho baŋ a ‘muni soŋ.’ (Mat. 13:23) Yɛ vɛŋ ka te nyɛ yɛlɛ naŋ na baŋ soŋ bo ka sagediibu na hoŋ taa Naaŋmen neŋ a Baabole eŋɛŋ na maaleŋ e kpeɛŋaa. “Sieree naŋ bebe meŋɛmeŋɛ” wuleeŋ ka te na baŋ taaɛ sagediibu naŋ e kpeɛŋaa Naaŋmen neŋ a Baabole eŋɛŋ.​—Hib. 11:1.

Baabole Poɔ Yelsonne

bhs zuri 19 wɛl. 10

Naŋ Kyɛnɛ Tagra Peɛlɛ Jehoova

¹⁰ Boŋ soŋ bo hoŋ wa leɛ Jehoova zɔmeŋɛ? A tuuro a Baabole zannoo eŋɛŋ, ho wa baŋɛɛ Jehoova yaga zaa, ka lɛ vɛŋ ka ho ne o nyɔge zɔmennoŋ naŋ e kpeɛŋaa. Te na baŋ de la niiloŋ naŋ be ho neŋ Jehoova kpakyagaŋ na manne neŋ vũũ naŋ seŋ ka ho vɛŋ ka a maaleŋ dire yaga zaa. Ka neɛŋ mare vũũ, aseŋ ka o maŋ woro daare eŋnɛ a vũũ ka lɛ vɛŋ ka a vũũ ta kpi. Lɛ meŋ la, ka hooŋ moɔ̃ niŋe a zanna Jehoova yɛlɛ, a na soŋ boŋ ka ho ne o niiloŋ na maaleŋ e kpeɛŋaa.​—Yeng Yelibie 2:1-5.